Read S'gaw Karen လံာ်တၢ်ကဲထီၣ်အခီၣ်ထံး 13 Bible Online

လံာ်တၢ်ကဲထီၣ်အခီၣ်ထံး 13 - S'gaw Karen bible

လံာ်တၢ်ကဲထီၣ်အခီၣ်ထံး 13

¹ဒီးစီၤအၤဘြၣ်ဟးထီၣ်လၢကီၢ်အဲၤကူပတူးဃုာ်ဒီးအမါဒီး ကယဲၢ်အတၢ်ဖိတၢ်လံၤခဲလၢာ်, ဒီးလဲၤဝဲဆူကလံၤစိးလၢအမ့ၢ်ကီၢ်ကနၤဧၣ်အကလံၤထံးန့ၣ်လီၤ. ဒီးစီၤလိာ်လဲၤဃုာ်တၢ်ဒီးအီၤလီၤ.

²စီၤအၤဘြၣ်မ့ၢ်ပှၤထူးဝဲတီၤဝဲဒိၣ်မးလၢအအိၣ်ဒီးသိ, မဲာ်တဲးလဲးဒီးဂီၤဘုၣ်ဂီၤဖံးဒီးထူဧိၤလွဲဧိၤ, ကျိၣ်ဧိၤစ့ဧိၤသ့ၣ်တဖၣ်န့ၣ်လီၤ.

³ဒီးဟးထီၣ်လၢတၢ်လီၢ်န့ၣ်ဒီးသုးအသးတတီၤဘၣ်တတီၤ, ဒီးလဲၤဝဲဆူဝ့ၢ်ဘ့ၤသ့လးန့ၣ်လီၤ. အဝဲလဲၤတုၤဝဲတၢ်လီၢ် လၢဝ့ၢ်ဘ့ၤသ့လးဒီးဝ့ၢ်ဂဲအဘၢၣ်စၢၤလၢအသူၣ်လီၤတ့ၢ်ဝဲ အဒဲလၢညါ,

⁴ဒီးမၤတ့ၢ်ဝဲတၢ်လုၢ်လီၢ်တတီၤ, ဒီးဘူၣ်ထီၣ်ဘါထီၣ်ယွၤဖဲ န့ၣ်လီၤ.

⁵စီၤလိာ်စ့ၢ်ကီးအိၣ်ဝဲဒီးသိ, မဲာ်တဲးလဲး, ဂီၤဘုၣ်ဂီၤဖံးဃုာ်ဒီးအဒူၣ်ဖိထၢဖိဒီးအကုၢ်အပှၤဒၣ်ဝဲန့ၣ်လီၤ.

⁶မၤသးဒ်န့ၣ်ဒီး, တၢ်အီၣ်ဆၣ်အလီၢ်တအိၣ်လၢလၢလီၣ်လီၣ်လၢအဝဲသ့ၣ် ခံဂၤကအိၣ်ဒ်သိးသိးအဂီၢ်ဘၣ်န့ၣ်လီၤ. အဂ့ၢ်ဒ်အံၤ, အဝဲသ့ၣ်အိၣ်ဒီးဆၣ်ဖိကီၢ်ဖိအါအါကလဲာ်လီၤ.

⁷မၤသးဒ်န့ၣ်ဒီး, တၢ်အ့ၣ်လိာ်ဆိးက့လိာ်အိၣ်ထီၣ်ဝဲဒၣ်လၢပှၤလၢ အကွၢ်စီၤအၤဘြၣ်အဆၣ်ဖိကီၢ်ဖိဒီးပှၤလၢအကွၢ်စီၤလိာ်အဆၣ်ဖိ ကီၢ်ဖိတဖၣ်အဘၢၣ်စၢၤန့ၣ်လီၤ. (အကတီၢ်ဖဲန့ၣ်ပှၤကနၤဧၣ်ဖိဒီးပှၤပရးစၤဖိအိၣ်ဆိးဒံးဝဲ လၢကီၢ်ပူၤန့ၣ်လီၤ).

⁸ဒီးစီၤအၤဘြၣ်စံးဘၣ်စီၤလိာ်, “ပမ့ၢ်ပှၤဒီဘူးဒီတံၢ်လီၤ. နပှၤဒီးယပှၤတဖၣ်တကြၢးအ့ၣ်လိာ်ဆိးက့လိာ်အသးဘၣ်.

⁹မၤသးဒ်န့ၣ်ဒီး, မ်ပကအိၣ်လီၤဖးလိာ်သကိးပသးတက့ၢ်. ဃုထၢတၢ်လီၢ်တတီၤတီၤလၢနသးလီလၢကီၢ်အံၤအပူၤတက့ၢ်. လဲၤနဲကျဲတဘိဒီးယကလဲၤယဲအဂၤတဘိလီၤ.”

¹⁰စီၤလိာ်ကွၢ်တၢ်ဝးဝးဒီးထံၣ်ဝဲဒၣ်လၢထံကျိယၢ်ဒ့ၣ်အတၢ်ပၢၤ ခိၣ်ဒီဘ့ၣ်ညါကျဲတရဲာ်ဃီဆူဝ့ၢ်စိၤဧၢ်န့ၣ်ထံအိၣ်လၢလၢလီၣ် လီၣ်လီၤဂာ်ဒ်ယွၤအတၤသၣ်လီၢ်အသိးမ့ၢ်ဂ့ၤ, လီၤဂာ်ဒ်ကီၢ်အဲၤကူပတူးအသိးမ့ၢ်ဂ့ၤန့ၣ်လီၤ. (အအံၤမ့ၢ်တၢ်အကတီၢ်လၢယွၤတချုးမၤဟးဂီၤဝ့ၢ်စဒိၣ်ဒီးဂမိၤ ရၤဒံးဘၣ်န့ၣ်လီၤ.)

¹¹မၤသးဒ်န့ၣ်ဒီးစီၤလိာ်ဃုထၢထီၣ်ဝဲထံကျိယၢ်ဒ့ၣ်အတၢ်ပၢၤ ခိၣ်ဒီဘ့ၣ်ညါလၢအဂီၢ်ဒၣ်ဝဲဒီးသုးကွံာ်အသးဆူမုၢ်ထီၣ်တကပၤ န့ၣ်လီၤ. တၢ်န့ၣ်မ့ၢ်ပှၤခံဂၤအတၢ်အိၣ်လီၤဖးလိာ်အသးဒ်လဲၣ်အဂ့ၢ်န့ၣ် လီၤ.

¹²စီၤအၤဘြၣ်အိၣ်ဝဲဆိးဝဲလၢကီၢ်ကနၤဧၣ်အပူၤဒီးစီၤလိာ်သူၣ် လီၤအတၢ်အိၣ်တၢ်ဆိးအလီၢ်လၢဝ့ၢ်တဖၣ်လၢအအိၣ်လၢယၢ်ဒ့ၣ်အတၢ်ပၢၤ ခိၣ်အကျါဒီးသူၣ်ထီၣ်အဒဲဘူးဒီးဝ့ၢ်စဒိၣ်န့ၣ်လီၤ.

¹³ပှၤဝ့ၢ်စဒိၣ်ဖိသ့ၣ်တဖၣ်န့ၣ်မ့ၢ်ပှၤအၢပှၤသီဒီးပှၤမၤတၢ်ဒဲး ဘးထီဒါယွၤန့ၣ်လီၤ.

¹⁴ဖဲစီၤလိာ်ဟးထီၣ်ကွံာ်ဝံၤအလီၢ်ခံန့ၣ်ယွၤစံးဘၣ်စီၤအၤဘြၣ်, “ဖဲနအိၣ်အလီၢ်အံၤန့ၣ်ကွၢ်ထီၣ်တၢ်လီၤတံၢ်လီၤဆဲးဆူ တၢ်လီၢ်ကိးကပၤဒဲးတက့ၢ်.

¹⁵ယကဟ့ၣ်လီၤနၤဒီးနစၢၤနသွဲၣ်တဖၣ်လၢကယဲၢ်ကီၢ်လၢနထံၣ်ဘၣ်အီၤ ဒီးကမ့ၢ်နတၢ်လီၤစိၤလီၤထီန့ၣ်လီၤ.

¹⁶ယကဟ့ၣ်လီၤနၤလၢနစၢၤနသွဲၣ်အါအါကလဲာ်တုၤပှၤဂံၢ်ထီၣ်အီၤ တန့ၢ်တသ့နီတဂၤဘၣ်န့ၣ်လီၤ. တၢ်မ့ၢ်ဘၣ်ဂံၢ်ကယဲၢ်ဟီၣ်ခိၣ်အကမူၣ်ခဲလၢာ်န့ၣ်ကညီဒိၣ်တက့ၢ်န့ၣ် လီၤ.

¹⁷ဒီးခဲကနံၣ်အံၤလဲၤဒီးကွၢ်ကီၢ်ဒီဘ့ၣ်ညါန့ၣ်တက့ၢ်. အဂ့ၢ်ဒ်အံၤ, ယကဟ့ၣ်လီၤနၤတၢ်အံၤခဲလၢာ်န့ၣ်လီၤ.”

¹⁸မၤသးဒ်န့ၣ်ဒီး, စီၤအၤဘြၣ်သုးအဒဲဒီးသူၣ်လီၤအတၢ်အိၣ်တၢ် ဆိးအလီၢ်ဘူးဒီးမးမရ့အသ့ၣ်စီဆှံတဖၣ်လၢအအိၣ်ဖဲဝ့ၢ်ဃ့ ဘြိၣ်န့ၣ်လီၤ. ဒီးမၤထီၣ်ဝဲတၢ်လုၢ်လီၢ်တခါလၢယွၤအဂီၢ်ဖဲန့ၣ်လီၤ.