Read NQAARIIT NE ROOG Haahate we 8 Bible Online

Haahate we 8 - NQAARIIT NE ROOG bible

Haahate we 8

¹Goor we na carind ale Efrayim a laya a Gedeyon ee: «Ndi xar taxu o fi a in kene? Xar taxu xoyiro a in ye o ñoxorkaa fo Maamajan we?» A nqasra fo ten nqasir ƭomu.

²Gedeyon a doona a den ee: «Ke fi’uuma kañ xalamee fodir fo ke nu mbi’na. Mee ndax a ƥoor ale Efrayim hupu o njiriiñ a saxad ale na qaw ale Abiyeseer[8]?

³Na xa ƥay nuun o mat Roog a ɓoxotu aa-adax we no Maamajan we, ndefna Oreb fa Seeb! Ke fi’uuma kañ xalamee fodir fo ke nu mbi’na.» Fa lay faaga a ɓoosdanda fuux le no Ee-efrayim we.

⁴Gedeyon fo goor teemeed tadik we ten a mbadiida Yordaan soo a njootin. Kaa nqij’u lool, ndaa pañtee da maad o ndaabaa fañ den.

⁵Yaa da ndaawna teeru faa Sukot, Gedeyon a laya we ngenoogna maaga yee: «Ngela ci’anaamoo xiixire weeke yoontuuma xa ƭeg puuru, yaam kaa nqij lool, too kaa i ndaabaa a Seba fa Salmuna, maad we no Maamajan we.»

⁶Kelfa ke na teeru faa a ndoonaan ee: «Xar na taxkaa i ci’aa xiixire we wo puuru, too damafuliro a Seba fa Salmuna?»

⁷Gedeyon a laya yee: «Ahaa, yaa o Yaal oxe a ɓoxotkaa a Seba fa Salmuna na xa ƥay es, xam saarit cer nuun kiƈ ke na koƥ-a-ƥor ale fo qooc.»

⁸Gedeyon a inoora maaga, a suur Penu’el soo a xeɗ we ngenna maaga leng kut ke. Waaga o ndoonaan leng kut ke wiin we Sukot a ndoon’uuna.

⁹Gedeyon a laya a den itam ee: «Cinj yaa um jegkaa o ndam boo nomtooxiid, xam gef taax-took ne na teeru fee nuun.»

¹⁰Seba fa Salmuna koy, kam Karkor a ndeeƭu fo a yaj ake den mbi’’atna ngap goor cuni xarɓaxay fo goor cuni ƥetik. Kaaga doŋ yoq’atu no xiixire we no molaan we no batand, yaam xiixire cuni teemeed fo xiixire cuni qarɓeen ƭik a mbare.

¹¹Gedeyon a xota a ƭat ale no we na ngenaa no ƭiif no batand naa Nooba fa Yogbaha soo a xaw a yaj ale mboogatna yee a ndefa no woor.

¹²Seba fa Salmuna a ndalfooxa o ƈuf, ndaa Gedeyon a daaba a den, a dam maad ɗik weene no Maamajan we soo a firɓand xiixire we den fop.

¹³Ye Gedeyon fee o ƥiy Yowaas a gataa na ñoq alaa, a reeftiid no Ñaang laa Heres,

¹⁴a dama o fes o leng olaa genna Sukot, a laamtin. Oxeene a bindanaan a kon ake no kelfa ke fo ake no maak we Sukot. A ndeeƭa goor qarɓeen ɓetuu ƭik fo goor ɓetuu ƭik.

¹⁵Cinj kaaga, Gedeyon a gara me no wiin we Sukot soo a lay a den ee: «Seba fa Salmuna yoo weeke, taxna nu mbenaam, ndamtin ee: ‹Xar na taxkaa i ci’aa goor xiju we wo puuru, too damafuliro a Seba fa Salmuna?› »

¹⁶Maaga, Gedeyon a dama maak we na teeru faa soo a xawit wiin we Sukot kiƈ ke na koƥ-a-ƥor ale fo qooc.

¹⁷A gefa itam taax-took naa Penu’el soo a war we na teeru faa.

¹⁸Gedeyon a laamta a Seba fa Salmuna yee: «Nam goor we nu mbaritna no joong olaa Taboor a nand’u?» A ndoonaan ee: «Nen a wo a nand’u, oxuu refna a nandtaa o ƥiy no maad.»

¹⁹Gedeyon a laya yee: «Maag es a ndeeƭu, waa fogtuuma a yaay fa leng kut. Ne ta wooritna yee o Yaal oxe xe ñoowaa, nu mbar’angee a den, warkoogiim a nuun itam.»

²⁰Maaga, a hebla a Yeter fee taaw um ee: «Inooxi war a den!» Kaa koy, o fes ole woos’ee laƥ um, yaam a diid’u, ne ta maadna o refaa o ndeɓandoong.

²¹Seba fa Salmuna a laya a Gedeyon ee: «Inooxi wo fa xoox of, war a in, o waagangaan, yaam o kiin oo kiin fa doole um.» Gedeyon a inooxa, a war a Seba fa Salmuna. Cinj kaaga, a janga kumooxel ke saxitna nen o nqool o ndeɓ, ndok’eena na xa cok axe no keeleemb ke den.

²²Ii-isra’el we a laya a Gedeyon ee: «Maadooxani a in, wo fa xoox of, cinj kaaga o ƥeef soo a cinj um o ndaan of, yaam wo watu a in na xa ƥay no Maamajan we.»

²³Gedeyon a doona a den ee: «Maadooxankiim a nuun, too o ƥees ne’aand, o Yaal oxe kañ na maadooxankaa a nuun.»

²⁴Gedeyon a laya a den ee: «Leng kut um xeɗaa a nuun: Cooxaamoo, oxuu refna, xa keɗ axaa ta jaɓitna na xire faa.» Fañ we koy, kaa njeg’u xa keɗ wurus, yaam kaa ndeeƭu Ii-isma’el[9].

²⁵Ii-isra’el we a ndoonaan ee: «Xan i cooxong a den no fud o letu.» A ƭaapa sabadoor, soo oxuu refna a deɓ teen xa keɗ axe ta xotit’ina na xire faa.

²⁶Xa keɗ wurus axe Gedeyon a laacna, a mbi’’a ngap kilo qarɓeen ƭik, too kumooxel ke saxitna nen o nqool o ndeɓ fo xa loŋ-loŋ axe fo tikoorik yaxgu ke maad we no Maamajan we a ndokoox’ina fo ceq ke ndok’eena na xa cok axe no keeleemb ke den limtaand.

²⁷Gedeyon a xawna wurus faaga nitaal, a ɓisin Ofra refna teeru um. Ii-isra’el we fop a ndefata no mbaɗooxaa nitaal naaga reeƭatna mbog na Gedeyon fo mbind um.

²⁸Maamajan we a ƥoxotooxa no Ii-isra’el we too mosatee o yoɗoor no njom den naaga. Saax le a reeƭata na jam boo xa kiid qarɓeen nahik, no ñoow ole Gedeyon fop.

²⁹Yerubaal[10] fee o ƥiy Yowaas a nomtooxa, a genik no mbind um.

³⁰A jeg’a xa ƥiy qarɓeen ɓetuu ƭik, yaam rew mayu a jeg’u.

³¹A rima itam fo ngeƈ-a-salma naa ten Sikeem o ƥiy o ngoor, soo ta ne’in Abimelek.

³²Gedeyon fee o ƥiy Yowaas a nogoy’a tigi soo a xonkaa, a gasel paam a mboy alaa Yowaas fee faap um maaga Ofra, a qaw ale Abiyeseer a njegna.

³³A cinj fa nqon fee Gedeyon, Ii-isra’el we a ndefa no mbaɗooxahinaa a Baaliin. A mbi’a a Baal-Berit[11] ta refat roog den.

³⁴A ndalfooxa o mbeec o Yaal oxe Roog den wat’ina a den no fañ we mbidna a den fop.

³⁵Ii-isra’el we njeg’ee o liir o leng no mbind Yerubaal, refna ref Gedeyon, no paax ke oxeene a fi’an’ina a den fop.