Read S'gaw Karen လံာ်စီၤၡမူၤအ့လးခံဘ့ၣ်တဘ့ၣ် 8 Bible Online

လံာ်စီၤၡမူၤအ့လးခံဘ့ၣ်တဘ့ၣ် 8 - S'gaw Karen bible

လံာ်စီၤၡမူၤအ့လးခံဘ့ၣ်တဘ့ၣ် 8

¹လၢခံတယံာ်ဘၣ်န့ၣ်, စီၤပၤစီၤဒၤဝံးလဲၤဒုးကဒီး ပှၤဖလ့ၡသးဖိတဖၣ်ဒီးမၤနၢၤကွံာ်အဝဲသ့ၣ်, ဒီးမၤကတၢၢ်ကွံာ်အဝဲသ့ၣ်အတၢ်ပၢၤဃးကီၢ်န့ၣ်လီၤ.

²အန့ၣ်ဝံၤဒီးအဝဲမၤနၢၤကွံာ်ပှၤမိၤအးဖိတဖၣ်လီၤ. အဝဲမၢပှၤဃိာ်ဖိတဖၣ်မံလီၤလၢဟီၣ်ခိၣ်လိၤဒီးမၤသံကွံာ်ပှၤ သၢဂၤအကျါခံဂၤစုာ်စုာ်လီၤ. မၤသးဒ်န့ၣ်ဒီး, ပှၤမိၤအးဖိတဖၣ်ကဲထီၣ်ပှၤဃၣ်ကွံာ်လၢအဝဲပၢ ဘၣ်အီၤဒီးဘၣ်ဟ့ၣ်အီၤလၢတၢ်အခိအသွဲတဖၣ်န့ၣ်လီၤ.

³အန့ၣ်ဝံၤဒီးအဝဲမၤနၢၤကွံာ်ပှၤစူၤရံဖိအစီၤပၤလၢကီၢ်ဆၣ်စိဘၤ, စီၤရဃိာ်အဖိခွါစီၤဟးဒးဧ့စ့ၢ်, ဖဲစီၤဟးဒးဧ့စ့ၢ်လဲၤ တၢ်လၢကျဲအဖၢမုၢ်ဒ်သိးအကလဲၤမၤန့ၢ်က့ၤအတၢ်ပၢၤဘၣ်လီၢ်ကဝီၤ လၢထံကျိဖရၤသးအထးခီအဂီၢ်အခါန့ၣ်လီၤ.

⁴စီၤဒၤဝံးဖီၣ်န့ၢ်အဝဲအပှၤကသ့ၣ်သုးဖိအဂၤတကထိနွံကယၤဒီး အဝဲပှၤခီၣ်သုးဖိအဂၤခံကလးန့ၣ်လီၤ. အဝဲပာ်ဃးဒံးကသ့ၣ်တဖၣ်လၢလၢလီၣ်လီၣ်လၢလ့ၣ်ကဟၣ်ဒုးသုးအဆိ တကယၤအဂီၢ်ဝံၤဒီး, အဂၤတဖၣ်န့ၣ်မၤဟးဂီၤကွံာ်ဝဲအခီၣ်ခဲလၢာ်န့ၣ်လီၤ.

⁵ဖဲပှၤစူၤရံဖိတဖၣ်လၢဝ့ၢ်ဒၤမ့ၤစ့း, ဆှၢလီၤသုးမုၢ်တဖုလၢကမၤစၢၤစီၤဟးဒးဧ့စ့ၢ်အဂီၢ်န့ၣ်, စီၤဒၤဝံးဒုးအီၤဒီးမၤသံကွံာ်ပှၤအဂၤခံကလးခံကထိန့ၣ် လီၤ.

⁶အန့ၣ်ဝံၤဒီး, အဝဲဆီလီၤသုးမုၢ်အသူၣ်ဒဲလီၢ်တဖၣ်လၢအဝဲသ့ၣ် အလီၢ်ကဝီၤပူၤဒီးအဝဲသ့ၣ်ကဲထီၣ်ပှၤတဖၣ်လၢအဝဲ ပၢဘၣ်အီၤဒီးဘၣ်ဟ့ၣ်အီၤလၢတၢ်အခိအသွဲတဖၣ်န့ၣ်လီၤ. ယွၤဒုးမၤနၢၤစီၤဒၤဝံးအတၢ်လၢတၢ်လီၢ်ကိးပူၤဒဲးန့ၣ်လီၤ.

⁷စီၤဒၤဝံးဂုာ်န့ၢ်ကတီၤထူတဖၣ်လၢစီၤဟးဒးဧ့စ့ၢ်အသုးခိၣ် သုးနၢ်တဖၣ်စိာ်ဝဲဒီးဟဲက့ၤစိာ်ဝဲဆူဝ့ၢ်ယရူၤၡလ့ၣ်န့ၣ်လီၤ.

⁸အဝဲဟဲက့ၤစိာ်စ့ၢ်ကီးတၢ်ပီးတၢ်လီအနီၣ်ဂံၢ်အါအါဂီၢ်ဂီၢ် လၢဝ့ၢ်ဘ့ၤကၤဒီးဝ့ၢ်ဘ့ၤရိသဲၤ, ဝ့ၢ်တဖၣ်လၢစီၤဟးဒးဧ့စ့ၢ်ပၢဘၣ်ဝဲအပူၤန့ၣ်လီၤ.

⁹စီၤပၤတိဧံၤလၢဝ့ၢ်ဃမါသးနၢ်ဟူဘၣ်လၢစီၤဒၤဝံးမၤနၢၤ ကွံာ်ကယဲၢ်စီၤဟးဒးဧ့စ့ၢ်အသုးမုၢ်ခဲလၢာ်န့ၣ်လီၤ.

¹⁰လၢတၢ်န့ၣ်အဃိ, အဝဲဆှၢလီၤအဖိခွါစီၤယိၤရၣ်လၢကလဲၤဆၢဂ့ၤဆၢဝါစီၤပၤ စီၤဒၤဝံးအဂီၢ်ဒီးလဲၤဒုးနဲၣ်အတၢ်သးခုဃုာ်ဒီးအီၤလၢအတၢ် မၤနၢၤစီၤဟးဒးဧ့စ့ၢ်အဃိန့ၣ်လီၤ. အဝဲမ့ၢ်ပှၤလၢစီၤပၤတိဧံၤဒုးတၢ်ထီဒါအီၤအါဘျီန့ၣ်လီၤ. စီၤယိၤရၣ်လဲၤစိာ်န့ၢ်စီၤဒၤဝံးလၢတၢ်ဟ့ၣ်ကနၢၤတဖၣ်လၢအဘၣ် တၢ်မၤအီၤလၢထူ, စ့ဒီးတိၢ်ဘီန့ၣ်လီၤ.

¹¹စီၤပၤဒၤဝံးပာ်စီဆှံတၢ်တဖၣ်န့ၣ်ဒ်သိးတၢ်ကသူအီၤလၢတၢ် ဘူၣ်တၢ်ဘါအပူၤ, ဃုာ်ဒီးထူဒီးစ့လၢအဝဲဟဲက့ၤစိာ်ဝဲလၢထံကီၢ်တဖၣ်လၢအဝဲ မၤနၢၤတ့ၢ်လံဝဲ,

¹²လၢအမ့ၢ်ကီၢ်အဒိၣ်, ကီၢ်မိၤအး, ကီၢ်ဧၤမိၣ်, ကီၢ်ဖလ့ၡသး, ဒီးကီၢ်ဧမၤလ့း, ဃုာ်ဒီးတၢ်ဂုာ်န့ၢ်တနီၤလၢအဟဲက့ၤစိာ်ဝဲ လၢစီၤဟးဒးဧ့စ့ၢ်အအိၣ်န့ၣ်လီၤ.

¹³ဖဲအဝဲဟဲက့ၤလၢတၢ်မၤသံကွံာ်ပှၤအဒိၣ်ဖိအဂၤတကလးဃိးကထိ လၢတၢ်တြီၤအံသၣ်ပူၤအခါန့ၣ်စီၤဒၤဝံးအမံၤဟူ ဒိၣ်ထီၣ်အါန့ၢ်အလီၢ်ဒၣ်လဲာ်လီၤ.

¹⁴အဝဲဆီထီၣ်တၢ်ဒုးတၢ်ယၤအသူၣ်ဒဲအလီၢ်တဖၣ်သကုၤကီၢ်အဒိၣ်ဒီး ပှၤဂီၢ်မုၢ်ဖဲန့ၣ်တဖၣ်ကဲထီၣ်ပှၤလၢအဝဲပၢဘၣ်အီၤန့ၣ်လီၤ. ယွၤဒုးမၤနၢၤစီၤဒၤဝံးအတၢ်လၢတၢ်လီၢ်ကိးပူၤဒဲးန့ၣ်လီၤ.

¹⁵စီၤဒၤဝံးပၢတၢ်လၢကီၢ်အံၣ်စရ့လးဒီကီၢ်ညါအဖီခိၣ်, ဒီးမၤလီၤတံၢ်ဝဲလၢ, အဝဲအပှၤဂီၢ်မုၢ်တဖၣ်ဘၣ်တၢ်မၤအီၤဒ်အကြၢးဝဲဘၣ်ဝဲ, အိၣ်ဒီးတၢ်စံၣ်ညီၣ်တီတဘိယူၢ်ဃီန့ၣ်လီၤ.

¹⁶စီၤယိၤအာ်, လၢအမိၢ်အမံၤမ့ၢ်နီၢ်စရူယၤ, မ့ၢ်သုးမုၢ်အသုး ခိၣ်ကျၢၢ်န့ၣ်လီၤ. စီၤအဃံလူးအဖိခွါစီၤယဟိၡၤဖးမ့ၢ်ပှၤကွၢ်ထွဲတၢ်ကွဲးနီၣ် ကွဲးဃါတဖၣ်အခိၣ်န့ၣ်လီၤ.

¹⁷စီၤအဃံတူာ်အဖိခွါစီၤစၤဒိးဒီးစီၤအ့ဘယၤသၢ်အဖိခွါစီၤ အဃံၤမ့လ့းမ့ၢ်ပှၤလုၢ်တၢ်အခိၣ်တဖၣ်န့ၣ်လီၤ. ဒီးစီၤစရါယၤမ့ၢ်ကွီၢ်ဘျီၣ်အပှၤကွဲးလံာ်ဒိၣ်န့ၣ်လီၤ.

¹⁸စီၤယဟိယဒါအဖိခွါစီၤဘနါယၤမ့ၢ်ပှၤအခိၣ်လၢပှၤပၢၤစီၤဒၤ ဝံးအသးသမူတဖၣ်အဂီၢ်န့ၣ်လီၤ. စီၤဒၤဝံးအဖိခွါတဖၣ်မၤန့ၢ်လီၢ်ဒိၣ်လၤထီလၢပဒိၣ်ပပှၢ်တဖၣ် အကျါန့ၣ်လီၤ.