Read NQAARIIT NE ROOG Ruut 2 Bible Online

Ruut 2 - NQAARIIT NE ROOG bible

Ruut 2

¹Nowemi a jeg’a o koor oxaa fogna no ƥasil ne Elimelek fee o kor um. Oxeene Bowaas a ne’’e, a ref o yaal halal tigi, too a niwel a paax.

²Ruut o Moomowaab oxe a laya a Nowemi yee: «Xaƴaam um ret na xa qol axaa gisaatook xa yaƥ axe saasaxad we a nqaƴaa a cinj den. Yaakaaraam ee xam jeg oxaa ci’axama o ten.» Nowemi a doonaan ee: «O ƥees, reti!»

³Ruut a gisaatooka kam o qol, soo a fod a cinj no saasaxad we. A soƥa koy ee o qol ole ta rokna, Bowaas fee fog’ina no ƥasil ne Elimelek jegun.

⁴Maaga, Bowaas a inoortiida Betleheem, a gar a simin saasaxad we ten ee: «Yaasam o Yaal oxe a ref fa nuun!» A ndoonaan ee: «Yaasam o Yaal oxe a barke’ong!»

⁵Bowaas a laamta o tag um oxe yetooxoogna saasaxad we yee: «An oo o toog oxene?»

⁶O tag oxe yetooxoogna saasaxad we a doonaan ee: «O toog o Moomowaab oxe yooniidna fa Nowemi ye ta gataa Mowaab oo.

⁷Kaa laamit ndax ta reefan saasaxad we, a gisaatooxaa xa yaƥ axe na samtaa na keeg ake. Naa ta garu nqes naa boo fa ndiik, o ndik rek a ñootnooxu.»

⁸Bowaas a laya a Ruut ee: «O ƥees, nan-gilooxaam a paax, ba o gisaatookat no qol no kiin o lakas, too sax ba o goƭ mene, ndaa refi fo jeefeer we mi.

⁹Haani no qol ole na saxadeel. Fodi a cinj jeefeer we na ngisaatooxaa. Andi yee heblaam dag we mi ndax nduqkirang, too o hoɗomange, fat o ret na xa calag axaa, yer no foofi le da ƈeewiidna.»

¹⁰Maaga, Ruut a dalfooxa naag giriƥriƥ a gooknoox, a gung na caf Bowaas, a layin ee: «Nam faaxto fa mi neeke, soo fextaam neen, mi fee andaandeena meen?»

¹¹Bowaas a doonaan ee: «Layeem a qool qac fop ke fi’anoona o seemir of, yaa o kor of a xonna boo fa ndiik fo ne xaƴtoona a faap of fa ya of fo saax le rimee’oona, ndax o ret na xeet faa and’eeroona yaaga.

¹²Yaasam o Yaal oxe a rabdong ke fi’oona! Yaasam saɗig of a magin no Yaal oxe refna Roog fee Isra’el, yaam jaɓnooxiidaa na xa ƥay um.»

¹³Ruut a doonaan ee: «O yaal es, ga’aam o mat ee faaxaa fa mi, yaalaxamo, lay fa mi nen oxaa na layaa fa xaariit um. Yaag oo toox de, fodiim fo o leng no jeefeer we wo.»

¹⁴Ye a put ale a fadna, Bowaas a layaan ee: «Gariidi ñaam fa in! Xoti o ɗeg mbuuru, suupin no fo ñeex ole safniteena bineegar.» Naaga, Ruut a gara, a moof paam no saasaxad we. Bowaas a cooxaan no muum ke. Ruut a ñaama boo a yoqiɗ.

¹⁵Ye ta gisaatookahinna, Bowaas a hebla dag we ten ee: «Fat nu nqaƴin ta gisaatooxaa itam a ndeer a keeg ake, too ba nu nqasanin.

¹⁶Fat nu mbatnaa sax xa yaƥ xa leng-leng na keeg ake, samnaa a den a lanq, ndax ta gisaatooxaa a den, too ba nu mbañtin.»

¹⁷A gisaatooxooga kam o qol olaa boo no kirand naa, soo ta sug ke ta gisaatoox’ina. Ke ta jeg’ina na lorso, a fi’’a a qandi laa na yipaa ngap kilo qarɓeen tadik.

¹⁸A xota ke ta jeg’ina, a xaad na teeru faa. Yaa ta fadna, a lala o seemir um ke ta gisaatoox’ina. A suta itam ke ta yoqiɗ’ina na put um, a cooxin o ten.

¹⁹Nowemi a layaan ee: «Mam gisaatook’o xaye? Mam yongo yong jalaa? Koo yaasam oxe gisoonga a barke’el!» Maaga, Ruut a wetandooxa o seemir um ee no qol no xaa ne’eena Bowaas, a jaloogu.

²⁰Nowemi a laya o seemir um ee: «Yaasam o Yaal oxe naageerna o sagantaa o paaxel um no ñoow we fo no xon we a barke o koor oxeene!» A ɓaata taaga yee: «O koor oxaaga o pog in tigi yoo. A foga no we mbarna o lam[2] a in.»

²¹Ruut o Moomowaab oxe a doona teen ee: «A layaxam itam um ref fo jeefeer we ten boo yaa a saxad ale ten fop a ƴutkaa.»

²²Nowemi a laya a Ruut fee o seemir um ee: «O ƥees, kaaga faaxa lool. Naagi o yoonaa fo jeefeer we ten. Neene, o leng ga’kirang o toroxateel no qol no kiin o lakas.»

²³Naaga, Ruut a yoonooga fo jeefeer we Bowaas, a gisaatooxaa boo neen a saxad ale na lorso fee fa bele fee sax a ƴutu, too a maad’a o genaa fo o seemir um.