Read NQAARIIT NE ROOG 1 Sami’el 19 Bible Online

1 Sami’el 19 - NQAARIIT NE ROOG bible

1 Sami’el 19

¹Sawul a laya o ƥeem Yoonatan fo dag we ten fop ee kaa bug Dawid a warel. Yoonatan feene koy, kaa hiɓ’u nqaariit saƭku fa Dawid.

²Ten taxu a ñu’aan pexey ne faap um, a layin ee: «Sawul fee faap es kaa waaƭaa maa ta warnoortoonga. Fat o wootoox boog o feet nqes, waaƭ maa ɗasoona soo moof maaga.

³Xam yooniid fa faap es na koƥ ale o ɗaskaa, geenoox paam um soo layin kaa jofna na wo. Kuu ta yuuɓna na wo rek, xam ñu’ong o ten.»

⁴Maaga, Yoonatan a layana a Dawid paax me faap um ee: «Wo, o maad oxe, wariro o tooñ o tag of Dawid, yaam ten fa xoox um fi’irang paaxeer leng, ndaa kañ, o ndimle maak a refu na wo.

⁵A jikooxa o ñis um, ndax ta war o Fiifilista xaa, too o Yaal oxe a ci’a a Isra’el o ndam o maak a koom. Ga’oodaa keene boo felakinoox teen. Xar taxu boog o bug o bakaad, ɓax fo’oy no cofu xene, warnoor a Dawid, too fi’ee paaxeer leng?»

⁶Sawul a nan-gilooxa o ñuxur ole Yoonatan soo a daaɓoox, a lay ee: «Ne ta wooritna yee o Yaal oxe xe ñoowaa, Dawid warkaand.»

⁷Maaga, Yoonatan a xoya a Dawid, a jangtooxin a ƭelem akaaga fop soo a ɓisiidin me Sawul. Dawid a jangatina calel um me no maad oxe ne ta fi’tooguuna yaaga.

⁸Ye xire fee a jangatinna, Dawid a reta, a xire’ik fo Fiifilista we, a xaw a den a qaw a ƭomu boo da ƈuf.

⁹Bes, yiif faaxeer laa o Yaal oxe a luliidna a rokahina a Sawul, a soƥ ta moof kam mbind um, a pokoox a salma le, Dawid a xilimbanan.

¹⁰Maaga, Sawul a jooraan a salma le ten, ndax ta rengin fo tabax ne, ndaa Dawid a kuuca, a salma le a dib no tabax ne, soo Dawid a ƴuf, a daɗ. No yeng olaa,

¹¹Sawul a lula wiin da yetook mbind Dawid, ndax da mbarin, yaa roog a feedna. Mikal fee o tew Dawid a ñu’aan ee: «O ƴufangee daɗ kam o yeng olene, roog feedkirang.»

¹²Maaga, Mikal a ñoomna a Dawid no falangteer ole, soo ta ƴuf, a ret. Neene mat a daɗtu.

¹³Mikal a janga nitaal mbangool ne, a doonin took njong ne, a jang saŋke naa fi’teena a ƥiñ pambe, a letnin na qoox njong ake soo a hul nitaal ne pay.

¹⁴Ye we Sawul a lul’ina a ndokna, ndax da ndam a Dawid, Mikal a laya a den ee: «Kaa jir.»

¹⁵Sawul a nomta a den, ndax da nga a Dawid, a lay a den ee: «Ƥisiidaamoo o ten fo njong um fop, ndax ta warel.»

¹⁶Ye we lul’eena a nomtooxiidna, a soƥa nitaal mbangool ne took njong ne, saŋke ne fi’teena a ƥiñ pambe a fod na qoox ake.

¹⁷Sawul a laamta a Mikal ee: «Xar taxu o naxaam, xaƴ o pañ es ta ƴuf, a daɗik?» Mikal a doonaan ee: «Kaa lay’aam ee: ‹O xaƴangiraam um ret, xam warong.› »

¹⁸Neene mat Dawid a ƴuftu boo a daɗ. A reta Rama maa Sami’el, a wetandooxin ke Sawul a fi’’uuna fop. Cinj kaaga, a yoona, a ndalik Nayot refna ref ngenand ne no duleer we Roog, a moof maaga.

¹⁹Sawul a yegne yee: «Dawid oxaay Nayot na teeru faa Rama.»

²⁰Ye Sawul a yegna keene, a lula goor, ndax da ndamik a Dawid. Kaa koy, ye weene a nga’na a yaj no duleer we Roog Sami’el a adooxan’ina, da yenaa leer, Yiif le Roog a fudooxa took no we Sawul a lul’ina, soo da yenaa leer den fa qoox den itam.

²¹Ye Sawul a yegna kaaga, a lula goor lakas. Waaga itam a yena leer. Sawul a lulahina goor lakas jaf dadkandeer, ndaa waaga itam, leng kut ke xew’u fa den.

²²Maaga, Sawul a dalfooxa o retan a xoox um Rama. Ye ta fadiidna no mband maak naa reeƭna Seeku a laamta yee: «Mam Sami’el fa Dawid a ndefu?» A ndoonaan ee: «Owaay Nayot na teeru faa Rama.»

²³Kaa koy, ye Sawul a inoorna maaga, a xotaa farna fa Nayot, Yiif le Roog a fudooxa took um itam, ten oo ta yenaa leer boo neen a fadiidu Nayot na teeru faa Rama.

²⁴A wola tikoorik um soo a yen leer mbaambir Sami’el boo a naag dal, a yoq duŋ no ñaal naaga fo no yeng olaaga. Ten taxu ta layeel ee: «Ndax Sawul itam no duleer we Roog a fogu?»