Read NQAARIIT NE ROOG 1 Sami’el 31 Bible Online

1 Sami’el 31 - NQAARIIT NE ROOG bible

1 Sami’el 31

¹Fiifilista we a songa Ii-isra’el we. Goor we Isra’el a ngoda o joor mbaambir den, too mayu na den a mbarte no joong olaa Gilbowa.

²Fiifilista we koy, kaa moƴ’u o mataa a Sawul fo xa ƥiy axe ten. A mbara a Yoonatan fa Abinadab fa Malkisuwa ndeeƭna xa ƥiy Sawul.

³No kaa xotitna na waxtu faaga a ñoq alaa fop a fudooxa took Sawul, yaam we saq’ina a qali ke a nga’aan. Maaga, a ndoomaan boo a ngaañin ƭomu.

⁴Sawul a laya oxe saqoogna ƥonax ke ten ee: «Jangi laƥ of, waraam, yaam bugiim Fiifilista xucooxar wene a ñagadilaam soo a mbarkaxam.» Kaa koy, oxe saqoogna ƥonax ke ten a faña faƥit, yaam saɗ’iran o war. Maaga, Sawul a janga laƥ um, a jooroox took um.

⁵Ye oxe saqoogna ƥonax ke a ga’na yee o yaal um a xona, ten itam a joorooxa took laƥ um soo a xon nen o ten.

⁶Neene mat Sawul fo xa ƥeem xa tadaq fo xe saqoogna ƥonax ke ten fo xiixire um a nqontu den fop no ñaal leng kut ne.

⁷Ye Ii-isra’el we ngen’ina no saax o lakas olaa na yulanq alaa fo no saax o lakas olaa no xuluɓ olaa Yordaan a yegna yee xiixire we Isra’el kaa ƈuf’u, Sawul fo xa ƥeem a nqon, a nqaƴa teeru ke den, a ƈuf. Maaga, Fiifilista we a ngara, a ngen teeru kaaga.

⁸No feet olaa, ye Fiifilista we a ngarna, ndax da njang tig oo tig ke no we nqonna, a nga’a o dal ole Sawul fo axe na xa ƥeem xa tadaq no joong olaa Gilbowa.

⁹A ƭega xoox le Sawul, a njang ƥonax ke ten soo a lulit a den kam saax le no Fiifilista we fop, ndax da yegnit yegil mbaax neene kam xa cuurand axe no pangool ke den fo a ndeer xeet faa fop.

¹⁰Cinj kaaga, a ngeeka ƥonax ke Sawul no juurand olaa Astarte fee da mbi’’ina roog den, soo a lok o dal ole no saŋe naa Bet-Se’aan.

¹¹Ye wiin we ngenna Yabes no saax laa Galaad a yegna ke Fiifilista we a mbi’’ina a Sawul,

¹²goor we moƴ’ina o njambaar na teeru faa a nqota a ƭat, a ñaaƴ o yeng olaa fop boo a mbadiid Bet-Se’aan. A loktita no saŋe naa o dal ole Sawul fo axe na xa ƥeem soo a nqaad fa den Yabes, a ndox a den maaga.

¹³Cinj kaaga, a njanga xa kiiƈ axe den, a ngas a den yoora mburndu kam Yabes soo a ngoor ñaal ɓetuu ƭik fo xa yeng den.