Read NQAARIIT NE ROOG 1 Sami’el 28 Bible Online

1 Sami’el 28 - NQAARIIT NE ROOG bible

1 Sami’el 28

¹Na jamaane faaga, Fiifilista we a mbokata a yaj ake no xiixire we den, ndax da ñoxorik fa Isra’el. Akiis a laya a Dawid ee: «Fat a woorong ee wo fo yoon of xan nu yoon fa in na ñoq aleene.»

²Dawid a doonaan ee: «Daali maad, iyo, too wo fa xoox of xan o ga ke waaguuma, mi fee o tag of.» Maaga, Akiis a dakooxaan o lay ee: «A faaxa, xam fi’ong o yeeyetax es boo kili.»

³Sami’el koy, a xon’a, too Ii-isra’el we fop a mboy’aan, a ngasin na teeru faa Rama me ta gen’ina. Sawul o mat, kaa fañit’u no saax um ɗeet we fo fop we na ƈufginooraa xon we.

⁴Na bes fa leng, Fiifilista we a mbokata a yaj ake den soo a ngar a ndal Suuneem. Sawul a fokata xiixire we Isra’el, da ngar a ndal Gilbowa.

⁵Ye Sawul a ga’na saŋe ne no Fiifilista we, a diida ƭomu boo o laaw ole ten a ref no fiiƭaa.

⁶Sawul a dalfooxa o laamit o Yaal oxe, ndaa oxeene dooniran dara, ta ref no ƭaad mbaat fo mbanjang tedu ne no saasadax oxe mbaat fo o tuleer um.

⁷Maaga, Sawul a laya dag we ten ee: «Mbaaƭanaamoo o tew oxaa na ƴufginooraa xon we, ndax um ɗeetnook maa ten.» A ndoonaan ee: «A jega teen o tew oxaa refna En-Door.»

⁸Sawul a supta a tokax, ndax andidkaand soo a yoon fo goor ɗik. O yeng a mbadiidu me no tew oxe, soo Sawul a lay o tew oxe yee: «Kaam xeɗang o ƴufginooxanaam o qon. Feeñlanaam oxe um laykang.»

⁹O tew oxe a doonaan ee: «Wo fa xoox of andaa xil ke Sawul a fi’na. A warnoora ɗeet we fo we na ƈufginooraa xon we kam saax le. Xar taxu boog o fogaxam, bugaam o warnoor?»

¹⁰Sawul a daaɓooxa no Yaal oxe yee: «Ne ta wooritna yee o Yaal oxe xe ñoowaa, dara soƥkirang no keene!»

¹¹O tew oxe a laamtaan ee: «An bugo um feeñlanong?» A doonaan ee: «Feeñlanaam a Sami’el.»

¹²Ye o tew oxe a ga’na a Sami’el, a dalfooxa o faɗoox, a lay a Sawul ee: «Xar taxu o naxaam? Mee ndax wo refu Sawul!»

¹³O maad oxe a layaan ee: «Ba o saɗar dara. Layaam rek ke ga’oona.» O tew oxe a doonaan ee: «Kaam ga o kiin Roog ta sutoortiidaa no xooɗ-ee-xooɗ le no lanq ke.»

¹⁴O maad oxe a laamtaan ee: «Nam a nandu?» O tew oxe a doonaan ee: «O koor o nogoyu yoo, a rokoox sabadoor.» Maaga, Sawul a dalfooxa o and ee Sami’el o mat a reeƭu. A gooknooxa o ndang, a gung a lanq.

¹⁵Sami’el a laamtaan ee: «Xar taxu o yaqanaxam a ñootnax, xoynaxam?» Sawul a doonaan ee: «Kaam jaq lool. Fiifilista we kaa siiknoor fa mi, soo Roog a xuunaam. Doonatiraam a reefandin no tuleer um mbaat no ƭaaɗ. Keene xoynitoong, ndax o layaam ke waruuma o fi.»

¹⁶Sami’el a doonaan ee: «Ye andoona boo ƴut ee o Yaal oxe kaa xuunong, a refat o pañ of, xar taxu o laamtaxam?

¹⁷O Yaal oxe a fadna ke ta heboox’ina, too um yegin’ong o ten. A suqta maat ne na xa ƥay of, a cooxin o lakas, ta ref Dawid.

¹⁸Ne nananeeroona o Yaal oxe, fañ o moocand Aa-amalek we, ne ta bugit’uuna, ten taxu ta doonong keene xaye.

¹⁹Too sax, xan o Yaal oxe a ɓoxotong, wo fa xeet fee Isra’el na xa ƥay no Fiifilista we. O feet, wo fo xa ƥeef xan nu ndef fa mi kam jaaniif, too xan o Yaal oxe a ɓoxot xiixire we Isra’el na xa ƥay no Fiifilista we.»

²⁰Ndak fo ndak, ye Sawul a nanna a ƭelem ake Sami’el, diid a damaan, ta naag dal, a yen. Moƴtaa sax jeg’atee doole, yaam a gij’a ñaam na faak faa.

²¹O tew oxe a matiidaan, a ga ne ta diiditna. Maaga, a layaan ee: «Ga’aa yee mi fee o ceefeer of, nan-gilooxaam o ñuxur of. Kaam jikoox o ñis es yaam o nananong.

²²Ndiiki koy, wo itam, nan-gilooxaam, mi fee o ceefeer of. Xaƴi um cooxong o ɗeg mbuuru o ñaam, ndax o waag o jeg doole faa xotatintoona a ƭat of.»

²³Sawul a faña faƥit ee ñaamkee, ndaa dag we ten fo o tew oxe a mbañaan o mbaas boo ta mujat o jaɓ. A inooxa a lanq, a moof took njong ne.

²⁴O tew oxe a jeg’a no mbind um o nqeel onqaa ta hud’ina. A ñofaan o war, a xot mbiɗel, a xiiwin, a juɗ teen xa kaf xa canja’e.

²⁵O tew oxe a diƈana a Sawul fo dag we ten. A ñaama soo a nqotatin a ƭat den no yeng o leng kut olaaga.