Read NQAARIIT NE ROOG Haahate we 6 Bible Online

Haahate we 6 - NQAARIIT NE ROOG bible

Haahate we 6

¹Ii-isra’el we a mbi’ahina kaa faaxeerna na kid no Yaal oxe, soo o Yaal oxe a ɓoxot a den na xa ƥay no Maamajan we boo xa kiid ɓetaa ƭaq.

²Maamajan we a toroxandooga a Isra’el toroxand ƭomu. Ii-isra’el we kaa ƭasoogu na xa baaƥ axe na xa coong axe fo no luf ke fo na ƥil a saƭku koŋ ake, ndax da ndaɗ Maamajan we.

³A mbanuu Ii-isra’el we a nduuf’ina xa qol axe den, Maamajan we, Aa-amalek we fo molaan lakas we no batand kaa ngaroogu a song a den.

⁴Kaa ndaloogu no fiisel ole den, a mbiitin duufe le no saax le boo farna fa Gaasa, too nqaƴoogee kam Isra’el ñoowir leng mbaat paal mbaat naak mbaat xa paam,

⁵yaam den fo xa siir den fo ƭiif den kaa mbadtiidoogu nen tooroog pagkatar. Den fo keeleemb den kaa may’u boo mbaagaand o lim, too kaa ngaroogu no saax le ndax da mbiitnin.

⁶Neene, Ii-isra’el we a ndeeƭata no ñaat yaam Maamajan we boo a tax da ƈufginoox o Yaal oxe.

⁷Ye Ii-isra’el we a ƈufginooxna o Yaal oxe yaam Maamajan we,

⁸a lulta a den o tuleer oxaa jo’tanuuna a den ee: «Keeke o Yaal oxe Roog fee Isra’el a layu: ‹Suttaam a nuun no saax laa Misira, maa nu ndeeƭna faɗ.

⁹Wataam a nuun na xa ƥay no Miimisira we fo na xa ƥay no lakas we toroxandoogna a nuun, rax a den mbaambir nuun, ci a nuun saax le den.

¹⁰Mi o Yaal oxe Roog nuun, maƭooxaam a nuun ee ba nu saɗar roog ke no Aa-amori we nu ngenna no saax den, ndaa nu nan-gilooxee o ñuxur es.› »

¹¹Malaaka fee no Yaal oxe a gara, a moof ɗuga ngariñ naa refna Ofra, too Yowaas fee fogna na qaw ale Abiyeseer a jeg’un. Gedeyon fee o ƥiy Yowaas kaa sugoogu bele no nirir o waqe laa, ndax ta ɗasnin Maamajan we.

¹²Malaaka fee no Yaal oxe a feeñooxaan, a layin ee: «A salma-koor a maak ale, o Yaal oxe xey fa wo!»

¹³Gedeyon a doonaan ee: «Ey! O yaal es, o Yaal oxe a refangaa fa in kañ, xar taxu kene fop a dalaa a in? Taa comlaand ke ten fop boog daan in a mbetandooxaa a in, a ndamtin ee: ‹Ndax o Yaal oxe suttee a in Misira?› Ndiiki koy, o Yaal oxe kaa waas a in pelek, a ɓoxot a in na xa ƥay no Maamajan we.»

¹⁴O Yaal oxe a geleerooxa a faambir fo ten, a layin ee: «Fa doole fee saqoona, reti wat Ii-isra’el we na xa ƥay no Maamajan we. Mi o mat lulong.»

¹⁵Gedeyon a laamtaan ee: «Ey! O yaal es, nam um watitkaa Ii-isra’el we? A qaw ale mi moƴu o rool na carind ale Manaase, soo um ref oxe moƴna o neew no ƥasil in.»

¹⁶O Yaal oxe a layaan ee: «Xam ref fa wo, ten taxu xan o xawit Maamajan we nen yaa da ndeeƭna o koor o leng koŋ.»

¹⁷Gedeyon a doonaan ee: «A soƥangaa yee daawaam yirmande of, cooxaam o anddiloor olaa lalitna yee wo na layaa fa mi.

¹⁸Ba o goƭ mene boo yaa um nomtooxiidkaa paam of, ɓisiid sadax es soo diƈin mbaambir of.» O Yaal oxe a doonaan ee: «Xam cungong mene boo yaa o nomtooxiidkaa.»

¹⁹Gedeyon a dalfooxa o ret, a jaw o mbambe, a juɗ puuru canja’e kaa mbi’teena ngap kilo qarɓeen tadik mbiɗel. A yipa a tegeƴ ake kam a cenjel, diwliin fee hatna teen ta yipin na tokol, a ɓisiidin a malaaka fee ɗuga ngariñ naa, a cooxin o ten.

²⁰Malaaka fee Roog a layaan ee: «Xoti a tegeƴ ake fo puuru ke, doon a den no ɓil lene, yip took den diwliin fee.» Gedeyon a fi’a naaga.

²¹Malaaka fee no Yaal oxe a letna o loq ole ta pokoox’ina, a cuqtin a tegeƴ ake fo puuru ke. Maaga, fiɗel a naagta jirdit no ɓil laa, a dox a tegeƴ ake fo puuru ke bo dee riw, soo malaaka fee no Yaal oxe a naagin mes.

²²Gedeyon a andata yee malaaka fee no Yaal oxe a reeƭu soo ta lay ee: «O Yaal oxe na refkaa boo faw, sabab took es, yaam ga’aam malaaka no Yaal oxe jaxrañ.»

²³O Yaal oxe a layaan ee: «Fat o laaw of a dal, ba o saɗar, xonkiro.»

²⁴Gedeyon a maxana maaga o Yaal oxe o sadaxand, a ne’in «O Yaal oxe refu jam». Boo xaye o sadaxand olaaga a maada Ofra fee a qaw ale Abiyeseer a njegna.

²⁵No yeng olaaga, o Yaal oxe a laya a Gedeyon ee: «Jangi nqoox ne faap of, nqoox ne jegna xa kiid ɓetaa ƭaq. Gefi o sadaxand ole Baal faap of a jegna soo fuur o daaƴ ole Asera lupeena paam um.

²⁶Cinj kaaga, maxani o Yaal oxe Roog of o sadaxand o xenu took o jul ole no ɓil leeke. Xoti nqoox ne, ɓoxotin nen sadax fa ndoxel, doxtin xa cuuƭ axe no daaƴ ole Asera o fuurkaa.»

²⁷Gedeyon a jila goor xarɓaxay no dag we ten soo a fi ke o Yaal oxe a hebil’uuna. Kaa koy, o yeng a fi’un, saɗiran o fi ñaal yaam a saɗaraa ƥasil um fo we na teeru fee.

²⁸Ye wiin we na teeru fee a inooxna ƥiiɓ teel, a nga’a yee o sadaxand ole Baal kaa gefel, o daaƴ ole Asera lup’eena paam um a fuurel, soo nqoox ne a ɓoxotel nen sadax fa ndoxel took o sadaxand ole max’eena.

²⁹A ndefa no laamtiraa yee: «Ndi an fi’u kene?» A laamtooga, a mbaaƭaa boo a layel ee Gedeyon fee o ƥiy Yowaas fi’un.

³⁰Maaga, wiin we na teeru fee a laya a Yowaas ee: «Sutiidi mene o ƥeef onqe, ta xon, yaam ten gefu o sadaxand ole Baal, a fuur o daaƴ ole Asera lup’eena paam um.»

³¹Yowaas a doona fop we ngeenooxna paam um ee: «Ndax nuun na mbaritkaa a Baal soo ƈufgiidin? Oxuu fartuuna, xan a xon ndeer mene fo feet nqes. A soƥangaa kañ ee Baal roog tigi a refu, fat a layooran a xoox um, feek o sadaxand um Gedeyon a gefu!»

³²No kaa xotitna no ñaal naaga, Gedeyon a xoyoogate Yerubaal[5] yaam ne Yowaas a layna yee: «Fat Baal a layooran a xoox um, feek o sadaxand um Gedeyon a gefu.»

³³Maamajan we fop, Aa-amalek we fo molaan lakas we no batand a mbokatoora, a njoot a Yordaan soo a ndal no saawit ole Yisre’el.

³⁴Yiif le no Yaal oxe a muura a Gedeyon. A dalfooxa o luuƥ, soo a qaw ale Abiyeseer a mbokatoor, a ndeefin.

³⁵A hebla duleer muu refna kam o fiisel ole Manaase ndax da nqoyel, a ndeefin itam. A heblahina duleer na carind ale Aseer, na le Sabulon fo na le Neftali, soo a carind akeene fop a nqetiid fo ten.

³⁶Gedeyon a laya a Roog ee: «A soƥangaa tigi yee o ɓay es bugo watit Ii-isra’el we, ne laytanoona,

³⁷ndiiki xam doon a ƥiñ paal no cukand ne, too boo liim le a yenna na ƥiñ ake soom, soo lanq ke mbidna a den a mbeer koroŋ, xam and ee o ɓay es o watitkaa Ii-isra’el we, ne laytanoona.»

³⁸Kaaga a jegta naaga. No feet olaa, Gedeyon a inooxa ƥiiɓ teel, a nol a ƥiñ ake, soo foofi le na liim ale yuuritna teen a may a tokol.

³⁹Gedeyon a laya a Roog ee: «Baa fuux le wo a biltooxanaam, yaa layahinuuma fa wo jaf leng. Kaam bug rek o anddiloor o lakas fo a ƥiñ ake. No jaf leeke koy, fat a ƥiñ ake a mbeer koroŋ, soo lanq ke mbidna a den a liim.»

⁴⁰No yeng olaaga, Roog a fi’a naaga. A ƥiñ ake soom a mbeera, soo lanq ke fop a liim.