Read NQAARIIT NE ROOG Mbeeñil 21 Bible Online

Mbeeñil 21 - NQAARIIT NE ROOG bible

Mbeeñil 21

¹Cinj kaaga, ga’aam asamaan fa nqas fo lanq qas. Asamaan fa eetaand fee fo lanq eetaand ke kaa mooc’u, too o maag jeg’atee.

²Ga’aam teeru fa tedu fee refna Yeerusaleem fa nqas fee Roog a fudnitiidna na asamaan. Kaa jagandoox nen o toog oxaa bugeena o ɓoxot o kor um.

³Nanaam o ñuxur o maak ta inoor no gamb no maad le, a lay ee: «Ndiiki koy, ngenand ne Roog oxey a ndeer no wiin we! Xan Roog a gen a ndeer den, soo wiin we a ndef xeet um. Roog fa xoox um xan a ref fa den, a ref Roog den.

⁴Xan a forit xa kooniit a kid den, too fa nqon refkatee meen. Ñaawax mbaat ƭomatax mbaat o ƭomel refkatee meen, yaam tig eetaand ke xan a mbaaf.»

⁵Maaga, oxe moof’ina no gamb no maad le a laya yee: «Ndiiki koy, xam fi’atin fop ta ref qas.» Cinj kaaga, a layaxam ee: «Bindi kene, yaam fa lay es ndigil kak oo, too a jare o hooloox.»

⁶Naaga, a doona teen ee: «Fop a fadnooxa! Mi refu Alfa fa Omega, mberaandoong ne fo muukandoong ne. Oxuu hoɗomeena, xam ci’in no fud o letu ta yer na cur foofi le na ñoownaa.

⁷Oxe na maafkaa, xan a lamit na mi ci’it neene. Xam ref Roog um, soo ta ref o ƥees.

⁸Kaa koy, kaa farna no wiin weeke: Saɗar we fo gore’aƭaru we fo we na mbi’aa cednooxu fo waawar we fo we na seeqaa fo fan we fo juujuur we fo maamaaɓ we fop, a las den na refkaa a mbeel fiɗel alaa no nqeen saasu kaa. Keene na refkaa fa nqon fa ƭikandeer fee.»

⁹Cinj kaaga, fa leng no malaaka ke saq’ina fo ndog ɓetuu ƭik ne yip’ina taamaala ɓetuu ƭik palakaand ke, a gara a layaam ee: «Gari boo um lalong o toog oxe refna o Kulook no Mbaal onqe.»

¹⁰Yiif le Roog a gifaxam, too malaaka fee a ɓisaxam took o joong o maak o jigdu. Maaga, a lalaxam teeru fa tedu fee refna Yeerusaleem fee Roog a fudnitiid’ina na asamaan.

¹¹Teeru feene koy, o ndam onqe Roog a taxa ta meleƈaa. O mosel um kaa nandtoogu nen ɓil jafeñu hoƥu laa ne’eena yaspe, a mirmirnaa nen galam fo jem.

¹²A jega saŋe ngoƭu took naa widna teeru fee, a jeg xa ton-maax xarɓaxay fo xa ton-maax xa ƭaq, malaaka xarɓaxay fo malaaka ƭik a yetooxaa a den. A kon ake na carind xarɓaxay fo a carind a ƭak ake Isra’el a mbind’e took xa ton-maax axe.

¹³O saax oluu refna koy, xa ton-maax xa tadaq ndeeƭu ta: Xa ton-maax xa tadaq no batand, xa ton-maax xa tadaq no ɓemb-roog o janoon, xa ton-maax xa tadaq no ɓemb-roog o ñamaak fo xa ton-maax xa tadaq no mudand.

¹⁴Saŋe ne na teeru fee koy na ƥil xarɓaxay fo a ƥil a ƭak a diƈooxu. Na ƥil akeene o mat, a kon ake no apootar xarɓaxay fo apootar ɗik we no Mbaal onqe a mbind’e.

¹⁵Malaaka fee layoogna fa mi a saqa o siind wurus olaa ta fi’na o liiƥir, ndax ta liiƥtin teeru fee fo xa ton-maax axe fo saŋe ne ten.

¹⁶Teeru fee koy, kooñ nahik a jegu. O cigdel um fo o yaajel um mbodir’u. Malaaka fee a liiƥta teeru fee o siind ole ten. O cigdel ole a fi’’a kilomeet cuni ƭik fo kilomeet teemeed nahik. Ne ta jigdit’ina a lanq a jigdit’u took, soo a yaajit neene.

¹⁷A liiƥa saŋe ne, too a fi’a meetar qarɓeen ɓetuu fa leng fo meetar ƥetik took, no ke ta liiƥtoogna.

¹⁸Saŋe ne koy, a ƥil a cafeñu a koƥu kaa ne’eena yaspe a maxit’e, soo teeru fee a ref wurus tigi, a ɗeetooraa nen o weer.

¹⁹A ƥil ake saŋe ne na teeru fee a diƈooxna koy, xa qos a ƥil a cafeñu a mayu a ndeeƭu, a mos bo. Ɓil eetaand le kaa hoƥ’u, a ne’el yaspe, ɓil ɗikandeer le a bulo, a ne’el safiir, ɓil dadkandeer le a hoƥ itam, a ne’el kalseduwaan,

²⁰ɓil nahkandeer le a hoƥ, a ne’el emerood, ɓil ɓetkandeer le a yaxig, a ne’el sardonik, ɓil ɓetuu fa lengandeer le a yaxig coy, a ne’el sarduwaan, ɓil ɓetuu ɗikandeer le a yaay, a ne’el kirisolit, a nand fa wurus, ɓil ɓetuu dadkandeer le a hoƥit nen foofi o maag, a ne’el beril, ɓil ɓetuu nahkandeer le a yaay, a ne’el topaas, ɓil xarɓaxayandeer le a yaac o ranig, a ne’el kirisoperas, ɓil xarɓaxay fo lengandeer le a yaay, a ne’el hiyasent, ɓil xarɓaxay fo ɗikandeer le a yaxgit nen piɗ sufarnaak, a ne’el ametist.

²¹Begax xarɓaxay fo begax ƭik ke koy, xa peme xarɓaxay fo xa peme xa ƭaq a ndeeƭu. Begax nuu refna o feme o leng a fi’te. A qal ale na teeru fee koy, wurus tigi faa na ɗeetooraa nen o weer a reeƭu.

²²Ga’iim Mbind Roog leng kam teeru fee, yaam o Yaal oxe Roog fa njegu katil fee refu Mbind Roog um, ten fo o Mbaal onqe.

²³Teeru fee soxla’ee a qoolaand njeeƈ mbaat a qoor. O ndam onqe Roog na xoolandan, soo o Mbaal onqe a ref o jam um.

²⁴Qeet ke fop na qoolaand um a mbugko ñaaƴaa, soo maad we na adna fee a ƥisiidaa teen kalal den.

²⁵Begax keene mbegooxkatee ñaal muk. Maaga, o yeng jegkatee sax.

²⁶O ndam onqe no qeet ke fo o neq den xan a ƥisiidel maaga.

²⁷Kaa koy, qoolaƭaru leng mbaat o kiin oxaa na fi’aa cednooxu mbaat oxaa na maaɓaa rokkee na teeru feene. We a kon den a mbindeena no safe le no ñoow ole o Mbaal onqe a jegna rek na ndokkaa teen.