Read NQAARIIT NE ROOG 1 Sami’el 30 Bible Online

1 Sami’el 30 - NQAARIIT NE ROOG bible

1 Sami’el 30

¹Na lakra laa, ye Dawid fo yoon um a mbadiidna Siklag, a soƥ’a Aa-amalek we a song o saax ole farna a Yudaa no ɓemb-roog o ñamaak fa Siklag. Kaa mbayit’u saate faa, a ndaaɓin.

²Kaa ndam’u rew we fo fop we ndeeƭna kam saate faa, maak fo xa caaƈ. Mbar’ee o leng koy, ndaa kaa ndam’u a den rek, a nqot fa den a ƭat.

³Neene, ye Dawid fo yoon um a mbadiidna na saate faa, a nga’a yee kaa raaɓ’el, soo rew we fo xa ƥiy axe den fop a ƥisel.

⁴Maaga, Dawid fo yoon um fop a ndefa no ƭomatooxaa, a mbaɗooxaa boo njegatee doole faa da mbaɗooritna.

⁵A ƥis’a sax rew ɗik we Dawid ndefna Ahinowam fee gen’ina Yisre’el fa Abigayil fee ñaawooxoogna a Nabal too a gen’u Karmel.

⁶Dawid a jaq’a lool, yaam yoon we ten kaa mbaajoogun o mbarit a kac. Oxuu refna na den, kam um kaa feƭar’u lool, yaam a xalaataa xa ƥeem. Kaa koy, Dawid a saƭakinooxa no Yaal oxe Roog um,

⁷a lay a Abiyataar fee o saasadax oxe refna o ƥiy Ahimelek ee: «Ɓisiidaam o jamb ole!» Abiyataar a dalfooxa o ɓisiid a Dawid o jamb ole.

⁸Dawid a laamta o Yaal oxe yee: «Ndax um daabangaa faan yaayaq laana xam daaw a den?» O Yaal oxe a doonaan ee: «Daabi a den, too xan o daaw a den soo wat we ndameena.»

⁹Dawid fo goor teemeed ɓetuu fa leng we ten a nqota a ƭat, too yaa da mbadiidna na ƈufnand alaa Besoor, we mbalak’ina a yoqa maaga.

¹⁰Dawid a suura na taab ale fo goor teemeed nahik, yaam we yoq’ina a cinj, a nqij boo mbaagatee o njoot, a ndeeƭa goor teemeed ƭik.

¹¹Yoon we Dawid a nqeta fo o fes o Miimisira kam a koƥ alaa soo a ƥisiidin a Dawid. A cooxaan puuru ta ñaam, a cooxin foofi ta yer.

¹²A cooxaan itam nduunq xa tun fo tuunq ƭik xa biiñ xa beeru. Ye ta ñaamna keene fop, a jokooxa, yaam a jeg’a ñaal tadik fo xa yeng den kaa ta ñaameerna, yeree.

¹³Dawid a laamtaan ee: «An refo fo mam inooro?» A doonaan ee: «O Miimisira refum, ref o paɗ no koor o Aa-amalek. Ñaal tadik key kaa o yaal es a deɓaxama, yaam ne yen’uuma jir.

¹⁴Kaa i song’u no ɓemb-roog o ñamaak olaa no fiisel olaa no Keekereti we fo olaa no Yuuyudaa we fo olaa no Kaakaleb we, njaɓ kalal ke den soo ndaaɓ itam saate faa Siklag.»

¹⁵Dawid a laamtaan ee: «Ndax jaɓaxamo o ɓis boo no faan yaayaq laaga?» O koor oxaa a doonaan ee: «O daaɓooxangaa mbaambir Roog ee warkiraamo, too ɓoxotkiraamo o yaal es, waagaaxoong o ɓis boo maa den.»

¹⁶Naaga, o koor oxaa a ɓisa a Dawid boo no Aa-amalek waa, a soƥa a den da pasaroox kam saax laa fop, a ñaamaa, a yeraa, a mbumbaayaa fo ke da njangalit’ina no saax laa no Fiifilista waa fo laa Yudaa.

¹⁷Dawid a fun’a no xawaa a den boo no kirand naa. O leng daɗ’ee, a refangee xa pes teemeed nahik axaa ŋaay’ina keeleemb, a ƈuf.

¹⁸Dawid a wat’a fop ke Aa-amalek we a njaɓ’ina, a mucil itam rew ɗik we ten.

¹⁹O leng yoqand’ee na xa caaƈ axe fo no maak we, na xa ƥiy xa koor axe fo xa tew axe, too ñak’ee dara no ke da njangalit’ina na den. Dawid a jangatin’a fop.

²⁰A jang’a itam a ked ake fo xa siir axe no Aa-amalek we. Yoon we Dawid a adin’a a den mbaambir um, a layaa yee: «Kene refu njangal ne Dawid!»

²¹Ye Dawid fo yoon um a nomtooxiidaa me no goor teemeed ƭik we nqij’ina boo mbaag’atiran o ndeefan too da nqaƴ’u a den na ƈufnand alaa Besoor, weene a nqetooxiida a den. Yaa da nqetna, Dawid a simna a den.

²²Maaga, wiin soxodu fo waa njareerna tus a ndeer no yoon we Dawid a laya yee: «Cooxkaand dara no njangal ne i njangatiniidna, yaam yoon’ee fa in. Fat oxuu refna a nomtel o teem fo xa ƥeem soom, a xot a den, a ret.»

²³Kaa koy, Dawid a laya a den ee: «Fog es, ba nu mbi’it neene fo ke o Yaal oxe a cooxna a in. Ten saytooxu a in, too sax a ɓoxota na xa ƥay in faan yaayaq le song’ina saate in.

²⁴O leng jaɓkee keene, yaam a las ale no xe ñoxorik’eena fo a las ale no xe yoq’ina fo tikoorik ke kaa mbar o mbodir. Den fop kaa mbar o nqaajir.»

²⁵Naaga a refit’u, too no kaa xotitna no ñaal naaga keene a dalne nen wargal fo o mbaax kam Isra’el boo no ñaal roog ne xaye.

²⁶Ye da mbadiidna Siklag, Dawid a watna a las no njangal ne da njaɓ’ina, a lultin maak we Yudaa ndeeƭna qaariit um. Kaa ɓisnoor’u a den ee: «Keeke refu ci’it es fa nuun no njangal ne xottuuma no fañ we no Yaal oxe.»

²⁷Dawid a lulta ci’it no maak we Betel fo no we Ramot garitna no ɓemb-roog o ñamaak fo no we Yaatir

²⁸fo no we Aroweer fo no we Sifmoot fo no we Estemowa

²⁹fo no we Rakal fo no we no teeru ke no Yeeyerahmel we fo no Keekeni we

³⁰fo no we Horma fo no we Bor-Asan fo no we Atak

³¹fo no we Hebron fo no we no fo mbiñ ne Dawid fo yoon um a ndeef’ina yaaga fop.