Read NQAARIIT NE ROOG 1 Sami’el 8 Bible Online

1 Sami’el 8 - NQAARIIT NE ROOG bible

1 Sami’el 8

¹Ye Sami’el a nogoyna, a dalna xa ƥeem da ƭoxaa xeet fee Isra’el.

²Taaw um Yowel a ne’’e, oxe reefna took um a ne’el Abiya. Beer-Seeba a ngate’toogu.

³Xa ƥiy xa ƭaq axe Sami’el koy, ndeef’ee o jaf um. Kaa mbex’u xaaliis bo ta hup, a njaɓ o ngerel soo a ngate’taa naa jofeerna.

⁴Ten taxu maak we Isra’el fop a mbokatoora, a soƥik a Sami’el Rama,

⁵a layin ee: «Ndiiki, nogoyaa lool, too xa ƥeef ndeefee o jaf of. Dalnani a in boog o maad oxaa adooxanna a in ne qeet lakas ke a njegtuuna.»

⁶Sami’el sawar’ee tus, ye da layna yee: «Ci’i a in o maad oxaa adooxanna a in.» Maaga, Sami’el a xeɗa o Yaal oxe.

⁷O Yaal oxe a doona a Sami’el ee: «Nan-gilooxi ke xeet fee a laykang fop, yaam refee yee wo a ndeɓu, ndaa mi sax a ndeɓu, ndax maadooxkatiim a ndeer den.

⁸Ne da mbesooraa fa mi, a mbesoortang. No kaa xotitna na bes faa sutuuma a den Misira boo no ñaal ne xaye kaa nqaƴaam, a mbaɗooxaa roog tefee ndigil ke.

⁹Ndiiki koy, nan-gilooxi a den, ndaa fat o maƭoox a den a paax too andnoor a den ke helna a den no xe na maadooxankaa a den.»

¹⁰Maaga, Sami’el a daawna xeet fee nqeɗiid’uuna o maad fop ke o Yaal oxe a lay’uuna.

¹¹A laya a den ee: «Keeke refu ke helna o maad oxe na maadooxankaa a nuun: Xan a xotit na xa ƥiy xa koor axe nuun waa na ƈufnanan a sareet ake ten fo waa na mbugko ŋaayaa pis ke ten. Xan a jeg itam na den waa na mbugko ƈufaa, a ndendaa fo a sareet ale ten.

¹²Xan a xotit na xa ƥiy xa koor axe nuun aa-adax no xiixire juni fo aa-adax no xiixire qarɓeen ƥetik. Xan a jil itam na den waa na nqooxanan xa qol um, a saxadanan fo waa na njalanan ƥonax fo fop ke a sareet a yoontaa.

¹³Xan a jang na xa ƥiy xa tew axe nuun waa na mbi’anan qeeñe-xeeñe fo waa na njawanan fo waa na njuɗanan puuru.

¹⁴Xan a jang we moƴna o mbaax na xa qol axe nuun fo na ƭing biiñ ake nuun fo no taxar oliiw ke nuun soo a coox a den dag we ten.

¹⁵Xan a jangaa a seek xarɓaxayandeer ale no saxade le nuun fo na xa tim axe no taxar biiñ ke nuun soo a coox a den cawdiin ke ten fo dag um.

¹⁶Xan a jang we moƴna o mbaax no dag we nuun, goor fo rew fo na xa pes axe nuun fo na xa paam axe nuun, a jalnoorik a den.

¹⁷Xan a jangaa a seek xarɓaxayandeer ale na ked ake nuun, soo nuun fa qoox nuun nu ndefik faɗ um.

¹⁸A koom, xan nu ƈufginooxaa o Yaal oxe yaam o maad oxe nu njilankaa a qoox nuun, ndaa nan-gilooxkee a nuun.»

¹⁹Xeet faa a mbaña o nan-giloox a Sami’el, a ndoonin ee: «A bug oo de, ndaa xan i njeg o maad kañ.

²⁰Kaa i mbug o nand fo qeet lakas ke. O maad na bugko hate’aa a in, a ɗoxaa a in, a adooxanaa a in, yaa xire a jegna.»

²¹Sami’el a nan-gilooxa ke xeet fee a layna fop soo a jo’tin o Yaal oxe.

²²Naaga, o Yaal oxe a doona a Sami’el ee: «Nan-gilooxi a den, dalnan a den o maad.» Sami’el a laya goor Ii-isra’el waa yee: «Fat oxuu refna na nuun a xaad na teeru um.»