Read NQAARIIT NE ROOG Haahate we 4 Bible Online

Haahate we 4 - NQAARIIT NE ROOG bible

Haahate we 4

¹A cinj ye Ehud a xonna, Ii-isra’el we a mbi’ahina kaa faaxeerna na kid no Yaal oxe.

²O Yaal oxe a ɓoxota a den na xa ƥay Yabin fee o maad Kanaan maadooxoogna Hasoor. O aa-adax oxe no xiixire we ten reeƭu Siisera fee genoogna Haroset-Hagoyim.

³Ii-isra’el we a ƈufginooxa o Yaal oxe, yaam Yabin a jeg’a a sareet-xire celem teemeed ɓetuu nahik, too a toroxanda a den ƭomu boo xa kiid qarɓeen ƭik.

⁴No camaane kaaga, Debora fee o tuleer, reeƭna o tew Lapidot, hate’oogu kam Isra’el.

⁵Kaa mer’u o moofaa ɗuga ngeec naa xoyoogateena Ngeec ne Debora, reeƭna ndeer Rama fa Betel no joong olaa Efrayim. Ii-isra’el we a layoorkooga maa ten, ndax da ngate’el.

⁶Bes, Debora a xoyna a Barak fee o ƥiy Abinowam, genna Qedes no fiisel olaa Neftali, a layin ee: «Keeke refu ke o Yaal oxe Roog fee Isra’el a hebloonga: ‹Reti jil goor cuni xarɓaxay na carind ale Neftali fo na le Sabulon soo yoon fa den no joong olaa Taboor.

⁷Xam kooc farna fa wo, na ƈufnand alaa Qiison, a Siisera fee o aa-adax no xiixire we Yabin, a sareet-xire ke ten fo a yaj ake ten, too xam ɓoxotin na xa ƥay of.› »

⁸Barak a doonaan ee: «O yoonangaa fa mi xam ret, ndaa o yoonangee fa mi retkiim.»

⁹Debora a layaan ee: «Yaaga boog, xam yoon fa wo, ndaa koy xotitkiro o ndam o leng na ƭat of, yaam na xa ƥay no tew o Yaal oxe a ɓoxotkaa a Siisera.» Cinj kaaga, Debora a inooxa, a yoon fa Barak boo Qedes.

¹⁰Barak a fokata maaga a carind ale Sabulon fo ale Neftali. Goor cuni xarɓaxay a ndeefaan, soo Debora a yoon fo ten itam.

¹¹Heber, o Keekeni xe, kaa xaajoor’u fo Keekeni lakas we ndefna ndef xa taan Hobab fee o pog Moyiis, soo a sip ƭiif um no ngariñ naa Saananim refna paam Qedes.

¹²Siisera a yegne yee Barak fee o ƥiy Abinowam a ŋaaya no joong olaa Taboor.

¹³A fokata kam Haroset-Hagoyim a sareet-xire celem teemeed ɓetuu nahik ake ten fo a yaj no xiixire we ten fop, soo a sag fa den na ƈufnand alaa Qiison.

¹⁴Maaga, Debora a laya a Barak ee: «Inooxi, yaam xaye o Yaal oxe a ɓoxot a Siisera na xa ƥay of. Ndax kaa o Yaal oxe adooxanirang?» Barak a fudoortiida no joong olaa Taboor, goor cuni xarɓaxay a ndeefan.

¹⁵O Yaal oxe a firɓanda a Siisera, a sareet-xire ke ten fo a yaj ake ten fop mbaambir Barak. Siisera a fudooxa a sareet-xire le ten, a god o joor.

¹⁶Barak a daaba a sareet ake fo xiixire we boo Haroset-Hagoyim, too xiixire we Siisera fop a mbarte laƥ boo yoqatee o koor o leng.

¹⁷Siisera a reeƭa na kaat boo a haktik no ƭiif naa Ya’el fee o tew Heber, o Keekeni xe, yaam jam a jeg’a a ndeer Yabin fee o maad Hasoor fo mbind Heber, o Keekeni xe.

¹⁸Ya’el a xetooxiida a Siisera, a layin ee: «O yaal es, rokiidi! Rokiidi no mbind es, too ba o saɗar!» A roka no ƭiif naa ten, soo ta muurin, a ɗasnin.

¹⁹Siisera a layaan ee: «Ngela ci’aam o ndik foofi um yer, kaam hoɗomel!» O tew oxe a suqta mboxos naa yipna fo sis, a ci’in ta yer soo a muuratinin.

²⁰Siisera a layahinaan ee: «Geenooxi no ndokand ne no ƭiif ne, too oxuu garna a laamtong ee: ‹Ndax o kiin rokiidee mene?›, fat o doonin ee: ‹Ha’aa!› »

²¹Siisera a naaga hanq a ɗaan, yaam a xij. Ya’el fee o tew Heber o mat, a fuurta o reng no ƭiif ne, a xot o leede, a ɓeed o ndang, a matiidin. A daaƴaan o ten no yook-nof bo ta suur a lanq, soo Siisera a xon.

²²Ye Barak fee daaboogna a Siisera a fadiidna, Ya’el a xetooxiidaan, a layin ee: «Gariidi um lalong oxe o waaƭaa.» Barak a roka no ƭiif naa ten soo a ga a Siisera tee laraas a xon, a dibel o reng no yook-nof.

²³A koom, Roog a neewanda a Yabin fee o maad Kanaan mbaambir Ii-isra’el we

²⁴moƴ’uuna o ŋaalooxanaa boo neen a mbarun.