Read S'gaw Karen လံာ်စီၤၡမူၤအ့လးခံဘ့ၣ်တဘ့ၣ် 20 Bible Online

လံာ်စီၤၡမူၤအ့လးခံဘ့ၣ်တဘ့ၣ် 20 - S'gaw Karen bible

လံာ်စီၤၡမူၤအ့လးခံဘ့ၣ်တဘ့ၣ် 20

¹တၢ်မၤအသးလၢဝ့ၢ်ကံးလကၤလးအပူၤန့ၣ်ပှၤတဂိာ်တသီၣ်ဘၣ်တၢ်အိၣ် ဝဲတဂၤလၢပှၤဘံၣ်ယၤမံၣ်အဒူၣ်အကျါ, လၢအမ့ၢ်စီၤကံးဘြံၤအဖိခွါစီၤၡဘၤန့ၣ်လီၤ. အဝဲအူထီၣ်ကွဲၤဒီးကိးပသူထီၣ်ဝဲဒၣ်, “မ်စီၤဒၤဝံးဘၣ်တၢ်ပာ်လီၤကွံာ်အလီၢ်အလၤတက့ၢ်. ပတပိာ်အခံဘၣ်. ပှၤကီၢ်အံၣ်စရ့လးဖိသ့ၣ်ဧၢ, မ်ပက့ၤကဒါက့ၤဆူဟံၣ်တက့ၢ်.”

²လၢတၢ်န့ၣ်အဃိ, ပှၤကီၢ်အံၣ်စရ့လးဖိတဖၣ်ဟးသဒၣ်ကွံာ် စီၤဒၤဝံးဒီးလဲၤဃုာ်တၢ်ဒီးစီၤၡဘၤန့ၣ်လီၤ. မ့မ့ၢ်ပှၤကီၢ်ယူဒၤဖိတဖၣ်အိၣ်တ့ၢ်ဝဲလၢတၢ်သူၣ်တီသးရၤ အပူၤဒီးပိာ်ထီၣ်စီၤဒၤဝံးအခံစးထီၣ်လၢထံကျိယၢ်ဒ့ၣ်တုၤ ဆူဝ့ၢ်ယရူၤၡလ့ၣ်န့ၣ်လီၤ.

³ဖဲစီၤဒၤဝံးက့ၤတုၤဝဲဆူအနူၢ်အစီၤလၢဝ့ၢ်ယရူၤၡလ့ၣ်အပူၤန့ၣ်, အဝဲကိးဃီၤအသံၣ်မါအဂၤတဆံလၢအပာ်တ့ၢ်ဝဲလၢကကွၢ်ထွဲအနူၢ်အစီၤန့ၣ်, ဒီးပာ်အီၤလၢတၢ်ပၢၤဃာ်အပူၤန့ၣ်လီၤ. အဝဲဟ့ၣ်လီၤတၢ်လၢအဝဲ သ့ၣ်လိၣ်ဘၣ်ဝဲတဖၣ်, ဘၣ်ဆၣ်ဒီးတမံဃုာ်ဘၣ်ဒီးအဝဲသ့ၣ်ဘၣ်. လၢအဝဲသ့ၣ်အတၢ်အိၣ်မူအိၣ်လီၤတဲာ်အပူၤန့ၣ်, အဝဲသ့ၣ်ဘၣ်တၢ်ပာ်အီၤဒ်အအိၣ်လၢတၢ်စၢဃာ်အပူၤအသိးဒီးအိၣ် ဆိးဝဲဒ်မုၣ်ကမဲတဖၣ်အသိးန့ၣ်လီၤ.

⁴စီၤပၤစံးဘၣ်စီၤဧမါစၤဒ်အံၤ, “ကိးဖှိၣ်ပှၤလၢကီၢ်ယူဒၤအပူၤတဖၣ်, ဒ်သိးကဟဲဆူယအိၣ်လၢသၢသီအတီၢ်ပူၤဒီးနဲ, ဟဲဃုာ်ဒီးအဝဲသ့ၣ်တက့ၢ်.”

⁵စီၤဧမါစၤလဲၤဒ်သိးကကိးန့ၢ်အဝဲသ့ၣ်, ဘၣ်ဆၣ်ဒီးဖဲမုၢ်နံၤ လၢစီၤပၤသ့ၣ်ပာ်အီၤန့ၣ်အဝဲဟဲက့ၤတတုၤဘၣ်.

⁶လၢတၢ်န့ၣ်အဃိ, စီၤပၤစံးဘၣ်စီၤအဘံၡဲၤဒ်အံၤ, “စီၤၡဘၤကဟ့ၣ်ပှၤတၢ်ကီတၢ်ခဲအါန့ၢ်ဒံးစီၤအးဘၡါလိၣ် တက့ၢ်လီၤ. ဟံးန့ၢ်ယပှၤတဖၣ်ဒီးလဲၤလူၤအီၤတက့ၢ်. မ့တမ့ၢ်ဘၣ်ဒ်န့ၣ်ဒီး, အဝဲကမၤန့ၢ်ဝ့ၢ်လၢအအိၣ်ဒီးတိာ်ဧိၤတာ် ဧိၤတနီၤဒီးပူၤဖျဲးကွံာ်လၢပစုပူၤန့ၣ်လီၤ.”

⁷လၢတၢ်န့ၣ်အဃိ, စီၤယိၤအာ်ဒီးအပှၤတဖၣ်, စီၤပၤအပှၤခိးအသးသမူတဖၣ်ဒီးကယဲၢ်ပှၤသုးဖိအဂၤခဲလၢာ်ဟး ထီၣ်ဝဲလၢဝ့ၢ်ယရူၤၡလ့ၣ်ဃုာ်ဒီးစီၤအဘံၡဲၤဒ်သိးကလူၤစီၤ ၡဘၤအဂီၢ်န့ၣ်လီၤ.

⁸ဖဲအဝဲသ့ၣ်လဲၤတုၤဝဲလၢလၢၢ်ဖးဒိၣ်တဖျၢၣ်လၢအအိၣ်ဖဲ ဝ့ၢ်ကံးဘဧၤန့ၣ်စီၤဧမါစၤဟဲသဂၢၢ်အဝဲသ့ၣ်န့ၣ်လီၤ. စီၤယိၤအာ်ကူဝဲသိးဝဲဒီးတၢ်ဒုးတၢ်ယၤအကူအသိး, အိၣ်ဒီးနးတဘ့ၣ်အိၣ်လၢအတြိးပူၤစၢဃာ်အသးလၢအဝဲ အယီၢ်တကိးအလိၤန့ၣ်လီၤ. ဖဲအဝဲလဲၤထီၣ်ဆူညါအခါန့ၣ်အနး လီၤတဲာ်ကွံာ်ဝဲလီၤ.

⁹စီၤယိၤအာ်စံးဘၣ်စီၤဧမါစၤ, “ယတံၤသကိးဧၢ, နအိၣ်ဆူအိၣ်ချ့စ့ၢ်ကီးဧါ.” ဒီးစီၤယိၤအာ်ဖီၣ်ဃးစီၤဧမါ စၤအခၣ်ဆူၣ်လၢအစုထွဲဒ်သိးအကနၢမူအီၤအဂီၢ်န့ၣ်လီၤ.

¹⁰စီၤဧမါစၤတပလီၢ်ဘၣ်အသးလၢနးတဘ့ၣ်လၢ စီၤယိၤအာ်ထၢထီၣ်က့ၤဝဲလၢအစုစ့ၣ်တခီဘၣ်, ဒီးစီၤယိၤအာ်ဆဲးအီၤဖဲအဟၢဖၢ ဒီးအဝဲအပှံာ်အကဖုတဖၣ်ဟဲလီၤလဲာ်ဆူဟီၣ်ခိၣ်လိၤန့ၣ်လီၤ. အဝဲသံဝဲတကီၢ်ခါန့ၣ်လီၤ. ဒီးစီၤယိၤအာ်ဆဲးကဒီးအီၤအလီၢ် တအိၣ်လၢၤဘၣ်. တုၤနုၤတစု, စီၤယိၤအာ်ဒီးအဒီပုၢ်ဝဲၢ်ခွါစီၤအဘံၡဲၤ လဲၤဆူညါဒီးလူၤစီၤၡဘၤန့ၣ်လီၤ.

¹¹ပှၤလၢစီၤယိၤအာ်အပှၤတဖၣ်အကျါတဂၤဆၢထၢၣ်ဝဲဖဲ စီၤဧမါစၤအစိၣ်အကပၤန့ၣ်ဒီးကိးထီၣ်ဝဲ, “ပှၤလၢအမ့ၢ်စီၤယိၤအာ်ဒီးစီၤဒၤဝံးအပှၤန့ၣ် မ်အပိာ်စီၤယိၤအာ်အခံတက့ၢ်.”

¹²စီၤဧမါစၤအစိၣ်လၢအဘၣ်ကးဘၢအသးလၢတၢ်သွံၣ်န့ၣ်, အိၣ်မံလီၤလၢကျဲခၢၣ်သးန့ၣ်လီၤ. စီၤယိၤအာ်အပှၤတဂၤထံၣ်ဘၣ်လၢပှၤကိးဂၤဒဲး အိၣ်ကတီၢ်ဝဲဖဲအဟဲတုၤတၢ်လီၢ်န့ၣ်အဃိ, အဝဲတွံၢ်ကွံာ်တၢ်အစိၣ်လၢကျဲဆူတၢ်ပျီပူၤ ဒီးမၤဘၢအီၤလၢယၣ်လုးတဘ့ၣ်န့ၣ်လီၤ.

¹³တုၤတၢ်အစိၣ်န့ၣ်ဘၣ်တၢ်သုးကွံာ်အီၤလၢကျဲဒီးပှၤကိးဂၤဒဲး ပိာ်ထွဲစီၤယိၤအာ်အခံလၢတၢ်လူၤစီၤၡဘၤအဂီၢ်န့ၣ်လီၤ.

¹⁴စီၤၡဘၤလဲၤခီဂာ်ကယဲၢ်အံၣ်စရ့လးအဒူၣ်တဖၣ်ခဲလၢာ်အလီၢ်ကဝီၤ ဒီးဟဲတုၤလၢဝ့ၢ်အၤဘ့ၤလးလၢကီၢ်ဘ့ၤသမၤကၤ ဒီးကယဲၢ်ပှၤလၢစီၤဘံးကြံၤအဒူၣ်ထၢပူၤခဲလၢာ်ပာ်ဖှိၣ်ထီၣ်အသးဒီးလဲၤနုာ်ပိာ်ထွဲအခံဆူဝ့ၢ်ပူၤန့ၣ်လီၤ.

¹⁵စီၤယိၤအာ်အပှၤတဖၣ်နၢ်ဟူဘၣ်ဝဲလၢစီၤၡဘၤအိၣ်ဝဲဖဲန့ၣ်အဃိ ဒီးအဝဲသ့ၣ်လဲၤဒီးကဝီၤဃာ်ဝ့ၢ်န့ၣ်လီၤ. အဝဲသ့ၣ်မၤကစီၤထီၣ်ဟီၣ်ခိၣ်ဝးတရံးဝ့ၢ်ခိၣ်ဒူအချၢဒီးတဘျီ ဃီစးထီၣ်ခူၣ်လီၤစ့ၢ်ကီးတၢ်လၢဝ့ၢ်ခိၣ်ဒူအဖီလာ်ဒ်သိးကမၤ လီၤပှီၢ်အီၤန့ၣ်လီၤ.

¹⁶ပှၤပိာ်မုၣ်လၢအကူၣ်တၢ်သ့တဂၤအိၣ်ဝဲလၢဝ့ၢ်ပူၤဒီးကိးထီၣ် လၢဝ့ၢ်ခိၣ်ဒူန့ၣ်, “ကနၣ်တက့ၢ်, ကနၣ်တက့ၢ်. တဲဘၣ်စီၤယိၤအာ်လၢကဟဲဆူအံၤတက့ၢ်. ယအဲၣ်ဒိးကတိၤတၢ်ဒီးအီၤန့ၣ်လီၤ.”

¹⁷စီၤယိၤအာ်လဲၤဝဲဒီးပိာ်မုၣ်န့ၣ်သံကွၢ်အီၤ, “နမ့ၢ်စီၤယိၤအာ်ဧါ.” အဝဲစံးဆၢဝဲ, “မ့ၢ်ယၤလီၤ.” ပိာ်မုၣ်စံးဝဲဒၣ်, “တၢ်ဒိၣ်ဧၢ, ဒိကနၣ်ယၤတက့ၢ်.” အဝဲစံးဆၢဝဲ, “ယကနၣ်တၢ်လီၤ.”

¹⁸ပိာ်မုၣ်န့ၣ်စံးဝဲဒၣ်, “လၢပျၢၤလၢသီန့ၣ်အဝဲသ့ၣ်ညီနူၢ်စံးဒၣ်, လဲၤဒီးမၤန့ၢ်နတၢ်စံးဆၢလၢဝ့ၢ်အၤဘ့ၤလးအပူၤတက့ၢ်.” အဃိဒီးအဝဲသ့ၣ်မၤဝဲဒၣ်ဒ်န့ၣ်လီၤ.

¹⁹ပဝ့ၢ်အံၤမ့ၢ်ဝ့ၢ်ဖးဒိၣ်လၢကီၢ်အံၣ်စရ့လးအပူၤတဖၣ်အကျါတဝ့ၢ်, လၢအအိၣ်ဒီးအပှၤဝ့ၢ်ဖိတဖၣ်လၢအအဲၣ်တၢ်ဃူတၢ်ဖိးဒီးအိၣ်ဒီး တၢ်သူၣ်တီသးရၤန့ၣ်လီၤ. ဘၣ်မနုၤလၢနကျဲးစၢးမၤဟးဂီၤအီၤန့ၣ်လဲၣ်. မ့ၢ်နအဲၣ်ဒိးမၤဟးဂီၤတၢ်လၢအဘၣ်ဃးဒီးယွၤန့ၣ်ဧါ.”

²⁰စီၤယိၤအာ်စံးဆၢဝဲဒၣ်, “ယတမၤဟးဂီၤမၤလီၤပှီၢ်သုဝ့ၢ်နီတစုနီတခီၣ်ဘၣ်.

²¹တၢ်န့ၣ်တမ့ၢ်ပတၢ်ကူၣ်ကျဲၤဘၣ်. ပှၤတဂၤလၢအမ့ၢ်စီၤဘံးတြံၤ အဖိခွါစီၤၡဘၤ, ပှၤလၢအဘၣ်ဃးဒီးကီၢ်အ့ဖရဲၣ်အကစၢၢ်ကလိန့ၣ်, စးထီၣ်ပူထီၣ်တၢ်ထီဒါစီၤပၤဒၤဝံးန့ၣ်လီၤ. ဟ့ၣ်လီၤကွံာ်ပှၤတဂၤအံၤဆူပအိၣ်ဒီးယကဟးထီၣ်ကွံာ်လၢဝ့ၢ်အံၤန့ၣ်လီၤ.” ပိာ်မုၣ်န့ၣ်စံးဘၣ်အီၤ, “ပကကွံာ်ခီလီၤအဝဲအခိၣ်လၢဝ့ၢ်ခိၣ်ဒူအံၤဆူနအိၣ်န့ၣ် လီၤ.”

²²အန့ၣ်ဝံၤဒီး, ပိာ်မုၣ်န့ၣ်လဲၤဆူဝ့ၢ်အပှၤဂီၢ်မုၢ်အအိၣ်ဃုာ် ဒီးအဝဲအတၢ်ကူၣ်တၢ်ကျဲၤ, သတးဒီးအဝဲသ့ၣ်ကျီတဲာ်ကွံာ်စီၤၡဘၤအခိၣ်ဒီးကွံာ်ခီအီၤဆူ စီၤယိၤအာ်အအိၣ်လၢဝ့ၢ်ခိၣ်ဒူန့ၣ်လီၤ. စီၤယိၤအာ်အူထီၣ်ကွဲၤဒ်တၢ်ပနီၣ်တမံၤဒ်သိးအပှၤတဖၣ်ကဟးထီၣ် ကွံာ်လၢဝ့ၢ်န့ၣ်ဒီးအဝဲသ့ၣ်က့ၤကဒါက့ၤဆူဟံၣ်န့ၣ်လီၤ. ဒီးစီၤယိၤအာ်က့ၤကဒါက့ၤဆူဝ့ၢ်ယရူၤၡလ့ၣ်ဆူစီၤပၤအအိၣ်န့ၣ်လီၤ.

²³စီၤယိၤအာ်မ့ၢ်ကီၢ်အံၣ်စရ့လးအသုးမုၢ်အသုးခိၣ်ကျၢၢ်န့ၣ်လီၤ. စီၤယဟိယဒါအဖိခွါစီၤဘနါယၤမ့ၢ်ပှၤအခိၣ်လၢအကွၢ်ထွဲ ပှၤခိးစီၤဒၤဝံးအသးသမူတဖၣ်န့ၣ်လီၤ.

²⁴စီၤအဒိၤရၣ်မ့ၢ်ပှၤဘၣ်တၢ်မၢဆူၣ်အီၤတဖၣ်အခိၣ်, စီၤအဃံလူးအဖိခွါစီၤယဟိၡၤဖးမ့ၢ်ပှၤကွဲးနီၣ်တၢ်တဖၣ်အ ခိၣ်,

²⁵စီၤၡဝၤမ့ၢ်ကွီၢ်ဘျီၣ်အပှၤကွဲးလံာ်ဒိၣ်, စီၤစၤဒိးဒီးစီၤအ့ဘယၤသၢ် မ့ၢ်ပှၤလုၢ်တၢ်အခိၣ်တဖၣ်,

²⁶ဒီးစီၤဧ့ရၤလၢဝ့ၢ်ယၤအံၢ်စ့ၢ်ကီးမ့ၢ်စီၤဒၤဝံးအပှၤလုၢ်တၢ်အခိၣ်တဖၣ်အကျါတဂၤန့ၣ်လီၤ.