Read NQAARIIT NE ROOG Mbeeñil 4 Bible Online

Mbeeñil 4 - NQAARIIT NE ROOG bible

Mbeeñil 4

¹Yaa kaaga a faafna, ga’ahinaam begax naa wetooxna kam asamaan. O ñuxur ole eet’uuma o nan, kaa fangoortoogu nen a luuƥ. Kaa lay ee: «Ŋaayiidi mene, too xam lalong ke warna o xew a cinj keene.»

²Ndak fo ndak, Yiif Tedu le a gifaxam, a ɓisaam. Maaga koy kam asamaan, a jeg’a gamb no maad. Took gamb leene koy, a jeg’a oxaa moof’ina teen.

³Meleƈ um kaa nandtoogu nen meleƈ ɓil jafeñu hoƥu laa ne’eena yaspe fo nen ɓil jafeñu yaxgu laa ne’eena sarduwaan. Gamb no maad leene koy, a ñang-ee-ñang alaa nandtoogna ɓil jafeñu hoƥu laa ne’eena emerood wid’un o kurul-keƥ.

⁴Me wid’ina gamb no maad le koy, a jeg’a a kamb qarɓeen ƭik fo a kamb a nahak a lakas. Maak qarɓeen ƭik fo maak nahuk moof’u na kamb akeene. Kaa ndokoox’u tikoorik tan fur, oxuu refna a saq o ndip wurus no xoox um.

⁵Xa kiiñ fo fangax fo ƭuuɗ a sutoortooga no gamb no maad le. Xa cam ɓetaa ƭaq a ngeƥand’e mbaambir gamb no maad le. Xa cam axeene ndeeƭu a yiif ɓetaa ƭaq ake Roog.

⁶Mbaambir gamb no maad leene, a jeg’ahina kaa nandna nen o maag o wendu laa mir-mirnoogna nen galam fo jem. A ndeer ee ndeer gamb no maad le fo me widuuna koy, a jeg’a pindel nahik kaa mayna a kid mbaambir den fo a cinj den.

⁷Mbindel eetaand ne kaa nandtoogu njogoy, ƭikandeer ne a nandtaa o xeel, ndadkandeer ne a saq mukit no kiin, nahkandeer ne a nandtaa a canjiik alaa na yetaa.

⁸Pindel nahik keene fop koy, oxuu refna na den a nafir ɓetaa fo leng a sax’u. Muu refna na nafir akeene kaa sax’u a kid, took fee fo yoora fee. Ñaal fo o yeng mbindel nuu refna kaa gimoogu yee: «O Yaal oxe Roog o Cegu katil oxe reeƭna fo xe na maadaa fo xe na garaa, kaa ted! Kaa ted! Kaa ted!»

⁹A mbanuu pindel nahik keene ngimoogna a simataa, a niwaa too a ngidmaa oxe moofna no gamb no maad le, refna oxe na ñoowaa bo na moos boo moos,

¹⁰maak qarɓeen ƭik fo maak nahuk we a ndalfooxooga o ngooknoox mbaambir no xe moof’ina took gamb no maad le, a mbaɗooxaa oxe na ñoowaa bo na moos boo moos, a mbolaa fo ndip ne den mbaambir gamb no maad le, soo a layaa yee:

¹¹«Koo o Yaal oxe Roog in, jombiro ɓoxotel o ndam fo o niwel fa katil, yaam wo saku fop, too na pexey o bug of ke sakeena a reftu.»