Read NQAARIIT NE ROOG Ruut 4 Bible Online

Ruut 4 - NQAARIIT NE ROOG bible

Ruut 4

¹Bowaas a reta no nqel naa na teeru faa, a moof maaga. Naaga, o koor oxe moƴ’ina o fog fa Elimelek, refna ref oxe Bowaas a ne’oogna a Ruut, a jooniida. Bowaas a xoyaan, a layin ee: «O koor o maak, garangi moof mene», ta gar a moof maaga.

²Cinj kaaga, Bowaas a xoya goor xarɓaxay a ndeer maak waa na teeru faa, a lay a den ee: «Moofyo mene.» Yaa da moofna,

³Bowaas a laya o koor oxe moƴ’ina o fog fa Elimelek ee: «Nowemi fee genik’ina na xa saawit axaa Mowaab, a gata, too kaa jikooxaa o qol ole o pog in Elimelek a jeg’ina.

⁴Kaam xalaat o yegnong o ten soo laamtang ndax o jikin mbaambir no maak wene fo we moofna mene! A soƥangaa yee bugaano o wat, wateen! A soƥangaa koy ee bugino o wat, layateelaam o ten um waag o and, yaam o lakas o leng jegee sañ-sañ faaga a refangee wo. Jegaanum, ndaa yaa ci’axamoona o ten.» A doonaan ee: «Xam watin!»

⁵Bowaas a layaan ee: «No ñaal ne o watkaa o qol ole na xa ƥay Nowemi, xan o lam itam a Ruut o Moomowaab oxe reeƭna o tew no xe ñakna, ndax o qol ole a yoq no ƥasil um.»

⁶O koor oxe war’ina o lam, a doonaan ee: «A reftangaa neene, waagkiim o wat o qol ole, yaam ndik um yaq ke wareema o lam. Ci’aaxoong o watin, yaam waaginum o wat.»

⁷(Yaa fa yaaga kam Isra’el, o bug’angaa o woor yaa o wataa tig mbaat o sofreel o ten, kaa o woloogu o ñaaƭ of soo cooxin o lakas oxe, ndax ta ref seede.)

⁸Oxe war’ina o wat a laya a Bowaas ta jik o qol ole. Naaga, a wola o ñaaƭ um soo a cooxin a Bowaas.

⁹Maaga, Bowaas a laya maak waa fo waa ndeeƭna maaga fop ee: «Xaye nu seede’a yee jiktaam na Nowemi fop ke Elimelek fa Kilyon fa Maxlon a njeg’ina.

¹⁰Lamaam itam a Ruut o Moomowaab oxe ñaawooxoogna a Maxlon. Neene, xan o qol ole a yoq no ƥasil no xe ñakna, too gon um ñufkee a ndeer no fog um fo na saate um. Nuun seede’u keene xaye.»

¹¹Xeet faa fop ndeeƭna maaga fo maak waa a laya yee: «In o mat seede’u keene! Yaasam o Yaal oxe a fi o tew oxe na rokiidaa no mbind of a nand nen a Rakel fa Leya we ndimna xeet fee Isra’el. Yaasam o jeg halal na qaw ale Efrata, gon of a siw kam Betleheem,

¹²xa taan axe o Yaal oxe a ci’kang fo o tew oxeene, a mbi boo mbind of a nand fo mbind Peres fee Tamaar a riman’ina a Yudaa.»

¹³Maaga, Bowaas a gilga a Ruut. A yoona fo ten, soo o Yaal oxe a fi boo Ruut a rok o fud, a ñoot o ƥiy o ngoor.

¹⁴Naaga, rew we a laya a Nowemi yee: «O Yaal oxe a hela o simatel, ten fee ci’oonga xaye o ndaan onqaa na ñootinkang, too gon um a xaykaa kam Isra’el.

¹⁵Xan a ɓutin kam of, a teeteelong, yaam o seemir of oxe fexoonga, a moƴanong xa ƥiy ɓetaa ƭaq, a rimanaang o ten.»

¹⁶Nowemi a janga o nqeq onqe, a ɓopin soo a yarkin.

¹⁷Rew gentand we a layoogata yee: «Nowemi a jega o ƥiy.» Naaga, a moolana o njaaƈ onqe Obed. Obed feene refu faap Isay fee refna ref faap Dawid.

¹⁸Weeke ndefu xa taan axe Peres: Peres kaa rim a Hesron,

¹⁹Hesron a rim a Raam, Raam a rim a Aminadab,

²⁰Aminadab a rim a Naason, Naason a rim a Salmoon,

²¹Salmoon a rim a Bowaas, Bowaas a rim a Obed,

²²Obed a rim a Isay, Isay a rim a Dawid.