Read S'gaw Karen လံာ်စီၤပၤအခီၣ်ထံးတဘ့ၣ် 1 Bible Online

လံာ်စီၤပၤအခီၣ်ထံးတဘ့ၣ် 1 - S'gaw Karen bible

လံာ်စီၤပၤအခီၣ်ထံးတဘ့ၣ် 1

¹ခဲအံၤစီၤပၤစီၤဒၤဝံးမ့ၢ်ပှၤတဂၤလၢအသးပှၢ်ဒိၣ်မး, ဒီးအခ့အပှၤတဖၣ်လုးဘၢအီၤလၢယၣ်လုးတဖၣ်ဒၣ်လဲာ်တလၢၤဘၣ်အီၤ လၢၤဘၣ်.

²လၢတၢ်န့ၣ်အဃိအဝဲအပဒိၣ်ပပှၢ်တဖၣ်စံးဘၣ်အီၤ, “တၢ်ဒိၣ်ကစၢ်စီၤပၤဧၢ, ပျဲပဃုထံၣ်န့ၢ်နၤမုၣ်လိၤဘိသးစၢ် တဂၤလၢကအိၣ်ဒီးနၤဒီးကဟုကယာ်နၤန့ၣ်တက့ၢ်. အဝဲကမံလၢနကပၤဒီးကမၤလၢၤနၤန့ၣ်လီၤ.”

³တၢ်ဃုထံၣ်န့ၢ်မုၣ်လိၤဘိဃံလၤတဂၤဘၣ်တၢ်မၤအီၤလၢကီၢ်အံၣ်စရ့လးဒီဘ့ၣ်ညါ, ဒီးလၢဝ့ၢ်ၡူန့ၣ်အပူၤ, အဝဲသ့ၣ်ထံၣ်န့ၢ်မုၣ်လိၤဘိဒ်န့ၣ်အသိးတဂၤလၢအမံၤမ့ၢ်ဝဲ နီၢ်အဘံၡး, ဒီးက့ၤကိးအီၤဆူစီၤပၤအအိၣ်န့ၣ်လီၤ.

⁴မုၣ်လိၣ်ဘိအံၤဃံလၤဝဲဒိၣ်မး, ဒီးအဝဲအိၣ်ခိးကွၢ်စီၤပၤ ဒီးကဟုကယာ်အီၤ, ဘၣ်ဆၣ်စီၤပၤတမံဃုာ်ဒီးအီၤဘၣ်.

⁵ဒီးခဲအံၤမ့ၢ်လၢစီၤအးဘၡါလိၣ်သံလံအဃိ, စီးဒၤဝံးဒီးနီၢ်ဃးကံၤအဖိခွါစီၤအဒိနံၤယၤမ့ၢ်ဖိခွါ အဒိၣ်ကတၢၢ်လၢဖိလၢအအိၣ်မူတ့ၢ်တဖၣ်အကျါန့ၣ်လီၤ. အဝဲသူၣ်ဆူၣ်သးဂဲၤလၢကကဲထီၣ်ဘၣ်စီၤပၤဒိၣ်မးလီၤ. လၢအကစၢ်ဒၣ်ဝဲအဂီၢ်, အဝဲကတဲာ်ကတီၤလ့ၣ်ကဟၣ်တဖၣ်, ကသ့ၣ်တဖၣ်ဒီးပှၤလၢအကလဲၤယုၤဒီးကဟုကယာ်အီၤယဲၢ်ဆံဂၤန့ၣ် လီၤ.

⁶စီၤဒၤဝံးတသိၣ်က့ၤသီက့ၤဘၣ်အီၤဆါဆါကလဲာ်လၢကယဲၢ်တၢ်ဂ့ၢ် တမံၤလၢ်လၢ်အဃိနီတစုဘၣ်. အဝဲမ့ၢ်ပှၤတဂၤလၢအက့ၢ်ဂီၤဂ့ၤဘၣ်ဒိၣ်မး, ဒီးအိၣ်ဖျဲၣ်ဝဲလၢစီၤအးဘၡါလိၣ်အလီၢ်ခံန့ၣ်လီၤ.

⁷အဝဲကတိၤတၢ်ဒီးစီၤယိၤအာ်လၢအမ့ၢ်နီၢ်စရူၤယၤအဖိခွါ, ဒီးပှၤလုၢ်တၢ်အခိၣ်စီၤအ့ဘယၤသၢ်ဘၣ်ထွဲဒီးတၢ်ဂ့ၢ်န့ၣ်, ဒီးအဝဲသ့ၣ်ဘၣ်သူၣ်ဘၣ်သးလၢကမၤစၢၤအီၤန့ၣ်လီၤ.

⁸မ့မ့ၢ်ပှၤလုၢ်တၢ်အခိၣ်စီၤစၤဒိး, စီၤဘနါယၤလၢအမ့ၢ်စီၤ ယဟိၤယဒါအဖိခွါ, ဝံနၤသၣ်, စီၤၡံမံၤ, စီၤရ့ဧံၤဒီးစီၤဒၤဝံးအပှၤခိးအသးသမူသ့ၣ်တဖၣ်တအိၣ်လၢ စီၤအဒိနံၤယၤအအိၣ်တကပၤဘၣ်.

⁹ဘၣ်မုၢ်တနံၤ, စီၤအဒိနံၤယၤလုၢ်ထီၣ်တၢ်လုၢ်တၢ်ပာ်လၢအမ့ၢ် သိ, ဂီၤဖံးဖါတဖၣ်, ဒီးဂီၤဖံးဖိအဘီၣ်တဖၣ်လၢလၢၢ်စိၤဃ့လ့းဖဲ ဧ့ၣ်ရိၤက့လးအထံထီၣ်ပၢၢ်အဃၢၤန့ၣ်လီၤ. ဒီးအဝဲကွဲဃီၤစီၤဒၤဝံးအဖိခွါအဂၤတဖၣ်, ဒီးစီၤပၤအပဒိၣ်ပပှၢ်တဖၣ်လၢအအိၣ်လၢကီၢ်ယူဒၤ, ဒ်သိးကဟဲဆူတၢ်လုၢ်ထီၣ်ပာ်ထီၣ်အမူးအံၤ,

¹⁰ဘၣ်ဆၣ်အဒီပုၢ်ဝဲၢ်ခွါဒူချၢစီၤၡလိၤမိၤ, လၢအမိၢ်မ့ၢ်နီၢ်ဘၤသၡ့ဘၤမ့ၢ်ဂ့ၤ, ဝံနၤသၣ်မ့ၢ်ဂ့ၤ, စီၤဘနါယၤမ့ၢ်ဂ့ၤ, ပှၤတဖၣ်လၢအခိးစီၤပၤအသးသမူမ့ၢ်ဂ့ၤ, အဝဲတကွဲဃီၤဝဲဘၣ်.

¹¹တုၤနုၤတစု, စီၤနၤသၣ်လဲၤဃီၤဆူစီၤၡလိၤမိၤအမိၢ်နီၢ်ဘၤ သၡ့ဘၤအအိၣ်, ဒီးသံကွၢ်အီၤ, “မ့ၢ်နတနၢ်ဟူဘၣ်လၢနီၢ်ဃးကံၤအဖိခွါစီၤ အဒိနံၤယၤပာ်ထီၣ်လံအသးဒၣ်ဝဲလၢစီၤပၤအလီၢ်န့ၣ်ဘၣ်ဧါ. ဒီးစီၤပၤဒၤဝံးတသ့ၣ်ညါတၢ်မၤအသးအံၤနီတမံၤဘၣ်.

¹²နမ့ၢ်အဲၣ်ဒိးနသးသမူဒီးနဖိခွါစီၤၡလိၤမိၤအသးသမူပူၤ ဖျဲးန့ၣ်, ယကဟ့ၣ်ကူၣ်နၤဒ်အံၤ,

¹³“လဲၤတဘျီဃီဆူစီၤပၤဒၤဝံးအအိၣ်ဒီးသံကွၢ်အီၤ, တၢ်ဒိၣ်ကစၢ်စီၤပၤဧၢ, မ့ၢ်နတအၢၣ်လီၤတ့ၢ်နဲယၤသမှံၤသပှၢ်လၢ ယဖိခွါစီၤၡလိၤမိၤကကဲထီၣ်စီၤပၤလၢနလီၢ်န့ၣ်ဘၣ်ဧါ. ခဲကနံၣ်အံၤ, စီၤအဒိနံၤယၤကဲထီၣ်စီၤပၤန့ၣ်, မ့ၢ်တၢ်လဲၤအသးဒ်လဲၣ်.”

¹⁴ဒီးစီၤနၤသၣ်စံးအါထီၣ်ကဒီးဝဲ, “ဖဲနကတိၤဒံးတၢ်ဒီးစီၤ ပၤဒၤဝံးအကတီၢ်န့ၣ်ယကဟဲနုာ်ဒီးမၤဂၢၢ်မၤကျၢၤနတၢ်ကတိၤ အဂ့ၢ်အကျိၤတဖၣ်န့ၣ်လီၤ.”

¹⁵လၢတၢ်န့ၣ်အဃိနီၢ်ဘၤသၡ့ဘၤလဲၤဃီၤဝဲဒ်သိးကထံၣ်ဘၣ်စီၤပၤ လၢအမံဒၢးပူၤန့ၣ်လီၤ. ဒီးစီၤပၤဒၤဝံးအသးပှၢ်ဒိၣ်နီၢ်မးဒီးဘၣ်တၢ်ကွၢ်ထွဲကဟု ကယာ်အီၤလၢပှၤၡူန့ၣ်ဖိနီၢ်အဘံၡးန့ၣ်လီၤ.

¹⁶နီၢ်ဘၤသၡ့ဘၤသကူးလီၤအသးလၢစီၤပၤအမဲာ်ညါ, ဒီးအဝဲသံကွၢ်အီၤ, “နသးလီမနုၤတမံၤန့ၣ်လဲၣ်.”

¹⁷အဝဲစံးဆၢအီၤ, “တၢ်ဒိၣ်ကစၢ်စီၤပၤဧၢ, နမၤတ့ၢ်တၢ်အၢၣ်လီၤ သမှံၤသပှၢ်တမံၤဒီးယၤလၢယွၤနကစၢ်ယွၤအမံၤအပူၤလၢယဖိခွါ စီၤၡလိၤမိၤကကဲထီၣ်စီၤပၤလၢနလီၢ်ခံန့ၣ်လီၤ.

¹⁸ဘၣ်ဆၣ်စီၤအဒိနံၤယၤကဲထီၣ်တ့ၢ်စီၤပၤလံန့ၣ်လီၤ. ဒီးနတသ့ၣ်ညါတၢ်နီတမံၤဘၣ်ဃးဒီးတၢ်ဂ့ၢ်အံၤဘၣ်.

¹⁹အဝဲလုၢ်ထီၣ်တ့ၢ်လံတၢ်လုၢ်တၢ်ပာ်လၢအမ့ၢ်ဂီၤဖံးဖါတဖၣ်, သိ, ဂီၤဖံးဖိလၢအဘီၣ်အါအါကလဲာ်, ဒီးအဝဲကွဲဝဲနဖိခွါတ ဖၣ်, ဒီးပှၤလုၢ်တၢ်အခိၣ်စီၤအ့ဘယၤသၢ်, ဒီးနပှၤသုးမုၢ်အခိၣ်စီၤယိၤအာ်ဆူတၢ်အီၣ်အမူး, ဘၣ်ဆၣ်အဝဲတကွဲနဖိခွါစီၤၡလိၤမိၤန့ၣ်ဘၣ်.

²⁰တၢ်ဒိၣ်ကစၢ်စီၤပၤဧၢ, ကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ် ကွၢ်ထီၣ်တၢ်ဆူနအိၣ်လၢနကတဲဘၣ်အဝဲသ့ၣ်လၢမ့ၢ်မတၤကကဲ ထီၣ်စီၤပၤလၢနလီၢ်လဲၣ်န့ၣ်လီၤ.

²¹နမ့ၢ်တမၤဒ်န့ၣ်ဘၣ်ဒီး, တုၤမ့ၢ်နသံတဘျီဃီယဖိခွါစီၤၡလိၤ မိၤဒီးယၤန့ၣ်, ပကဘၣ်တၢ်ပာ်ပှၤဒ်ပှၤလၢအသးတတီဘၣ်ဒီးအထံအကီၢ်န့ၣ်လီၤ.”

²²ဖဲစီၤနၤသၣ်ဟဲတုၤဃီၤဆူနီပူၤန့ၣ်နီၢ်ဘၤသၡ့ဘၤစံးကတိၤ ဒံးတၢ်အဖၢမုၢ်န့ၣ်လီၤ.

²³ဒီးပှၤတဲဘၣ်စီၤပၤလၢဝံအိၣ်ဝဲဖဲန့ၣ်ဒီးစီၤနၤသၣ်လဲၤ နုာ်ဝဲဒီးသကူးလီၤအသးလၢစီၤပၤအမဲာ်ညါန့ၣ်လီၤ.

²⁴အန့ၣ်ဒီးအဝဲစံးဝဲ, “တၢ်ဒိၣ်ကစၢ်စီၤပၤဧၢ, မ့ၢ်နဘိးဘၣ်သ့ၣ်ညါတ့ၢ်နဲလၢစီၤအဒိနံၤယၤကကဲထီၣ်စီၤပၤ လၢနလီၢ်န့ၣ်ဧါ.

²⁵အအံၤတနံၤအံၤဒၣ်လဲာ်န့ၣ်အဝဲလဲၤတ့ၢ်ဝဲဒီးလုၢ်ထီၣ်တ့ၢ်တၢ် လုၢ်တၢ်ပာ်လၢအမ့ၢ်ဂီၤဖံးဖါအါအါကလဲာ်, သိဒီးဂီၤဖံးအဘီၣ်တဖၣ်အါအါကလဲာ်န့ၣ်လီၤ. အဝဲကွဲမုာ်နဖိခွါခဲလၢာ်, နပှၤသုးမုၢ်အခိၣ်စီၤယိၤအာ်, ဒီးပှၤလုၢ်တၢ်အခိၣ်စီၤအ့ဘယၤသၢ်, ဒီးခဲကနံၣ်အံၤအဝဲသ့ၣ်အီၣ်တၢ်အီတၢ်ဒီးအီၤဒီးကိးပသူထီၣ်ဝဲ, မ်စီၤပၤအဒိနံၤယၤအိၣ်မူဝဲအါနံၣ်အါလါတက့ၢ်, န့ၣ်လီၤ.

²⁶ဘၣ်ဆၣ်တၢ်ဒိၣ်ဧၢ, အဝဲတကွဲဝဲယၤမ့ၢ်ဂ့ၤ, ပှၤလုၢ်တၢ်အခိၣ်စီၤ စၤဒိးမ့ၢ်ဂ့ၤ, စီၤဘနါယၤမ့ၢ်ဂ့ၤ, စီၤၡလိၤမိၤမ့ၢ်ဂ့ၤန့ၣ် ဘၣ်.

²⁷မ့ၢ်တၢ်ဒိၣ်ကစၢ်စီၤပၤဘၣ်အသးလၢတၢ်အံၤခဲလၢာ်ဒီးတတဲဘၣ်ဒၣ် လဲာ်နပဒိၣ်ပပှၢ်တဖၣ်လၢမ့ၢ်မတၤကကဲထီၣ်စီၤပၤလၢနလီၢ်ဘၣ်န့ၣ် ဧါ.”

²⁸စီၤပၤဒၤဝံးစံးဝဲ, “မၢနီၢ်ဘၤသၡ့ဘၤဟဲနုာ်ကဒါက့ၤတက့ၢ်.” ဒီးအဝဲဒၣ်ဟဲက့ၤနုာ်ဝဲဒီးဆၢထၢၣ်ဝဲဒၣ်လၢစီၤပၤဒၤဝံး အမဲာ်ညါန့ၣ်လီၤ.

²⁹အန့ၣ်ဝံၤဒီးအဝဲစံးဘၣ်အီၤ, “ယအၢၣ်လီၤနၤလၢယွၤလၢအမူဝဲ လၢအမၤပူၤဖျဲးတ့ၢ်ယၤလၢကယဲၢ်ယတၢ်ကိၢ်တၢ်ဂီၤခဲလၢာ်တဂၤ အမံၤအပူၤ,

³⁰လၢတနံၤအံၤ, ယကဟံးဃာ်တၢ်အၢၣ်လီၤလၢယမၤတ့ၢ်ဒီးနၤလၢယွၤ, အံၣ်စရ့လးအကစၢ်ယွၤအမံၤအပူၤ, လၢနဖိခွါစီၤၡလိၤမိၤကကဲထီၣ်စီၤပၤလၢယလီၢ်န့ၣ်လီၤ.”

³¹နီၢ်ဘၤသၡ့ဘၤသကူးလီၤအသးဒီးစံးဝဲ, “မ်ယကစၢ်စီၤပၤမူဝဲလီၤစိၤလီၤထီန့ၣ်တက့ၢ်.”

³²အန့ၣ်ဝံၤဒီး, စီၤပၤဒၤဝံးမၢပှၤကိးန့ၢ်စီၤစၤဒိး, စီၤနၤသၣ်ဒီးစီၤဘနါယၤသ့ၣ်တဖၣ်န့ၣ်လီၤ. ဒီးတုၤအဝဲသ့ၣ်ဟဲနုာ်ဝဲန့ၣ်,

³³အဝဲစံးဘၣ်အဝဲသ့ၣ်, “ကိးဃုာ်ယကွီၢ်အပဒိၣ်ပပှၢ်တဖၣ်ဒီးသု, ဒုးဒိးထီၣ်ယဖိခွါစီၤၡလိၤမိၤလၢယကသ့ၣ်လၤဒၣ်ယဲဒီးလဲၤ ယုၤဒီးကဟုကယာ်အီၤတုၤလီၤဆူထံကီၢ်အထံမူထီၣ်ပၢၢ်,

³⁴ဒီးဖဲန့ၣ်, စီၤစၤဒိး, ဒီးစီၤနၤသၣ်ကဘၣ်ဖှူအီၤဒ်ကီၢ်အံၣ် စရ့လးအစီၤပၤအသိးန့ၣ်လီၤ. အန့ၣ်ဝံၤဒီး, အူထီၣ်ကွဲၤဒီးကိးပသူထီၣ်, မ်စီၤပၤၡလိၤမိၤမူဝဲအါနံၣ်အါလါန့ၣ်တက့ၢ်.

³⁵ဟဲက့ၤပိာ်ကဒါက့ၤအခံဆူအံၤ, ဖဲအဝဲဟဲက့ၤဒ်သိးကဆ့ၣ်နီၤ လၢယလီၢ်ပစိာ်အဖီခိၣ်အဂီၢ်န့ၣ်တက့ၢ်. အဝဲကကဲထီၣ်စီၤပၤလၢယလီၢ်မ့ၢ်လၢအဝဲမ့ၢ်ပှၤတဂၤလၢယဃုထၢ တ့ၢ်လၢကကဲထီၣ်ပှၤပၢတၢ်လၢကီၢ်အံၣ်စရ့လးဒီးကီၢ်ယူဒၤအဖီ ခိၣ်အဃိန့ၣ်လီၤ.”

³⁶ဒီးစီၤဘနါယၤစံးဆၢဝဲ, “မ်တၢ်ကမၤအသးဒ်န့ၣ်တက့ၢ်. ဒီးမ်ယွၤနကစၢ်ယွၤပာ်ဂၢၢ်ပာ်ကျၢၤတၢ်အံၤန့ၣ်တက့ၢ်.

³⁷ဒ်ယွၤအိၣ်တ့ၢ်လံဒီးတၢ်ဒိၣ်ကစၢ်စီၤပၤအသိး, မ်အဝဲဒၣ်အိၣ်စ့ၢ်ကီးဒီးစီၤၡလိၤမိၤဒီးဒုးဘီၣ်ထီၣ်ညီ ထီၣ်အတၢ်ပၢတၢ်ပြးဒိၣ်န့ၢ်အါန့ၢ်ဒံးနတၢ်ပၢတၢ်ပြးန့ၣ်တ က့ၢ်.”

³⁸လၢတၢ်န့ၣ်အဃိစီၤစၤဒိး, စီၤနၤသၣ်, စီၤဘနါယၤဒီးစီၤပၤ အခ့အပှၤတဖၣ်ဒုးဒိးထီၣ်စီၤၡလိၤမိၤလၢစီၤပၤဒၤဝံးအကသ့ၣ် လၤဒီးလဲၤယုၤဒီးကဟုကယာ်အီၤတုၤလီၤဆူကံဃိၣ်အထံမူ ထီၣ်ပၢၢ်န့ၣ်လီၤ.

³⁹စီၤစၤဒိးဟံးန့ၢ်သ့ၣ်စၤယံးအသိဒၢလၢအဟဲစိာ်ဝဲလၢယွၤ အိၣ်ဝဲဆိးဝဲအဒဲစီဆှံအပူၤဒီးဖှူဝဲစီၤၡလိၤမိၤန့ၣ်လီၤ. အဝဲသ့ၣ်အူထီၣ်ကွဲၤဒီးပှၤဂီၢ်မုၢ်ခဲလၢာ်ကိးပသူထီၣ်ဝဲ, “မ်စီၤပၤၡလိၤမိၤမူဝဲအါနံၣ်အါလါန့ၣ်တက့ၢ်.”

⁴⁰အန့ၣ်ဝံၤဒီး, အဝဲသ့ၣ်ခဲလၢာ်ဟဲက့ၤပိာ်အခံ, ကိးထီၣ်လၢတၢ်သူၣ်ခုသးခုဒီးအူပံတဖၣ်တုၤဒၣ်လဲာ်ဟီၣ်ခိၣ် သထြူးဝဲလၢတၢ်သီၣ်တၢ်သဲအဃိန့ၣ်လီၤ.

⁴¹ဖဲစီၤအဒိနံၤယၤဒီးကယဲၢ်အပှၤသမှံၤခဲလၢာ်အီၣ်တၢ်အီတၢ်ဝံၤ န့ၣ်, အဝဲသ့ၣ်နၢ်ဟူတၢ်အသီၣ်န့ၣ်လီၤ. ဒီးဖဲစီၤယိၤအာ်နၢ်ဟူဝဲကွဲၤအသီၣ်န့ၣ်သံကွၢ်ဝဲ, “ကယဲၢ်တၢ်အသီၣ်လၢဝ့ၢ်ပူၤန့ၣ်အခီပညီမ့ၢ်တၢ်မနုၤန့ၣ် လဲၣ်.”

⁴²တချုးလၢအကတိၤတၢ်ဝံၤဒံးဘၣ်န့ၣ်, စီၤယိၤနၤသၣ်လၢအမ့ၢ်ပှၤလုၢ်တၢ်အခိၣ်စီၤအ့ဘယၤသၢ်အဖိခွါ ဟဲတုၤဝဲဒၣ်န့ၣ်လီၤ. စီၤအဒိနံၤယၤစံးဘၣ်အီၤ, “ဟဲနုာ်တက့ၢ်. နမ့ၢ်ပှၤအဂ့ၤတဂၤလီၤ. လီၤဂာ်လၢနဟဲစိာ်တၢ်ကစီၣ်လၢအဂ့ၤန့ၣ်လီၤ.”

⁴³စီၤယိၤနၤသၣ်စံးဆၢဝဲ, “တမ့ၢ်ဒ်န့ၣ်ဘၣ်. တၢ်ဒိၣ်ကစၢ်စီၤပၤဒၤဝံးဒုးကဲထီၣ်စီၤၡလိၤမိၤလၢစီၤပၤ လံန့ၣ်လီၤ.

⁴⁴စီၤပၤမၢလီၤဝဲစီၤစၤဒိး, စီၤနၤသၣ်, စီၤဘနါယၤဒီးပှၤ တဖၣ်လၢအခိးစီၤပၤအသးသမူဒ်သိးကလဲၤယုၤအီၤဒီးကဟုကယာ်အီၤ အဂီၢ်န့ၣ်လီၤ. အဝဲသ့ၣ်ဒုးဒိးအီၤစီၤပၤအကသ့ၣ်လၤန့ၣ်လီၤ.

⁴⁵ဒီးစီၤစၤဒိးဒီးစီၤနၤသၣ်ဖှူအီၤဒ်စီၤပၤအသိးဖဲကံဃိၣ် အထံထီၣ်ပၢၢ်န့ၣ်လီၤ. အန့ၣ်ဝံၤအဝဲသ့ၣ်လဲၤဆူဝ့ၢ်ပူၤ, ကိးထီၣ်လၢတၢ်သးခုဒီး, ပှၤဂီၢ်မုၢ်သ့ၣ်တဖၣ်ခဲကနံၣ်အံၤ, သီၣ်တထူၣ်ဘးလီန့ၣ်လီၤ. တၢ်အသီၣ်န့ၣ်, မ့ၢ်တၢ်လၢနနၢ်ဟူတ့ၢ်န့ၣ်လီၤ.

⁴⁶ခဲကနံၣ်အံၤစီၤၡလိၤမိၤကဲထီၣ်စီၤပၤလံန့ၣ်လီၤ.

⁴⁷လၢတၢ်န့ၣ်အမဲာ်ညါ, ကွီၢ်အပဒိၣ်ပပှၢ်တဖၣ်လဲၤနုာ်ဒ်သိးကဟ့ၣ်ထီၣ် တၢ်ယူးယီၣ်ဆူတၢ်ဒိၣ်ကစၢ်စီၤပၤဒၤဝံးဒီးစံးဝဲ, မ်နကစၢ်ယွၤဒုးမၤမံၤဟူသၣ်ဖျါစီၤၡလိၤမိၤအါန့ၢ်ဒံးနၤ ဒၣ်လဲာ်, တက့ၢ်န့ၣ်လီၤ. အန့ၣ်တစု, စီၤပၤဒၤဝံးသကူးလီၤအသးဒီးဘူၣ် ထီၣ်ဘါထီၣ်တၢ်လၢအလီၢ်မံအဖီခိၣ်န့ၣ်လီၤ.

⁴⁸ဒီးဃ့ဘါထုကဖၣ်ဝဲ, မ်ပကစံးထီၣ်ပတြၢၤယွၤ, ကီၢ်အံၣ်စရ့လးအကစၢ်ယွၤလၢမုၢ်မဆါတနံၤအံၤ, ဒုးကဲထီၣ်ယစၢၤယသွဲၣ်အကျါတဂၤလၢကထီၣ်ယလီၢ်ဒ်စီၤပၤတဂၤ အသိးဒီးပျဲယအိၣ်မူလၢယကထံၣ်ဘၣ်တၢ်အံၤ, အဃိန့ၣ်တက့ၢ်, န့ၣ်လီၤ.”

⁴⁹အန့ၣ်ဝံၤဒီး, စီၤအဒိနံၤယၤအပှၤသမှံၤတဖၣ်ပျံၤတၢ်ဖုးတၢ် ဒီးအဝဲသ့ၣ်ခဲလၢာ်ဂဲၤထၢၣ်ဝဲဒီးဟးထီၣ်ကွံာ်ဝဲ, တဂၤလၢအကျဲဒၣ်ဝဲစုာ်စုာ်န့ၣ်လီၤ.

⁵⁰လၢတၢ်ပျံၤဘၣ်စီၤၡလိၤမိၤဖးဒိၣ်အပူၤန့ၣ်, စီၤအဒိၤနံၤယၤလဲၤဝဲဆူယွၤအဒဲစီဆှံလၢယွၤအိၣ်ဝဲဒီး ဟံးဃာ်ကျၢၤယွၤအတၢ်လုၢ်လီၢ်အနၢၣ်တဖၣ်န့ၣ်လီၤ.

⁵¹စီၤပၤၡလိၤမိၤဘၣ်တၢ်တဲဘၣ်အီၤလၢစီၤအဒိနံၤယၤပျံၤအီၤ ဒီးဖီၣ်ဃးဝဲတၢ်လုၢ်လီၢ်အနၢၣ်တဖၣ်ဒီးစံးဝဲ, “အဆိကတၢၢ်န့ၣ်ယအဲၣ်ဒိးလၢစီၤပၤၡလိၤမိၤကဆိၣ်လီၤအသးဒီး ယၤလၢအသုတမၤသံယၤတဂ့ၤန့ၣ်လီၤ.”

⁵²စီၤၡလိၤမိၤစံးဆၢဝဲ, “အဝဲအသးမ့ၢ်တီန့ၣ်, အခိၣ်သူတဘိလၢအခိၣ်လိၤဒၣ်လဲာ်န့ၣ်တဘၣ်တၢ်ထိးအီၤဘၣ်. ဘၣ်ဆၣ်အသးမ့ၢ်တတီဘၣ်န့ၣ်ဒီးအဝဲကဘၣ်သံဝဲဒၣ်န့ၣ်လီၤ.”

⁵³အန့ၣ်ဒီး, စီၤပၤၡလိၤမိၤမၢပှၤလဲၤကိးစီၤအဒိနံၤယၤဒီး မၢပှၤဟဲက့ၤစိာ်လီၤက့ၤအီၤလၢတၢ်လုၢ်လီၢ်အဖီခိၣ်န့ၣ်လီၤ. စီၤအဒိနံၤယၤလဲၤဆူစီၤပၤအအိၣ်, သကူးလီၤအသးလၢစီၤပၤ အမဲာ်ညါဒီးစီၤပၤစံးဘၣ်အီၤ, “နက့ၤဆူနဟံၣ်သ့ဝဲလီၤ.”