Read S'gaw Karen လံာ်တၢ်ကဲထီၣ်အခီၣ်ထံး 29 Bible Online

လံာ်တၢ်ကဲထီၣ်အခီၣ်ထံး 29 - S'gaw Karen bible

လံာ်တၢ်ကဲထီၣ်အခီၣ်ထံး 29

¹ဒီးစီၤယၤကိာ်လဲၤဆူညါကွ့ၢ်ကွ့ၢ်ဒီးလဲၤဝဲလိၤလိၤဆူကီၢ် လၢမုၢ်ထီၣ်န့ၣ်လီၤ.

²သတူၢ်ကလာ်အဝဲဟဲတုၤဝဲဆူထံပူၤတပူၤလၢအအိၣ်လၢစံာ်ပျီတဖၣ် အပူၤ, အိၣ်ဒီးသိအဖုသၢဖုကိာ်လီၤဝးတရံးအီၤန့ၣ်လီၤ. ထံပူၤအံၤမ့ၢ်တၢ်လီၢ်လၢသိအဖုအဂီၢ်တဖၣ်ဘၣ်တၢ်ဒုးအီအီၤထံ အလီၢ်, ဒီးလၢၢ်ဖးဒိၣ်အိၣ်ဝဲတဖျၢၣ်လၢထံပူၤအံၤအခိၣ်ထိးန့ၣ်လီၤ.

³ဒီးဖဲလၢသိအဖုအဂီၢ်ခဲလၢာ်ဟဲတုၤဖှိၣ်ဖဲန့ၣ်တဘျီဂ့ၤ တဘျီဂ့ၤန့ၣ်ပှၤကွၢ်သိတဖၣ်တလ့ၣ်ကွံာ်လၢၢ်န့ၣ်ဒီးဒုးအီသိ တဖၣ်လၢထံန့ၣ်လီၤ. အန့ၣ်ဝံၤဒီး, တလ့ၣ်ကဒါက့ၤလၢၢ်လၢအလီၢ်ဒၣ်ဝဲ န့ၣ်လီၤ.

⁴စီၤယၤကိာ်သံကွၢ်ပှၤကွၢ်သိတဖၣ်, “ယတံၤသကိးသ့ၣ်ဧၢ, သုဟဲလၢလဲၣ်”. ဒီးအဝဲသ့ၣ်စံးဆၢဝဲ, “လၢဝ့ၢ်ဟၤရၣ်န့ၣ်လီၤ.”

⁵အဝဲသံကွၢ်ဝဲ, “မ့ၢ်သုသ့ၣ်ညါစီၤနၤဃိၢ်အဖိခွါစီၤလၤဘၣ် န့ၣ်ဧါ.” ဒီးအဝဲသ့ၣ်စံးဆၢဝဲ, “မ့ၢ်ပသ့ၣ်ညါလီၤ.”

⁶အဝဲသံကွၢ်ဝဲ, “မ့ၢ်အအိၣ်မုာ်ကစီဒီဧါ.” ဒီးအဝဲသ့ၣ်စံးဆၢဝဲ, “အိၣ်မုာ်ဝဲလီၤ. ကွၢ်, အဖိမုၣ်နီၢ်ရၤဃ့လးဟဲလၢန့ၣ်ဃုာ်ဒီးအသိအဖုအဂီၢ်န့ၣ် တက့ၢ်.”

⁷ဒီးစီၤယၤကိာ်စံးဝဲဒၣ်, “မုၢ်တၢ်ကပီၤအိၣ်ဒံးဝဲဖးထီ ဒီးတမ့ၢ်ဘၣ်အဆၢကတီၢ်လၢတၢ်ဝီနုာ်က့ၤသိအဖုအဂီၢ်တဖၣ်ဒံးဘၣ် န့ၣ်, ဘၣ်မနုၤလၢသုတဒုးအီအီၤလၢထံဒီးဆှၢကဒါက့ၤဆူတၢ်အီၣ် အဆၣ်အလီၢ်ဘၣ်န့ၣ်လဲၣ်.”

⁸ဒီးအဝဲသ့ၣ်စံးဆၢဝဲ, “တချုးလၢကယဲၢ်သိအဖုအဂီၢ်တဖၣ်ဟဲတုၤဖှိၣ် ဖဲအံၤဒီးတချုးပှၤတလ့ၣ်ကွံာ်လၢၢ်လၢထံပူၤအခိၣ်ထိး ဘၣ်န့ၣ်ပမၤတသ့ဘၣ်. သိအဖုအဂီၢ်မ့ၢ်ဟဲတုၤဖှိၣ်ဒီး, ပကဒုးအီအဝဲသ့ၣ်လၢထံလီၤ.”

⁹ဖဲစီၤယၤကိာ်ကတိၤဒံးတၢ်ဒီးအဝဲသ့ၣ်အဖၢမုၢ်န့ၣ်နီၢ်ရၤဃ့လး ဟဲတုၤဒီးအသိအဖုအဂီၢ်န့ၣ်လီၤ.

¹⁰တုၤစီၤယၤကိာ်ထံၣ်နီၢ်ရၤဃ့လးဃုာ်ဒီးအဖါတံၢ်စီၤလၤဘၣ် အသိတဖၣ်န့ၣ်လဲၤဝဲဆူထံပူၤဒီးတလ့ၣ်ကွံာ်လၢၢ်ဝံၤဒုးအီသိ တဖၣ်လၢထံန့ၣ်လီၤ.

¹¹ဒီးနၢမူဝဲနီၢ်ရၤဃ့လးဒီးကိးထီၣ်ဝဲလၢတၢ်သူၣ်ခုသးခု အဃိလီၤ.

¹²စီၤယၤကိာ်စံးဘၣ်အီၤ, “ယမ့ၢ်နပၢ်အဘူးအတံၢ်နီၢ်ရံးဘကၤအဖိ ခွါလီၤ.” နီၢ်ရၤဃ့လးဃ့ၢ်ဝဲဒ်သိးကတဲဘၣ်အပၢ်န့ၣ်လီၤ.

¹³ဒီးတုၤစီၤလၤဘၣ်နၢ်ဟူအဖိဒိၣ်ခွါစီၤယၤကိာ်အကစီၣ်န့ၣ်လဲၤ ဃ့ၢ်ဝဲလၢကထံၣ်လိာ်အီၤဒီးဖိးဃုဃာ်အီၤဒီးနၢမူအီၤ, ဒီးဟဲက့ၤကိးအီၤဆူအဟံၣ်ပူၤန့ၣ်လီၤ. တုၤစီၤယၤကိာ်တဲစီၤလၤဘၣ်လၢကယဲၢ်တၢ်ခဲလၢာ်လၢအမၤတ့ၢ်အသး ဝံၤဒီး,

¹⁴စီၤလၤဘၣ်စံးဘၣ်အီၤ, “နမ့ၢ်ယသွံၣ်ဒီးယညၣ်နီၢ်နီၢ်လီၤ.” ဒီးစီၤယၤကိာ်အိၣ်ဖဲန့ၣ်ဒီတလါန့ၣ်လီၤ.

¹⁵ဒီးစီၤလၤဘၣ်စံးဘၣ်စီၤယၤကိာ်, “မ့ၢ်လၢနမ့ၢ်ယဘူးယတံၢ်အ ဃိနတကြၢးမၤတၢ်လၢယဂီၢ်ကလီကလီဘၣ်. နသးလီတၢ်အဘူးအလဲဆံးအါလဲၣ်.”

¹⁶စီၤလၤဘၣ်အိၣ်ဒီးအဖိမုၣ်ခံဂၤန့ၣ်လီၤ. အဒိၣ်တဂၤန့ၣ်အမံၤမ့ၢ်ဝဲနီၢ်လ့ၤအၤဒီးအဆံးတဂၤမ့ၢ်ဝဲ နီၢ်ရၤဃ့လးန့ၣ်လီၤ.

¹⁷ဒီးနီၢ်လ့ၤအၤန့ၣ်အမဲာ်ချံတဖၣ်ဘံယုၤဝဲဒီးနီၢ်ရၤဃ့လး န့ၣ်အက့ၢ်အဂီၤဂ့ၤဝဲဒီးဃံလၤဝဲလီၤ.

¹⁸စီၤယၤကိာ်အဲၣ်ဝဲနီၢ်ရၤဃ့လးအဃိဒီးစံးဝဲ, “နမ့ၢ်ပျဲယဖျီဃုာ်ယသးဒီးနီၢ်ရၤဃ့လၤန့ၣ်ယကမၤတၢ်လၢနဂီၢ် နွံနံၣ်လီၤ.”

¹⁹ဒီးစီၤလၤဘၣ်စံးဆၢအီၤ, “ယသးအိၣ်ဟ့ၣ်အီၤလၢနၤဒိၣ်န့ၢ် ယကဟ့ၣ်ပှၤအဂၤတဂၤလီၤ. အိၣ်ဖဲအံၤတက့ၢ်.”

²⁰စီၤယၤကိာ်မၤတ့ၢ်တၢ်နွံနံၣ်ဒ်သိးကဒိးန့ၢ်ဘၣ်နီၢ်ရၤဃ့လး အဂီၢ်လီၤ. တၢ်ဆၢကတီၢ်မၤအသးဒ်စှၤနံၤစှၤသီအသိးလၢအဂီၢ်လီၤ. အဂ့ၢ်ဒ်အံၤ, အဝဲအဲၣ်ဘၣ်ပိာ်မုၣ်န့ၣ်လီၤ.

²¹ဒီးစီၤယၤကိာ်စံးဘၣ်စီၤလၤဘၣ်, “တၢ်ဆၢကတီၢ်ထီၣ်ဘးလံ. ပျဲယဖျီဃုာ်ယသးဒီးနဖိမုၣ်တက့ၢ်.”

²²ဒီးစီၤလၤဘၣ်မၤတၢ်ဖျီအမူးဒီးကွဲပှၤကိးဂၤဒဲးန့ၣ်လီၤ.

²³ဘၣ်ဆၣ်ဒီးလၢနၤအဝဲန့ၣ်, အဝဲလဲၤဆှၢနီၢ်လ့ၤအၤလၢနီၢ်ရၤဃ့ လးအလီၢ်, ဆူစီၤယၤကိာ်အအိၣ်ဒီးစီၤယၤကိာ်မံဃုာ်ဂဲၤဃုာ်ဒီးနီၢ်လ့ၤ အၤန့ၣ်လီၤ.

²⁴(ဒီးစီၤလၤဘၣ်ဟ့ၣ်လီၤဝဲအကုၢ်ပိာ်မုၣ်ဖိနီၢ်စံၤလပၤဆူအဖိ မုၣ်နီၢ်လ့ၤအၤဒ်အခ့အပှၤပိာ်မုၣ်အသိးန့ၣ်လီၤ.)

²⁵ဒီးလၢမုၢ်ဆ့ၣ်ထီၣ်လၢခံတနံၤဖဲစီၤယၤကိာ်သ့ၣ်ညါဝဲလၢ အမ့ၢ်နီၢ်လ့ၤအၤန့ၣ်, ဒီးစီၤယၤကိာ်လဲၤဝဲဆူစီၤလၤဘၣ်အအိၣ်ဒီးစံးဝဲ, “ဘၣ်မနုၤအဃိ, နမၤတၢ်ဒ်အံၤလၢယၤန့ၣ်လဲၣ်. ယမၤတၢ်လၢယကန့ၢ်ဘၣ်နီၢ်ရၤဃ့လးအဂီၢ်လီၤ. ဘၣ်မနုၤလၢနလီယၤန့ၣ်လဲၣ်.”

²⁶စီၤလၤဘၣ်စံးဆၢဝဲဒၣ်, “တၢ်ဟ့ၣ်လီၤဆိဖိမုၣ်အဆံးလၢအဒိၣ် အမဲာ်ညါန့ၣ်တမ့ၢ်တၢ်လီၢ်ဖဲအံၤအလုၢ်အလၢ်ဘၣ်.

²⁷အိၣ်ခိးတုၤတၢ်တ့တၢ်ဖျီအမူးအကတီၢ်တနွံဝံၤတက့ၢ်. ဒီးယကဟ့ၣ်နၤလၢနီၢ်ရၤဃ့လးဖဲနမၤတၢ်လၢယဂီၢ်ဆူညါနွံနံၣ် န့ၣ်လီၤ.”

²⁸စီၤယၤကိာ်ဘၣ်သူၣ်ဘၣ်သးဝဲဒီးဖဲတၢ်တ့တၢ်ဖျီအမူးတနွံဝံၤ အလီၢ်ခံစီၤလၤဘၣ်ဟ့ၣ်အီၤလၢအဖိမုၣ်နီၢ်ရၤဃ့လးဒ်အမါအသိး န့ၣ်လီၤ.

²⁹(ဒီးစီၤလၤဘၣ်ဟ့ၣ်အကုၢ်ပိာ်မုၣ်ဖိနီၢ်ဘံၤလဟၤဆူအဖိမုၣ် နီၢ်ရၤဃ့လးဒ်အခ့အပှၤပိာ်မုၣ်အသိးန့ၣ်လီၤ.)

³⁰ဒီးစီၤယၤကိာ်မံဃုာ်ဂဲၤဃုာ်စ့ၢ်ကီးဒီးနီၢ်ရၤဃ့လး, ဒီးအဲၣ်ဝဲနီၢ်ရၤဃ့လးအါန့ၢ်နီၢ်လ့ၤအၤန့ၣ်လီၤ. ဒီးမၤကဒီးတၢ်လၢစီၤလၤဘၣ်အဂီၢ်ဆူညါနွံနံၣ်န့ၣ်လီၤ.

³¹ဒီးတုၤယွၤထံၣ်ဝဲဒၣ်လၢနီၢ်လ့ၤအၤဘၣ်တၢ်အဲၣ်အီၤစှၤန့ၢ် နီၢ်ရၤဃ့လးန့ၣ်မၤဝဲဒ်သိးနီၢ်လ့ၤအၤအိၣ်ဒီးအဖိကသ့ဝဲ အဂီၢ်န့ၣ်လီၤ. မ့မ့ၢ်, နီၢ်ရၤဃ့လးအိၣ်ဒံးဝဲဒ်ပှၤတူာ်ဖိအသိးန့ၣ်လီၤ.

³²ဒီးနီၢ်လ့ၤအၤဒၢထီၣ်ဒီးဆံးစၢ်န့ၣ်အဖိခွါတဂၤလီၤ. ဒီးစံးဝဲ, “ယွၤထံၣ်တ့ၢ်လံယတၢ်ကီတၢ်ခဲလံ, ဒီးခဲကနံၣ်အံၤယဝၤကအဲၣ်ယၤလီၤ.” ဒီးယုၢ်န့ၢ်အမံၤလၢစီၤရူၤဘ့ၣ်လီၤ.

³³နီၢ်လ့ၤအၤဒၢထီၣ်ကဒီးဝဲဒီးဆံးစၢ်ထီၣ်အဖိခွါလၢခံတဂၤ န့ၣ်လီၤ. ဒီးစံးဝဲ, “ယွၤဟ့ၣ်လံယၤယဖိခွါအံၤစ့ၢ်ကီးလီၤ. အဂ့ၢ်ဒ်အံၤ, ယွၤနၢ်ဟူတ့ၢ်လၢယတဘၣ်တၢ်အဲၣ်ယၤအဃိန့ၣ်လီၤ.” ဒီးယုၢ်အမံၤလၢစီၤစူၤမ့းအိၣ်လီၤ.

³⁴ဒီးဒၢထီၣ်ကဒီးဝဲဒီးဆံးစၢ်ထီၣ်အဖိခွါတဂၤန့ၣ်လီၤ. ဒီးစံးဝဲ, “ဒီးခဲကနံၣ်အံၤ, ယဝၤကဘျုးအသးအါထီၣ်ဒီးယၤ လီၤ. အဂ့ၢ်ဒ်အံၤ, ယဆံးစၢ်န့ၢ်အဖိခွါသၢဂၤအဃိလီၤ.” ဒီးယုၢ်အမံၤလၢစီၤလ့ၤဝံလီၤ.

³⁵ဒီးဒၢထီၣ်ကဒီးဝဲဒီးဆံးစၢ်န့ၢ်အဖိခွါအဂၤတဂၤစ့ၢ်ကီး လီၤ. ဒီးစံးဝဲ, “အအံၤတဘျီယကစံးထီၣ်ပတြၢၤယွၤလီၤ.” ဒီးယုၢ်န့ၢ်အမံၤလၢစီၤယူဒၤလီၤ. ဒီးပိာ်မုၣ်န့ၣ်ဆိတ့ၢ်ဝဲ တၢ်အိၣ်ဒံၣ်အိၣ်ဖိန့ၣ်လီၤ.