Read NQAARIIT NE ROOG 2Saŋ 1 Bible Online

2Saŋ 1 - NQAARIIT NE ROOG bible

2Saŋ 1

¹Mi fee refna o maak kam mbokatax ne no gimu we na bindang o leetar oleeke, wo fee refna yaay na mi, wo fee Roog a jilna, wo fo xa ƥeef axe[1] fexuuma tigi. Refee yee mi doŋ fexu a nuun, ndaa fop we andna ndigil ne.

²Ndigil neene oxe na in, too na in a genkaa boo faw.

³Yaaga koy, yaasam Roog Faap fee fa Yeesu Kiristaa fee o Ƥeem a ci a in yirmande fo a baasan fa jam, da sax na in no ndigil fo no mbeq.

⁴Ye ga’uuma yee a jega na xa ƥeef waa na ndeefaa ndigil ne Faap fee a hebilna a ndeer in, sawar’aam lool.

⁵Ndiiki koy, leng kut bugoong o xeɗ, wo ya es, too refee kebil nqas, yaam no mberaand naa i ndaawun, ta ref ee: Fat i mbexir a ndeer in.

⁶O mbeq koy, refu ñoowtaa ne kebil ke Roog a dalinna meen a laytuuna. Keene, nu njangne o ten no mberaand naa, too nu mbariran o mbaas.

⁷Nu mbootoox koy, yaam kaa jeg mayu waa ndefatna na adna fee, a naxaa wiin we. Weene mbeejlee yee Yeesu Kiristaa a cerooxa, ye ta garna na adna fee, a ñoowaa nen o kiin. Oxuu na fi’aa keene, kaa naxiid wiin we, too o Mbodandoor-Kiristaa yoo.

⁸Fat oxuu refna a ɗeetaqin a xoox um, yaam ndik calel in no Yaal oxe a ndef kasaara. Mbootooxyo boog, ndax nu mbaag o ndaaw saɗig ne Roog a geekanna a nuun.

⁹Kuu o kiin a waagna o ŋaalooxaa, ta jof na Roog, too refee a cangin ale Kiristaa, oxeene jegee a Roog. Oxuu ŋereƥooxna na cangin aleene koy, a gayan, a jega a Faap fee, a jeg o Ƥeenqe itam.

¹⁰Oxuu layiidna a nuun paru na Roog, too jangnee keene, baa dal no mbind nuun, too ba nu simnin sax,

¹¹yaam o dalnin, o yoon fo ten no paaxeer oo.

¹²A jega lakas mayu kaa buguuma o lay a nuun, ndaa bugiim ta ref no leetar. Ke moƴanaxama refu um gar i njasnoor lay, o ɗaay in a ñak sik.

¹³Mbokatax ne no gimu we meeke fop owe simnang.