Read NQAARIIT NE ROOG Haahate we 3 Bible Online

Haahate we 3 - NQAARIIT NE ROOG bible

Haahate we 3

¹Keeke ndefu qeet ke o Yaal oxe a xaƴna da ngen kam saax le, ndax ta ɗeetloorit a den Ii-isra’el we, fop we maad’eerna qire ke kam saax le Kanaan fop,

²yaam a bug soom suk ke no Ii-isra’el we a and soo a aqatoox xire, tan-tan boog we and’eeruuna yaaga:

³xa cegel axe no gelwaar ɓetuk we no Fiifilista we, Kaakanaan we fop, Siisidoŋ we fo Hiihiwi we ngenoogna no joong olaa Libaŋ, a xotit no joong olaa Baal-Hermon boo no ndokand naa Hamat.

⁴Ii-isra’el we a ƭeetloorit’e qeet keene boo and ndax xan a nanan kebil ke no Yaal oxe, ta dalnan’ina daan den, a reefandin na Moyiis.

⁵Neene, Ii-isra’el we a ngenooga a ndeer no Kaakanaan we, Heeheet we, Aa-amori we, Peeperisi we, Hiihiwi we fo Yeeyebus we.

⁶A mbaaƭtooga rew me no qeet keene, a ci’aa a den rew soo a mbaɗooxaa roog ke den.

⁷Ii-isra’el we a mbi’a kaa faaxeerna na kid no Yaal oxe Roog den, a mbeecit o Yaal oxe Roog den soo a mbaɗooxaa a Baaliin, Aserayiin.

⁸Fuux le no Yaal oxe a biltooxana Ii-isra’el we, soo ta ɓoxot a den na xa ƥay Kusan-Risatayim fee o maad Mesopotami, da ndagooxan boo xa kiid ɓetaa tadaq.

⁹Maaga, Ii-isra’el we a ƈufginooxa o Yaal oxe, soo ta sutan a den o baawat oxaa watna a den, ta ref Otni’el fee o ƥiy Kenaas fee o ndeɓ Kaleb.

¹⁰Yiif le no Yaal oxe a reeƭa fo ten, ta refat o kaahate no Ii-isra’el we soo ta xire’ik. O Yaal oxe a ɓoxota a Kusan-Risatayim fee o maad Mesopotami na xa ƥay um, soo ta xawin.

¹¹Saax le a reeƭata na jam boo xa kiid qarɓeen nahik. Cinj kaaga, Otni’el fee o ƥiy Kenaas a xona.

¹²Ii-isra’el we a mbi’ahina kaa faaxeerna na kid no Yaal oxe. Ten taxu o Yaal oxe a saƭkand a Eglon fee o maad Mowaab bo ta hupat Ii-isra’el we doole.

¹³Eglon a fokatoora fo Aa-amon we fo Aa-amalek we, a inooxan Ii-isra’el we, a xaw a den soo a jaɓ Teeru fee no keec ke.

¹⁴Ii-isra’el we a ndagooxooga a Eglon fee o maad Mowaab boo xa kiid xarɓaxay fo xa kiid ɓetaa tadaq.

¹⁵Maaga, Ii-isra’el we a ƈufginooxa o Yaal oxe, soo ta sutan a den o baawat, ta ref Ehud fee reeƭna a canoon, a ref o ƥiy Gera na carind ale Bensame. Ii-isra’el we a lulaan ta ɓisan a den a Eglon fee o maad Mowaab ɗang.

¹⁶Ehud a jalana a xoox um saamar faa fi’na o noonoong, a laqin kam tikoorik ke ten, ta garit no rak o ñamaak ole.

¹⁷A ɓoxota a Eglon fee o maad Mowaab ɗang le. Eglon koy, o koor o magnu a reeƭu.

¹⁸Ye Ehud a ɓoxotna ɗang le boo a ƴut, a welta wiin we ƥisiid’uuna.

¹⁹Yaa ta fadiidna na ƥil a sexe kaa paam Gilgal, a naaga temel a nomtoox, a lay ee: «Daali maad, jegaam yegnit naa waroonga o yegin na pet.» O maad oxe a laya yee: «Naangyo cel!» Maaga, waa ndeeƭna paam um fop a sutooxa.

²⁰Ehud a matiidaan, a soƥ ta moof na ndok-took a ƥuuɓu le ta kesan’eena ten doŋ, a layin ee: «Jegaam fa lay Roog faa waroonga o daawin.» O maad oxe a dalfooxa o inoox no gamb le ten.

²¹Ehud a woosta o ɓay um o janoon laƥ ne reeƭna no rak um o ñamaak, a dibin o maad oxe no fud.

²²Laƥ ne a roka boo fonq le sax a daɗ, soo neebam fee a muur laƥ ne, yaam Ehud woos’iran.

²³Ehud a sutoora xulanq faa, a cinj ye ta wegitna begax ke na ndok-took ale o jaafu.

²⁴Ye ta sutooxna, dag we a ƭeetiida soo a nga ee begax ke kaa njaafu’el, da lay ee: «Ga’na rek, o maad oxe kaa ret na xulanq fee na ndok a ƥuuɓu le.»

²⁵A cunga boo a nqij, ndaa wetee begax ke na ndok-took ale. A nqota o jaafu, a mbet begax ke soo a nga o yaal den a luuñaa a lanq, a xon.

²⁶Ye da kurkurnaa, Ehud a ƴufa, a ret boo a jol a ƥil a sexe kaa soo a daɗik Seyiira.

²⁷Yaa ta fadiidna rek, a dalfooxa o luuƥ kam o jegel olaa no joong olaa Efrayim ndax ta fokat Ii-isra’el we. Cinj kaaga, a adooxana a den, da mbudoortiid no joong olaa.

²⁸A laya a den ee: «Ndeefaamoo, yaam o Yaal oxe a ɓoxota a nuun Moomowaab we fañ nuun.» A ndeefaan, a njaɓit no Moomowaab we cootand ke Yordaan too nqaƴee o leng na den ta jootiid.

²⁹A koom, a nqawa no Moomowaab we ngap goor cuni xarɓaxay, poŋkil ke fop fo cambaar ke fop, too o leng na den daɗ’ee.

³⁰No ñaal naaga, Moomowaab we a ƥoxotooxa no Ii-isra’el we, too saax le a reeƭata na jam boo xa kiid qarɓeen ɓetuu tadik.

³¹Samgar fee o ƥiy Anat rondand’u a Ehud. A xawta Fiifilista teemeed ɓetuu fa leng o loq o xurir naak. Ten itam a wata Ii-isra’el we.