Read NQAARIIT NE ROOG 3Saŋ 1 Bible Online

3Saŋ 1 - NQAARIIT NE ROOG bible

3Saŋ 1

¹Wo Gayus fee fexuuma tigi, mi fee refna o maak no mbokatax ne no gimu we na bindang o leetar oleeke.

²Wo fee fexuuma, Roog a anda yee woxey no xeeñ es. Ten taxu kaam xeɗaa barke a ɓood mbaambir of, fo ɓaal of a wodit ne o ngim of a woditna.

³Kaam jeg o ɗaay lool, yaam ye we ngar’ina saax nuun a ngatna, a mbetandooxaxam ndigil ne o ñaaƴnaa, too ta sax na wo itam.

⁴Dara moƴiraam o fel o nanel ee xa ƥees no ndigil ne a ñaaƴaa.

⁵Wo fee fexuuma, ngor tigi lalto, ye dalnoona we i mbogitna o ngim, boo no gimu lakas waa inoorna no saax jan.

⁶Weene fop a mbetandooxaxam mayu, too ke da layna fop kaa seede o mbeq of. A layaan mbaambir no gimu we fop. Njogol of fa den itam a ɓutanda kam boo a paam Roog. Naagi o fi’aa neene.

⁷Weene koy, gon no Yaal oxe Yeesu Kiristaa inu a den, da mbaare’aa, a ndetaa, ndaa njangkee ci’it no xaa refeerna o kimu na Kiristaa.

⁸Ten taxu, in we ngimna, i mbara o ndalnaa wiin um, ndax i ndaar, ndend fa den no qol ole no ndigil ne.

⁹A jega o leetar olaa binduuma gimu we no saax nuun, ndaa andaa Joteref: O kiin oxaa na gindreel a adax a refu, ten taxu ta fañ o reef ke xeɗooxooguuma a den.

¹⁰Feek neene a fi’tu koy, boo Roog a ɓisiidaxama, xam feedin a pi um mbaambir no fop. A jega a ƭelem a paaxeer a mayu kaa ta feranaa a in, keene deyiran ta fañ o genaraa gimu we na ngaraa, too sax a jega kaa moƴna faaxaƭar keene fop. Ten refu yee fañee o genar a den soom, a day teen, ndaa kaa xañtaa lakas we mbugna o ngenar a den ee ngenarkee o leng, soo we na ngenaraa a den, ta sut a den mbokatax ne no gimu we.

¹¹Wo fee fexuuma o mat, ngela ba o laal paaxeer. Fat paax soom a ref o ɗeendoor of. Oxe na ñoowaa na pi a paax, o ndeɓandoong Roog oo, ndaa oxe naageerna o reefaa paax, matee a Roog.

¹²Demetiryus o mat, fop na seede’anan paax, boo no ndigil ne refna Yeesu Kiristaa fa xoox um. Mi itam no seede’anan paax genum, too andaa yee ndigil soom um seede’aa.

¹³A jega lakas mayu kaa bugoonga o lay, ndaa bugiim ta ref no leetar.

¹⁴Kaam bug o cung bo i njasnoor, yaam Roog a fi’angaan, ndiiki um ɗeetiid a nuun. A koom, xan i mbaag o layit fop.

¹⁵We ndefna fa mi fop owe simnang. Ngela simnani a in fop we ndefna fa wo. Yaasam o Yaal oxe a fudin jam took of!