Read NQAARIIT NE ROOG Mbeeñil 2 Bible Online

Mbeeñil 2 - NQAARIIT NE ROOG bible

Mbeeñil 2

¹«Bindanaam a malaaka fee na yetooxaa mbokatax ne no gimu we kam teeru faa Efees ee: ‹Fa lay feeke kaa inoor no xe deegooxna xa qoor ɓetaa ƭaq axe na ñamaak um, refna oxe na ñaaƴaa a ndeer a pagal ɓetaa ƭaq xa lampa akaa mbi’teena wurus.

²Kaa tee: Andaam a pi of fop fo calel ƭomu of fo o saƭkel ole jegoona. Andaam itam ee waagiro o fi’ir fo hañaan we, yaam ɗeetlooxaa we na layooxaa apootar, too ndefiran, boo ga ee maamaaɓ a ndefu.

³Andaam itam ee saƭkaa. Xijaa yaam gon es, too dakooxiro a cinj.

⁴Kaa koy, a jega kaa ɗomaxama na wo: Kaa fexatiraamo ne fexit’axamoona no mberaand naa.

⁵Wetandooxi boog me toloftoona! Fesi pakaad of a cinj, reefatin o jaf o eetaand of. O fi’angiran, xam yen took of, too xam in a pagal xa lampa ale wo na seek um. Xam fi’in, o fesangee pakaad of a cinj.

⁶Kaa koy, a jega kaa felaxama na wo: Nen a mi, kaa o sib a pi ake na qaaj ale na reefaa a cangin ale Nikolawus[5].

⁷Oxuu jegna nof, fat a nan-giloox ke Yiif le a layaa pokatax ke no gimu we: Oxe na maafkaa, xam ci’in ta ñaam no ndaxar ne no ñoow ole refna kam a ƭing ale Roog.› »

⁸«Bindanaam a malaaka fee na yetooxaa mbokatax ne no gimu we kam teeru faa Ismir ee: ‹Fa lay feeke kaa inoor no xe refna o eetaand oxe fo o palakaand oxe, a ref oxe xon’ina, a xontoox.

⁹Kaa tee: Andaam ne o toroxandteel, and itam ne rooltoona. Kaa koy, no ndigil o yaal halal refo. We na layooxaa Yaawuur too ndefiran, a ndef no layanang paaxeer, keene sax andaanum. Wiin weene, no mbind a qeƭ ne Saytaane o mat a mbogu!

¹⁰Ba o diid no ke o ñagadilkeel. Nan-gilooxi: Xan o ƈiƴ oxe a ɗeetloox a nuun. Xan a ɓek leng-leng na nuun kam kaso, too xan nu toroxandel boo ñaal xarɓaxay. Fat o gore boog boo na fa nqon, too xam cooxong o ñoow ole, ta ref o ndip of.

¹¹Oxuu jegna nof, fat a nan-giloox ke Yiif le a layaa pokatax ke no gimu we: Oxe na maafkaa, ñimkee fa nqon fa ƭikandeer faa.› »

¹²«Bindanaam a malaaka fee na yetooxaa mbokatax ne no gimu we kam teeru faa Pergaam ee: ‹Fa lay feeke kaa inoor no xe saqna saamar.

¹³Kaa tee: Andaam me genoona. Ten refu me gamb no maad le Saytaane a refna. Kaa o damoox no gon es, too fañiro o gim na mi. Fañino sax na jamaane fee o seede es o kore’u xe ne’eena Antipaas, a warit’eena me nuun, me Saytaane a genaa.

¹⁴Kaa koy, a jega onqaa ɗomaxama na wo: Ten refu yee kaa o jeg meene wiin waa ndamooxna na cangin ale Balam[6]. Kaa jangnoogu a Balak yaaga, ta sip a panq alaa na baɓaa Ii-isra’el we, a maafnooraa a den na bakaad yaa ta koocaa a den da ñaam a tegeƴ a sadaxte akaa ne’teena pangool, soo a seeqaa.

¹⁵Neene, wo itam jegaa me wo wiin nandu neene waa ndamooxna na cangin ale na qaaj ale na reefaa a cangin ale Nikolawus.

¹⁶Fesi pakaad of a cinj boog, mbaat xam yen took of ndiiki, too xam maafit wiin weene saamar fee na sutooraa no don es.›

¹⁷Oxuu jegna nof, fat a nan-giloox ke Yiif le a layaa pokatax ke no gimu we: ‹Oxe na maafkaa, xam ci’in maan fa ƭasu. Xam ci’in itam ɓil ran fur. Took ɓil leene koy, gon xas a binde teen. Gon le o mat, o leng andiran a refangee oxe na daawkan.› »

¹⁸«Bindanaam a malaaka fee na yetooxaa mbokatax ne no gimu we kam teeru faa Tiyatiir ee: ‹Fa lay feeke kaa inoor no Ƥeenqe Roog, a kid um a miric-miricnaa nen ƈulfaan fiɗel, a caf um a telelaa nen xanjar faa naayneena na fiɗel boo a xawnel.

¹⁹Kaa tee: Andaam a pi of fop. Andaam itam o mbeq of fo o ngim of fo a koorgoorlax of no dimle’aa lakas we fo o saƭkel of. Andaam koy o mat ee ke o jalaa ndiiki hupu ke jaloogoona no mberaandoong naa.

²⁰Kaa koy, a jega kaa ɗomaxama na wo: Kaa o waas o tew oxe ne’eena Isebel na layooxaa o tuleer Roog, soo a naxaa dag we mi. Kaa jangnaa a den ee da seeqaa, soo a ñaamaa a tegeƴ akaa sadaxeena pangool.

²¹Ci’aanum maa ta fesitna pakaad um a cinj, ndaa bugee o fes a cinj ceeq ne ta fi’aa.

²²Ten taxu xam wondnin no njong o torox, toroxand we mosna o seeq fo ten fop. Xam fi’in, a mbañangaa o mbes a cinj a pi a paaxeer ake da mosna o mbi fo ten fop.

²³Kaa jolna keene, xam xawit xa ƥeem fa nqon. Neene, xan pokatax ke no gimu we fop a and ee mi refu oxe na horooxaa a pug fo a qalaat a ƭasu ke no wiin we, too xam ɓoxot o kiin oo kiin ke ta jalna.

²⁴Nuun lakas we mbogna no mbokatax ne no gimu we Tiyatiir o mat, andaam ee nu ndamooxee na cangin a koɓong aleene fo ke da nqoyaa kunpa qooɗu ke Saytaane. Mexe layaa a nuun boog ee gadinkiim a nuun a toq a lakas.

²⁵Kaa koy, ke nu njegna, ngeekeenoo boo yaa um garkaa.

²⁶Neene, oxe na maafkaa koy, a gen no fi’aa ke buguuma boo no muukandoong naa, xam lasin qeet ke da ndef na sañ-sañ um,

²⁷o samb njelem a bugko xurtaa a den, a duguñaa a den nen nqaw maxte ƭok.

²⁸Mi fa xoox es na Faap es daawtum sañ-sañ feene took qeet ke. Xam ci oxe na maafkaa itam o xoor mbeet ole.

²⁹Oxuu jegna nof, fat a nan-giloox ke Yiif le a layaa pokatax ke no gimu we.› »