Read NQAARIIT NE ROOG 1 Sami’el 21 Bible Online

1 Sami’el 21 - NQAARIIT NE ROOG bible

1 Sami’el 21

¹Maaga, Dawid a reta, soo Yoonatan a nomtoox na teeru faa.

²Dawid a reta Noob maa Ahimelek fee o saasadax oxe. Ahimelek a xetooxiida a Dawid, a sendaa soo a layin ee: «Xar taxu o yooniid wo doŋ, too jegee o leng oxaa yoonna fa wo?»

³Dawid a doona a Ahimelek ee: «O maad oxe kaa heblaam, a layaam ee: ‹Ba o leng a and ke taxna um lulang fo kebil ne cooxoonga.› Kaam lay yoon es me i nqetkaa.

⁴Ii, ndiiki koy, xar jego nen ñaamel? Ci’aam puuru ƥetik mbaat kuu jegoona rek.»

⁵O saasadax oxe a doona a Dawid ee: «Saqiim puuru a refangee xa kaf puuru xe ƥoxoteena o Yaal oxe. A soƥangaa koy ee xa pes axe wo nduqee rew, waagaaxoong o coox teen.»

⁶Dawid a doona o saasadax oxe yee: «A woora yee a nqoola. A mbanuu i ndetaa na xire, kaa i mbañteel o nduq rew, ndax ngoor ke mi a ted soo a nqool. Ke kene a refeerna a ƭat xire fop oo, yaqanee a nqoola qac.»

⁷Maaga, o saasadax oxe a ci’aan na xa kaf puuru xaa ƥoxoteena o Yaal oxe, yaam jeg’ee lakas. Xa kaf axeene kaa nqotit’el mbaambir no Yaal oxe soo a softel xa kaf xa sumu.

⁸No ñaal leng kut ne, a jeg’a maaga o leng no dag we Sawul oxaa kes’eena, a geekel mbaambir no Yaal oxe. Doweg a ne’’e, a ref o Ee-edoom. Ten reeƭu o aa-adax oxe no gaynaak we Sawul.

⁹Dawid a laamtahina a Ahimelek ee: «Ndax saqiro mene a salma mbaat laƥ? Kaa mi kat, saqiidiim a saqiid laƥ es too saqahiniim ƥonax lakas leng, yaam o maad oxe kaa ñofandoox’u.»

¹⁰O saasadax oxe a doonaan ee: «Laƥ ne Golyat, o Fiifilista xe warit’oona na yulanq alaa Eela soom refu meen. Oxaay laqa o jamb ole, a laxasel sabadoor. A soƥangaa too bugaano jang, jangeen, yaam ten soom i njegu meen nen ƥonax.» Dawid a doonaan ee: «Cooxaam o ten, yaam jegee naa moƴuuna.»

¹¹No ñaal leng kut naaga Dawid a maad’a o ƴufaa a Sawul boo a ret maa Akiis fee o maad Gaat.

¹²Dag we no maad Akiis a ngara, a lay o yaal mbind den ee: «Mee ndax kene Dawid fee o maad Isra’el oo? Ten o mat gimanooge, a fecaneel ee: ‹Sawul a xawa wiin juni, Dawid o mat, a xaw wiin cuni xarɓaxay.› »

¹³Dawid a and’a yee fa lay faaga a saɗarnooxa, too a diid’a lool a Akiis fee o maad Gaat.

¹⁴A dalfooxa o suptooxaƭoox mbaambir Fiifilista we, a layaa ƭooɗofir ƥor, a fiisaa no begax ke na xa ton-maax axe soo a xaƴ a yaraw ake da yuuraa no raatam ole.

¹⁵O maad Akiis a laya dag we ten ee: «Nuun moƴu o and ee o kiin oxene, pambe um ngatee! Xar taxu boog nu ƥisiidaxam o ten?

¹⁶Ndax kaa mene jegee ɗof boo a tax nu ƥisiidaam oxene ta fi’aa ƭooɗofir ke ten mbaambir es? Baa ta rok no mbind es kat!»