Read NQAARIIT NE ROOG 1 Sami’el 29 Bible Online

1 Sami’el 29 - NQAARIIT NE ROOG bible

1 Sami’el 29

¹Fiifilista we a mbokata a yaj ake den soo a ndal Afeq. Ii-isra’el we o mat, a ndal paam a cur alaa refna Yisre’el.

²A yaj ake no xiixire teemeed we fo ake no xiixire juni we, gelwaar we no Fiifilista we a adooxan’ina, mbod’u mbaambir, Dawid fo yoon um a mbalak fo o kelwaar Akiis.

³Gelwaar we no Fiifilista we a laamta yee: «Hebre wene koy, aniin oo?» Akiis a doona a den ee: «Dawid fee reeƭna o tag Sawul fee o maad Isra’el oo! Yaa ta refna fa mi, a miña lool, too ga’iim kaa ɓanjtanuuma, no kaa xotitna no ñaal naa ta garna me mi boo na caf roog ake xaye.»

⁴Gelwaar we no Fiifilista we a mbuuxana a Akiis, a layin ee: «Nomti o koor oxene, ta saktoox maa dalin’anoona. Baa yoon fa in, yaam ndik ta geleerooxan a in, a siiknoor fa in kam a ñoq ale. Ndi o mat, nam o yaal mbind um o eetaand a waagun o jaɓit, a refangee kaa ɓoxotin a qoox ake in?

⁵Mee ndax Dawid fene gimanooge, a fecaneel ee: ‹Sawul a xawa wiin juni, Dawid o mat, a xaw wiin cuni xarɓaxay.› »

⁶Akiis a xoya a Dawid, a layin ee: «Ne ta wooritna yee o Yaal oxe xe ñoowaa, neene a woortu yee o kiin o booru refo. Bug’aam lool o ref fa mi fo xiixire es, i ndetaa ngaraa, yaam ga’iim na wo paaxeer leng, no kaa xotitna no ñaal naa garoona me mi boo na caf roog ake xaye, ndaa feliro gelwaar lakas we.

⁷Ndiiki daal, nomtooxi o ret na jam, ndax tooñkiro gelwaar we no Fiifilista we.»

⁸Dawid a laya a Akiis ee: «Daali maad, ndi xar fi’um? Xar ga’o na mi fee o tag of, naa refum fa wo boo na caf roog ake xaye, kaa waagna o tax ñoxorkiim fo fañ we no maad oxe, o yaal es?»

⁹Akiis a doona a Dawid ee: «Dara kaa ga’uuma na wo! Kaa o felaam boo nen a malaaka Roog, ndaa gelwaar we no Fiifilista we kaa lay ee: ‹Waree o yoon fa in na ñoq ale.›

¹⁰Waraa o inoox boog o feet ƥiiɓ teel, wo fo dag we no yaal mbind of Sawul yooniidna fa wo, nu ndet no mbiñ onqe cooxuuma a nuun, too ba o ɗomatooxin no xeeñ of muk, yaam felaxamo. Boo a kid a nqoolaa, fat nu inoox ndet.»

¹¹No feet olaa ƥiiɓ teel, Dawid fo yoon um a inooxa, ndax da nomtoox no saax laa no Fiifilista waa, Fiifilista we o mat a suur Yisre’el.