Read S'gaw Karen လံာ်တၢ်ကဲထီၣ်အခီၣ်ထံး 43 Bible Online

လံာ်တၢ်ကဲထီၣ်အခီၣ်ထံး 43 - S'gaw Karen bible

လံာ်တၢ်ကဲထီၣ်အခီၣ်ထံး 43

¹တၢ်သၣ်ဝံၤလီၤဒိလၢကီၢ်ကနၤဧၣ်အပူၤန့ၣ်, နးထီၣ်ဝဲ,

²ဒီးတုၤစီၤယၤကိာ်အဒူၣ်ဖိထၢဖိတဖၣ်အီၣ်ဘုဧိၤဟုဧိၤလၢအ ဟဲ က့ၤစိာ်ဝဲလၢကီၢ်အဲၤကူပတူးလၢာ်ကွံာ်ဝဲန့ၣ်, စီၤယၤကိာ်စံးဘၣ်အဖိခွါတဖၣ်, “လဲၤကဒါက့ၤဒီးပှ့ၤတၢ် အီၣ်တစဲးလၢပဂီၢ်တက့ၢ်.”

³စီၤယူဒၤစံးဘၣ်အီၤ, “ပှၤတဂၤန့ၣ်ဟ့ၣ်ပလီၢ်တ့ၢ်ပှၤဆူၣ်ဆူၣ် လၢမ့တမ့ၢ်ဘၣ်လၢပဒီပုၢ်ဝဲၢ်ခွါလဲၤဃုာ်တၢ်ဒီးပှၤန့ၣ်, တမ့ၢ်ပကဘၣ်တၢ်ပျဲနုာ်ပှၤဆူအမဲာ်ညါန့ၣ်ဘၣ်.

⁴နမ့ၢ်သးအိၣ်ပျဲပဒီပုၢ်ဝဲၢ်ခွါလဲၤဃုာ်တၢ်ဒီးပှၤန့ၣ်, ပကလဲၤဒီးပှ့ၤတၢ်အီၣ်တၢ်အီလၢနဂီၢ်န့ၣ်လီၤ.

⁵နမ့ၢ်တသးအိၣ်ပျဲဘၣ်ဒီးပတလဲၤဘၣ်. အဂ့ၢ်ဒ်အံၤ, ပှၤတဂၤန့ၣ်တဲဘၣ်ပှၤလၢမ့တမ့ၢ်ဘၣ်လၢပဒီပုၢ်ဝဲၢ်ခွါလဲၤဃုာ် တၢ်ဒီးပှၤန့ၣ်တမ့ၢ်ပကဘၣ်တၢ်ပျဲနုာ်ပှၤဆူအမဲာ်ညါန့ၣ်ဘၣ်.”

⁶စီၤယၤကိာ်စံးဝဲ, “ဘၣ်မနုၤသုဒုးဘၣ်ယၤတၢ်ကိၢ်တၢ်ဂီၤနး မးခီဖျိသုတဲဘၣ်ပှၤတဂၤန့ၣ်လၢသုအိၣ်ဒံးဒီးသုဒီပုၢ် ဝဲၢ်ခွါအဂၤတဂၤန့ၣ်လဲၣ်.”

⁷အဝဲသ့ၣ်စံးဆၢဝဲ, “ပှၤတဂၤန့ၣ်သံကွၢ်ဝံၤသံကွၢ်က့ၤပှၤ ဒီးပဒူၣ်ဖိထၢဖိအဂ့ၢ်လီၤ. မ့ၢ်သုပၢ်အိၣ်မူဝဲဒံးဧါ. မ့ၢ်သုအိၣ်ဒီးသုဒီပုၢ်ဝဲၢ် ခွါအဂၤတဂၤဧါ. ပဘၣ်စံးဆၢအတၢ်သံကွၢ်တဖၣ်လီၤ. အဝဲကမၢပဟဲကိးပဒီပုၢ်ဝဲၢ်ခွါဒီးပှၤလီၤန့ၣ်ပသ့ၣ်ညါကသ့ဒ်လဲၣ်.”

⁸စီၤယူဒၤစံးဘၣ်အပၢ်, “ပျဲလီၤစီၤဘံၣ်ယၤမံၣ်ဒီးယၤတ က့ၢ်. ဒီးပကဟးထီၣ်တဘျီဃီလီၤ. တုၤနုၤတစုပတလီၤဒိသံဘၣ်နီတဂၤ ဘၣ်.

⁹ယကအုၣ်ကီၤယသးသမူဒၣ်ယဲလၢအဂီၢ်, ဒီးနပာ်မူပာ်ဒါယၤလၢအဝဲ အဂီၢ်သ့လီၤ. ယမ့ၢ်တဟဲက့ၤကိးအီၤပူၤပူၤဖျဲးဖျဲးဘၣ်ဒီး, ယကတူၢ်တၢ်ပာ်ဒ့ၣ်ပာ်ကမၣ်တဘိယူၢ်ဃီန့ၣ်လီၤ.

¹⁰ပမ့ၢ်တသုးဆၢသုးကတီၢ်ယံာ်ယံာ်ထဲအံၤဘၣ်ဒီး, ပလဲၤကတုၤတ့ၢ်ဖဲန့ၣ်ဒီးခဲအံၤပဟဲက့ၤကဒါက့ၤကတုၤခံဘျီ လံလီၤ.”

¹¹အဝဲသ့ၣ်အပၢ်စံးဘၣ်အီၤ, “မ့ကဘၣ်မ့ၢ်ဒ်န့ၣ်အဃိဒီး, ဟံးန့ၢ်ကီၢ်အတၢ်ဟးထီၣ်အဂ့ၤကတၢၢ်တဖၣ်ဒ်သ့ၣ်စရံၤအထုးတစဲး, ကနဲစီတစဲး, တၢ်နၢမူနၢဆှီတဖၣ်, သ့အီၣ်ဘိတၣ်အ သၣ်တဖၣ်ဒီးသ့ၣ်ၡီးက့းအသၣ်တဖၣ်လၢသုထၢၣ်တဖၣ်အပူၤဒ်တၢ်ဟ့ၣ် ကနၢၤလၢပဒိၣ်ဖးဒိၣ်အဂီၢ်တက့ၢ်.

¹²ဟံးန့ၢ်စ့ၢ်ကီးစ့ခံစး, မ့ၢ်လၢသုကဘၣ်က့ၤစိာ်က့ၤစ့လၢ အဘၣ်တၢ်ဟ့ၣ်ကဒါက့ၤသုလၢသုထၢၣ်တဖၣ်အဖီခိၣ်အဃိလီၤ. ဘၣ်သ့ၣ်သ့ၣ်တၢ်န့ၣ်ကမ့ၢ်တၢ်ကမူၤကမၣ်တမံၤလီၤ.

¹³လဲၤကိးသုဒီပုၢ်ဝဲၢ်ခွါဒီးဟဲက့ၤကဒါက့ၤတဘျီဃီတက့ၢ်.

¹⁴မ်သ့တၢ်လၢာ်ကစၢ်ယွၤထိးဘၣ်ပှၤတဂၤန့ၣ်အသးဒ်သိးကသးကညီၤသု တုၤလၢကဟ့ၣ်ကဒါက့ၤစီၤဘံၣ်ယၤမံၣ်ဒီးသုဒီပုၢ်ဝဲၢ်ခွါအဂၤ တဂၤဆူသုအိၣ်န့ၣ်တက့ၢ်. မ့မ့ၢ်လၢယဂီၢ်တခီယမ့ၢ်ဘၣ်ခီၣ်ဆူကွံာ်ယဖိတဖၣ်ဒီးယကဘၣ်ခီၣ် ဆူကွံာ်လီၤ.”

¹⁵ဒီးပှၤဒီပုၢ်ဝဲၢ်ခွါသ့ၣ်တဖၣ်စိာ်ထီၣ်တၢ်ဟ့ၣ်သ့ၣ်တဖၣ်ဒီးစ့ လၢအဘၣ်တၢ်ဟ့ၣ်ကဒါက့ၤအီၤခံစးဒီးဟးထီၣ်လဲၤဆူကီၢ်အဲၤကူ ပတူးဃုာ်ဒီးစီၤဘံၣ်ယၤမံၣ်န့ၣ်လီၤ. ဒီးဖဲန့ၣ်အဝဲသ့ၣ်ပာ်ဖျါအသးလၢစီၤယိၤသးအမဲာ်ညါန့ၣ်လီၤ.

¹⁶ဖဲစီၤယိၤသးထံၣ်ဘၣ်စီၤဘံၣ်ယၤမံၣ်ဟဲဃုာ်ဒီးအဝဲသ့ၣ်န့ၣ် စံးဘၣ်အဟံၣ်အခ့အပှၤတဖၣ်အခိၣ်တဂၤ, “လဲၤကိးပှၤသ့ၣ်တဖၣ်အံၤဆူယဟံၣ်တက့ၢ်. အဝဲသ့ၣ်ကအီၣ်မုၢ်ထူၣ်အတၢ်အီၣ်ဒီးယၤန့ၣ်လီၤ. အဃိမၤသံဆၣ်ဖိကီၢ်ဖိတဒုဒီးကတဲာ်ကတီၤအီၤတက့ၢ်.”

¹⁷တၢ်ခ့တၢ်ပှၤအံၤမၤဒ်အဘၣ်တၢ်မၤလိာ်အီၤအသိးဒီးလဲၤကိးပှၤ ဒီပုၢ်ဝဲၢ်ခွါတဖၣ်အံၤဆူစီၤယိၤသးအဟံၣ်န့ၣ်လီၤ.

¹⁸မ့ၢ်လၢအဝဲသ့ၣ်ဘၣ်တၢ်က့ၤကိးဆူဟံၣ်န့ၣ်အဃိ, အဝဲသ့ၣ်ပျံၤတၢ်ဒီးဆိကမိၣ်ထီၣ်ဝဲ, “ပဘၣ်တၢ်ဟဲကိးပှၤဖဲ အံၤမ့ၢ်ဒၣ်လၢစ့လၢအဘၣ်တၢ်ဟ့ၣ်ကဒါက့ၤပှၤလၢပထၢၣ်တဖၣ်အပူၤ အခီၣ်ထံးတဘျီအဃိလီၤ. အဝဲသ့ၣ်ကမၤဒၢၣ်ပှၤသတူၢ်ကလာ်, ဟံးန့ၢ်ပကသ့ၣ်ယီၤတဖၣ်, ဒီးဒုးကဲထီၣ်ပှၤလၢအကုၢ်တဖၣ်န့ၣ်လီၤ.”

¹⁹လၢတၢ်န့ၣ်အဃိဖဲဟံၣ်အတြဲၤန့ၣ်, အဝဲသ့ၣ်စံးဘၣ်တၢ်ခ့တၢ်ပှၤ အခိၣ်,

²⁰“ကစၢ်ဧၢ, လၢနတၢ်ပျဲပှၤအဃိ, ပဟဲတ့ၢ်လၢညါတဘျီ ဒ်သိးပကပှ့ၤတၢ်အီၣ်တၢ်အီလီၤ.

²¹ဖဲပက့ၤဆူဟံၣ်လၢကျဲ, ဖဲပသူၣ်ဒဲအိၣ်ဘှံးအလီၢ်န့ၣ်ပအိးထီၣ် ပထၢၣ်တဖၣ်, ဒီးပဝဲတဂၤဘၣ်တဂၤစုာ်စုာ်ပထံၣ်ပစ့ကိးဘ့ၣ်ဒဲးလၢပထၢၣ်အခိၣ် ထိးန့ၣ်လီၤ. ဒီးပဟဲစိာ်ကဒါက့ၤစ့အံၤဆူနအိၣ်လီၤ.

²²ပဟဲစိာ်အါထီၣ်စ့ၢ်ကီးစ့တနီၤလၢပသိးလၢပကပှ့ၤအါထီၣ်တၢ် အီၣ်တၢ်အီအဂီၢ်န့ၣ်လီၤ. မ့ၢ်မတၤဒၢနုာ်ကဒါက့ၤပစ့လၢပထၢၣ်တဖၣ်အပူၤလဲၣ်န့ၣ်ပတသ့ၣ်ညါ ဘၣ်.”

²³တၢ်ခ့တၢ်ပှၤစံးဘၣ်အီၤ, “ဘၣ်ယိၣ်တၢ်တဂ့ၤ, ပျံၤတၢ်တဂ့ၤ. သုကစၢ်ယွၤ, သုပၢ်အကစၢ်ယွၤကတ့ၢ်နုာ်က့ၤစ့လၢသုထၢၣ်တဖၣ် အပူၤလၢသုဂီၢ်န့ၣ်လီၤ. ယဒိးန့ၢ်ဘၣ်သုတၢ်ဟ့ၣ်ကဒါက့ၤလံ.” ဒီးဟဲက့ၤကိးစီၤစူၤမ့းအိၣ်ဆူအဝဲသ့ၣ်အအိၣ်လီၤ.

²⁴တၢ်ခ့တၢ်ပှၤန့ၣ်လဲၤကိးပှၤဒီပုၢ်ဝဲၢ်ခွါတဖၣ်ဆူဟံၣ်ပူၤန့ၣ် လီၤ. ဒီးဟ့ၣ်အဝဲသ့ၣ်လၢထံဒ်သိးကသ့အခီၣ်ဒီးဒုးအီၣ်အဝဲသ့ၣ် အကသ့ၣ်ယီၤတဖၣ်အဆၣ်န့ၣ်လီၤ.

²⁵အဝဲသ့ၣ်ကတဲာ်ကတီၤထီၣ်အတၢ်ဟ့ၣ်တဖၣ်လၢကဟ့ၣ်စီၤယိၤသး, ဖဲအဝဲဟဲက့ၤတုၤလၢမုၢ်ထူၣ်အကတီၢ်, မ့ၢ်လၢအဝဲသ့ၣ်ဘၣ်တၢ်တဲ ဘၣ်တ့ၢ်အီၤလၢအဝဲသ့ၣ်ကဘၣ်အီၣ်တၢ်ဒီးအီၤအဃိန့ၣ်လီၤ.

²⁶ဖဲစီၤယိၤသးဟဲက့ၤတုၤဆူဟံၣ်န့ၣ်, အဝဲသ့ၣ်လဲၤစိာ်တၢ်ဟ့ၣ် တဖၣ်ဆူဟံၣ်ပူၤဆူအအိၣ်ဒီးဆုးလီၤအခိၣ်တုၤလၢဟီၣ်ခိၣ်လိၤ လၢအမဲာ်ညါန့ၣ်လီၤ.

²⁷အဝဲသံကွၢ်တၢ်ဘၣ်ဃးဒီးအဝဲသ့ၣ်အတၢ်အိၣ်ဆူၣ်အိၣ်ချ့ အဂ့ၢ်ဝံၤဒီးစံးဝဲ, “သုတဲဘၣ်တ့ၢ်ယၤဘၣ်ဃးသုပၢ်သးပှၢ် အဂ့ၢ်လီၤ. အဝဲအိၣ်မၤသးဒ်လဲၣ်. မ့ၢ်အအိၣ်မူဒံးဒီးအိၣ်ဆူၣ်အိၣ်ချ့ ကစီဒီဧါ.”

²⁸အဝဲသ့ၣ်စံးဆၢဝဲ, “နခ့ဆံးပှၤဆံးပပၢ်အိၣ်မူဒံးဝဲအိၣ် ဆူၣ်အိၣ်ချ့ကစီဒီလီၤ.” ဒီးအဝဲသ့ၣ်ချံးခီၣ်တီၤလီၤဒီးသကူးလီၤအသးလၢအမဲာ်ညါန့ၣ်လီၤ.

²⁹ဖဲစီၤယိၤသးထံၣ်ဘၣ်အဒီပုၢ်ဝဲၢ်ခွါစီၤဘံၣ်ယၤမံၣ်န့ၣ်, အဝဲစံးဝဲ, “အဝဲအံၤမ့ၢ်သုပုၢ်ပိာ်ခွါအဆံးကတၢၢ်လၢသု တဲတ့ၢ်ယၤအဂ့ၢ်န့ၣ်ဧါ. ယဖိခွါဧၢ, မ်ကစၢ်ယွၤဆိၣ်ဂ့ၤနၤတ က့ၢ်.”

³⁰တုၤနုၤတစုစီၤယိၤသးဟးထီၣ်သတူၢ်ကလာ်, မ့ၢ်လၢအသးလီၤသကံးဒိၣ်မးလၢအဒီပုၢ်ဝဲၢ်ခွါအဃိန့ၣ်လီၤ. အဝဲထၢၣ်အသးတန့ၢ်လၢၤဘၣ်အဃိ, လဲၤနုာ်ဆူအဒၢးပူၤဒီးဟီၣ်ဝဲဒၣ်န့ၣ်လီၤ.

³¹တုၤအပျၢ်ကွံာ်အမဲာ်ဝံၤန့ၣ်, အဝဲဟဲက့ၤထီၣ်, ပၢၤက့ၤအသး, ဒီးမၢပှၤကတဲာ်ကတီၤတၢ်အီၣ်တၢ်အီန့ၣ်လီၤ.

³²စီၤယိၤသးဘၣ်တၢ်ကတဲာ်ကတီၤန့ၢ်အီၤတၢ်အီၣ်လၢစီၢ်နီၤခိၣ် တဖျၢၣ်ဒီးအဒီပုၢ်ဝဲၢ်ခွါတဖၣ်တခီလၢစီၢ်နီၤခိၣ်အဂၤတဖျၢၣ် န့ၣ်လီၤ. ဒီးပှၤအဲၤကူပတူးဖိတဖၣ်အီၣ်စ့ၢ်ကီးတၢ်လၢစီၢ်နီၤခိၣ်အဂၤ တဖျၢၣ်, မ့ၢ်လၢအဝဲသ့ၣ်ဆိကမိၣ်ဝဲလၢတၢ်အီၣ်သကိးတၢ်ဒီးပှၤဧ့ၤဘြံၤ ဖိတဖၣ်န့ၣ်မၤဆံးလီၤစှၤလီၤအဝဲသ့ၣ်အသူးအသ့ၣ်အဃိလီၤ.

³³ပှၤဒီပုၢ်ဝဲၢ်ခွါတဖၣ်ဘၣ်တၢ်ပာ်လီၤန့ၢ်အလီၢ်လၢစီၢ်နီၤခိၣ်, မဲာ်သကိးမဲာ်ဒီးစီၤယိၤသးဒ်အသးအနံၣ်အလါဒၣ်ဝဲစးထီၣ်လၢ ပှၤသးပှၢ်ကတၢၢ်တုၤလၢအသးစၢ်ကတၢၢ်န့ၣ်လီၤ. ဖဲအဝဲသ့ၣ်ထံၣ်ဘၣ်ဝဲတၢ်ပာ်လီၤန့ၢ်အီၤအလီၢ်ဒ်လဲၣ်န့ၣ်, အဝဲသ့ၣ်ကွၢ်လိာ်အသးတဂၤဒီးတဂၤလၢတၢ်ကမၢကမၣ်အပူၤန့ၣ်လီၤ.

³⁴တၢ်အီၣ်ဘၣ်တၢ်ဟံးန့ၢ်အီၤလၢစီၤယိၤသးအစီၢ်နီၤခိၣ်ဒီးဟ့ၣ် လီၤဆူအဝဲသ့ၣ်, ဒီးစီၤဘံၣ်ယၤမံၣ်ဘၣ်တၢ်ဟ့ၣ်အီၤအါန့ၢ်အဂၤတဖၣ်ယဲၢ်စးလီၤ. ဒီးအဝဲသ့ၣ်အီၣ်တၢ်ဒီးအီတၢ်ဒီးစီၤယိၤသးတုၤအမူၤအဘှီး တစုန့ၣ်လီၤ.