Read S'gaw Karen လံာ်စီၤၡမူၤအ့လးခံဘ့ၣ်တဘ့ၣ် 10 Bible Online

လံာ်စီၤၡမူၤအ့လးခံဘ့ၣ်တဘ့ၣ် 10 - S'gaw Karen bible

လံာ်စီၤၡမူၤအ့လးခံဘ့ၣ်တဘ့ၣ် 10

¹လၢခံတယံာ်ဘၣ်န့ၣ်, ပှၤဧၣ်မိၣ်ဖိအစီၤပၤစီၤနၤဃၣ်သံဝဲဒီး အဖိခွါစီၤဃၤနူၣ်ကဲထီၣ်စီၤပၤန့ၣ်လီၤ.

²စီၤပၤစီၤဒၤဝံးစံးဝဲဒၣ်, “ယကဘၣ်ဒုးနဲၣ်တံၤသကိးအတၢ် သူၣ်တီသးရၤဆူစီၤဃၤနူၣ်ဒ်အဝဲအပၢ်စီၤနၤဃၣ်မၤတ့ၢ်ယၤ အသိးန့ၣ်လီၤ. မၤသးဒ်န့ၣ်ဒီး, စီၤဒၤဝံးဆှၢလီၤပှၤစိာ်တၢ်ကစီၣ်တဖၣ်လၢကပာ် ဖျါထီၣ်အဝဲအတၢ်သူၣ်အုးသးအုးဃုာ်ဒီးအီၤန့ၣ်လီၤ. ဖဲအဝဲသ့ၣ်ဟဲတုၤလၢကီၢ်ဧၣ်မိၣ်အပူၤန့ၣ်,

³ပှၤဧၣ်မိၣ်ဖိအခိၣ်အနၢ်တဖၣ်စံးဘၣ်စီၤပၤ, “မ့ၢ်နဆိကမိၣ်လၢစီၤဒၤဝံးဆှၢလီၤပှၤတဖၣ်အံၤလၢကဒုးနဲၣ်ဖျါထီၣ် တၢ်သူၣ်အုးသးအုးဃုာ်ဒီးနၤန့ၣ်မ့ၢ်လၢတၢ်မၤလၤကပီၤနပၢ်အပူၤန့ၣ်ဧါ. တမ့ၢ်ဒ်န့ၣ်ဘၣ်. အဝဲဆှၢလီၤပှၤတဖၣ်န့ၣ်ဖဲအံၤဒ်ပှၤကွၢ်ဟုၣ်ကွၢ်စုးတၢ်တဖၣ်အသိး လၢကဃုသ့ၣ်ညါဝ့ၢ်အဂ့ၢ်ဒ်သိးအဝဲမၤနၢၤ ပှၤကသ့အဂီၢ်န့ၣ်လီၤ.”

⁴စီၤဃၤနူၣ်ဖီၣ်စီၤဒၤဝံးအပှၤစိာ်တၢ်ကစီၣ်တဖၣ်, လူၤကျိကွံာ်အဝဲသ့ၣ်အခၣ်ဆူၣ်တကပၤ, ကူးတဲာ်ကွံာ်အဝဲ သ့ၣ်အကူအသိးစးထီၣ်လၢအဆ့ကၤခီၣ်ထံးတုၤလၢအခံ ခိၣ်ဒီးဆှၢကဒါက့ၤအဝဲသ့ၣ်တဖၣ်န့ၣ်လီၤ.

⁵အဝဲသ့ၣ်အမဲာ်ဆှးဒိၣ်မးလၢကက့ၤကဒါက့ၤဆူဟံၣ်အဂီၢ်လီၤ. ဖဲစီၤဒၤဝံးနၢ်ဟူတၢ်လၢအမၤတ့ၢ်အသးအဂ့ၢ်န့ၣ်, အဝဲတဲဘၣ်လီၤအဝဲသ့ၣ်လၢကအိၣ်ဆိးဖဲဝ့ၢ်ယရံၤဃိအပူၤဒီး တချုးလၢအနိးဆူၣ်ခၣ်ဆူၣ်ဟဲထီၣ်ကဒါက့ၤဒံးဘၣ်ဒီးအသုတဟဲ က့ၤကဒါက့ၤတဂ့ၤန့ၣ်လီၤ.

⁶ပှၤဧၣ်မိၣ်ဖိတဖၣ်ထံၣ်သ့ၣ်ညါဝဲလၢအဝဲသ့ၣ်ဒုးကဲထီၣ်စီၤဒၤ ဝံးလၢအဝဲသ့ၣ်အဒုၣ်အဒါလံ, သတးဒီးအဝဲသ့ၣ်ဒိးလဲန့ၢ်ဝဲ ပှၤစူၤရံအသုးဖိအဂၤခံကလးလၢဝ့ၢ်ဘ့ၤသရဃိာ်ဒီးဝ့ၢ်စိဘၤ, ပှၤအဂၤတကလးခံကထိလၢဝ့ၢ်တိာ်ဒီးကိးဝ့ၢ်မကၤအစီၤပၤဃုာ် ဒီးအပှၤတကထိဂၤန့ၣ်လီၤ.

⁷စီၤဒၤဝံးနၢ်ဟူဘၣ်တၢ်ဂ့ၢ်န့ၣ်ဒီးဆှၢလီၤစီၤယိၤအာ်ထီဒါ အဝဲသ့ၣ်ဃုာ်ဒီးသုးမုၢ်ဒီတဖုညါန့ၣ်လီၤ.

⁸ပှၤဧၣ်မိၣ်ဖိတဖၣ်ဟဲထီၣ်ဒီးဟံးန့ၢ်အလီၢ်ဖဲ တၢ်လဲၤနုာ်ဆူအဝဲသ့ၣ်အဝ့ၢ်ခိၣ်ဝ့ၢ်ရံးဘၤအကျဲစၢၤ, ဖဲပှၤအဂၤတဖၣ်လၢအမ့ၢ်ပှၤ စူၤရံဖိတဖၣ်ဒီးပှၤတဖၣ်လၢဝ့ၢ်တိာ်ဒီးဝ့ၢ်မကၤဟံးန့ၢ်အလီၢ် လၢဝ့ၢ်အချၢတၢ်ပျီပူၤန့ၣ်လီၤ.

⁹စီၤယိၤအာ်ထံၣ်ဘၣ်လၢဒုၣ်ဒါအသုးဖိတဖၣ်ကဒုးအီၤလၢ တၢ်မဲာ်ညါဒီးလၢတၢ်လီၢ်ခံသတးဒီး, အဝဲဃုထၢထီၣ်ကီၢ်အံၣ်စရ့လးအသုးဖိအဂ့ၤကတၢၢ်တဖၣ်ဒီးဆီ လီၤအီၤလၢတၢ်ကွၢ်ဆၢၣ်မဲာ်ပှၤစူၤရံဖိတဖၣ်အဂီၢ်န့ၣ်လီၤ.

¹⁰အဝဲပာ်လီၤအပှၤသုးဖိအိၣ်လီၤတဲာ်အဂၤတဖၣ်လၢအဝဲ အဒီပုၢ်ဝဲၢ်စီၤအဘံၡဲၤအတၢ်ပၢတၢ်ဆှၢအဖီလာ်, ဒီးစီၤအဘံၡဲၤဆီလီၤသုးဖိတဖၣ်န့ၣ်လၢကကွၢ်ဆၢၣ်မဲာ်ပှၤဧၣ် မိၣ်ဖိတဖၣ်အဂီၢ်န့ၣ်လီၤ.

¹¹စီၤယိၤအာ်စံးဘၣ်အီၤ, “နမ့ၢ်ထံၣ်ဘၣ်လၢပှၤစူၤရံဖိတဖၣ်မၤ နၢၤယၤဒီးဟဲဒီးမၤစၢၤယၤတက့ၢ်. ဒီးပှၤဧၣ်မိၣ်ဖိတဖၣ်မ့ၢ်မၤနၢၤနၤန့ၣ်ယကလဲၤဒီးမၤစၢၤနၤလီၤ.

¹²အိၣ်ဒီးတၢ်ဂံၢ်ဆူၣ်ဘါဆူၣ်ဒီးတၢ်သူၣ်ဒူသးဒူတက့ၢ်. မ်ပဒုးတၢ်ဆူၣ်ဆူၣ်လၢပပှၤဂီၢ်မုၢ်အဂီၢ်ဒီးလၢပကစၢ်ယွၤ အဝ့ၢ်တဖၣ်အဂီၢ်န့ၣ်တက့ၢ်. ဒီးမ်တၢ်ဘၣ်ယွၤအသးလၢထီၣ်ပှဲၤထီၣ်ဝဲန့ၣ်တက့ၢ်.”

¹³စီၤယိၤအာ်ဒီးအပှၤတဖၣ်လဲၤထီၣ်ဆူညါလၢကဒုးတၢ်အဂီၢ်ဒီးပှၤ စူၤရံဖိတဖၣ်ထွးထီၣ်ဃ့ၢ်ကွံာ်ဝဲဒၣ်လီၤ.

¹⁴ဖဲပှၤဧၣ်မိၣ်ဖိတဖၣ်ထံၣ်လၢပှၤစူၤရံဖိတဖၣ်ထွးထီၣ်ဃ့ၢ်ကွံာ်ဝဲဒီး, အဝဲသ့ၣ်ထွးထီၣ်ဃ့ၢ်ကွံာ်လၢစီၤအဘံၡဲၤအမဲာ်ညါဒီးဂုၤကဒါ က့ၤဆူအလီၢ်ခံဆူဝ့ၢ်ပူၤန့ၣ်လီၤ. တုၤနုၤတစု, စီၤယိၤအာ်ဃၣ်ကဒါက့ၤအသးလၢတၢ်ဒုးပှၤဧၣ်မိၣ်ဖိတဖၣ် ဒီးက့ၤကဒါက့ၤဆူဝ့ၢ်ယရူၤၡလ့ၣ်န့ၣ်လီၤ.

¹⁵ပှၤစူၤရံဖိတဖၣ်ထံၣ်သ့ၣ်ညါဝဲလၢအဝဲသ့ၣ်ဘၣ်တၢ်မၤနၢၤကွံာ်အီၤလၢ ပှၤအံၣ်စရ့လးဖိတဖၣ်လံသတးဒီးအဝဲသ့ၣ်ကိးဖှိၣ်က့ၤ အသုးဖိသံၣ်ဖိခဲလၢာ်န့ၣ်လီၤ.

¹⁶စီၤပၤစီၤဟးဒးဧ့စ့ၢ်မၢပှၤကိးန့ၢ်အီၤပှၤစူၤရံဖိတဖၣ် လၢအအိၣ်လၢထံကျိဖရၤသးအမုၢ်ထီၣ်, ဒီးအဝဲသ့ၣ်ဟဲဝဲ ဆူဝ့ၢ်ဃ့လၣ်, ဆူစီၤၡိဘၤလၢအမ့ၢ်စီၤပၤစီၤဟးဒးဧ့စ့ၢ် အသုးခိၣ်ကျၢၢ်လၢဝ့ၢ်စိဘၤ, အတၢ်ပၢဆှၢအဖီလာ်န့ၣ်လီၤ.

¹⁷ဖဲစီၤဒၤဝံးနၢ်ဟူဘၣ်တၢ်ဂ့ၢ်အံၤန့ၣ်, အဝဲပာ်ဖှိၣ်ထီၣ်ကီၢ်အံၣ်စရ့လးအသုးဖိသံၣ်ဖိတဖၣ်, ခီဂာ်ထံကျိယၢ်ဒ့ၣ်ဒီးထီၣ်ဝဲဆူ ဝ့ၢ်ဃ့လၣ်ဖဲပှၤစူၤရံဖိတဖၣ်ဆီလီၤအလီၢ်ဒီးကွၢ်ဆၢၣ်မဲာ်အီၤန့ၣ်လီၤ.

¹⁸တၢ်ဒုးတၢ်ယၤစးထီၣ်ဝဲဒီးပှၤအံၣ်စရ့လးဖိတဖၣ်နီၣ်ကဒါက့ၤ ပှၤစူၤရံဖိအသုးမုၢ်ဆူအလီၢ်ခံန့ၣ်လီၤ. စီၤဒၤဝံးဒီးအပှၤတဖၣ်မၤသံကွံာ်ပှၤစူၤရံဖိအပှၤနီၣ်လ့ၣ်ကဟၣ်ဒုးသုးအဂၤနွံကယၤဒီး ကသ့ၣ်သုးဖိအဂၤလွံၢ်ကလး, ဒီးအဝဲသ့ၣ်မၤဘၣ်ဒိဘၣ်ထံးဒုၣ်ဒါအသုးခိၣ်ကျၢၢ်စီၤၡိဘး လၢအသံဝဲဖဲတၢ်ဒုးပျီအပူၤန့ၣ်လီၤ.

¹⁹ဖဲစီၤပၤတဖၣ်လၢအအိၣ်လၢစီၤဟးဒးဧ့စ့ၢ်အတၢ်ပၢတၢ်ပြးအဖီ လာ်ထံၣ်သ့ၣ်ညါဝဲလၢအဝဲသ့ၣ်ဘၣ်တၢ်မၤနၢၤကွံာ်အီၤလၢပှၤအံၣ် စရ့လးဖိတဖၣ်လံဒီး, အဝဲသ့ၣ်မၤတၢ်ဃူတၢ်ဖိးဒီးပှၤအံၣ်စရ့လးဖိတဖၣ်ဒီးကဲထီၣ် ပှၤတဖၣ်လၢအံၣ်စရ့လးပၢဘၣ်အီၤန့ၣ်လီၤ. ဒီးပှၤစူၤရံဖိတဖၣ်ပျံၤတၢ်လၢကမၤစၢၤပှၤဧၣ်မိၣ်ဖိတဖၣ် အဂီၢ်ဆူညါန့ၣ်လီၤ.