Read NQAARIIT NE ROOG 1 Sami’el 13 Bible Online

1 Sami’el 13 - NQAARIIT NE ROOG bible

1 Sami’el 13

¹Sawul a maadoox’afula o hiid o leng kam Isra’el too yaa ta rokaa no hiid[9] o ɗikandeer olaa no maat um,

²a jila goor cuni tadik kam Isra’el. Cuni ƭik we a ndeeƭa fo ten Mikmas fo na xa coong axaa Betel, soo wiin juni we a ndef fa Yoonatan na teeru faa Gibe’a fee Bensame. We yoq’ina na xeet faa koy, Sawul a nomta oxuu refna na den no mbind um.

³Yoonatan a wara a yaj no Fiifilista waa ndeeƭna Geba, a yetooxaa. Fiifilista waa fop a yega kaaga. Sawul a simta o luuƥanel kam saax laa fop ee: «Fat Hebre we a yeg keene.»

⁴Isra’el fop a yega yee Sawul a wara a yaj no Fiifilista we, a yeg itam ee Fiifilista we a mbuuxana Ii-isra’el we. Maaga, xiixire waa fop a mbokatoora Gilgal maa Sawul.

⁵Fiifilista we a mbokatoora ndax da ñoxor fo Ii-isra’el we. A njeg’a a sareet-xire cuni qarɓeen tadik fo ŋaaŋaay pis cuni ɓetuu fa leng fo xiixire ñaañaaƴ waa mayitna nen pep lanq na ƥeeraamb o maag. A ngara, a ndal Mikmas, no batand naa Bet-Awen.

⁶Ye goor we Isra’el a nga’na yee a sisa, kaa ƭasoogu no luf ke, na xa baaƥ axe, na xa coong axe, na semb ake fo no kas cegee foofi ke.

⁷A jeg’a itam Hebre waa nqaañna o xuluɓ olaa Yordaan, ndax da njaɓnook no fiisel olaa Gaad fa Galaad. Sawul o mat Gilgal a maad’u, soo xiixire we ndeeƭna fo ten fop a sendaa.

⁸A cunga maaga boo ñaal ɓetuu ƭik ne Sami’el a layit’uuna o ten, ndaa Sami’el gar’ee Gilgal. Xiixire waa a ndalfooxa o pictooraa, a nqaƴaa a Sawul.

⁹Maaga, Sawul a laya yee: «Ƥisiidaamoo sadax fa ndoxel fee fo sadax camsa’oor ke.» Cinj kaaga, a ɓoxota ten fa xoox um sadax fa ndoxel fee.

¹⁰Ye ta muukaa a ƥoxot ale na sadax fa ndoxel fee, Sami’el a fadiidaa, soo Sawul a xetooxiidin ndax ta simnin.

¹¹Sami’el a laamtaan ee: «Ndi, xar fi’o?» Sawul a doonaan ee: «Kaam ga ee xiixire we kaa nqaƴoogaam, yaam ne gareeroona na waxtu fee lay’axamoona, too itam Fiifilista we kaa mbokatoor’u Mikmas.

¹²Maaga, xalaataam ee xan da soƥiid a in Gilgal, ndax da song a in, too i mbaaƭafulee o mbel o Yaal oxe ndax ta jaɓ a in. Ten taxu um jeg njambaar o ɓoxot sadax fa ndoxel fee.»

¹³Sami’el a laya a Sawul ee: «Ke fi’oona ƭof oo! Nananiro kebil ne o Yaal oxe Roog of a cooxoonga. A reeƭangiran, o Yaal oxe geenooxkoogu maat of kam Isra’el boo kili!

¹⁴Ndiiki koy, maat of miñkatee. O Yaal oxe a jila o lakas oxaa feluuna no xeeñ um, ndax ta adooxan xeet um, yaam ne nanaƭaroona ke o Yaal oxe a hebloonga.»

¹⁵Sami’el a inoorta Gilgal, ndax ta ret Gibe’a fee Bensame. Sawul a lima xiixire waa yoq’atna fo ten, da ndef ngap teemeed ɓetuu fa leng.

¹⁶Sawul fa Yoonatan fee o ƥeem fo xiixire waa yoq’atna fa den a ndala Geba fee Bensame. Fiifilista we mat, Mikmas a ndal’u.

¹⁷Maaga, a yaj no xiixire a sutoorta no saŋe ne no Fiifilista waa, a mbi a qaaj a tadak. A qaaj a eetaand ale a janga a ƭat ale Ofra farna fo saax laa Suwal,

¹⁸a qaaj a ƭikandeer ale a xot a ƭat ale Bet-Horon, soo a qaaj a tadkandeer ale a jagin na ƭat alaa no ŋat olaa fudookna farna fa yulanq alaa Seboyiim no saax olaa na koƥ-a-ƥor alaa.

¹⁹No camaane kaaga, o paal o leng jeg’ee kam saax le Isra’el boo Isra’el a xet, yaam Fiifilista we mbug’ee Hebre we a njalan a qoox den laƥ mbaat a salma.

²⁰O koor oxuu refna no Ii-isra’el we a retooga maa no Fiifilista waa ndax ta lakanel helaar xooxir um, goɓi um, ɓaax um mbaat a ñand um.

²¹A lakin helaar xooxir fo goɓi oxe jarooga ƭik no tadik kuu ndefna no xanjar xaaliis fa nqoolu, a lakin ɓaax fo a bad ale no njelem ne no loq ole na xurteel qoox oxe jarooga a qaaj a tadkandeer no xanjar xaaliis fa nqoolu.

²²Ten taxu no ñaal naa na xire faa o leng no yoon we Sawul fa Yoonatan jeg’ee laƥ ne’atiim a salma. Sawul fa Yoonatan fee o ƥeem soom njeg’u a den.

²³A qaaj a leng no xiixire we no Fiifilista we a ngara, a ndaliid na qufid alaa Mikmas.