Read NQAARIIT NE ROOG Haahate we 7 Bible Online

Haahate we 7 - NQAARIIT NE ROOG bible

Haahate we 7

¹Yerubaal fee refna ref Gedeyon fo xiixire waa ndeeƭna fo ten fop a inooxa ƥiiɓ teel, a ndalik paam a cur alaa Harod. Saŋe ne no Maamajan we koy kaa garit’u no ɓemb-roog o janoon, farna fo ñaang laa More, na yulanq alaa.

²O Yaal oxe a laya a Gedeyon ee: «Xiixire we wo kaa mayood lool ndax um ɓoxot Maamajan we na xa ƥay den, ndik Ii-isra’el we a njang o ndam onqe helaxama, a mbakooxaa, a ndamtin ee: ‹Doole in watu a in.›

³Yegni xiixire we boog kene: ‹Oxuu saɗarna, a yooɓ o send, fat a goƭ o joong ole Galaad, a naag col a xaad.› » A ndeer no xiixire we goor cuni qarɓeen ƭik fo goor cuni ƭik a nomtooxa bo ta yoqat goor cuni xarɓaxay na den.

⁴O Yaal oxe a laya a Gedeyon ee: «Xiixire we kaa maad o mayaa lool. Ɓisi a den na ƥeeraamb alaa no poofi ke, too maaga xam ɗeetlooxanong a den. Oxe um laykang ee fat a yoon fa wo, xan a yoon fa wo, oxe um laykang ee baa yoon fa wo, yoonkee fa wo.»

⁵Gedeyon a ɓisa xiixire we no poofi kaa, soo o Yaal oxe a layin ee: «We na njaxkaa foofi le ne o ɓox a jaxtaa, fat o xaaj a den fo fop we na ngooknooxkaa ndax da yer.»

⁶We njaxoogna foofi le da nqaftoogna xa ƥay den, a ndeeƭa goor teemeed tadik, soo we yoqna no xiixire waa fop a ngooknoox a yeraa.

⁷Maaga, o Yaal oxe a laya a Gedeyon ee: «Goor teemeed tadik weeke njaxna foofi le rek um watitkaa a nuun, ɓoxot Maamajan we na xa ƥay of. We yoqna fop koy, fat a nomtoox, a nqaad.»

⁸Goor teemeed tadik waaga a njanga ñaamel ke xiixire we a yaxandoox’ina fo a luuƥ ake den. Cinj kaaga, Gedeyon a nomta Ii-isra’el lakas we no ƭiif den, soo a yoq fo goor teemeed tadik waa. Saŋe ne no Maamajan we koy kaa garit’u ne ten a lanq kam a yulanq alaa.

⁹Kam o yeng olaaga, o Yaal oxe a laya a Gedeyon ee: «Inooxi, fudooxan saŋe ne no Maamajan we, yaam ɓoxotaam a den na xa ƥay of.

¹⁰O saɗangiran o fudooxan, eeti yoon fa Puura fee o tag of.

¹¹Nan-gilooxi ke da laykaa, cinj kaaga xan o jegat njambaar o fudooxan saŋe ne.» Gedeyon a yoona fa Puura fee o tag um boo da mbaambnoox yeeyetax we na eeteel o ngomit no saŋe ne.

¹²Maamajan we, Aa-amalek we fo molaan lakas we no batand fop kaa naang’u gañ kam a yulanq alaa nen tooroog pagkatar, too keeleemb ke den mbaagaand o lim, yaam a mayit nen pep lanq na ƥeeraamb o maag.

¹³Gedeyon a fadiida soo a jopir o koor a wetandooxaa o yoon um o ƭaaɗ ee: «Kaam ɗaaɗ ga mbuuru naa fi’teena lorso a berengooxaa kam saŋe ne in boo a gom ƭiif, a maafin soo a sagin.»

¹⁴O yoon um oxaaga a doonaan ee: «Kaaga de waagee o ref lakas colu laƥ ne Gedeyon o Ii-isra’el oxe, refna o ƥiy Yowaas. Roog a ɓoxota na xa ƥay um Maamajan we fo saŋe ne fop.»

¹⁵Ye Gedeyon a nanna a betandax ale no ƭaaɗ ole fo a tekit ale ten, a gunga a lanq, a nomtooxiid no saŋe ne no Ii-isra’el we soo a lay ee: «Inooxyo, yaam o Yaal oxe a ɓoxota saŋe ne no Maamajan we na xa ƥay nuun.»

¹⁶Gedeyon a xaaja goor teemeed tadik we a yaj a tadak, o koor oo koor ta cooxin a luuƥ fo o nqaw o ƥor fo o jam olaa ɓekeena kam o nqaw onqe.

¹⁷A laya a den ee: «Naangyo ƭeetaxam, mbi’aa nen a mi. Mexaa fadiidaa no cat ke no saŋe ne rek, fat nu mbi ke um fi’kaa.

¹⁸I njibnangaa a luuƥ, mi fo yoon es, nuun itam fat nu njibin a luuƥ me widna saŋe ne soo mbalalooxaa yee: ‹Fat i ñoxoran o Yaal oxe fa Gedeyon!› »

¹⁹Gedeyon fo goor teemeed we ta yoonitna a mbadiida no cat ke no saŋe ne, a jopir yeeyetax we na nqottaa no ƭaan o peraand[6] a sogaa ngar. Gedeyon fo yoon um a ndalfooxa o luuƥ soo a nduguñ fo nqaw ne da saqna.

²⁰Maaga, a yaj a tadak ake fop a ndalfooxa o luuƥ, a nduguñ fo nqaw ne. A pokta xa cam axe a canoon soo a luuƥ ake da pokit a den a ñamaak, ndax da luuƥ, soo a mbalalooxaa yee: «A gara laƥ ne no Yaal oxe de fo ne Gedeyon!»

²¹Oxuu refna kaa fod’u na seek um, da ndeer saŋe ne. We no saŋe naa fop koy kaa ƈufoogu, a mbaɗooxaa soo a mbaaƭaa maa ndaɗitna.

²²Ye goor teemeed tadik we a maadna o njibnaa a luuƥ ake, o Yaal oxe a fi’a boo kam saŋe ne no Maamajan we, fop a njangir laƥ, a mbarraa a ndeer den, too we no saŋe ne a ƈufa boo Bet-Sita, a njagin Serera, a mbaaƭik cat kaa Abel-Mehola paam Tabat.

²³Goor Ii-isra’el we mbogna na carind ale Neftali, we na le Aseer fo we na le Manaase fop, a mbokatoora soo a ndaab Maamajan we.

²⁴Gedeyon a hebla duleer da yegnitik kam o joong olaa Efrayim fop ee: «Mbudooxyo nqetik fo Maamajan we, ƭeg a den cootand ke Yordaan boo Bet-Baara.» Goor we Efrayim fop a mbokatoora, a njaɓ cootand ke Yordaan boo Bet-Baara.

²⁵A ndama aa-adax ɗik we no Maamajan we, ndefna Oreb fa Seeb. A mbarta a Oreb no ɓil laa Oreb[7] soo Seeb da mbartin no nirir o waqe laa Seeb. Cinj kaaga, a suura no ndaabaa Maamajan we. A ƥisa maa Gedeyon fee reeƭna no saax o lakas olaa Yordaan xoox le Oreb fo le Seeb.