Read S'gaw Karen လံာ်စီၤၡမူၤအ့လးခံဘ့ၣ်တဘ့ၣ် 7 Bible Online

လံာ်စီၤၡမူၤအ့လးခံဘ့ၣ်တဘ့ၣ် 7 - S'gaw Karen bible

လံာ်စီၤၡမူၤအ့လးခံဘ့ၣ်တဘ့ၣ် 7

¹စီၤပၤဒၤဝံးအိၣ်ဂၢၢ်ဆိးကျၢၤဝဲလၢအနူၢ်ပူၤစီၤပူၤဒီး ယွၤကဟုဘံၣ်ကယာ်ဘၢအီၤပူၤဖျဲးဒီးကယဲၢ်အဒုၣ်အဒါတဖၣ်န့ၣ် လီၤ.

²တုၤနုၤတစုစီၤပၤစံးဘၣ်ဝံနၤသၣ်, “ယအိၣ်ဆိးဖဲအံၤလၢ ဟံၣ်တဖျၢၣ်လၢအဘၣ်တၢ်ဘှီထီၣ်အီၤလၢသ့ၣ်ဆှိအ့ရ့းအပူၤလီၤ. မ့မ့ၢ်ကစၢ်ယွၤအတၢ်အၢၣ်လီၤအီလီၤအတလါစီဆှံန့ၣ်ဘၣ်တၢ်ပာ် အီၤလၢဒဲတဖျၢၣ်အပူၤလီၤ.”

³စီၤနၤသၣ်စံးဆၢဝဲ, “ကယဲၢ်တၢ်တမံၤလၢ်လၢ်လၢအအိၣ်လၢနသးပူၤန့ၣ်မၤအီၤတက့ၢ်. အဂ့ၢ်ဒ်အံၤ, ယွၤအိၣ်ဒီးနၤလီၤ.”

⁴ဘၣ်ဆၣ်ဒီးမုၢ်နၤအဝဲန့ၣ်ယွၤစံးဘၣ်စီၤနၤသၣ်,

⁵“လဲၤဒီးတဲဘၣ်ယခ့ယပှၤစီၤဒၤဝံးလၢယစံးဘၣ်အီၤဒ်အံၤ, နတမ့ၢ်ပှၤတဂၤလၢကဘၣ်သူၣ်ထီၣ်တၢ်လုၢ်ဟံၣ်တဖျၢၣ်လၢယကအိၣ်လၢ အပူၤန့ၣ်ဘၣ်.

⁶စးထီၣ်မုၢ်တနံၤလၢယမၤပူၤဖျဲးတ့ၢ်ကီၢ်အံၣ်စရ့လးအပှၤဂီၢ် မုၢ်လၢကီၢ်အဲၤကူပတူးအပူၤတုၤခဲကနံၣ်တစုန့ၣ်ယလဲၤဝ့ၤဝီၤ တၢ်ဒီးအိၣ်ဆိးလၢဒဲတဖျၢၣ်အပူၤန့ၣ်လီၤ.

⁷လၢကယဲၢ်ယတၢ်လဲၤဃုာ်တၢ်ဒီးကီၢ်အံၣ်စရ့လးအပှၤဂီၢ်မုၢ်အပူၤန့ၣ်, ယတသံကွၢ်ဘၣ်ပှၤခိၣ်ပှၤနၢ်တဂၤဂၤလၢယဃုထၢပာ်လီၤအီၤနီတစုလၢ, ဘၣ်မနုၤအဝဲသ့ၣ်တသူၣ်ထီၣ်န့ၢ်ယၤတၢ်လုၢ်ဟံၣ်တဖျၢၣ် လၢအဘၣ်တၢ်ဘှီထီၣ်အီၤလၢသ့ၣ်ဆှိအ့ရ့းလဲၣ်, န့ၣ်ဘၣ်.

⁸လၢတၢ်န့ၣ်အဃိတဲဘၣ်ယခ့ယပှၤစီၤဒၤဝံလၢယၤ, ယွၤသ့တၢ်လၢာ်စံးဘၣ်အီၤဒ်အံၤ, ယဟံးထီၣ်နၤလၢတၢ်ကွၢ်ထွဲသိဖိတဖၣ် လၢပျီတဖၣ်အပူၤဒီးဒုးကဲထီၣ်နၤလၢပှၤပၢဘၣ်ယပှၤ ဂီၢ်မုၢ်အံၣ်စရ့လးန့ၣ်လီၤ.

⁹ယအိၣ်တ့ၢ်ဒီးနၤဖဲနလဲၤတၢ်တပူၤလၢ်လၢ်ဒီးယမၤနၢၤတ့ၢ်ကယဲၢ် နဒုၣ်နဒါခဲလၢာ်ဖဲနလဲၤထီၣ်ဒုးတၢ်န့ၣ်လီၤ. ယကဒုးမံၤဟူသၣ်ဖျါနၤထဲသိးခိၣ်နၢ်အဒိၣ်ကတၢၢ်တဖၣ် လၢဟီၣ်ခိၣ်ချၢန့ၣ်လီၤ.

¹⁰ယဃုထၢတ့ၢ်တၢ်လီၢ်တတီၤလၢပှၤဂီၢ်မုၢ်အံၣ်စရ့လးအဂီၢ် ဒီးသူၣ်လီၤဆီလီၤအဝဲသ့ၣ်ဖဲန့ၣ်, ဖဲအဝဲသ့ၣ်ကအိၣ်ဆိးဝဲ တအိၣ်ဘၣ်ဒီးတၢ်မၤအၢမၤနးအီၤနီတစုဘၣ်န့ၣ်လီၤ. စးထီၣ်လၢအဝဲသ့ၣ်နုာ်လီၤဆူကီၢ်အံၤအပူၤလံၤလံၤန့ၣ်, အဝဲသ့ၣ်ဘၣ်တၢ်ဒုးအီၤလၢပှၤမၤတၢ်လၢတၢ်စုဆူၣ်ခီၣ်တကးအပူၤ တဖၣ်လီၤ.

¹¹ဘၣ်ဆၣ်ဒီးတၢ်အံၤတမၤကဒီးအသးလၢၤဘၣ်. ယအၢၣ်လီၤအီၤလီၤလၢယကကဟုကယာ်နၤလၢနဒုၣ်နဒါခဲလၢာ်, ဒီးဟ့ၣ်လီၤနၤလၢနစၢၤနသွဲၣ်တဖၣ်န့ၣ်လီၤ.

¹²ဖဲနသံဒီးဘၣ်တၢ်ခူၣ်လီၤကွံာ်နၤဃုာ်ဒီးနမိၢ်ပၢ်ဖံဖုလၢ ပျၢၤတဖၣ်န့ၣ်, ယကဒုးကဲထီၣ်နဖိခွါတဖၣ်အကျါတဂၤ လၢစီၤပၤဒီးဒုးဆူၣ်ထီၣ်အဘီအမုၢ်န့ၣ်လီၤ.

¹³အဝဲကမ့ၢ်ပှၤတဂၤလၢကသူၣ်ထီၣ်တၢ်လုၢ်ဟံၣ်တဖျၢၣ်လၢယဂီၢ်ဒီး ယကမၤလီၤတံၢ်လၢအဝဲအစၢၤအသွဲၣ်ကပၢတၢ်ဆူညါလီၤစိၤလီၤထီန့ၣ်လီၤ.

¹⁴ယကမ့ၢ်အဝဲအပၢ်, ဒီးအဝဲကမ့ၢ်ယဖိခွါလီၤ. ဖဲအဝဲမၤကမၣ်တၢ်န့ၣ်ယကစံၣ်ညီၣ်အီၤဒ်ပၢ်တဂၤစံၣ်ညီၣ်အဖိခွါ အသိးန့ၣ်လီၤ.

¹⁵ဘၣ်ဆၣ်ဒီးယတထုးကွံာ်ဘၣ်ယတၢ်ဆီၣ်ထွဲမၤစၢၤအီၤဒ်ယမၤဘၣ်တ့ၢ် စီၤစီလူး, ပှၤတဂၤလၢယသုးကွံာ်အီၤဒ်သိးနကဲထီၣ်စီၤပၤကသ့အဂီၢ်, အသိးန့ၣ်ဘၣ်.

¹⁶နကအိၣ်ဒီးနစၢၤနသွဲၣ်တဖၣ်ထီဘိ, ဒီးယကဒုးအိၣ်ဂၢၢ်ဆိးကျၢၤ နဘီနမုၢ်လီၤထူလီၤယိာ်လီၤ. နစၢၤနသွဲၣ်အတၢ်ပၢတၢ်ပြးန့ၣ်အကတၢၢ်တအိၣ်ဘၣ်နီတစု ဘၣ်.”

¹⁷စီၤနၤသၣ်တဲဘၣ်စီၤဒၤဝံး, ကယဲၢ်တၢ်ကိးမံၤဒဲးလၢကစၢ်ယွၤ လီၣ်ဖျါထီၣ်န့ၢ်အီၤန့ၣ်လီၤ.

¹⁸တုၤနုၤတစု, စီၤပၤစီၤဒၤဝံးလဲၤနုာ်ဆူယွၤအဒဲစီဆှံလၢ ယွၤအိၣ်ဝဲဆိးဝဲအပူၤ, ဆ့ၣ်နီၤဝဲဒီးဘါထုကဖၣ်ဝဲ, “ယွၤ, ပၢဘၣ်တၢ်ခဲလၢာ်ကစၢ်ဧၢ, ယၤမ့ၢ်ဂ့ၤ, ယပှၤဟံၣ်ဖိဃီဖိမ့ၢ်ဂ့ၤ, တကြၢးဘၣ်ဒီးတၢ်လၢနမၤတ့ၢ်အီၤလၢယဂီၢ်န့ၣ်ဘၣ်.

¹⁹အန့ၣ်ဒၣ်လဲာ်, ခဲကနံၣ်အံၤ, ယွၤပၢဘၣ်တၢ်ခဲလၢာ်ကစၢ်ဧၢ, နမၤတၢ်အါန့ၢ်အန့ၣ်တက့ၢ်လီၤ. နမၤတ့ၢ်တၢ်အၢၣ်လီၤအီလီၤတဖၣ်ဘၣ်ဃးဒီးယစၢၤယသွဲၣ်တဖၣ်လၢ နံၣ်လၢအကဟဲတဖၣ်အပူၤန့ၣ်လီၤ. ဒီးယွၤ, ပၢဘၣ်တၢ်ခဲလၢာ်ကစၢ်ဧၢ, နပျဲပှၤတဂၤထံၣ်တၢ်အံၤလီၤ.

²⁰ယစံးအါထီၣ်နၤတၢ်မနုၤကသ့ဒံးလဲၣ်. နသ့ၣ်ညါယၤ, နခ့နပှၤအံၤလီၤ.

²¹တၢ်အံၤမ့ၢ်နတၢ်ဘၣ်နသးဒီးတၢ်တိာ်လၢနကမၤအီၤန့ၣ်လီၤ. နမၤတ့ၢ်ကယဲၢ်တၢ်မၤဖးဒိၣ်ကိးမံၤဒဲးအံၤလၢတၢ်သိၣ်လိ နဲၣ်ယုၤယၤအဂီၢ်န့ၣ်လီၤ.

²²နမ့ၢ်တၢ်ဒိၣ်နီၢ်မးလဲၣ်, ပၢဘၣ်တၢ်ခဲလၢာ်ကစၢ်, ယွၤဧၢ. ပှၤဒ်သိးနၤတအိၣ်ဘၣ်နီတဂၤဘၣ်. ပသ့ၣ်ညါတ့ၢ်ထီဘိလၢထဲဒၣ်နၤတဂၤန့ၣ်နမ့ၢ်ကစၢ်ယွၤန့ၣ်လီၤ.

²³လၢဟီၣ်ခိၣ်ချၢအံၤပှၤကလုာ်ဂၤလၢကလီၤဂာ်ဒီးအံၣ်စရ့လးလၢ နမၤပူၤဖျဲးအီၤလၢကုၢ်အလီၢ်ဒ်သိးနကဒုးကဲထီၣ်အီၤလၢနပှၤ ဂီၢ်မုၢ်ဒၣ်နဲန့ၣ်, တအိၣ်ဘၣ်နီတကလုာ်ဘၣ်. တၢ်အဒိၣ်အမုၢ်ဒီးတၢ်လီၤလးတဖၣ်လၢနမၤတ့ၢ်လၢအဝဲသ့ၣ်အဂီၢ် န့ၣ်ဒုးဟူထီၣ်သါလီၤနမံၤလၢဟီၣ်ခိၣ်ဒီဘ့ၣ်ညါလီၤ. နဟီထီၣ်ကွံာ်တ့ၢ်ပှၤကလုာ်အဂၤတဖၣ်ဒီးအဝဲသ့ၣ်အကစၢ်တဖၣ်ဖဲနပှၤ ဂီၢ်မုၢ်လဲၤထီၣ်ဒုးတၢ်အခါန့ၣ်လီၤ. ပှၤဂီၢ်မုၢ်အံၤမ့ၢ်ပှၤလၢနမၤထူၣ်ဖျဲးထီၣ်အီၤလၢ ကီၢ်အဲၤကူပတူးဒ်သိးကကဲထီၣ်နပှၤဒၣ်နဲန့ၣ်လီၤ.

²⁴နဒုးကဲထီၣ်တ့ၢ်အံၣ်စရ့လးလၢနပှၤဂီၢ်မုၢ်ဒၣ်နဲလီၤထူလီၤယိာ်, ဒီးနဲဒၣ်ယွၤဧၢ, နကဲထီၣ်အဝဲသ့ၣ်အကစၢ်ယွၤန့ၣ်လီၤ.

²⁵ဒီးခဲအံၤ, ကစၢ်ယွၤဧၢ, မၤလၢထီၣ်ပှဲၤထီၣ်တၢ်အၢၣ်လီၤအီ လီၤလၢနမၤတ့ၢ်ဘၣ်ဃးယၤဒီးယစၢၤယသွဲၣ်တဖၣ်အဂ့ၢ်တဘိယူာ်ဃီ ဒီးမၤတၢ်လၢနစံးတ့ၢ်လၢနကမၤအီၤတဖၣ်န့ၣ်တက့ၢ်.

²⁶နတၢ်မံၤဟူသၣ်ဖျါကဒိၣ်ဝဲ, ဒီးပှၤဂီၢ်မုၢ်ကစံးဝဲလီၤစိၤလီၤထီ, လၢယွၤ, သ့တၢ်လၢာ်ကစၢ်န့ၣ်မ့ၢ်ကစၢ်ယွၤလၢကီၢ်အံၣ်စရ့လးအဖီ ခိၣ်လီၤ. ဒီးနကကတီၤဃာ်ယစၢၤယသွဲၣ်အတၢ်ပၢတဘိယူၢ်ဃီန့ၣ်လီၤ.

²⁷သ့တၢ်လၢာ်ကစၢ်, အံၣ်စရ့လးအကစၢ်ယွၤဧၢ, ယအိၣ်ဒီးတၢ်သးဒူလၢယကဘါထုကဖၣ်တၢ်ထုကဖၣ်အဝဲအံၤဆူနအိၣ်လီၤ. အဂ့ၢ်ဒ်အံၤ, နလီၣ်ဖျါထီၣ်တ့ၢ်တၢ်ခဲလၢာ်အံၤဆူယၤ, နခ့နပှၤ, ဒီးနတဲဘၣ်တ့ၢ်ယၤလၢနကဒုးကဲထီၣ်ယစၢၤယသွဲၣ်တဖၣ် လၢစီၤပၤတဖၣ်န့ၣ်လီၤ.

²⁸ဒီးခဲအံၤ, ယွၤ, ပၢဘၣ်တၢ်ခဲလၢာ်ကစၢ်ဧၢ, နမ့ၢ်ကစၢ်ယွၤလီၤ. နဟံးဃာ်ဂၢၢ်ကျၢၤနတၢ်အၢၣ်လီၤအီလီၤတဖၣ်ထီဘိ, ဒီးနမၤတ့ၢ်တၢ်အၢၣ်လီၤလီၤလးအံၤဒီးယၤလီၤ.

²⁹ယဃ့နၤလၢနကဆိၣ်ဂ့ၤယစၢၤယသွဲၣ်တဖၣ်, ဒ်သိးအဝဲသ့ၣ်ကသးခုဘၣ်ဒံးလၢ နတၢ်ကွၢ်မဲာ်အပူၤန့ၣ်လီၤ. နဲဒၣ်, ယွၤပၢဘၣ်တၢ်ခဲလၢာ်ကစၢ်ဧၢ, နအၢၣ်လီၤအီလီၤတ့ၢ်တၢ်အံၤဒီးနတၢ်ဆိၣ်ဂ့ၤကအိၣ်ကဆိးလၢယစၢၤ ယသွဲၣ်တဖၣ်အဖီခိၣ်လီၤထူလီၤယိာ်လီၤ.”