Read NQAARIIT NE ROOG Mbeeñil 22 Bible Online

Mbeeñil 22 - NQAARIIT NE ROOG bible

Mbeeñil 22

¹Naaga, malaaka fee a lalaxam o xuluɓ ole no foofi le na ñoownaa. Kaa mir-mirnoogna nen galam fo jem a sutoorooga no gamb no maad le, Roog fo o Mbaal onqe a njegna,

²a ɓaxooxaa a ndeer ee ndeer a qal ale na teeru fee. No saax oluu refna no xuluɓ ole koy, a jeg’a ndaxar ne no ñoow ole. Kaa ndimaa a caf xarɓaxay fo a caf a ƭak o hiid oluu refna, ta ref jaf leng o nqool onquu refna. A naf ake den koy, kaa mbaadnitoogel jiru we no qeet ke.

³A kalak Roog njegkatee. Gamb no maad le Roog fo o Mbaal onqe a njegna kam teeru fee a refkaa, too dag we Roog xan a mbaɗoox a Roog.

⁴Xan a nga mukit um, too gon um xan a bindel took a tagid den.

⁵O yeng jegkatee, too wiin we soxla’katee a qoolaand o jam mbaat ale no njeeƈ ne, yaam o Yaal oxe Roog xan a fudin took den a qoolaand um, da maadooxaa boo faw.

⁶Cinj kaaga, malaaka fee a layaxam ee: «Fa lay feeke ndigil kak oo, too a dey o jaɓel. Maaga, o Yaal oxe Roog fee na ɓekaa duleer we Yiif um, a luliida malaaka um, ndax ta lal dag we Roog ke warna o xew no miñeer.»

⁷Maaga, Yeesu a laya yee: «Nan-gilooxi! Mexe garaa no miñeer! We na ngayaa fa lay fee no nduleer ne Roog bindeena no safe lene, a ƭaaya.»

⁸Mi Saŋ, mi nanu keene, too ga’in. Ye nananuuma, ga’in, naagaam giriƥriƥ na caf ake na malaaka fee lal’axama a den, ndax um faɗooxin.

⁹Kaa koy, malaaka fee a layaxam ee: «Ba o fi’in! O tag refum nen a wo, refin itam nen fog of we ndefna duleer fo nen we na ngeekaa fa lay fee bindeena no safe lene. Roog soom helu o faɗooxel!»

¹⁰Cinj kaaga, Yeesu a layaxam itam ee: «Ba o ɗasin muk fa lay fee no nduleer ne Roog bindeena no safe lene, yaam waxtu fee keene a hapaneena fop a matiida.

¹¹Fat o paaxaƭaru xe a gen no fi’aa paaxeer, o qoolaƭaru xe a gen no fi’aa qooleer. Kaam ee fat o cofu xe a gen no fi’aa cofu, o tedu xe a gen no ñoowaa kam o tedel.»

¹²Yeesu a layahina yee: «Nan-gilooxi! Mexe garaa no miñeer! Xam ɓislooxiid tabid ke, o kiin oo kiin, um ɓoxotin ke ta fi’na.

¹³Mi refu Alfa fa Omega, o eetaand oxe fo o palakaand oxe, mberaandoong ne fo muukandoong ne.»

¹⁴We na ndapaa toki den, ndax da ci’el a ñaam o rim ole no ndaxar ne no ñoow[13] ole, a ndoktaa na xa ton-maax axe na teeru fee, a ƭaaya.

¹⁵Kaa koy, we na mbi’aa cednooxu fo fan we fo we na seeqaa fo waawar we fo juujuur we fo fop we mbexna o maaɓaa na fa lay fo na pi, o leng na den rokkee na teeru fee muk.

¹⁶«Mi Yeesu, mi lulu malaaka es, ndax ta yegin a nuun keene fop kam pokatax ke no gimu we. O ndaan Dawid refum fo o xoor o maak ole ne’eena o Mbuŋa.»

¹⁷Yiif le Roog fo o Kulook oxe kaa layaa yee: «Gari!» Oxuu nanna kene fat a lay itam ee: «Gari!» Oxuu hoɗomeena fat a gar, a yer. Oxuu bugna foofi le na ñoownaa, fat a jangin! Ci’it oo!

¹⁸Mi Saŋ, mexe maƭooxaa fop we na nanaa fa lay fee no nduleer ne Roog bindeena no safe lene yee: Oxuu ɓaatna teen tig, xan Roog a ɓaat na qaw um taamaala ke layteena kam safe leeke.

¹⁹Oxuu watinna tig na fa lay fee no nduleer ne Roog bindeena no safe lene, xan Roog a watin a las um no ndaxar ne no ñoow ole fo na teeru fee layteena no safe lene.

²⁰Oxe feedinna kene a laya yee: «Ii, mexe garaa no miñeer!» Amiini! Gari, o Yaal oxe Yeesu!

²¹Yaasam yirmande fee no Yaal oxe Yeesu a ref fo fop.