Read NQAARIIT NE ROOG 1 Sami’el 11 Bible Online

1 Sami’el 11 - NQAARIIT NE ROOG bible

1 Sami’el 11

¹Ngap o nqool a cinj kaaga, Naahas, o Aa-amon oxe a gara, a wid teeru faa Yabes no saax laa Galaad o kurul-keƥ, ndax ta songin. Wiin waa Yabes a laya a Naahas ee: «Dalni fa in ngiɓoor, too yaaga xan i ndagooxong.»

²Naahas, o Aa-amon oxe a doona a den ee: «Xam dalnin fa nuun, yaa andoona yee kaa nu njaɓ um yul a ngid a ñamaak no xuu refna na nuun. Neene, xam tax Ii-isra’el we fop a niwaƭarel.»

³Maak waa Yabes a ndoonaan ee: «Ci’i a in ndeer mene fo ñaal ɓetuu ƭik, ndax i lul wiin muu refna kam Isra’el. O leng a ƴufgiidangee a in, xan i ƥoxotoox na wo.»

⁴Waa lul’eena a mbadiida Gibe’a, na teeru fee Sawul a gen’ina, soo a lay xeet faa fop kaaga. Yaa xeet faa a nanna ke xew’ina, den fop a ndefa no mbaɗooxaa.

⁵Sawul fee sog’ina o gataa na xa qol axaa, a adin qoox ke ten, a jopra fo kaaga, too a laamta yee: «Xar xewu boo xeet fee a mbaɗooxaa?» A jangtooxe ke duleer we inoor’ina Yabes a lay’ina.

⁶Ye Sawul a nanna kaaga, Yiif le Roog a rokaan, ta dalfoox o fuux fuux maak.

⁷Sawul a janga qoox ƭik, a ɗeg a den teɓ-reɓ, a coox a den wiin, da ƥis a den muu refna kam Isra’el, a yegin Ii-isra’el we yee: «Oxuu reefkeerna a Sawul fa Sami’el na xire faa, xan qoox um a mbi’el neeke.» O Yaal oxe a diidnoora Ii-isra’el we ƭomu, too a nqotta a ƭat nen o koor o leng.

⁸Sawul a limta a den Beseq. A ndeeƭa goor cuni teemeed tadik na carind ake no ɓemb-roog o janoon fo goor cuni qarɓeen tadik na carind ale Yudaa.

⁹A laya waa luliid’eena yee: «Ndetyo lay wiin waa Yabes kam Galaad ee: ‹O feet, farna fo njeeƈ ndeer xoox, xan nu muclel.› » Waa luliid’eena a ndalfooxa o ndet, a yegnik wiin waa Yabes o nan o felu laaga, soo da ndef no mbelakinax.

¹⁰Wiin waa Yabes a laya Aa-amon waa yee: «O feet, xan i ƥoxotoox na nuun, nu mbi a in kuu felna a nuun.»

¹¹No feet olaa, Sawul a xaaja xiixire um a yaj a tadak. No mbuyukuun naa, a ndoka kam saŋe naa, a mbaraa Aa-amon we boo farna fo njeeƈ ndeer xoox. Onqe maad’ina o ñoowaa no Aa-amon we a pasarooxa boo yoqatee sax ɗik waa yoonna.

¹²Maaga, xeet faa a laya a Sami’el ee: «Taa we mbug’eerna Sawul a maadooxan a den? Ƥoxotyo a in a den, ndax i mbar a den.»

¹³Kaa koy, Sawul a laya yee: «O leng warkaand no ñaal nene, yaam xaye o Yaal oxe fi’u a muc kam Isra’el.»

¹⁴Sami’el a laya xeet faa yee: «Ngaryo i ndet Gilgal, ndax i ƭegit maaga ñimatir ke no kaa farna no maat ne Sawul.»

¹⁵Naaga, xeet faa fop a ndeta Gilgal too a ndodta a Sawul maaga o maad mbaambir no Yaal oxe. Cinj kaaga, a ƥoxota o Yaal oxe sadax camsa’oor. Neene, Sawul fo Ii-isra’el we fop a mbelakinoox’a lool.