Read NQAARIIT NE ROOG 1 Sami’el 22 Bible Online

1 Sami’el 22 - NQAARIIT NE ROOG bible

1 Sami’el 22

¹Dawid a ƴufta Gaat, a jaɓnook no luf naa Adulaam. Yaa maag we ten fo fog we ten fop a yegna kaaga, a ndeta a soƥkin.

²Goor we njeg’ina coono fo we saq’ina xa lad fo we sawar’eerna fop a ngara, a mbokatoor me ten, soo ta refat o aa-adax den. Den fop a ndeeƭa ngap goor teemeed nahik.

³Dawid a inoora Adulaam, a ret Mispe kam Mowaab, a lay o maad oxe Mowaab ee: «Daali maad, kaam xeɗang, ndax faap es fa ya es a moof meeke boo yaa anduuma ke Roog a fi’kaa na mi.»

⁴Dawid a ɓisa a faap um fa ya um maa no maad oxaa Mowaab, soo da moof maaga no ñaal ke Dawid a jaɓnooxoogna fop.

⁵Bes, o tuleer Roog oxe ne’’eena Gaad a laya a Dawid ee: «Ba o moof no ndoktal neeke. Reti no saax laa Yudaa.» Naaga, Dawid a reta no jec olaa Heret.

⁶Sawul a yega yee wiin we a njega o nan na Dawid fo yoon um. Sawul koy, Gibe’a a reeƭu, a moof no ñaang, no yook mburndu, a pokoox a salma um, dag we ten fop a ngeenoox, a ndeerin.

⁷Sawul a laya dag waa ndeeƭna a paam um ee: «Nuun Beebensame we, nan-gilooxyo! Ndax o ƥeenqe Isay kaa reg a nuun xa qol fo a ƭing taxar biiñ? Ndi kaa reg a nuun nu adooxanaa goor juni mbaat goor teemeed

⁸boo a tax nuun fop nu ngiɓanaam o ngir? O leng sax waagiraam o yegin ee o ƥees kaa hiɓ nqaariit fa Dawid. Yuɗiim o leng na nuun sax boo ta waagaam o yegin ee o ƥees soobu o ƥiy onqe Isay boo ta fogaxam, ne ta refitna xaye.»

⁹Doweg, o Ee-edoom oxe reeƭna a ndeer dag we Sawul, a doonaan ee: «A kom ale, ga’aam o ƥiy onqe Isay a gar Noob, maa Ahimelek fee o ƥiy Ahituub.

¹⁰Ahimelek a laamtanaan o Yaal oxe soo a cooxin ñaamel fo laƥ ne no Fiifilista xe ne’’eena Golyat.»

¹¹Maaga, o maad oxe a lula wiin da nqotik a Ahimelek fo we mbogna no ƥasil um fop too a ndef saasadax kam Noob. Den fop a ngara mbaambir o maad oxe.

¹²Sawul a laya a Ahimelek ee: «Wo o ƥiy onqe Ahituub nan-gilooxaam!» Ta doonin ee: «Daali maad, mexey nan-gilooxang.»

¹³O maad oxe a laamtaan ee: «Xar taxu nu ngiɓanaam o ngir, wo fo o ƥiy onqe Isay? Wo o mat cooxun ñaamel fo laƥ soo laamtanin a Roog, ndax ta fañraa fa mi, a fogaxam, ne ta refitna xaye.»

¹⁴Ahimelek a doonaan ee: «Daali maad, ndax a ndeer dag we wo fop a jega na den oxaa moƴna o gore a Dawid? O seemir of oo, a ref itam oxe adooxanna we na yetooxang, a niwel a paax kam mbind of.

¹⁵Keene refee jaf feraand le um laamtanan a Roog! Koo boo muk, um hiɓanang o ngir! Ba o jambaam, too ba o jamb we no ƥasil es, yaam o mat a woora yee mi fee o tag of andiim dara no keene fop!»

¹⁶O maad oxe a laya a Ahimelek ee: «Wo fo ƥasil of fop xan nu mbarel.»

¹⁷Naaga, o maad oxe a laya dag we yetooxooguuna too a mbod’un na xa saax ee: «Aca mbaryo saasadax weeke no Yaal oxe, yaam den oo kaa mbarit’u a Dawid. A and’a xil ee Dawid kaa ƴuf, soo da mbañaam o yegin o ten.» O leng koy no dag we Sawul bug’ee o yoɗ o ɓay um, ndax ta war saasadax weene no Yaal oxe.

¹⁸O maad oxe a laya a Doweg, o Ee-edoom oxe yee: «Aca, wari saasadax wene.» Doweg a geleerooxa, a war saasadax we. No ñaal naaga, a wara saasadax qarɓeen ɓetuu tadik fo saasadax ɓetuk waa oxuu refna na den a rokoox’ina o jamb olaa fi’teena gaare.

¹⁹Kam Noob fee reeƭna teeru fee no saasadax weene koy, Sawul a warnoor’a goor we fo rew we fo xa teɓandoong axe fo xa qeq axe boo no qoox ke fo xa paam axe fo paal ke fo pambe ke sax.

²⁰Abiyataar fee reeƭna o leng na xa ƥiy axe Ahimelek fee o ƥiy Ahituub soom ɓostoox’u, a ƴuf maa Dawid.

²¹A gara, a yegin a Dawid ee Sawul a warnoora saasadax we no Yaal oxe.

²²Dawid a layaan ee: «A kom ale, ga’aam ee Doweg, o Ee-edoom oxe, a reeƭa Noob itam. And’aam ee ñakkee o ɓay a Sawul fop. Yaaga koy, mi gartu fa nqon fee no wiin of weene fop.

²³Ndiiki koy, yoqi me mi too ba o saɗarat dara. Sawul fee bugna o xuuf o ñoow of, bugu o xuuf o ñoow es itam, ndaa o refangaa me mi, xan o yaadoox a paax.»