Read S'gaw Karen လံာ်တၢ်ကဲထီၣ်အခီၣ်ထံး 7 Bible Online

လံာ်တၢ်ကဲထီၣ်အခီၣ်ထံး 7 - S'gaw Karen bible

လံာ်တၢ်ကဲထီၣ်အခီၣ်ထံး 7

¹ဒီးယွၤစံးဘၣ်စီၤနိအၤ, “လဲၤနုာ်ဆူကဘီပူၤဃုာ်ဒီးနပှၤ ဟံၣ်ဖိဃီဖိခဲလၢာ်န့ၣ်တက့ၢ်. ယထံၣ်တ့ၢ်လံလၢနမ့ၢ်ပှၤထဲတဂၤဧိၤလၢအမ့ၢ်ပှၤတီပှၤလိၤလၢ ကယဲၢ်ဟီၣ်ခိၣ်ဒီဘ့ၣ်ညါန့ၣ်လီၤ.

²မၤန့ၢ်ကယဲၢ်ဆၣ်ဖိကီၢ်ဖိလၢအကဆှီဒ်တၢ်ဘူၣ်တၢ်ဘါအလုၢ်အလၢ်အိၣ် ဝဲအသိးအကျါနွံဒုနွံဒုအမိၢ်ဒီးအဖါ, ဒီးဆၣ်ဖိကီၢ်ဖိလၢအတကဆှီဘၣ်အကျါခံဒုခံဒုအမိၢ်ဒီးအဖါ ဒီးလဲၤစိာ်ဃုာ်ဒီးနၤတက့ၢ်.

³ဟံးန့ၢ်ဃုာ်ထိၣ်ဖိလံာ်ဖိနွံဘ့ၣ်နွံဘ့ၣ်အမိၢ်ဒီးအဖါဒ် အကလုာ်ဒၣ်ဝဲအသိးစ့ၢ်ကီးတက့ၢ်. မၤတၢ်ဒ်အံၤဒ်သိးကယဲၢ်ဆၣ်ဖိကီၢ်ဖိထိၣ်ဧိၤလံာ်ဧိၤကမူဝဲဒ် အကလုာ်ဒၣ်ဝဲအသိးဒီးကလိၣ်ထီၣ်ဖးထီၣ်ကဒါက့ၤကဒီးလၢဟီၣ်ခိၣ် ချၢအဂီၢ်န့ၣ်တက့ၢ်.

⁴စးထီၣ်ခဲအံၤဒီးဆူညါနွံနံၤန့ၣ်ယကဒုးစူၤလီၤမူခိၣ်ဒီး ကစူၤဝဲအနံၤလွံၢ်ဆံဒီးအနၤလွံၢ်ဆံလၢကမၤဟးဂီၤကွံာ်ကယဲၢ် တၢ်လၢအမူအသါတဖၣ်လၢယတ့တ့ၢ်အီၤခဲလၢာ်န့ၣ်လီၤ.”

⁵ဒီးစီၤနိအၤမၤဝဲဒ်ကယဲၢ်တၢ်လၢယွၤမၤလိာ်တ့ၢ်အီၤအသိးန့ၣ်လီၤ.

⁶ဒီးဖဲထံလုၣ်ဘၢတၢ်ဟဲလၢဟီၣ်ခိၣ်အဖီခိၣ်န့ၣ်စီၤနိအၤအသး အိၣ်လံအနံၣ်ဃုကယၤန့ၣ်လီၤ.

⁷ဒီးစီၤနိအၤဒီးအမါ, အဖိခွါတဖၣ်ဒီးအမါတဖၣ်လဲၤနုာ်ဆူ ကဘီပူၤဒ်သိးကပူၤဖျဲးဝဲလၢထံလုၣ်ဘၢတၢ်န့ၣ်လီၤ.

⁸ဆၣ်ဖိကီၢ်ဖိကိးအကလုာ်ဒဲးဒီးထိၣ်ဖိလံာ်ဖိလၢအကဆှီဒ်တၢ် ဘူၣ်တၢ်ဘါအလုၢ်အလၢ်အိၣ်ဝဲအသိးမ့ၢ်ဂ့ၤ, တကဆှီမ့ၢ်ဂ့ၤအမိၢ်ဒီးအဖါစုာ်စုာ်,

⁹လဲၤနုာ်ဆူကဘီပူၤဃုာ်ဒီးစီၤနိအၤဒ်ကစၢ်ယွၤမၤလိာ်တ့ၢ် အီၤအသိးန့ၣ်လီၤ.

¹⁰နွံသီပူၤကွံာ်ဒီးထံလုၣ်ဘၢတၢ်အိၣ်ထီၣ်ဝဲလၢဟီၣ်ခိၣ်ချၢလီၤ.

¹¹ဒီးတုၤစီၤနိအၤအသးအိၣ်အနံၣ်ဃုကယၤ, လါခံလါတလါ, ထီၣ်တဆံနွံသီအနံၤန့ၣ်ထံမိၢ်ပှၢ်ဖးလဲၢ်လၢဟီၣ်ခိၣ်လာ်အထံ ထီၣ်ပၢၢ်အလီၢ်တဖၣ်ပိၢ်ဖးထီၣ်ဝဲဒီးကယဲၢ်ထံလုၣ်ဘၢတၢ်အတြဲၤ တဖၣ်လၢမူခိၣ်အိးထီၣ်အသး,

¹²ဒီးတၢ်စူၤလီၤလၢဟီၣ်ခိၣ်ဖီခိၣ်အနံၤလွံၢ်ဆံဒီးအနၤလွံၢ် ဆံန့ၣ်လီၤ.

¹³လၢမုၢ်နံၤတနံၤဃီန့ၣ်စီၤနိအၤဒီးအမါလဲၤနုာ်ဆူကဘီပူၤ ဃုာ်ဒီးအဖိခွါသၢဂၤ, စီၤၡ့ၣ်, စီၤဃၣ်ဒီးစီၤယ့ဖ့းသးဒီး အဝဲသ့ၣ်အမါတဖၣ်န့ၣ်လီၤ.

¹⁴ကယဲၢ်ဆၣ်ဖိကီၢ်ဖိကိးကလုာ်ဒဲးလၢအမံၤဒီးအဒၢ, အဒိၣ်ဒီးအဆံးဒီးကယဲၢ်ထိၣ်ကိးအကလုာ်ဒဲးလဲၤနုာ်ဃုာ်ဒီးအဝဲ သ့ၣ်န့ၣ်လီၤ.

¹⁵တၢ်လၢအမူအသါဒ်အကလုာ်ဒၣ်ဝဲအသိး, အမိၢ်ဒီးအဖါစုာ်စုာ်လဲၤနုာ်ဆူကဘီပူၤဃုာ်ဒီး စီၤနိအၤ,

¹⁶ဒ်ကစၢ်ယွၤမၤလိာ်တ့ၢ်အသိးန့ၣ်လီၤ. ဒီးယွၤကးတံာ်ဃးတြဲၤ လၢစီၤနိအၤအလီၢ်ခံန့ၣ်လီၤ.

¹⁷ဒီးထံလုၣ်ဘၢတၢ်မၤဒံးအသးဆူညါအသီလွံၢ်ဆံဒီးထံအါထီၣ် ယိာ်ထီၣ်ဝဲတုၤလၢကဘီထီၣ်ဖီကသ့အဂီၢ်န့ၣ်လီၤ.

¹⁸ဒီးထံယိာ်ထီၣ်အါထီၣ်ဝဲဒီးကဘီန့ၣ်လီၤထွံလၢထံအမဲာ်ဖံး ခိၣ်န့ၣ်လီၤ.

¹⁹ဒီးထံဒိၣ်ထီၣ်ယိာ်ထီၣ်ဝဲအါအါကလဲာ်တုၤအလုၣ်ဘၢကွံာ်ကစၢၢ် လၢအထီကတၢၢ်တဖၣ်န့ၣ်လီၤ.

²⁰ဒီးထံထီၣ်ဝဲဆူညါတုၤအကစီၤထီၣ်ဝဲလၢကစၢၢ်တဖၣ်အဒီ ခိၣ်တဆံယဲၢ်ပျၢ်န့ၣ်လီၤ.

²¹ကယဲၢ်တၢ်လၢအမူအသါအိၣ်ဝဲလၢဟီၣ်ခိၣ်ဖီခိၣ်, ကယဲၢ်ထိၣ်ဧိၤလံာ်ဧိၤ, ဆၣ်ဖိကီၢ်ဖိဒီးပှၤကညီသံဝဲခဲလၢာ် လီၤ.

²²တၢ်အိၣ်လၢဟီၣ်ခိၣ်ဖီခိၣ်လၢအသါဝဲခဲလၢာ်န့ၣ်သံဝဲဒၣ်လီၤ.

²³ယွၤမၤဟးဂီၤကွံာ်ကယဲၢ်တၢ်လၢအမူအသါခဲလၢာ်လၢဟီၣ်ခိၣ်ဖီ ခိၣ်, ပှၤကညီတဖၣ်, ဆၣ်ဖိကီၢ်ဖိတဖၣ်ဒီးထိၣ်ဖိလံၣ်ဖိ တဖၣ်န့ၣ်လီၤ. ပှၤအိၣ်လီၤတဲာ်ဒၣ်ထဲစီၤနိအၤဒီးပှၤအိၣ်ဒီး အီၤတဖၣ်လၢကဘီပူၤန့ၣ်လီၤ.

²⁴ဒီးထံဒိၣ်ဝဲလၢဟီၣ်ခိၣ်ဖီခိၣ်အသီတကယၤယဲၢ်ဆံန့ၣ်လီၤ.