Read NQAARIIT NE ROOG Ruut 1 Bible Online

Ruut 1 - NQAARIIT NE ROOG bible

Ruut 1

¹No camaane ke haahate we a maadooxaa kam Isra’el, a jeg’a biim maak kam saax laa. O koor a inoora Betleheem, no lanq kaa Yudaa, ten fo o teem fo xa ƥeem xa koor xa ƭaq, a ngenik na xa saawit axaa Mowaab.

²O koor oxeene Elimelek a ne’’e, o teem a ne’el Nowemi, soo xa ƥiy xa ƭaq axe den a ne’el Maxlon fa Kilyon. Na qaw ale Efrata a mbog’u, a ngen Betleheem no lanq kaa Yudaa. A ngara a ndal na xa saawit axaa Mowaab, a ngenaa maaga.

³Cinj kaaga, Elimelek fee o kor Nowemi a xona, soo Nowemi a yoq fo xa ƥeem xa ƭaq.

⁴Weene, no Moomowaab we a ngilgit’u rew. O tew o leng oxe Orpa a ne’’e, o lakas oxe a ne’el Ruut. A ngenooga maaga boo ngap xa kiid xarɓaxay.

⁵Maxlon fa Kilyon a nqona den ɗik fop itam. Naaga, Nowemi a ñak’a o kor um fo xa ƥeem xa ƭaq.

⁶Nowemi a yegta na xa saawit axaa Mowaab ee o Yaal oxe a ƴufgiida xeet um ye ta ci’na a den ndiig mbaax. Maaga, a bufooxa ndax ta nomtoox no saax laa Yudaa, ten fo seemir we ten.

⁷A sutooxa no mbiñ onqaa ta genoogna, seemir ɗik we ten a yoon fo ten. Ye da nomtooxaa no saax laa Yudaa,

⁸Nowemi a laya seemir we ten ee: «Ndiiki, fat oxuu refna na nuun a nomtoox no mbind ya um! Yaasam o paaxel ole no Yaal oxe a ref na nuun, ne ole nuun a refit’ina no we nqonna fo na mi.

⁹Yaasam o Yaal oxe a ci oxuu refna na nuun o kor oxaa na ñootinkan!» A dalfooxa o farakoox a den, soo weene a ndef no mbaɗooxaa.

¹⁰A ndoonaan ee: «Ha’aa, kaa i yoonkaa fa wo na xeet of.»

¹¹Nowemi a doona yee: «Xa ƥees, nomtooxyo no pind nuun. Xar taxu nu mbug o yoon fa mi? Xa kiid es ci’atiraam um jeg xa ƥiy axaa mbaagna o ngeek a nuun.

¹²Xa ƥees, nomtooxyo, ndetyo nqaad, yaam kaam nogoyat lool no jeg o kor, too sax um lay’angaa yee no yeng olene yaakaaraam o jeg o kor oxaa waaguuma o jegit xa ƥiy xa koor,

¹³ndax xan nu mbaag o cung boo da maak? Kaam ee, ndax keene xan a yaqan a nuun nu ndolooxanatinik o koor o lakas? Xa ƥees, ha’aa, baa refit naaga, yaam kene fop o Yaal oxe a doonna a in, mi gartun. Kaa nu yuɗaam sax.»

¹⁴A ndakooxa o mbaɗoox. Cinj kaaga, Orpa a farakooxa o seemir um soo a asoor fo ten, ndaa Ruut o mat a saaƭooxaan.

¹⁵Maaga, Nowemi a laya a Ruut ee: «Ɗeeti, o kend of a nomtooxa na xeet um fo na roog um, wo itam oo, nomtooxi reefanin.»

¹⁶Ruut a doonaan ee: «Ba o seraam um xaƴong ndax reefkiroong! Muu retoona, xam ret maaga, muu genoona, xam gen maaga. Xeet of xan a ref xeet es, soo Roog of a ref Roog es.

¹⁷Muu xontoona, bugaam o xonit maaga, gasel maaga. Yaasam o Yaal oxe a halakaam yaa xaajooruuma fa wo, too refee fa nqon.»

¹⁸Ye Nowemi a ga’na yee Ruut kaa heboox o yoon fo ten, a tiima, a fañatin o lay dara no kaaga.

¹⁹A yoona den ɗik boo Betleheem. Ye da ndokiidaa, teeru faa fop a yo’nooxa, too rew we a layrooga yee: «Mee ndax keeke Nowemi yoo!»

²⁰Nowemi a laya a den ee: «Ba nu nqoyataam Nowemi[1], ndaa nqoyaamoo Maara, yaam o Cegu katil oxe kaa naqadilaam tigi!

²¹Kaam neq’u ye um retaa, ndaa o Yaal oxe a nomtiidaxam o ƥor. Xar taxu boog nu nqoyaxam Nowemi? O Yaal oxe kaa siiknoor fa mi. Kaam ee o Cegu katil oxe a fi’axam ƭomu.»

²²Neene Nowemi a gattu na xa saawit axaa Mowaab, a yoontiid a Ruut fee o seemir um, o Moomowaab oxe. A mbadiida Betleheem ye lorso fee a sogeena o saxadaa.