Read NQAARIIT NE ROOG 1 Sami’el 15 Bible Online

1 Sami’el 15 - NQAARIIT NE ROOG bible

1 Sami’el 15

¹Sami’el a laya a Sawul ee: «Mee ndax mi o Yaal oxe a luliid’u, ndax um ɗuumong o maad Isra’el fee xeet um. Nan-gilooxi boog ke o Yaal oxe a layna.

²O Yaal oxe Hupna fop kaa tee: ‹Xam rabdinoox took Aa-amalek we, yaam ne da kand’ina Ii-isra’el we, ye da sutooxna Misira boo a nqot a ƭat den.

³Ndiiki koy, reti xaw Aa-amalek we, sak pexey ke da njegna fop. Yirimkiro a den, too fat o war goor we fo rew we, xa caaƈ axe fo xa qeq axe, qoox ke fo paal ke, keeleemb ke fo xa paam axe.› »

⁴Sawul a fokata xiixire waa fop, a limit a den Telahiim. A jeg’a goor cuni teemeed ƭik waa ñaaƴoogna fo xa caf den fogreerna fo goor cuni xarɓaxay waa inoor’ina Yudaa.

⁵Sawul a ɗoxa xiixire um boo da mbaambnoox teeru faa no Aa-amalek waa, soo da njagandooxit na paas alaa ŋiis’ina.

⁶A laya Keekeni waa yee: «Aca sutooxyo a ndeer no Aa-amalek we, ndik nu mbog na moocand ale i moocandkaa a den, yaam nu mbaax’a no Ii-isra’el we fop, ye da sutoorna Misira.» Naaga, Keekeni waa a ndalfooxa o sutoox a ndeer no Aa-amalek waa.

⁷Sawul a refa no xawtaa Aa-amalek we no jegel olaa Hawila boo na coonand alaa na koƥ-a-ƥor alaa Suur jasnoorna fa Misira.

⁸A ndama a Agag, o maad oxe no Aa-amalek we soo a saŋkit lakas waa fop laƥ.

⁹Kaa koy, Sawul fo xiixire um mbaree a Agag fo cegel ke moƴ’ina o mbaax na ked ake boo no fo mbote ne fo ke moƴ’ina o mbaax na xa siir axe boo na xa qeel axe too yaq’ee ke faax’ina no jeg den fop. A ngeeka keene fop. Ke may’eerna o njiriiñ soom a yaq’u.

¹⁰Maaga, o Yaal oxe a laya a Sami’el a ƭelem akene yee:

¹¹«Ricooxaam tigi ke taxna um dalin a Sawul o maad, yaam kaa fesaam a cinj too nananee kebil es.» Sami’el a jaaxɗa lool soo a ref no xeɗooxaa o Yaal oxe kam o yeng olaaga fop.

¹²No feet olaa, Sami’el a inooxa ƥiiɓ teel, ndax ta xetik fa Sawul. A laye yee: «Sawul a reta na saate faa Karmel, ndax ta sipan a xoox um ɓil laa na wetandooreel o ndam onqe ten, cinj kaaga ta suur boo a fad Gilgal.»

¹³Sami’el a daba a Sawul, soo Sawul a layin ee: «Yaasam o Yaal oxe a barke’ong! Fadnaam ke o Yaal oxe a hebil’axama fop.»

¹⁴Kaa koy, Sami’el a laamtaan ee: «Xar refu xa lool axe na ked ake fo na xa siir axe um nanaa boog?»

¹⁵Sawul a doonaan ee: «Kaa i ƥistiid a den maa no Aa-amalek waa, yaam xiixire we kaa kes cegel ke moƴna o mbaax na ked ake fo na xa siir axe, ndax da sadaxin o Yaal oxe Roog of, ndaa ke yoqna fop, i yaqa a den.»

¹⁶Sami’el a ɗegooxaan ee: «A deya! Xam yegnong ke o Yaal oxe a layaxama no yeng ole faafna.» Sawul a doonaan ee: «Layi.»

¹⁷Sami’el a layaan ee: «Yaaga, kaa o xalaatoogu yee refiro o kiin o maak, ndaa yaqanee o Yaal oxe a ɗuumong o maad Isra’el, o refat oxe adooxanna a carind ake Isra’el fop.

¹⁸O Yaal oxe a jooxaang a ƭat ale, ye ta layoonga yee: ‹Reti saŋik baabakaad weene ndefna ndef Aa-amalek we, o ñoxoraa fa den boo yaa o moocandkaa a den.›

¹⁹Xar taxu nan-gilooxiro o ñuxur no Yaal oxe ndax o deɓoox no njangal ne? Neene, fi’aa ke faaxeerna na kid no Yaal oxe.»

²⁰Sawul a doona a Sami’el ee: «Bara! Nan-gilooxaam a paax o ñuxur ole no Yaal oxe, reef a ƭat ale ta joox’axama. Saŋkaam Aa-amalek we fop bo ta yoqaa a Agag fee o maad den ɓisiiduuma.

²¹Kaa koy, xiixire we a njanga cegel ke moƴna o mbaax na ked ake fo na xa siir axe mbar’eena o yaq, a sadaxin o Yaal oxe Roog of meeke Gilgal.»

²²Sami’el a layaan ee: «Ndax sadax toxel ke fo sadax lakas ke o Yaal oxe a moƴu o bug ee o nanan fa lay um? Nanan ne moƴanun sadax ke, njaɓan ne a moƴanin neebam fee na suk paal ake.

²³Kaam ee nanaƭar ne kaa faaxaƭarit nen bakaad ƭeet, njaɓaƭar a ref nen a cuur pangool refna naanaxir ƥor. Neene, yaam ne deɓoona fa lay fee no Yaal oxe, ten itam a deɓaang, ndax maadooxankatiro xeet um.»

²⁴Naaga, Sawul a laya a Sami’el ee: «Bakaadaam, yaam reefiim ke o Yaal oxe a heblaxama fo ke layaxamoona. O saɗar xiixire es rek taxu um xaƴ a den da mbi ke da mbugna.

²⁵Ndiiki koy, kaam xeɗang o waasanaam bakaad fee mi too gariid yoon fa mi, ndax um gung mbaambir no Yaal oxe, faɗooxin.»

²⁶Sami’el a doona a Sawul ee: «Yoonkiim fa wo, yaam kaa o deɓ fa lay fee no Yaal oxe, too ten itam a deɓaang, ndax maadooxankatiro xeet fee Isra’el.»

²⁷Ye Sami’el a geleerooxaa ndax ta ret, Sawul a kaflooxa o noflax ole no sabadoor ne ten boo ta xuuyoox.

²⁸Sami’el a layaan ee: «Neene o Yaal oxe a suqtitu maat ne Isra’el na xa ƥay of xaye, a cooxin o lakas oxaa moƴoonga.

²⁹O Yaal oxe refna o ndam onqe Isra’el naangee o maaɓaa too kaa damaa fa lay um, yaam refee o kiin boo fa lay um a fe’aa a koƥ.»

³⁰Sawul a ɓaataan o lay ee: «Bakaadaam! Ndiiki koy, kaam xeɗang o niwaam mbaambir maak we na xeet es fo mbaambir Ii-isra’el we fop, gar yoon fa mi, ndax um gung mbaambir no Yaal oxe Roog of, faɗooxin.»

³¹Maaga, Sami’el a jaɓata o yoon fo ten, soo Sawul a ret a gung mbaambir no Yaal oxe, a faɗooxin.

³²Cinj kaaga, Sami’el a laya yee: «Ƥisiidaamoo a Agag, o maad oxe no Aa-amalek we.» Agag kaa sendoogu, ye ta garaa me Sawul, a layaa yee: «Fa nqon daal felee[10].»

³³Sami’el a layaan ee: «Ne laƥ of a sambranditna rew fo xa ƥiy den, neene ya of a sambranditkeel itam fo o ƥeem.» A ɗega a Agag teɓ-reɓ mbaambir no Yaal oxe kam Gilgal.

³⁴Cinj kaaga, Sami’el a xaada Rama, soo Sawul a xaad Gibe’a fee Sawul.

³⁵Sami’el mosatee o ga a Sawul boo neen a xonu. O Yaal oxe a ricoox’a ke taxna ta dalin a Sawul o maad Isra’el, too Sami’el oo a naqadilooxa yaam Sawul nen oxaa na ñaawooxaa.