Read NQAARIIT NE ROOG Mbeeñil 8 Bible Online

Mbeeñil 8 - NQAARIIT NE ROOG bible

Mbeeñil 8

¹Ye o Mbaal onqe a ñaƥitna o ñaas o ɓetuu ɗikandeer ole, tigaa a naaga yereŋ, a tiim kam asamaan boo ngap genwal waxtu.

²Maaga, ga’aam malaaka ɓetuu ƭik ke a ngeenoox mbaambir Roog, a cooxel a luuƥ ɓetaa ƭaq.

³Malaaka fa lakas a gara, a geenoox paam o sadaxand ole, a saq o njaq wurus. A coox’e cuuraay fa mayu, ndax ta ɓoxotin no sadaxand wurus ole refna mbaambir gamb no maad le, a yoonandtin a qeƭ ake no gimu we fop mbogna na Roog.

⁴Fo suun ole na cuuraay fee fo a qeƭ ake no gimu we mbogna na Roog, a yoɗoortooga no ɓay ole na malaaka fee geenoox’ina mbaambir Roog.

⁵Cinj kaaga, malaaka fee a janga o njaq onqe, a naqit fiɗel no sadaxand ole, a yipin teen bo ta may, soo a deɓin a lanq. Naaga, a jeg’a ƭuuɗ fo fangax fo xa kiiñaand fo a yo’nax lanq.

⁶Maaga, malaaka ɓetuu ƭik ke saq’ina a luuƥ ɓetaa ƭaq ake a mbaaja ndax da luuƥ.

⁷Malaaka fa eetaand fee a luuƥa, too kaa nandna nen a kalam a ƥuuɓu fa fiɗel laa fokatoorna fo fo’oy a yuuriida a lanq. Keene a taxa boo a qaaj a tadkandeer ale no lanq ke fo ale no taxar ke fo daaƭ le na xuƥaa fop a dox.

⁸Malaaka fa ƭikandeer fee a luuƥa. Kaa fi’na nen o joong olaa na kaƥaa a girdooxa kam o maag olaa, too a qaaj a tadkandeer ale no maag olaa a suptooxa fo’oy,

⁹a qaaj a tadkandeer ale no pindel ke na ñoowaa kam o maag olaa fop a nqon, a qaaj a tadkandeer ale na kaal ake fop a nduguñoox.

¹⁰Cinj kaaga, malaaka fa ndadkandeer fee a luuƥa. O xoor o maak olaa na kaƥaa nen o jam a yentiida na asamaan, a dal took a qaaj a tadkandeer ale na xa maag axe fo na xa quluɓ axe.

¹¹O xoor oleene koy, nqaaɗaan a ne’e. A qaaj a tadkandeer ale no poofi ke a nqaaɗa, too wiin mayu a nqona a cinj ye da yerna na foofi leene, yaam kaa jeg’u daŋat.

¹²Cinj kaaga, malaaka fa nahkandeer fee a luuƥa. Naaga, a qaaj a tadkandeer ale na qoor ale fo ale na xa qoor axe a nqawe, boo oxuu refna na den, a qaaj a tadkandeer ale na qoolaand um a mo. Jeg’atee a qoolaand na qaaj a tadkandeer ale no ñaal ne fo ale no yeng ole.

¹³Ga’aam too nanaam a canjiik alaa na yetaa na asamaan, a layaa a maak ee: «Sabab! Sabab! Ndaw sabab took we ngenna no lanq ke yaa a luuƥ ake no malaaka tadik lakas ke a njibkaa!»