Read NQAARIIT NE ROOG Ruut 3 Bible Online

Ruut 3 - NQAARIIT NE ROOG bible

Ruut 3

¹Maaga, Nowemi a laya a Ruut fee o seemir um ee: «O ƥees, kaam bugong o fexeyan o yaal a ndok alaa na ñootinkang.

²Ne andtanoona, Bowaas fee xaƴ’oonga o yoonaa fo jeefeer we ten, o pog in oo. Ndiiki koy, o yaar xan a ret no cukand naa, a feesik lorso fee ten.

³Ɓogooxi, ɗuumoox, rokoox toki mosu soo ret soƥkin. Ɗofti boo baa ga’ong, a refangee kaa ñaam, a yer boo a ƴut.

⁴Bo ta wondookna, fat o ɗeet boo and me ta wondooxna. Cinj kaaga, fat o ret, hulit o ndik na caf ake ten soo wondoox[3] maaga. Ten fa xoox um xan a layong ke waroona o fi.»

⁵Ruut a doonaan ee: «Xam fi fop ke layaxamoona.»

⁶Ruut a gara boo no cukand naa soo a fi ke o seemir um a hebil’uuna.

⁷Bowaas a ñaama, a yer, soo xeeñ um a may fo o ɗaay. Naaga, a wondooka paam juum laa. Ruut a ɓeediida o ndang, a gar, a hulit o ndik na caf ake ten soo a wondoox maaga.

⁸Ndeer o yeng ole, o koor oxeene a naaga tafeet, a yokoox, a yoɗ xoox um, soo a ga o tew oxe wondoox’ina na caf um.

⁹A laamtaan ee: «An oo xene?» A doonaan ee: «O yaal es, mi yoo, mi Ruut. Gisaam, yaam waraxamo o lam.»

¹⁰Bowaas a layaan ee: «O ƥees, yaasam o Yaal oxe a barke’ong! O jaf of olene a lalta ngor of no ƥasil no seemir of kupu ke eetoona o fi, yaam waaƭiro maa bugritoona fo mboƥ ne, ta ref rool we mbaat yaal kalal ke.

¹¹Ndiiki koy, o ƥees, ba o saɗar, xam fi’anong fop ke o laykaa, yaam o mat no nqel naa Roog sax oxuu refna a anda yee gor refo.

¹²Me ta refna koy, a woora yee waraaxoong o lam, ndaa a jega o lakas oxaa moƴaxama o mat o ten.

¹³Fe’i mene. O feet nqes, a soƥangaa yee a bugaang o lam, a faaxa, fat a fi’in. A bugangirang o lam koy, xam lamong, ne ta wooritna yee o Yaal oxe xe ñoowaa. Wondooxi mene boo o feet.»

¹⁴Ruut a wondooxa paam a caf ake Bowaas boo no feet nqes olaa. A inooxa no mbuyukuun naa, yaaga o leng waagafulee o andid o kend um. Bowaas a laya taa no yiif um ee wiin we mbaree o and ee o tew oxene no cukand ne a gar’u.

¹⁵Bowaas a layaan ee: «Muqti a naf of, ɗaapin.» Ruut a muqta a naf um, soo ta yipanin teen ngap kilo qarɓeen ƭik lorso, a dimle’in ta ɓembaanooxin. Cinj kaaga, Ruut a xaada na teeru faa,

¹⁶a gat maa no seemir um. Ye ta fadiidna, Nowemi a layaan ee: «O ƥees, xar gatto koy?» Maaga, Ruut a wetandooxaan fop ke o koor oxeene a fi’anuuna.

¹⁷A layaan itam ee: «Ten ci’axam kilo qarɓeen ƭik lorso kene, a layaam ee: ‹Jaɓiro nomtoox o ƥor maa no seemir of.› »

¹⁸Nowemi a layaan ee: «O ƥees, muñi boo and ne fop a muukoorkaa, yaam boo o koor oxeene a jegaa jam xaye, a ñaaƴ keene boo ta soxu.»