Read S'gaw Karen လံာ်စီၤၡမူၤအ့လးခံဘ့ၣ်တဘ့ၣ် 3 Bible Online

လံာ်စီၤၡမူၤအ့လးခံဘ့ၣ်တဘ့ၣ် 3 - S'gaw Karen bible

လံာ်စီၤၡမူၤအ့လးခံဘ့ၣ်တဘ့ၣ် 3

¹တၢ်ဒုးတၢ်ယၤလၢသုးဖိတဖၣ်လၢအဆီၣ်ထွဲမၤစၢၤစီၤစီလူး အဒူၣ်ဖိထၢဖိဒီးသုးဖိတဖၣ်လၢအဆီၣ်ထွဲစီၤဒၤဝံးအဘၢၣ်စၢၤ န့ၣ်မၤအသးဆူညါဖးယံာ်န့ၣ်လီၤ. ဒ်စီၤဒၤဝံးအဂံၢ်အဘါဆူၣ်ထီၣ်ဆူၣ်ထီၣ်ဝဲဒၣ်အသိးန့ၣ်ပှၤလၢအထီဒါအီၤတဖၣ် အဂံၢ်အဘါစၢ်လီၤဝဲဒၣ်န့ၣ်လီၤ.

²စီၤဒၤဝံးအဖိခွါဃုဂၤလၢအအိၣ်ဖျဲၣ်ထီၣ်ဝဲလၢဝ့ၢ်ဃ့ဘြိၣ် အပူၤတဂၤဘၣ်တဂၤစးထီၣ်လၢအဒိၣ်ကတၢၢ်တုၤလၢအဆံးကတၢၢ်တဖၣ် န့ၣ်, မ့ၢ်ဝဲပှၤယံးစရ့လးမုၣ်ဖိနီၢ်အဃံနိၣ်အဖိခွါစီၤအၤမနိၣ်,

³စီၤကံးလအၢ်လၢအမ့ၢ်ပှၤကၤမ့လးဖိစီၤနၤဘလးအမါမုၣ်ကမဲ နီၢ်အဘံၤကါယံးလးအဖိခွါ,

⁴စီၤအးဘၡါလိၣ်လၢအမ့ၢ်ဝ့ၢ်ကရူၢ်အစီၤပၤစီၤတးလမဲအဖိမုၣ် နီၢ်မၤက့ၤအဖိခွါ,

⁵စီၤအဒိနံယၤလၢအမိၢ်မ့ၢ်ဝဲနီၢ်ဃးကံၤ, စီၤၡဖးတယၤလၢအမိၢ် မ့ၢ်ဝဲနီၢ်အဘံတလး, ဒီးစီၤယံးသြၣ်လၢအမိၢ်မ့ၢ်ဝဲနီၢ်ဧကလၤ န့ၣ်လီၤ. ကယဲၢ်အဖိခွါတဖၣ်အံၤအိၣ်ဖျဲၣ်ထီၣ်ဝဲဖဲ ဝ့ၢ်ဃ့ဘြိၣ်န့ၣ်လီၤ.

⁶ဒ်တၢ်ဒုးတၢ်ယၤလၢစီၤဒၤဝံးအသုးဖိတဖၣ်ဒီးသုးဖိတဖၣ်လၢ အသးတီဒီးစီၤစီလူးအဒူၣ်ဖိထၢဖိအဘၢၣ်စၢၤမၤအသးဆူညါ အသိးန့ၣ်, စီၤအဘံန့ၢ်ကဲထီၣ်ပှၤလၢအစိကမီၤဆူၣ်ထီၣ်အါထီၣ် လၢပှၤလၢအပိာ်စီၤစီလူးအခံတဖၣ်အကျါန့ၣ်လီၤ.

⁷တနံၤန့ၣ်စီၤစီလူးအဖိခွါစီၤအံၤၡဘိးၡ့းပာ်တၢ်ကမၣ်လၢ စီၤအဘံန့ၢ်အလိၤလၢအမံဃုာ်ဒီးစီၤစီလူးအသံၣ်မါနီၢ်ရံးစဖၤ လၢအမ့ၢ်စီၤအၤယၤအဖိမုၣ်အဃိန့ၣ်လီၤ.

⁸တၢ်အံၤမၤသးဒိၣ်ထီၣ်စီၤအဘံန့ၢ်ဒီးအဝဲစံးဝဲဒၣ်, “မ့ၢ်နဆိကမိၣ်လၢယကဟ့ၣ်လီၤကွံာ်စီၤစီလူးဧါ. မ့ၢ်နဆိကမိၣ်သပှၢ်ကတၢၢ်လၢယမၤကီၢ်ယူဒၤအတၢ်မၤဧါ. စးထီၣ်လၢအခီၣ်ထံးလံၤလံၤန့ၣ်ယသူၣ်တီသးလိၤတ့ၢ်ဒီးနပၢ် စီၤစီလူး, အဒီပုၢ်ဝဲၢ်တဖၣ်, ဒီးအတံၤသကိးတဖၣ်ဒီးယမၤပူၤဖျဲးနၤဒ် သိးနသုတဘၣ်တၢ်မၤနၢၤနၤလၢစီၤဒၤဝံးတဂ့ၤအဂီၢ်လီၤ. အန့ၣ်ဒၣ်လဲာ်တနံၤအံၤနပာ်တၢ်ကမၣ်လၢယလိၤလၢပိာ်မုၣ်တဂၤအဃိ လီၤ.

⁹ယွၤအၢၣ်လီၤတ့ၢ်စီၤဒၤဝံးလၢအဝဲကဟံးထီၣ်ကွံာ်ဘီမုၢ်လၢ စီၤစီလူးဒီးအစၢၤအသွဲၣ်တဖၣ်အစုပူၤဒီးကဒုးကဲထီၣ်စီၤဒၤ ဝံးလၢစီၤပၤလၢကီၢ်အံၣ်စရ့လးဒီးကီၢ်ယူဒၤခံဘ့ၣ်လိာ်အဖီ ခိၣ်စးထီၣ်လၢကီၢ်ဆၢအကတၢၢ်တခီတုၤဆူကီၢ်ဆၢအဂၤတခီ အကတၢၢ်န့ၣ်လီၤ.

¹⁰ခဲအံၤယမ့ၢ်တမၤလၢထီၣ်ပှဲၤထီၣ်ဘၣ်တၢ်ဂ့ၢ်အံၤဒီးမ်ကစၢ်ယွၤ ကမၤသံယၤတက့ၢ်.”

¹¹စီၤအံၤၡဘိၡ့းပျံၤစီၤအဘံန့ၢ်ဒိၣ်မးတုၤဒၣ်လဲာ်အဝဲကတိၤ ထီၣ်တၢ်တသ့နီတထံၣ်ဒၣ်လဲာ်ဘၣ်န့ၣ်လီၤ.

¹²စီၤအဘံန့ၢ်ဆှၢလီၤပှၤစိာ်တၢ်ကစီၣ်တဖၣ်ဆူစီၤဒၤဝံးအအိၣ်ဖဲ အအိၣ်ဒံးဝဲလၢဝ့ၢ်ဃ့ဘြိၣ်အပူၤ, ဒ်သိးကစံးဘၣ်အီၤ, “မတၤကပၢကီၢ်အံၤလဲၣ်. မၤတၢ်အၢၣ်လီၤအီလီၤဒီးယၤ. ဒီးယကမၤစၢၤနၤဒ်သိးနကမၤန့ၢ်ပှၤအံၣ်စရ့လးဖိခဲလၢာ်ဆူ နအိၣ်တခီလီၤ.”

¹³စီၤဒၤဝံးစံးဆၢဝဲ, “ဂ့ၤလံ. ယကမၤတၢ်အၢၣ်လီၤအီလီၤဒီး နၤသန့ၤထီၣ်အသးလၢတၢ်ဂ့ၢ်တမံၤအဖီခိၣ်န့ၣ်လီၤ. နကဘၣ်ဟဲကိးဃုာ်စီၤစီလူးအဖိမုၣ်နီၢ်မံၤကၤလးဆူယအိၣ်ဖဲ နဟဲထံၣ်လိာ်နသးဒီးယၤန့ၣ်လီၤ.”

¹⁴ဒီးစီၤဒၤဝံးဆှၢလီၤစ့ၢ်ကီးပှၤစိာ်တၢ်ကစီၣ်တဖၣ်ဆူစီၤအံၤ ၡဘိၡ့းအအိၣ်ဒီးစံး, “ဟ့ၣ်က့ၤယၤယမါနီၢ်မံၤကၤလးတက့ၢ်. ယဟ့ၣ်တ့ၢ်ပှၤဖလ့ၡသးဖိအတၢ်ခိၣ်ထိးအဖံးတကယၤဒ်သိးယကဖျီဘၣ် ယသးဒီးအီၤအဂီၢ်လီၤ.”

¹⁵မၤသးဒ်န့ၣ်ဒီး, စီၤအံၤၡဘိၡ့းမၢပှၤဟံးန့ၢ်က့ၤအီၤလၢအဝၤ, စီၤဖးလတံၤလးလၢအမ့ၢ်စီၤလ့ၡ့ၣ်အဖိခွါအအိၣ်န့ၣ်လီၤ.

¹⁶စီၤဖးလတံၤလးလဲၤပိာ်ထွဲပိာ်မုၣ်န့ၣ်အခံလၢကျဲဒီဘိညါ ဆူဝ့ၢ်ဘၤဃူရံၣ်, ဟီၣ်ဝဲယၢၤဝဲဖဲအလဲၤတၢ်အဖၢမုၢ်န့ၣ်လီၤ. ဘၣ်ဆၣ်ဒီးဖဲစီၤအဘံန့ၢ်စံးဘၣ်အီၤ, “က့ၤကဒါက့ၤဆူဟံၣ်တက့ၢ်,” န့ၣ်, အဝဲက့ၤက့ၤဝဲလီၤ.

¹⁷စီၤအဘံန့ၢ်လဲၤဆူကီၢ်အံၣ်စရ့လးအခိၣ်အနၢ်တဖၣ်အအိၣ်ဒီးစံး ဘၣ်အဝဲသ့ၣ်, “သုအဲၣ်ဒိးလၢစီၤဒၤဝံးကကဲထီၣ်တ့ၢ်သုစီၤပၤယံာ်တ့ၢ်လံ လီၤ.

¹⁸ခဲကနံၣ်အံၤမ့ၢ်တၢ်အခွဲးအယာ်လၢသုဂီၢ်လီၤ. သ့ၣ်နီၣ်ထီၣ်လၢယွၤစံးတ့ၢ်ဝဲ, “ယကသူယခ့ယပှၤစီၤဒၤဝံးဒ် သိးကအုၣ်က့ၤခီၣ်က့ၤယပှၤဂီၢ်မုၢ်အံၣ်စရ့လးလၢပှၤဖလ့ ၡသးဖိတဖၣ်အစုပူၤဒီးလၢကယဲၢ်အဒုၣ်အဒါအဂၤခဲလၢာ်အစုပူၤလီၤ.”

¹⁹စီၤအဘံန့ၢ်ကတိၤစ့ၢ်ကီးတၢ်ဆူပှၤဘံၣ်ယၤမံၣ်အဒူၣ်အ ပှၤဂီၢ်မုၢ်အအိၣ်, ဝံၤဒီးလဲၤဝဲဆူဝ့ၢ်ဃ့ဘြိၣ်လၢကတဲဘၣ် စီၤဒၤဝံးတၢ်လၢဘံၣ်ယၤမံၣ်ဒီးအံၣ်စရ့လးအပှၤဂီၢ်မုၢ်ဘၣ်သူၣ်ဘၣ်သးတ့ၢ်ဝဲ တၢ်လၢအကမၤဝဲန့ၣ်လီၤ.

²⁰ဖဲစီၤအဘံန့ၢ်ဟဲတုၤလၢစီၤဒၤဝံးအအိၣ်ဖဲဝ့ၢ်ဃ့ဘြိၣ်ဃုာ် ဒီးအပှၤအဂၤခံဆံန့ၣ်စီၤဒၤဝံးမၤတၢ်အီၣ်တၢ်အီအမူးဖးဒိၣ်တခါ လၢအဝဲသ့ၣ်အဂီၢ်န့ၣ်လီၤ.

²¹စီၤအဘံန့ၢ်စံးဘၣ်စီၤဒၤဝံး, “ယကလဲၤခဲအံၤဒီးမၤန့ၢ် ကီၢ်အံၣ်စရ့လးဒီဘ့ၣ်လၢတၢ်ဒိၣ်ကစၢ်စီၤပၤအဂီၢ်လီၤ. အဝဲသ့ၣ်ကတူၢ်လိာ်နၤဒ်စီၤပၤအသိး, ဒီးနကဒိးန့ၢ်တၢ်လၢနသးလီတ့ၢ်အီၤဒီးနကပၢဘၣ်ကီၢ်ဒီဘ့ၣ်ညါန့ၣ်လီၤ.” စီၤဒၤဝံးဟ့ၣ်ဝဲစီၤအဘံန့ၢ်တၢ်အုၣ်ခီၣ်သးတမံၤလၢအတၢ်ပူၤ ဖျဲးအဂီၢ်ဒီးပျဲအက့ၤဆူအကျဲဒၣ်ဝဲန့ၣ်လီၤ.

²²လၢခံန့ၣ်, စီၤယိၤအာ်ဒီးစီၤဒၤဝံးအပှၤအဂၤတဖၣ်ဟဲက့ၤလၢ တၢ်ဒုးတၢ်ယၤဒီးဟဲက့ၤစိာ်တၢ်ဂုာ်န့ၢ်အါအါဂီၢ်ဂီၢ်ဃုာ်ဒီး အဝဲသ့ၣ်လီၤ. ဘၣ်ဆၣ်ဒီးစီၤအဘံန့ၢ်တအိၣ်လၢၤဘၣ်ဒီးစီၤဒၤဝံးဖဲဝ့ၢ်ဃ့ဘြိၣ်န့ၣ်ဘၣ်. အဂ့ၢ်ဒ်အံၤ, စီၤဒၤဝံးဆှၢကွံာ်အီၤအိၣ်ဒီးတၢ်အုၣ်ခီၣ်သးလၢ အတၢ်ပူၤဖျဲးအဂီၢ်န့ၣ်လီၤ.

²³ဖဲစီၤယိၤအာ်ဒီးအပှၤတဖၣ်ဟဲက့ၤတုၤန့ၣ်, ဘၣ်တၢ်တဲဘၣ်အီၤလၢစီၤအဘံန့ၢ်ဟဲဆူစီၤဒၤဝံးအအိၣ်ဒီးဘၣ် တၢ်ဆှၢကွံာ်အီၤအိၣ်ဒီးတၢ်အုၣ်ခီၣ်သးလၢအတၢ်ပူၤဖျဲးအဂီၢ် န့ၣ်လီၤ.

²⁴မၤသးဒ်န့ၣ်ဒီး, စီၤယိၤအာ်လဲၤဆူစီၤပၤအအိၣ်ဒီးစံးဘၣ် အီၤ, “နမၤတ့ၢ်တၢ်မနုၤလဲၣ်. စီၤအဘံန့ၢ်ဟဲဆူနအိၣ်, ဒီးဘၣ်မနုၤနပျဲလဲၤကွံာ်အီၤဒ်န့ၣ်လဲၣ်.

²⁵အဝဲဟဲဖဲအံၤလၢကလီန့ၢ်နၤဒီးဃုသ့ၣ်ညါကယဲၢ်တၢ်လၢနမၤအီၤ ကိးမံၤဒဲးဒီးတၢ်လီၢ်လၢနလဲၤကိးပူၤဒဲးန့ၣ်လီၤ. နသ့ၣ်ညါတၢ်န့ၣ်သပှၢ်ကတၢၢ်လီၤ.”

²⁶ဖဲဟးထီၣ်ကွံာ်လၢစီၤဒၤဝံးအအိၣ်ဝံၤအလီၢ်ခံန့ၣ်စီၤယိၤအာ် ဆှၢလီၤပှၤစိာ်တၢ်ကစီၣ်တဖၣ်ဒ်သိးကမၤန့ၢ်စီၤအဘံန့ၢ်ဒီးအဝဲ သ့ၣ်ဟဲက့ၤစိာ်ကဒါက့ၤအီၤဆူထံပူၤစံရၤလီၤ. ဘၣ်ဆၣ်ဒီးစီၤဒၤဝံးတသ့ၣ်ညါတၢ်ဂ့ၢ်န့ၣ်နီတမံၤဘၣ်.

²⁷ဖဲစီၤအဘံန့ၢ်ဟဲတုၤလၢဝ့ၢ်ဃ့ဘြိၣ်န့ၣ်စီၤယိၤအာ်ကိးအီၤ ဆူကျဲစၢၤအကပၤမၤသးဒ်အအဲၣ်ဒိးကတိၤတၢ်ဒီးအီၤထဲခံဂၤဧိၤ န့ၣ်လီၤ. ဒီးဖဲန့ၣ်အဝဲဆဲးအီၤလၢအဟၢဖၢန့ၣ်လီၤ. အဂ့ၢ်ဒ်အံၤ, အဝဲမၤသံတ့ၢ်စီၤယိၤအာ်အဒီပုၢ်ဝဲၢ်ခွါစီၤဧစၤအ့လးအဃိလီၤ.

²⁸ဖဲစီၤဒၤဝံးနၢ်ဟူတၢ်ကစီၣ်န့ၣ်အဝဲစံးဝဲဒၣ်, “ယွၤသ့ၣ်ညါလၢယထံဖိကီၢ်ဖိဒီးယၤန့ၣ်အတၢ်ကမၣ်တအိၣ်လ့ၤတက့ၤဘၣ်လၢ တၢ်မၤသံစီၤအဘံန့ၢ်အဂ့ၢ်န့ၣ်ဘၣ်လီၤ.

²⁹မ်တၢ်စံၣ်ညီၣ်လၢတၢ်ဂ့ၢ်န့ၣ်ကလီၤဘၣ်ဝဲလၢစီၤယိၤအာ်ဒီး အဒူၣ်ဖိထၢဖိခဲလၢာ်အလိၤတက့ၢ်. လၢအစိၤကိးစိၤဒဲးန့ၣ်မ်ပှၤပိာ်ခွါတနီၤလၢအဒူၣ်ဖိထၢဖိ အကျါကအိၣ်ဒီးဃဲအတၢ်ဆါမ့ၢ်ဂ့ၤ, ပှၤဘၣ်တၢ်ဆါအၢမ့ၢ်ဂ့ၤ, ပှၤလၢကြၢးဒၣ်လၢအမၤပှၤပိာ်မုၣ်အတၢ်မၤမ့ၢ်ဂ့ၤ, ဘၣ်သံလၢတၢ်ဒုးတၢ်ယၤအပူၤမ့ၢ်ဂ့ၤ, ပှၤလၢအီၣ်တလၢအီတလၢမ့ၢ် ဂ့ၤန့ၣ်တက့ၢ်.”

³⁰မၤသးဒ်န့ၣ်ဒီးစီၤယိၤအာ်ဒီးအဒီပုၢ်ဝဲၢ်စီၤအဘံၡဲၤဟ့ၣ်ကၣ် စီၤအဘံန့ၢ်လၢအမၤသံအဒီပုၢ်ဝဲၢ်ခွါစီၤဧစၤအ့လးလၢတၢ်ဒုးဖဲဝ့ၢ်ကံးဘိၣ် အပူၤအဃိန့ၣ်လီၤ.

³¹အန့ၣ်ဝံၤဒီးစီၤဒၤဝံးဟ့ၣ်လီၤအကလုၢ်လၢစီၤယိၤအာ်ဒီးအပှၤ တဖၣ်ကဖှီယာ်အကူအသိးတဖၣ်ဒီးကၤထီၣ်ထၢၣ်ကံးယာ်ဒီးဟီၣ်တၢ် ယၢၤတၢ်လၢစီၤအဘံန့ၢ်အဂီၢ်န့ၣ်လီၤ. ဒီးလၢတၢ်လဲၤခူၣ်လီၤအကတီၢ်န့ၣ်, စီၤပၤစီၤဒၤဝံးအနီၢ်ကစၢ်ဒၣ်ဝဲဟးလၢကျုာ်အလီၢ်ခံန့ၣ်လီၤ.

³²စီၤအဘံန့ၢ်ဘၣ်တၢ်ခူၣ်လီၤအီၤဖဲဝ့ၢ်ဃ့ဘြိၣ်ဒီးစီၤပၤဟီၣ် လၢအကလုၢ်ဖးဒိၣ်ဖဲတၢ်သွၣ်ခိၣ်ဒီးပှၤကိးဂၤဒဲးစ့ၢ်ကီးဟီၣ် ဝဲဒ်န့ၣ်လီၤ.

³³စီၤဒၤဝံးသးဝံၣ်တၢ်မိၢ်တၢ်မးအတၢ်သးဝံၣ်လၢစီၤအဘံန့ၢ် အဂီၢ်န့ၣ်လီၤ. “ဘၣ်မနုၤစီၤအဘံန့ၢ်ဘၣ်သံဝဲဒၣ်ဒ်ပှၤအမၢးတဂၤအသိးန့ၣ်လဲၣ်.

³⁴အစုတဖၣ်တဘၣ်တၢ်စၢဃာ်အီၤဘၣ်, ဒီးအခီၣ်တဖၣ်တဘၣ်တၢ်စၢတံၢ်အီၤဘၣ်, အဝဲသံလီၤဂာ်ဒ်ပှၤတဂၤလၢအဘၣ်တၢ်မၤသံ အီၤလၢပှၤအၢပှၤသီတဖၣ်အသိးန့ၣ်လီၤ.” ဒီးပှၤဂီၢ်မုၢ်ဟီၣ်တၢ်ယၢၤတၢ်ကဒီးလၢအဂီၢ်န့ၣ်လီၤ.

³⁵ဒီတနံၤညါန့ၣ်ပှၤဂီၢ်မုၢ်ကျဲးစၢးဝဲဒ်သိးစီၤဒၤဝံးကအီၣ် တၢ်တမံၤမံၤဘၣ်ဆၣ်အဝဲမၤတၢ်ဆိၣ်သညူးသပှၢ်တမံၤ, “ယမ့ၢ်အီၣ်တၢ်တမံၤမံၤတချုးမုၢ်လီၤနုာ်န့ၣ်မ်ကစၢ်ယွၤ မၤသံယၤတက့ၢ်.”

³⁶အဝဲသ့ၣ်ပာ်သူၣ်ပာ်သးလၢတၢ်အံၤဒီးဘၣ်သူၣ်ဘၣ်သးဝဲဒၣ်လီၤ. ကယဲၢ်တၢ်လၢစီၤပၤမၤကိးမံၤဒဲးန့ၣ်မၤမုာ်မၤမံပှၤဂီၢ်မုၢ် အသးသပှၢ်ကတၢၢ်န့ၣ်လီၤ.

³⁷စီၤဒၤဝံးအပှၤဂီၢ်မုၢ်ခဲလၢာ်ဒီးကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ် နၢ်ပၢၢ်ဝဲဒၣ်လၢတၢ်မၤသံစီၤအဘံန့ၢ်တဘၣ်ဃး ဒီးစီၤပၤနီတမံၤဘၣ်န့ၣ်လီၤ.

³⁸စီၤပၤစံးဘၣ်အပဒိၣ်ပပှၢ်တဖၣ်, “မ့ၢ်သုတသ့ၣ်ညါဘၣ်လၢတနံၤ အံၤန့ၣ်ပှၤခိၣ်ပှၤနၢ်ဖးဒိၣ်တဂၤလၢကီၢ်အံၣ်စရ့လးအပူၤသံဝဲဒၣ်လံန့ၣ်ဘၣ်ဧါ.

³⁹ယမ့ၢ်စီၤပၤတဂၤလၢကစၢ်ယွၤဃုထၢတ့ၢ်ဒၣ်လဲာ်န့ၣ်တနံၤအံၤ ယဂံၢ်ယဘါစၢ်လီၤ. နီၢ်စရူယၤအဖိခွါတဖၣ်အံၤဆူၣ်စိးအၢသီကဲၣ်ဆိးလၢယဂီၢ်လီၤ. မ်ယွၤစံၣ်ညီၣ်ပှၤအအၢအသီတဖၣ်အံၤဒ်အဝဲသ့ၣ်ကြၢးဒိးဘၣ်ဝဲ အသိးန့ၣ်တက့ၢ်.”