Read S'gaw Karen လံာ်တၢ်ကဲထီၣ်အခီၣ်ထံး 25 Bible Online

လံာ်တၢ်ကဲထီၣ်အခီၣ်ထံး 25 - S'gaw Karen bible

လံာ်တၢ်ကဲထီၣ်အခီၣ်ထံး 25

¹ဒီးစီၤအၤဘြၤဟၣ်န့ၢ်အမါလၢပိာ်မုၣ်အဂၤတဂၤလၢအမံၤမ့ၢ်ဝဲ နီၢ်ကတူရၤန့ၣ်လီၤ.

²ပိာ်မုၣ်န့ၣ်ဆံးစၢ်န့ၢ်အီၤစီၤစံးမရၣ်, စီၤယးကၡၣ်, စီၤမဒၣ်, စီၤမံးဒယၣ်, စီၤယံးၡဘးဒီးစီၤၡူဧၤန့ၣ်လီၤ.

³ဒီးစီၤယးကၡၣ်မ့ၢ်စီၤၡဘၤဒီးစီၤဒဒၣ်အပၢ်လီၤ. ဒီးစီၤဒဒၣ်အစၢၤအသွဲၣ်တဖၣ်မ့ၢ်ဝဲပှၤအၤၡူရးဖိ, ပှၤလတူၡးဖိဒီးပှၤလူမးဖိလီၤ.

⁴ဒီးစီၤမံးဒယၣ်အဖိခွါတဖၣ်မ့ၢ်ဝဲစီၤဧ့ၤဖၣ်, စီၤဧ့ၤဖ့ၢ်, စီၤဃနိာ်, စီၤအဘံဒၤဒီးစီၤအ့ၤလဒါဧၤလီၤ. ပှၤခဲလၢာ်အံၤန့ၣ်မ့ၢ်နီၢ်ကတူရၤအစၢၤအသွဲၣ်တဖၣ်န့ၣ်လီၤ.

⁵ဒီးစီၤအၤဘြၤဟၣ်ဟ့ၣ်တ့ၢ်ကယဲၢ်တၢ်လၢအအိၣ်ဒီးအီၤခဲလၢာ်ဆူ စီၤအံၤစဲးန့ၣ်လီၤ.

⁶မ့မ့ၢ်, ဖဲအအိၣ်မူဒံးဝဲအခါန့ၣ်ဟ့ၣ်ဝဲတၢ်ဟ့ၣ်သ့ၣ်တဖၣ်ဆူ အဖိခွါတဖၣ်လၢအမါအဂၤတဖၣ်ဆံးစၢ်န့ၢ်အီၤန့ၣ်လီၤ. ဒီးဆှၢလီၤအဖိခွါသ့ၣ်တဖၣ်အံၤဆူကီၢ်လၢမုၢ်ထီၣ်လၢအယံၤ ဒီးအဖိခွါစီၤအံၤစဲးန့ၣ်လီၤ.

⁷ဒီးစီၤအၤဘြၤဟၣ်သံဝဲဖဲဒီးအသးအနံၣ်အလါအိၣ်ဝဲတကယၤနွံ ဆံယဲၢ်နံၣ်န့ၣ်လီၤ.

⁸အဝဲအိၣ်ကၢအိၣ်ခိးတုၤအသးပှၢ်တုာ်ဝဲန့ၣ်လီၤ.

⁹အဖိခွါတဖၣ်လၢအမ့ၢ်ဝဲစီၤအံၤစဲးဒီးစီၤယံးၡမၤဧ့လးခူၣ် လီၤဘျၢလီၤအီၤလၢလၢၢ်ကအိမးကပ့လၤလၢအဘၣ်ဃးဒီးပှၤဃ့ၤသး ဖိစီၤစိၤဃၢ်အဖိခွါစီၤဧ့ၤဖရိၣ်, လၢအအိၣ်ဖဲ မးမရ့အမုၢ်ထီၣ်ပျီပူၤန့ၣ်လီၤ.

¹⁰ဒီးပျီအံၤမ့ၢ်တၢ်လီၢ်လၢစီၤအၤဘြၤဟၣ်ပှ့ၤတ့ၢ်လၢပှၤဃ့ၤသး ဖိအအိၣ်န့ၣ်လီၤ. စီၤအၤဘြၤဟၣ်ဒီးအမါနီၢ်စၤရါဘၣ်တၢ်ခူၣ်လီၤအီၤခံဂၤလိာ် ဖဲန့ၣ်လီၤ.

¹¹ဒီးစီၤအၤဘြၤဟၣ်သံဝံၤအလီၢ်ခံကစၢ်ယွၤဆိၣ်ဂ့ၤအဖိခွါစီၤ အံၤစဲးလၢအအိၣ်ဝဲဆိးဝဲဘူးဒီး “ပှၤမူဝဲတဂၤလၢအထံၣ်ယၤ အထံပူၤ” န့ၣ်လီၤ.

¹²စီၤယံးၡမၤဧ့လး, လၢနီၢ်စၤရါအကုၢ်ပိာ်မုၣ်ပှၤအဲၤကူပတူး နီၢ်ဟၤကၢ်ဆံးစၢ်န့ၢ်ဝဲလၢစီၤအၤဘြၤဟၣ်အဂီၢ်န့ၣ်, အိၣ်ဒီးအဖိခွါသ့ၣ်တဖၣ်အံၤလီၤ.

¹³အမံၤဒ်အအိၣ်ဖျဲၣ်ထီၣ်ဝဲတဂၤဝံၤတဂၤအသိးန့ၣ်မ့ၢ်ဝဲစီၤနဘါ ယိး, စီၤက့ဒၢ်, စီၤအးဒဘအ့လး, စီၤမံးကစၢ်,

¹⁴စီၤမံးၡမၤ, စီၤဒူမၤ, စီၤမၤစၤ, စီၤဃဒၢ်, စီၤတ့မၤ, စီၤယတူၢ်, စီၤနါဖံၣ်ဒီးစီၤက့ဒမၤလီၤ.

¹⁶အဝဲသ့ၣ်မ့ၢ်ပှၤတဆံခံဒူၣ်အမိၢ်ပၢ်ဖံဖုလၢပျၢၤဒီးအမံၤတဖၣ် ဘၣ်တၢ်ဟ့ၣ်လီၤဆူအဒူသဝီတဖၣ်ဒီးတၢ်လီၢ်လၢအသူၣ်ဒဲ အလီၢ်တဖၣ်အိၣ်ဝဲန့ၣ်လီၤ.

¹⁷စီၤယံးၡမၤဧ့လးအသးအိၣ်ဝဲတကယၤသၢဆံနွံနံၣ်ဖဲအသံဝဲ န့ၣ်လီၤ.

¹⁸စီၤယံးၡမၤဧ့လးအစၢၤအသွဲၣ်တဖၣ်အိၣ်ဝဲဆိးဝဲလၢတၢ်လီၢ်လၢ ကီၢ်ဃဝံလၤဒီးကီၢ်ၡူၢ်အဘၢၣ်စၢၤဒီးပၢၢ်လၢကီၢ်အဲၤကူပတူး အမုၢ်ထီၣ်ဒီးဆူကီၢ်အၤၡူၢ်န့ၣ်လီၤ. အဝဲသ့ၣ်အိၣ်လီၤဖးဒီးစီၤအၤဘြၤဟၣ်အစၢၤအသွဲၣ်အဂၤတဖၣ်န့ၣ် လီၤ.

¹⁹အအံၤမ့ၢ်စီၤအၤဘြၤဟၣ်အဖိခွါစီၤအံၤစဲးအဂ့ၢ်န့ၣ်လီၤ.

²⁰ဒီးဖဲစီၤအံၤစဲးန့ၢ်မါလၢနီၢ်ရံးဘကၤ, လၢအမ့ၢ်ပှၤစူၤရံဖိ စီၤဘသူၤအ့လးအိၣ်လၢပၤဒနါရၣ်အပျီပူၤ (ပှၤအမံနယၣ်ဖိလၢ ကီၢ်မ့းစပံတၤမ, အဖိမုၣ်), ပှၤစူၤရံဖိစီၤလၤဘၣ်အဒီပုၢ်ဝဲၢ်မုၣ်န့ၣ်, အသးအိၣ်လံဝဲအနံၣ်လွံၢ်ဆံန့ၣ်လီၤ.

²¹ဒီးမ့ၢ်လၢနီၢ်ရံးဘကၤအဖိတအိၣ်ဘၣ်အဃိစီၤအံၤစဲးဘါထုကဖၣ် လၢအဂီၢ်န့ၣ်လီၤ. ဒီးယွၤစံးဆၢအတၢ်ထုကဖၣ်ဒီးနီၢ်ရံးဘကၤဒၢထီၣ်ဝဲဒၣ်န့ၣ်လီၤ.

²²နီၢ်ရံးဘကၤကန့ၢ်ဘၣ်အဖိအသဃံာ်ဒီးတချုးအဝဲသ့ၣ်အိၣ်ဖျဲၣ်ထီၣ် ဒံးဘၣ်န့ၣ်အဝဲသ့ၣ်ကနိလိာ်သးလၢအမိၢ်အဟၢဖၢပူၤန့ၣ်လီၤ. ဒီးပိာ်မုၣ်စံးဝဲ, “ဘၣ်မနုၤအဃိတၢ်ဒ်သိးအံၤမၤအသးဒီး ယၤန့ၣ်လဲၣ်.” မၤသးဒ်န့ၣ်ဒီးအဝဲလဲၤသံကွၢ် တၢ်လၢယွၤလၢတၢ်စံးဆၢတမံၤအဂီၢ်န့ၣ်လီၤ.

²³ဒီးယွၤစံးဘၣ်အီၤ, “ပှၤကလုာ်ခံကလုာ်အိၣ်ဝဲလၢနပူၤလီၤ. နကဆံးစၢ်ထီၣ်, ပှၤဂီၢ်မုၢ်ထီဒါလိာ်သးခံဖုန့ၣ်လီၤ. ပှၤတကလုာ်ကဆူၣ်န့ၢ်အဂၤတကလုာ်လီၤ. ပှၤအဒိၣ်ကဘၣ်မၤတၢ်ခ့တၢ်ပှၤ အတၢ်မၤလၢပှၤအဆံးအဂီၢ်န့ၣ်လီၤ.”

²⁴တၢ်ဆၢကတီၢ်ဘၣ်ဝဲလၢအဂီၢ်လၢအကဆံးစၢ်ထီၣ်တၢ်ဒီး, အဝဲမၤန့ၢ်အဖိခွါသဃံာ်ခံဂၤလီၤ.

²⁵ပှၤအခီၣ်ထံးတဂၤန့ၣ်အညၣ်ဂီၤဃဲးဝဲဒီးအဖံးမၤအသးဒ်ဆ့ကၤ ဖးထီအိၣ်ဒီးအဆူၣ်အဒံးအဃိဒီးအဝဲဘၣ်တၢ်ယုၢ်န့ၢ်အမံၤလၢ စီၤဧ့ၡီၤလီၤ.

²⁶ပှၤခံဂၤတဂၤန့ၣ်အိၣ်ဖျဲၣ်ထီၣ်လၢအစုဟံးဃာ်စီၤဧ့ၡီၤအခီၣ် နၢၣ်ခံဃံးဃံးဒီးဘၣ်တၢ်ကိးအီၤလၢစီၤယၤကိာ်လီၤ. ဒီးလၢအဝဲသ့ၣ်အိၣ်ဖျဲၣ်ထီၣ်ဝဲန့ၣ်စီၤအံၤစဲးအသးအိၣ်ဝဲ အနံၣ်ဃုဆံန့ၣ်လီၤ.

²⁷ဒီးဖိသၣ်ပိာ်ခွါတဖၣ်ဒိၣ်ထီၣ်ဝဲ, ဒီးစီၤဧ့ၡီၤကဲထီၣ်ပှၤ ခးတၢ်သ့ ဂ့ၤဂ့ၤ, ပှၤတဂၤလၢအအိၣ်မုာ်လၢခိခိၣ်ပှၢ်လၢ်ကျါလီၤ.

²⁸ဒီးစီၤအံၤစဲးဘၣ်အသးလၢစီၤဧ့ၡီၤဒိၣ်တက့ၢ်လီၤ. အဂ့ၢ်ဒ်အံၤ, ဆၣ်ဖိကီၢ်ဖိလၢအဘၣ်တၢ်ခးန့ၢ်အီၤလၢစီၤဧ့ၡီၤ န့ၣ်အီၣ်ဝဲဘဲဒီးအသးမုာ်ဝဲန့ၣ်လီၤ. မ့မ့ၢ်နီၢ်ရံးဘကၤဘၣ်အသးဒိၣ်တက့ၢ်လၢစီၤယၤကိာ်လီၤ.

²⁹ဒီးမုၢ်တနံၤဖဲစီၤယၤကိာ်ဖီဝဲသဘ့ကသူထံန့ၣ်စီၤဧ့ၡီၤ ဟဲက့ၤလၢအလူၤခးတၢ်န့ၣ်လီၤ. ဒီးတၢ်သၣ်ဝံၤအသးလီၤ.

³⁰ဒီးစံးဘၣ်စီၤယၤကိာ်, “ယသၣ်ဝံၤလီၤဒိလၢာ်လံ. ဟ့ၣ်ယၤလၢတၢ်အီၣ်ဖါဂီၤအံၤတနီၤတက့ၢ်.” (မၤသးဒ်န့ၣ်ဒီးပှၤကိးအမံၤလၢအဒိၣ်လီၤ.)

³¹ဒီးစီၤယၤကိာ်စံးဆၢအီၤ, “နမ့ၢ်ဟ့ၣ်ယၤလၢဖိဝဲၢ်ကိတၢ် န့ၢ်သါအတၢ်ဆိၣ်ဂ့ၤန့ၣ်ယကဟ့ၣ်နၤတၢ်န့ၣ်လီၤ.”

³²ဒီးစီၤဧ့ၡီၤစံးဝဲဒၣ်, “ဂ့ၤလံ, ဘူးမးလၢယကသံလီၤ. ယတၢ်န့ၢ်သါအတၢ်ဆိၣ်ဂ့ၤန့ၣ်ကမၤဂ့ၤယၤမနုၤလဲၣ်.”

³³ဒီးစီၤယၤကိာ်စံးဆၢအီၤ, “အဆိန့ၣ်မၤတၢ်ဆိၣ်တမံၤလၢနကဟ့ၣ် ယၤတၢ်န့ၢ်သါအတၢ်ဆိၣ်ဂ့ၤတက့ၢ်.” ဒီးစီၤဧ့ၡီၤမၤတၢ်ဆိၣ်န့ၣ်ဒီးဟ့ၣ်လီၤအတၢ်န့ၢ်သါအတၢ်ဆိၣ် ဂ့ၤဆူစီၤယၤကိာ်န့ၣ်လီၤ.

³⁴တုၤနုၤတစု, စီၤယၤကိာ်ဟ့ၣ်အီၤကိၣ်ဒီးသဘ့ကသူထံတနီၤလီၤ. စီၤဧ့ၡီၤအီၣ်တၢ်အီတၢ်ဝံၤဒီးဂဲၤဆၢထၢၣ်ဟးထီၣ်ကွံာ်ဝဲလီၤ. တၢ်န့ၣ်မ့ၢ်စီၤဧ့ၡီၤပာ်ကဲဖိဝဲၢ်ကိတၢ်န့ၢ်သါအတၢ်ဆိၣ်ဂ့ၤ ထဲလဲၣ်အဂ့ၢ်လီၤ.