Read NQAARIIT NE ROOG 1 Sami’el 6 Bible Online

1 Sami’el 6 - NQAARIIT NE ROOG bible

1 Sami’el 6

¹Arka ne no Yaal oxe a jeg’a a qool ɓetaa ƭaq kam saax laa no Fiifilista waa.

²Cinj kaaga, Fiifilista we a nqoya saasadax we fo maɗag we, a laamit a den ee: «Xar i mbi’kaa fo arka ne no Yaal oxe? Layyo a in ne i mbaruuna o yaxattik maa ta jegeena.»

³A ndoona a den ee: «Boo nu yaxatkaa arka ne Roog fee Isra’el, ba nu ƥisin o ƥor, ndaa fat nu yoonandtin ci’it nqendandoor. Neene, xan nu mbod, too xan nu and ke taxna Roog feene a toroxandaa a nuun fa katil um.»

⁴Fiifilista waa a laamta a den ee: «Ci’it nqendandoor num i mbarun o yoonandit boo ta fodir fo ten?» Saasadax waa fo maɗag waa a ndoona a den ee: «Ƭeetyo ne gelwaar we no Fiifilista we a mbodna, nu mbi nitaal ƥetik wurus kaa lalitna xa tul axe fo ƈoox ƥetik wurus, yaam a qaw a leng kut ale daawna daaw a nuun, daawu maad we nuun itam.

⁵Mbi’yo boog kaa samandaalna xa tul axe fo kaa lalitna ƈoox ke na yaqaa saax le, soo nu ƥoxot a Roog fee Isra’el o ndam. Neene, xeƈa toroxandkatee a nuun fa katil um, nuun fo roog ke nuun fo saax le nuun fop.

⁶Ba nu ŋaj ne Miimisira we fa Firawon fee a mbi’it’uuna. Ndi kaa nu mbetandooxee ne Roog feene a xawtoogna a den boo neen a nqaƴu Ii-isra’el we da ndet?

⁷Ndiiki koy, fat nu njal a sareet a qas, nqot naak ƭik kaa na numnaa too mosee o ndoxondoox a sug, nu ngumin a den a sareet ale soo ƥis xa lap axe no pind kaa.

⁸Fat nu njang arka ne no Yaal oxe, ndoonin took a sareet ale, nu mbi paam um o arka nqe nu yipkaa tikoorik wurus ke nu ƥoxotkan nen ci’it nqendandoor, soo nu nqaƴ a sareet ale ta ret.

⁹Cinj kaaga, fat nu ƭeet a paax. Boo naak ke a nqotna a ƭat ale Isra’el, a njagin Bet-Semes, nu and ee o Yaal oxe doonu a in coono maak kene fop. A nqotangee maaga koy, nu and ee o Yaal oxe doonee a in kene, ndaa kaa dal a dal a in rek, too i andatee maa ta faqaqoorna.»

¹⁰Wiin waa a mbi’a naaga. A njanga naak ƭik kaa na numnaa, a ngumin a den a sareet ale, soo a mbeg xa lap axe no pind kaa.

¹¹A ndoona took a sareet ale arka ne no Yaal oxe fo o arka lakas onqe da yip’ina ƈoox wurus ke fo nitaal wurus ke samandaalna xa tul axe.

¹²Naak ke a ndalfooxa o nqot a ƭat ale jaginna Bet-Semes, a ndeefin doŋ, a loolaa. Ƭapee na ñamaak, ƭapee na janoon. Gelwaar we no Fiifilista we a ndeefa took den boo no ŋat olaa Bet-Semes.

¹³Wiin we Bet-Semes kaa saxadoogu bele kam xa saawit axe den. A letna a qoox den, a ƈook arka ne no ngiɓoor ne soo a mbelakinoox lool.

¹⁴A sareet ale a fadiida no qol Yosuwe fee Bet-Semes, a geenoox maaga paam ɓil maak. Wiin waa a ƥola a patax ake na sareet ale fop, a mbi a den xa cuuƭ, soo a njang naak ke, a ƥoxot a den o Yaal oxe, ta ref sadax fa ndoxel.

¹⁵Leelewi waa kaa eet’u o mbudin arka ne no Yaal oxe fo o arka nqe yip’ina tikoorik wurus ke, a ndoon a den no ɓil maak laa. No ñaal naaga, wiin we Bet-Semes a ƥoxotooga o Yaal oxe sadax toxel fo sadax camsa’oor.

¹⁶No ñaal leng kut ne itam, a cinj ye gelwaar ɓetuk we no Fiifilista we a nga’na keene, a nomtooxa, a nqaad Ekron.

¹⁷Keeke ndefu nitaal wurus ke na xa tul axe Fiifilista we a ƥoxotna o Yaal oxe, ndax da nqendandoor fo ten: Leng kaa reeƭu yaam Asdod, leng a ref yaam Gaasa, leng yaam Askalon, leng yaam Gaat fo leng yaam Ekron.

¹⁸Ƈoox wurus ke koy, kaa mbodir’u fo teeru cegu saŋe ke fo caate ke gelwaar ɓetuk we no Fiifilista we a kelfa’’ina. Boo no ñaal ne xaye sax, ɓil maak laa no qol Yosuwe fee Bet-Semes, da ndoon’ina arka ne no Yaal oxe, kaa maad o wetandoorteel keene.

¹⁹O Yaal oxe a xawa wiin we Bet-Semes, yaam kaa ƭeet’u kam arka ne no Yaal oxe. O Yaal oxe a wara na den wiin qarɓeen ɓetuu ƭik[4]. We maad’ina o ñoowaa fop a naqadiloox’a ƭomu, yaam ne o Yaal oxe a xaw’ina a den a qaw a ƭomu.

²⁰Wiin we Bet-Semes kaa layoogu yee: «An waagu boog o geenoox mbaambir no Yaal oxe, Roog fa tedu fene? Ndi maa an a xotkaa, yaa ta inoorna me in?»

²¹A ndalfooxa o lul wiin na saate faa Kiryat-Ye’arim[5], ndax da lay a den ee: «Fiifilista we a nomtiida arka ne no Yaal oxe. Ngaryo nqotin, ƥisin me nuun.»