Read S'gaw Karen လံာ်စီၤၡမူၤအ့လးခံဘ့ၣ်တဘ့ၣ် 12 Bible Online

လံာ်စီၤၡမူၤအ့လးခံဘ့ၣ်တဘ့ၣ် 12 - S'gaw Karen bible

လံာ်စီၤၡမူၤအ့လးခံဘ့ၣ်တဘ့ၣ် 12

¹ယွၤဆှၢလီၤဝံစီၤနၤသၣ်ဆူစီၤဒၤဝံးအအိၣ်လီၤ. စီၤနၤသၣ်လဲၤဆူအအိၣ်ဒီးစံးဘၣ်အီၤ, “ပှၤအိၣ်ဝဲခံဂၤလၢအအိၣ်ဆိးလၢဝ့ၢ်တဝ့ၢ်ဃီအပူၤလီၤ. တဂၤန့ၣ်ထူးတီၤဒီးတဂၤန့ၣ်ဖှီၣ်ဝဲယာ်ဝဲလီၤ.

²ပှၤထူးပှၤတီၤတဂၤန့ၣ်အိၣ်ဒီးဂီၤဘုၣ်ဂီၤဖံးအါအါကလဲာ်ဒီး သိတဖၣ်,

³ဖဲပှၤအဖှီၣ်တဂၤန့ၣ်အိၣ်ဒၣ်ထဲသိဖိတဒုဧိၤလၢအဝဲပှ့ၤန့ၢ်ဝဲဒၣ်န့ၣ်လီၤ. အဝဲအံးထွဲကွၢ်ထွဲသိဖိန့ၣ်ဒီးသိဖိန့ၣ်ဒိၣ်ထီၣ်ဝဲ ဃုာ်ဒီးအဝဲအဖိတဖၣ်လၢအဟံၣ်ပူၤလီၤ. အဝဲဒုးအီၣ်အီၤလၢအတၢ်အီၣ်ဒၣ်ဝဲတနီၤ, ဒီးဒုးအီအီၤတၢ်လၢအဝဲအလီခီအပူၤဒီးစိာ်အီၤလၢအကံၣ်ဖျၢၣ်ခိၣ်န့ၣ်လီၤ. သိဖိန့ၣ်လီၤဂာ်ဒ်ဖိမုၣ်တဂၤအသိးလၢအဝဲအဂီၢ်န့ၣ်လီၤ.

⁴ဘၣ်မုၢ်တနံၤန့ၣ်, ပှၤသမှံၤတဂၤဟဲတုၤဝဲဆူပှၤထူးပှၤတီၤတဂၤအဟံၣ်န့ၣ်လီၤ. ပှၤထူးပှၤတီၤတဂၤန့ၣ်တအဲၣ်ဒိးမၤသံအဆၣ်ဖိကီၢ်ဖိဒၣ်ဝဲ အကျါတဒုဒၣ်လဲာ် လၢကကတဲာ်ကတီၤတၢ်အီၣ်တၢ်အီလၢအဂီၢ်ဘၣ်. အခိၣ်တလိာ်, အဝဲဟံးန့ၢ်ပှၤဖှီၣ်ဖိအသိတဒုန့ၣ်ဒီး ကတဲာ်ကတီၤတၢ်အီၣ်တၢ်အီလၢအဝဲအပှၤသမှံၤအဂီၢ်န့ၣ်လီၤ.”

⁵စီၤဒၤဝံးအသးဒိၣ်ထီၣ်ဘၣ်ပှၤထူးပှၤတီၤန့ၣ်ဒိၣ်ဒိၣ်ကလဲာ်ဒီး စံးဝဲဒၣ်, “ယဆိၣ်တၢ်လၢယွၤလၢအမူဝဲတဂၤအမံၤအပူၤ, လၢပှၤတဂၤလၢအမၤတၢ်န့ၣ်, ကြၢးသံဝဲဒၣ်လီၤ.

⁶လၢအမၤတ့ၢ်တၢ်အၢတၢ်သီဒ်န့ၣ်တမံၤအဃိ, အဝဲကဟ့ၣ်ကဒါက့ၤတၢ်လွံၢ်စးအါထဲသိးတၢ်လၢအဝဲဟံးန့ၢ်တ့ၢ်ဝဲန့ၣ်လီၤ.”

⁷စီၤနၤသၣ်စံးဘၣ်စီၤဒၤဝံး, “နမ့ၢ်ပှၤအဝဲန့ၣ်လီၤ. ဒီးတၢ်အံၤ, မ့ၢ်တၢ်လၢယွၤ, ကီၢ်အံၣ်စရ့လးအကစၢ်ယွၤစံးဝဲဒၣ်လီၤ. ယဒုးကဲထီၣ်နၤကီၢ်အံၣ်စရ့လးအစီၤပၤဒီးမၤပူၤဖျဲးနၤလၢ စီၤစီလူးအစုပူၤန့ၣ်လီၤ.

⁸ယဟ့ၣ်လီၤနၤလၢအဝဲအဘီအမုၢ်ဒီးအမါတဖၣ်လီၤ. ယဒုးကဲထီၣ်နၤစီၤပၤလၢကီၢ်အံၣ်စရ့လးဒီးကီၢ်ယူဒၤအဖီခိၣ်လီၤ. တၢ်အံၤမ့ၢ်တလၢဒံးဝဲဘၣ်ဒီးယကဟ့ၣ်အါထီၣ်ဒံးနၤခံစးန့ၣ်လီၤ.

⁹မ့မ့ၢ်ဒ်န့ၣ်ဒီးဘၣ်မနုၤအဃိ, နတစူၢ်ဘၣ်ယတၢ်မၤလိာ်တဖၣ်န့ၣ်လဲၣ်. ဘၣ်မနုၤနမၤတၢ်အၢတၢ်သီတမံၤအံၤန့ၣ်လဲၣ်. နပျဲစီၤအူၤရံယၤဘၣ်တၢ်မၤသံကွံာ်အီၤလၢတၢ်ဒုးတၢ်ယၤအပူၤ, နပျဲပှၤဧၣ်မိၣ်ဖိတဖၣ်မၤသံကွံာ်အီၤ, အန့ၣ်ဝံၤဒီးနဟံးန့ၢ်ကွံာ်အမါန့ၣ်လီၤ.

¹⁰ခဲကနံၣ်အံၤ, လၢစိၤကိးစိၤဒဲးအပူၤ, နစၢၤနသွဲၣ်တနီၤကသံဝဲလၢတၢ်သံဆူၣ်သံစိးတမံၤ, မ့ၢ်လၢနတစူၢ်ယၤဘၣ်ဒီးနဟံးန့ၢ်စီၤအူၤရံယၤအမါ အဃိန့ၣ်လီၤ.

¹¹ယဆိၣ်တၢ်ဒီးနၤလၢယကဒုးအိၣ်ထီၣ်ပှၤတဂၤဂၤလၢနဟံၣ်ဖိဃီဖိအကျါ လၢကဟဲစိာ်တၢ်ကီတၢ်ခဲလၢနလိၤန့ၣ်လီၤ. နကထံၣ်ဘၣ်တၢ်န့ၣ်ဖဲယဟံးန့ၢ်ကွံာ်နမါတဖၣ်လၢနအိၣ် ဒီးဟ့ၣ်လီၤကွံာ်အဝဲသ့ၣ်ဆူပှၤအဂၤတဂၤအအိၣ်အခါ, ဒီးအဝဲကမံဃုာ်ဂဲၤဃုာ်ဒီးပိာ်မုၣ်တဖၣ်န့ၣ်လၢကမျၢၢ်အမဲာ်ညါ ဖဲမုၢ်ဆါအကတီၢ်န့ၣ်လီၤ.

¹²နမၤတ့ၢ်တၢ်ဒဲးဘးလၢတၢ်ခူသူၣ်အပူၤ, ဘၣ်ဆၣ်ဒီးယကပျဲတၢ်အံၤမၤအသးလၢမုၢ်ထူၣ်မုၢ်ဆါအဆၢကတီၢ် ဒ်သိးကီၢ်အံၣ်စရ့လးဒီကီၢ်ကထံၣ်ဘၣ်အီၤအဂီၢ်န့ၣ်လီၤ.”

¹³စီၤဒၤဝံးစံးဝဲဒၣ်, “ယမၤဘၣ်တ့ၢ်တၢ်ဒဲးဘးထီဒါယွၤလံ.” စီၤနၤသၣ်စံးဆၢဝဲ, “ယွၤပျၢ်နၤလၢနတၢ်ဒဲးဘးလီၤ. နတသံဘၣ်ဘၣ်.

¹⁴ဘၣ်ဆၣ်ဒီးမ့ၢ်လၢနဒုးကဲထီၣ်ယွၤလၢတၢ်ဒုၣ်ဒွဲၣ်စံးအၢ, ခီဖျိတၢ်မၤတၢ်ဒဲးဘးအံၤအဃိဒီး, နဖိကသံဝဲလီၤ.”

¹⁵အန့ၣ်ဝံၤဒီးစီၤနၤသၣ်က့ၤဝဲဆူဟံၣ်လီၤ. ဖိသၣ်လၢစီၤအူၤရံယၤအမါဆံးစၢ်ထီၣ်အီၤလၢစီၤဒၤဝံးအဂီၢ်န့ၣ် ယွၤဒုးဘၣ်ဆူးဘၣ်ဆါအီၤနးနးကလဲာ်လီၤ.

¹⁶စီၤဒၤဝံးဘါထုကဖၣ်တ့ၢ်ဆူကစၢ်ယွၤအအိၣ် လၢဖိသၣ်ကအိၣ်ဆူၣ်ထီၣ်က့ၤအဂီၢ်န့ၣ်လီၤ. အဝဲဂ့ၢ်လိာ်လၢကအီၣ်တၢ်တမံၤဂ့ၤတမံၤဂ့ၤအဂီၢ်, ဒီးကိးမုၢ်နၤဒဲးန့ၣ်လဲၤမံလီၤဝဲလၢဟီၣ်ခိၣ်လိၤသီတနၤကျၢၤန့ၣ်လီၤ.

¹⁷အဝဲအကွီၢ်ဘျီၣ်အပဒိၣ်ပပှၢ်တဖၣ်လဲၤဆူအအိၣ် ဒီးကျဲးစၢးဒုးဂဲၤထၢၣ်အီၤ ဘၣ်ဆၣ်ဒီးအဝဲဂ့ၢ်လိာ်ဝဲဒီးတအီၣ်ဃုာ်တၢ်နီတမံၤဒီးအဝဲသ့ၣ်ဘၣ်.

¹⁸တနွံပူၤကွံာ်အလီၢ်ခံဖိသၣ်န့ၣ်သံဝဲလီၤ. ဒီးစီၤဒၤဝံးအပဒိၣ်ပပှၢ်တဖၣ်ပျံၤတၢ်လၢကတဲအီၤတၢ်ကစီၣ်အဂီၢ်န့ၣ်လီၤ. အဝဲသ့ၣ်စံးဒၣ်, “ဖဲဖိသၣ်မူဒံးအခါန့ၣ်, ပကတိၤတၢ်ဒီးအီၤဘၣ်ဆၣ် စီၤဒၤဝံးတစံးဆၢပှၤဘၣ်. အဖိသံလံန့ၣ်, မ့ၢ်ပတဲဘၣ်အီၤကသ့ဒ်လဲၣ်. အဝဲကမၤဆါလီၤဘၣ်ဖုးအသးတမံၤမံၤလီၤ.”

¹⁹ဖဲစီၤဒၤဝံးပာ်သူၣ်ပာ်သးလၢ အဝဲသ့ၣ်ကတိၤကသွံလိာ်အသးတဂၤဒီးတဂၤန့ၣ် အဝဲထံၣ်သ့ၣ်ညါဝဲလၢဖိသၣ်သံလံန့ၣ်လီၤ. သတးဒီး, အဝဲသံကွၢ်အဝဲသ့ၣ်, “ဖိသၣ်သံလံဧါ”. အဝဲသ့ၣ်စံးဆၢဝဲ, “မ့ၢ်, အဝဲသံလံ.”

²⁰စီၤဒၤဝံးဂဲၤဆၢထၢၣ်လၢဟီၣ်ခိၣ်လိၤ, လုၢ်ထံလုၢ်နိ, ခွံထီၣ်အခိၣ်သူ, ဒီးလဲလိာ်အကူအသိးတဖၣ်န့ၣ်လီၤ. အန့ၣ်ဝံၤဒီး, အဝဲလဲၤဘူၣ်ထီၣ်ဘါထီၣ်တၢ်လၢယွၤအဟံၣ်ပူၤန့ၣ်လီၤ. ဖဲအဝဲဟဲက့ၤဆူနူၢ်ပူၤစီၤပူၤန့ၣ်အဝဲဃ့အီၣ်တၢ်ဒီးအီၣ်ဝဲတဘျီဃီ ဖဲပှၤဟဲပာ်လီၤန့ၢ်အီၤန့ၣ်လီၤ.

²¹အဝဲအပဒိၣ်ပပှၢ်တဖၣ်စံးဘၣ်အီၤ, “ပနၢ်တပၢၢ်တၢ်အံၤဘၣ်. ဖဲဖိသၣ်အိၣ်မူဒံးဝဲအခါန့ၣ်, နဟီၣ်နယၢၤလၢအဂီၢ်ဒီးတအီၣ်တၢ်အီတၢ်ဘၣ်, မ့မ့ၢ်ဖဲအဝဲသံတဘျီဃီန့ၣ်, နဂဲၤဆၢထၢၣ်ဒီးအီၣ်တၢ်အီတၢ်လီၤ.”

²²စီၤဒၤဝံးစံးဆၢဝဲ, “မ့ၢ်လီၤ. ဖဲအဝဲအိၣ်မူဒံးဝဲအခါန့ၣ် ယဒုၣ်တၢ်အီၣ်တၢ်အီဒီးဟီၣ်တၢ်ယၢၤတၢ်လီၤ. ယဆိကမိၣ်လၢယွၤကသးကညီၤယၤဒီးတပျဲဖိသၣ်သံဘၣ်န့ၣ်လီၤ.

²³ဘၣ်ဆၣ်ဒီးခဲအံၤမ့ၢ်လၢအဝဲဒၣ်သံလံအဃိ, ဘၣ်မနုၤယကဘၣ်ဒုၣ်တၢ်အီၣ်န့ၣ်လဲၣ်. ယမၤမူထီၣ်က့ၤဖိသၣ်အံၤကသ့ဧါ. မုၢ်တနံၤန့ၣ်ယကလဲၤဆူတၢ်လီၢ်ဖဲအဝဲအိၣ်ဝဲ မ့မ့ၢ်အဝဲဟဲက့ၤ ဆူယအိၣ်တသ့ဘၣ်နီတစုဘၣ်.”

²⁴အန့ၣ်ဝံၤဒီး, စီၤဒၤဝံးမၤမုာ်ထီၣ်က့ၤအမါနီၢ်ဘၤသၡ့ဘၤ န့ၣ်လီၤ. အဝဲမံဃုာ်ဂဲၤဃုာ်ဒီးအီၤဒီးအဝဲဆံးစၢ်ထီၣ်န့ၢ်အီၤလၢဖိခွါတဂၤ ဒီးစီၤဒၤဝံးယုၢ်အမံၤလၢစီၤၡလိၤမိၤန့ၣ်လီၤ. ယွၤအဲၣ်ဖိသၣ်ပိာ်ခွါန့ၣ်,

²⁵ဒီးယွၤမၤလိာ်ဝံစီၤနၤသၣ်လၢကယုၢ်ဖိသၣ်န့ၣ်အမံၤလၢစီၤယဒံဒယၤ လီၤ. အဂ့ၢ်ဒ်အံၤ, ယွၤအဲၣ်အီၤဒိၣ်မးလီၤ.

²⁶အခါဖဲန့ၣ်, စီၤယိၤအာ်ထီၣ်ဒုးထွဲဒံးတၢ်ထီဒါပှၤဧၣ်မိၣ်ဖိ အဝ့ၢ်ခိၣ်ဝ့ၢ်ရးဘါဒီးဘူးတ့ၢ်လၢကမၤန့ၢ်အီၤလီၤ.

²⁷အဝဲဆှၢလီၤပှၤစိာ်တၢ်ကစီၣ်တဖၣ်ဆူစီၤဒၤဝံးအအိၣ်လၢကတဲဖျါ ထီၣ်တၢ်ဂ့ၢ်ဒ်အံၤ, “ယဒုးထီဒါဝ့ၢ်ရးဘါဒီးမၤန့ၢ်ကွံာ်အတၢ်ဟ့ၣ်ထံအလီၢ်လံ.

²⁸ခဲအံၤပာ်ဖှိၣ်ထီၣ်နသုးမုၢ်တဖၣ်လၢအအိၣ်လီၤတဲာ်ဒံး, ထီၣ်ဒုးဝ့ၢ်န့ၣ်ဒီးမၤန့ၢ်အီၤလၢနကစၢ်ဒၣ်နဲတက့ၢ်. ယတအဲၣ်ဒိးမၤန့ၢ်ယမံၤလၢတၢ်မၤန့ၢ်ဝ့ၢ်န့ၣ်အဃိဘၣ်.”

²⁹လၢတၢ်န့ၣ်အဃိ, စီၤဒၤဝံးပာ်ဖှိၣ်ထီၣ်အသုးမုၢ်တဖၣ်, လဲၤဆူဝ့ၢ်ရးဘါ, ထီၣ်ဒုးအီၤဒီးမၤန့ၢ်အီၤလီၤ.

³⁰လၢပှၤဧၣ်မိၣ်ဖိတဖၣ်အကစၢ်တၢ်ဂီၤမိလးအခိၣ်လိၤန့ၣ်စီၤဒၤဝံး ဟံးန့ၢ်ခိၣ်သလုးထူတဖျၢၣ်, လၢအဃၢလီၤတယၢၢ်တကံကၢ်လၢအအိၣ်ဒီးတၢ်မျၢ်တဖျၢၣ်လၢအလိၤန့ၣ်လီၤ. စီၤဒၤဝံးဟံးန့ၢ်တၢ်မျၢ်တဖျၢၣ်န့ၣ်ဒီးထီထီၣ်အီၤလၢအခိၣ် သလုးဒၣ်ဝဲအလိၤန့ၣ်လီၤ. အဝဲဟံးန့ၢ်စ့ၢ်ကီးတၢ်ဂုာ်န့ၢ်အါအါဂီၢ်ဂီၢ်လၢဝ့ၢ်ပူၤန့ၣ်,

³¹ဒီးမၢဝ့ၢ်အပှၤဂီၢ်မုၢ်တဖၣ်မၤတၢ်လၢထးဘူးသ့ၣ်တဖၣ်, ထးကြၢ်တဖၣ်, ဒီးထးကွါတဖၣ်ဒီးမၢဆူၣ်အဝဲသ့ၣ်လၢကမၤတၢ်ဖဲ တၢ်မၤဒၢးခီတဖၣ်အလီၢ်န့ၣ်လီၤ. ကယဲၢ်ဝ့ၢ်အဂၤတဖၣ်အပှၤဂီၢ်မုၢ်လၢကီၢ်ဧၣ်မိၣ်အပူၤန့ၣ်အဝဲမၢစ့ၢ်ကီးဝဲတမံၤဃီဒ်န့ၣ်လီၤ. အန့ၣ်ဝံၤဒီးအပှၤတဖၣ်ဟဲက့ၤကဒါက့ၤဆူဝ့ၢ်ယရူၤၡလ့ၣ်န့ၣ်လီၤ.