Read NQAARIIT NE ROOG Mbeeñil 5 Bible Online

Mbeeñil 5 - NQAARIIT NE ROOG bible

Mbeeñil 5

¹Cinj kaaga, ga’aam no ɓay o ñamaak ole no xe moofna took gamb no maad le a kayit[7] alaa doreena, a bindel o saax oo saax, soo a wegtel xa ñaas ɓetaa ƭaq.

²Maaga, ga’aam malaaka njegu doole naa falalooxoogna a maak ee: «An jombeeru o ñaƥit xa ñaas axe, soo a dorit a kayit ale boog?»

³Kaa koy, o leng waag’ee o dorit a kayit ale mbaat ta ɗeet ke refna teen, refee na asamaan mbaat took lanq ke mbaat ɗuga lanq ke.

⁴Kaam looloogu cay, yaam ne o dorit a kayit aleene mbaat o jang ke refna teen a jomb’ina fop.

⁵Maaga, o leng no maak we a layaxam ee: «Ba o loolat! Ga’iro xeƈa! Njogoy ne na carind ale Yudaa, refna o Ndaan onqe Dawid a maafa, ndax ta ñaƥit xa ñaas ɓetaa ƭaq axe na kayit ale, soo a dortin.»

⁶Yaa kaaga a faafna, ga’atinaam o Mbaal onqaa geenooxna a ndeer ee ndeer gamb no maad le, pindel nahik ke fo maak we a ndeerin. O Mbaal onqe kaa nandtoogu nen kaa war’eena. Xa can ɓetaa ƭaq fo a kid ɓetaa ƭaq a saq’u, ndefna ndef a yiif ɓetaa ƭaq ake Roog, luliideena took lanq ke fop.

⁷A gara, a xot a kayit ale no ɓay o ñamaak ole no Xe moof’ina took gamb no maad le.

⁸Ye ta xotna a kayit ale, pindel nahik ke fo maak qarɓeen ƭik fo maak nahuk we a ndalfooxa o ngooknoox mbaambir no Mbaal onqe. Oxuu refna na den kaa saq’u o nqilimb fo o ndog wurus o yipe cuuraay boo muut. Cuuraay feene koy reeƭu a qeƭ ake no gimu we mbogna na Roog.

⁹Maaga, a ngimooga a kim a qas alene: «O xot a kayit ale soo ñaƥit xa ñaas axe jombirang, yaam kaa o war’el. Na pexey fo’oy of watanaa a Roog wiin inooru no tim oluu refna, na lak fuu refna fo no saax luu refna fo na xeet fuu refna.

¹⁰Fi’aa a den da ndef saasadax no maat of, ndax da ndagooxaa a Roog, a maadoox took lanq ke.»

¹¹Ɗeetahinaam too nanaam o ñuxur no malaaka mayu. A mbi’a ngap cuni-cuni fo qarɓaxay no cuni. Malaaka keene kaa ngeenoox’u, a mbid o kurul-keƥ gamb no maad le fo pindel ke fo maak we fop.

¹²Kaa ngimoogu fo o ñuxur o maak ee: «O Mbaal onqe war’eena a hela o daaw katil fa halal fo o and fa doole fo o niwel fo o ndam fo a simat.»

¹³Maaga, ke sakeena fop, ta ref na asamaan fo took lanq ke fo ɗuga lanq ke fo no maag ole, pindel ke kam adna fee fop, nanaam a den da ngimaa yee: «Yaasam Oxe moofna no gamb no maad le, o ten fo o Mbaal onqe a ndaaw a simat fo o niwel fo o ndam fa katil, bo na moos boo moos!»

¹⁴Cinj kaaga, pindel nahik ke a ndoona yee: «Amiini!» Maak we o mat a ngooknoox, a mbaɗooxaa.