Read S'gaw Karen လံာ်စီၤပၤအခီၣ်ထံးတဘ့ၣ် 11 Bible Online

လံာ်စီၤပၤအခီၣ်ထံးတဘ့ၣ် 11 - S'gaw Karen bible

လံာ်စီၤပၤအခီၣ်ထံးတဘ့ၣ် 11

¹စီၤၡလိၤမိၤအဲၣ်တ့ၢ်ပှၤတခီဘီမုၢ်ဖိပိာ်မုၣ်အါဂၤန့ၣ်လီၤ. အဝဲဟံးန့ၢ်ကီၢ်အဲၤကူပတူးအစီၤပၤဖိမုၣ်တကးဒံးဘၣ်, အဝဲဒိးတ့ဒိးဖျီတ့ၢ်အသးဒီးပှၤဃ့ၤသးမုၣ်တဖၣ်, ဒီးပှၤပိာ်မုၣ်တဖၣ်လၢကီၢ်မိၤအး, ကီၢ်ဧၣ်မိၣ်, ကီၢ်အဒိၣ်ဒီးကီၢ်စံဒိၣ်န့ၣ်လီၤ.

²ယွၤမၤလိာ်တ့ၢ်ပှၤအံၣ်စရ့လးဖိတဖၣ်လၢအတဘၣ်ဟံးန့ၢ်ပှၤဂီၢ် မုၢ်တဖၣ်အံၤန့ၣ်ဘၣ်. အဂ့ၢ်ဒ်အံၤ, အဝဲသ့ၣ်ဒုးကဲထီၣ်ပှၤအံၣ်စရ့လးဖိတဖၣ်လၢပှၤဟ့ၣ်လီၤအတၢ်သး တီဆူကစၢ်အဂၤတဖၣ်အအိၣ်သ့ဝဲလီၤ. တၢ်န့ၣ်ဒၣ်လဲာ်, စီၤၡလိၤမိၤဒိးတ့ဒိးဖျီတ့ၢ်အသးဒီးပိာ်မုၣ်တဖၣ်န့ၣ်လီၤ.

³စီၤၡလိၤမိၤဒိးတ့ဒိးဖျီတ့ၢ်အသးဒီးစီၤပၤအဖိမုၣ်တဖၣ် အဂၤနွံကယၤဒီးအိၣ်စ့ၢ်ကီးဒီးအသံၣ်မါအဂၤသၢကယၤန့ၣ်လီၤ. အဝဲသ့ၣ်ဒုးဃၣ်ယံၤကွံာ်အီၤလၢကစၢ်ယွၤအအိၣ်,

⁴ဒီးဖဲစီၤၡလိၤမိၤအသးပှၢ်ထီၣ်န့ၣ်, အဝဲသ့ၣ်ဆှၢဃီၤအီၤဆူ တၢ်ဘူၣ်ထီၣ်ဘါထီၣ်ပှၤတခီဘီမုၢ်ဖိအကစၢ်တဖၣ်န့ၣ်လီၤ. အဝဲတတီဒီးယွၤ, အကစၢ်ယွၤဒ်အပၢ်စီၤဒၤဝံးအသိးဘၣ်.

⁵အဝဲဘူၣ်ထီၣ်ဘါထီၣ်တ့ၢ်ကီၢ်စံဒိၣ်အကစၢ်မုၣ်ဧၤၡတြိးဒီးကီၢ် ဧၣ်မိၣ်အကစၢ်လၢလီၤသးဘၣ်အၢမိလးန့ၣ်လီၤ.

⁶အဝဲမၤတ့ၢ်တၢ်ဒဲးဘးထီဒါယွၤဒီးတတီဘၣ်ဒီးအီၤဒ်အပၢ်စီၤ ဒၤဝံးတီတ့ၢ်ဒီးယွၤအသိးန့ၣ်ဘၣ်.

⁷လၢဝ့ၢ်ယရူၤၡလ့ၣ်မုၢ်ထီၣ်အကစၢၢ်ဒီခိၣ်န့ၣ်အဝဲမၤထီၣ်တၢ်လီၢ် တတီၤလၢကဘူၣ်ထီၣ်ဘါထီၣ်ကီၢ်မိၤအးအကစၢ်တဖၣ်လၢအလီၤသးဘၣ် အၢ, ကမိၣ်အဂီၢ်, ဒီးတၢ်လီၢ်တတီၤလၢကဘူၣ်ထီၣ်ဘါထီၣ်ကီၢ်ဧၣ်မိၣ်အကစၢ်လၢတၢ်လီၤ သးဘၣ်အၢမိလးအဂီၢ်န့ၣ်လီၤ.

⁸အဝဲမၤထီၣ်စ့ၢ်ကီးတၢ်ဘူၣ်ထီၣ်ဘါထီၣ်အလီၢ်တဖၣ်ဖဲ ကယဲၢ်အဝဲအမါပှၤတခီဘီမုၢ်ဖိတဖၣ်ဆူးကဲၤထီၣ်တၢ်နၢမူ ဒီးလုၢ်ထီၣ်တၢ်လုၢ်တၢ်ပာ်တဖၣ်ဆူအဝဲသ့ၣ်အကစၢ်တဖၣ်အအိၣ်, ကသ့ဝဲအဂီၢ်န့ၣ်လီၤ.

⁹ယွၤ, ကီၢ်အံၣ်စရ့လးအကစၢ်ယွၤလီၣ်ဖျါထီၣ်တ့ၢ်အသးဆူ စီၤၡလိၤမိၤအအိၣ်ခံဘျီဒီးမၤလိာ်တ့ၢ်အီၤလၢအတဘၣ်ဘူၣ်ထီၣ် ဘါထီၣ်ပှၤတခီဘီမုၢ်ဖိအကစၢ်တဖၣ်ဒၣ်လဲာ်န့ၣ်စီၤၡလိၤမိၤတစူၢ်ယွၤဘၣ်.

¹⁰မ့မ့ၢ်အဝဲဃၣ်ကွံာ်အသးလၢယွၤအအိၣ်န့ၣ်လီၤ. လၢတၢ်န့ၣ်အဃိယွၤအသးထီၣ်ဘၣ်စီၤၡလိၤမိၤန့ၣ်လီၤ.

¹¹ဒီးယွၤစံးဘၣ်အီၤ, “မ့ၢ်လၢနကူၣ်မၤဟးဂီၤကွံာ်နတၢ်အၢၣ် လီၤဒီးယၤဒီးနတစူၢ်ဘၣ်ယတၢ်မၤလိာ်တဖၣ်အဃိ, ယအၢၣ်လီၤလၢယကဟံးထီၣ်ကွံာ်ဘီဧိၤမုၢ်ဧိၤလၢနအိၣ်ဒီးဟ့ၣ် လီၤကွံာ်အီၤဆူနပဒိၣ်ပပှၢ်အကျါတဂၤန့ၣ်လီၤ.

¹²သနာ်က့ဒီး, လၢယတၢ်ကွၢ်မဲာ်နပၢ်စီၤဒၤဝံးအဃိ, ယတမၤဒံးတၢ်အံၤဖဲနအိၣ်မူအဆၢကတီၢ်န့ၣ်ဘၣ်. မ့မ့ၢ်ယကမၤအီၤလၢနဖိခွါပၢတၢ်အစိၤန့ၣ်လီၤ.

¹³ဒီးယတဟံးထီၣ်ကွံာ်ဘၣ်ဘီမုၢ်ဒီတဘ့ၣ်လၢအအိၣ်န့ၣ်ဘၣ်. မ့မ့ၢ်ယကပာ်န့ၢ်တ့ၢ်န့ၢ်အီၤပှၤတဒူၣ်လၢတၢ်ကွၢ်မဲာ်ယခ့ ယပှၤစီၤဒၤဝံးအဃိ, ဒီးလၢတၢ်ကွၢ်မဲာ်ဝ့ၢ်ယရူၤၡလ့ၣ်, ဝ့ၢ်လၢယပာ်အီၤလၢယဂီၢ်ဒၣ်ယဲအဃိန့ၣ်လီၤ.”

¹⁴လၢတၢ်န့ၣ်အဃိယွၤထိၣ်ဂဲၤထီၣ်ကီၢ်အဒိၣ်အစီၤပၤအဒူၣ်ဖိ ထၢဖိစီၤဟၤဒးအသးလၢကထီဒါကွံာ်စီၤၡလိၤမိၤန့ၣ်လီၤ.

¹⁵တချုးဒံးဘၣ်လၢတၢ်အံၤမၤအသးအါနံၣ်အါလါ, ဖဲစီၤဒၤဝံးမၤနၢၤကွံာ်ကီၢ်အဒိၣ်န့ၣ်, အဝဲအသုးမုၢ်အသုး ခိၣ်ကျၢၢ်စီၤယိၤအာ်လဲၤတ့ၢ်ဖဲန့ၣ်လၢကခူၣ်လီၤကွံာ်ပှၤသံ တဖၣ်အဂီၢ်န့ၣ်လီၤ.

¹⁶အဝဲဒီးအပှၤတဖၣ်အိၣ်တ့ၢ်ထွဲဒံးဝဲဒၣ်လၢကီၢ်အဒိၣ်အပူၤဃု လါ, ဒီးအခါဖဲန့ၣ်အဝဲသ့ၣ်မၤသံကွံာ်ပှၤပိာ်ခွါလၢကီၢ်အဒိၣ် အပူၤခဲလၢာ်,

¹⁷အိၣ်လီၤတဲာ်တ့ၢ်ထဲစီၤဟၤဒးဒီးအပၢ်အခ့အပှၤ, ပှၤအဒိၣ်ဖိတနီၤလၢအဃ့ၢ်ထူၣ်ဖျဲးကွံာ်ဆူကီၢ်အဲၤကူပတူးန့ၣ် လီၤ. (အခါဖဲန့ၣ်စီၤဟၤဒးမ့ၢ်ဒံးဒၣ်ဖိသၣ်ဆံးတဂၤန့ၣ်လီၤ.)

¹⁸အဝဲသ့ၣ်ဟးထီၣ်ကွံာ်လၢကီၢ်မံးဒယၣ်အပူၤဒီးလဲၤဝဲဆူကီၢ်ပၤ ရၣ်ဖဲပှၤအဂၤတနီၤပာ်ဖှိၣ်ထီၣ်အသးဒီးအဝဲသ့ၣ်န့ၣ်လီၤ. အန့ၣ်ဝံၤဒီး, အဝဲသ့ၣ်လဲၤဝဲဆူကီၢ်အဲၤကူပတူး, ဒီးလဲၤဝဲဆူစီၤပၤအအိၣ်, ဒီးစီၤပၤဟ့ၣ်လီၤစီၤဟၤဒးလၢတၢ်လီၢ်တနီၤ, ဒီးဟံၣ်တဖျၢၣ်ဒီးဟ့ၣ်လီၤအီၤလၢတၢ်အီၣ်တၢ်အီန့ၣ်လီၤ.

¹⁹စီၤဟၤဒးကဲထီၣ်စီၤပၤအတံၤသကိး, ဒီးစီၤပၤဟ့ၣ်လီၤအီၤ လၢအဝဲအမါဒၣ်ဝဲ, နီၢ်ပၤမုၣ်တၤပါန့ၤအဒီပုၢ်ဝဲၢ်မုၣ်တဂၤလၢကဒိးတ့ဒိးဖျီ အသးဒီးအီၤန့ၣ်လီၤ.

²⁰ပိာ်မုၣ်အံၤဆံးစၢ်န့ၢ်အီၤလၢအဖိခွါတဂၤလၢအမံၤမ့ၢ်ဝဲစီၤ ကနူဘးန့ၣ်လီၤ. အဝဲဘၣ်တၢ်လုၢ်ဒိၣ်ထီၣ်အီၤလၢနီၢ်ပၤမုၣ်လၢနီပူၤဖဲအဝဲအိၣ် ဆိးဝဲဒီးစီၤပၤဖိခွါတဖၣ်န့ၣ်လီၤ.

²¹ဖဲစီၤဟၤဒးအိၣ်လၢကီၢ်အဲၤကူပတူးအပူၤဒီးနၢ်ဟူဘၣ်တၢ် ကစီၣ်လၢစီၤဒၤဝံးသံလံဒီးအသုးမုၢ်အသုးခိၣ်ကျၢၢ်စီၤယိၤ အာ်သံလံန့ၣ်, စီၤဟၤဒးစံးဘၣ်စီၤပၤ, “ပျဲယက့ၤကဒါက့ၤဆူ ယထံယကီၢ်ဒၣ်ယဲန့ၣ်တက့ၢ်.”

²²စီၤပၤသံကွၢ်အီၤ, “ဘၣ်မနုၤအဃိလဲၣ်. မ့ၢ်ယတဟ့ၣ်ဘၣ်နၤလၢ တၢ်တမံၤမံၤလၢနကြၢးဒိးန့ၢ်အီၤအဃိဧါ. လၢတၢ်အံၤအဃိမ့ၢ်နအဲၣ်ဒိးက့ၤကဒါက့ၤဆူနဟံၣ်နဃီန့ၣ်ဧါ.” စီၤဟၤဒးစံးဆၢစီၤပၤ, “တမ့ၢ်ဘၣ်, မ့မ့ၢ်, ထဲပျဲယၤလၢယကက့ၤတက့ၢ်.” ဒီးအဝဲက့ၤကဒါက့ၤဆူအထံအကီၢ်န့ၣ်လီၤ. ဒ်ကီၢ်အဒိၣ်စီၤပၤအသိး, စီၤဟၤဒးမ့ၢ်ကီၢ်အံၣ်စရ့လးအဒုၣ် အဒါအအၢအသီနးနးကလဲာ်တဂၤန့ၣ်လီၤ.

²³ကစၢ်ယွၤထိၣ်ဂဲၤထီၣ်စ့ၢ်ကီးစီၤအလံဒၤအဖိခွါစီၤရစိၣ်အသး လၢကထီဒါစီၤၡလိၤမိၤန့ၣ်လီၤ. စီၤရစိၣ်ဃ့ၢ်ထီၣ်ကွံာ်တ့ၢ်လၢအကစၢ်, စိဘၤအစီၤပၤဟးဒးဧ့ စ့ၢ်အအိၣ်,

²⁴ဒီးကဲထီၣ်တ့ၢ်ခိၣ်နၢ်တဂၤလၢပှၤတဖုလၢတဒိကနၣ်ထံကီၢ်အတၢ် သိၣ်တၢ်သီအဂီၢ်န့ၣ်လီၤ. (တၢ်အံၤမၤအသးဖဲစီၤဒၤဝံးမၤနၢၤကွံာ်စီၤဟးဒးဧ့စ့ၢ် ဒီးမၤသံကွံာ်အဝဲအသိၣ်အမှံၤပှၤစူၤရံဖိတဖၣ်ဝံၤအလီၢ်ခံ န့ၣ်လီၤ.) စီၤရစိၣ်ဒီးအပှၤတဖၣ်လဲၤဒီးအိၣ်ဝဲဆိးဝဲဖဲဝ့ၢ်ဒၤမ့း စ့း, ဖဲအဝဲအပှၤတဖၣ်ပာ်ထီၣ်အီၤလၢကီၢ်စူၤရံအစီၤပၤန့ၣ်လီၤ.

²⁵အဝဲမ့ၢ်ကီၢ်အံၣ်စရ့လးအဒုၣ်အဒါတဂၤဖဲစီၤၡလိၤမိၤအိၣ်မူ ဝဲအခါန့ၣ်လီၤ.

²⁶ပှၤအဂၤတဂၤလၢအထီဒါကွံာ်စီၤပၤၡလိၤမိၤန့ၣ်, မ့ၢ်အဝဲအပဒိၣ်ပပှၢ်အကျါတဂၤ, လၢအမ့ၢ်စီၤနဘးအဖိခွါစီၤယၤ ရၤဘၣ်, ပှၤအ့ဖရဲၣ်ဖိတဂၤလၢအဘၣ်ဃးဒီးစရ့ဒၤန့ၣ်လီၤ. အဝဲအမိၢ်မ့ၢ်မုၣ်ကမဲတဂၤလၢအမံၤမ့ၢ်နီၢ်စရူၤဧၤန့ၣ်လီၤ.

²⁷အအံၤမ့ၢ်တၢ်တဲဘၣ်ဃးဒီးတၢ်ပူထီၣ်အဂ့ၢ်န့ၣ်လီၤ. စီၤၡလိၤမိၤမၤပှဲၤက့ၤဟီၣ်ခိၣ်လၢဝ့ၢ်ယရူၤရှလ့ၣ်အမုၢ်ထီၣ် တကပၤဒီးဘှီဂ့ၤထီၣ်က့ၤဝ့ၢ်ခိၣ်ဒူတဖၣ်, န့ၣ်လီၤ.

²⁸စီၤယၤရၤဘၣ်မ့ၢ်ပှၤသးစၢ်တဂၤလၢအမၤတၢ်သ့, ဒီးဖဲစီၤၡလိၤမိၤပာ်သူၣ်ပာ်သးလၢအဝဲမၤတၢ်ဆူၣ်ထဲလဲၣ်ထဲ လဲၣ်န့ၣ်, အဝဲဒုးကဲထီၣ်အီၤလၢပှၤအခိၣ်တဂၤလၢတၢ်မၢဆူၣ်မၢနၢၤအတၢ်မၤ အပူၤလၢပှၤမနၤၡ့ၤဒီးပှၤအ့ဖရဲၣ်အဒူၣ်တဖၣ်အလီၢ်ကဝီၤပူၤန့ၣ် လီၤ.

²⁹ဘၣ်မုၢ်တနံၤဖဲစီၤယၤရၤဘၣ်ဟးထီၣ်လၢဝ့ၢ်ယရူၤၡလ့ၣ်န့ၣ်, ဝံအဃံယၤလၢဝ့ၢ်ၡံလိၤထံၣ်လိာ်အသးဒီးအီၤခီဂၤဂၤဖဲကျဲ လိၤလၢတၢ်ပျီပူၤန့ၣ်လီၤ.

³⁰စီၤအဃံယၤဘ့ၣ်လီၤကွံာ်အဆ့ကၤဖးထီအသီလၢအကၤဝဲ, ဖှီယာ်ကွံာ်အီၤဆူအက့တဆံခံက့,

³¹ဒီးစံးဘၣ်စီၤယၤရၤဘၣ်, “ဟံးန့ၢ်တၢ်အက့တဆံလၢနဂီၢ်, မ့ၢ်လၢယွၤအံၣ်စရ့လးအကစၢ်ယွၤစံးဘၣ်နၤလၢ, ယကဟံးထီၣ်ကွံာ်ဘီမုၢ်လၢစီၤၡလိၤမိၤအအိၣ်, ဒီးယကဟ့ၣ်နၤပှၤအဒူၣ်တဆံဒူၣ်အဃိန့ၣ်လီၤ.

³²စီၤၡလိၤမိၤကပၢၤဃာ်ပှၤအဒူၣ်တဒူၣ်လၢယခ့ယပှၤစီၤဒၤဝံးအဃိ ဒီးလၢဝ့ၢ်ယရူၤရှလ့ၣ်, ဝ့ၢ်လၢယဃုထၢတ့ၢ်အီၤလၢယဂီၢ်လၢကီၢ်အံၣ်စရ့လးဒီကတီၢ်ညါအ ပူၤ, အဃိန့ၣ်လီၤ.

³³ယကမၤတၢ်အံၤမ့ၢ်လၢစီၤၡလိၤမိၤညိကွံာ်လံယၤဒီးဘူၣ်ထီၣ်ဘါ ထီၣ်ပှၤတခီဘီမုၢ်ဖိအကစၢ်တဖၣ်လၢအမ့ၢ်ဝဲ, ကီၢ်စံဒိၣ်အကစၢ်မုၣ်ဧၤၡတြိး, ကီၢ်မိၤအးအကစၢ်ကမိၣ်, ဒီးကီၢ်ဧၣ်မိၣ်အကစၢ်မိလးအဃိန့ၣ်လီၤ. စီၤၡလိၤမိၤတစူၢ်တ့ၢ်ယၤလၢၤဘၣ်. အဝဲမၤကမၣ်တ့ၢ်တၢ်ဒီးတတိၢ် န့ၢ်ဖံးဃာ်ယတၢ်သိၣ်တၢ်သီတဖၣ်ဒီးယတၢ်မၤလိာ်တဖၣ်ဒ်အပၢ်စီၤဒၤ ဝံးမၤတ့ၢ်ဝဲအသိးန့ၣ်ဘၣ်.

³⁴ဘၣ်ဆၣ်ယတဟံးထီၣ်ကွံာ်ဘီဧိၤမုၢ်ဧိၤဒီဘ့ၣ်ညါလၢစီၤၡလိၤ မိၤအစုပူၤဘၣ်. ယကဟ့ၣ်ဒံးအီၤတၢ်စိတၢ်ကမီၤဖဲအဝဲအိၣ်မူဒံးဝဲ အဖၢမုၢ်န့ၣ်လီၤ. ယကမၤတၢ်အံၤမ့ၢ်လၢတၢ်ကွၢ်မဲာ်ယခ့ ယပှၤစီၤဒၤဝံးလၢယဃုထၢတ့ၢ်အီၤဒီးလၢအစူၢ်ယတၢ်သိၣ်တၢ်သီ တဖၣ်ဒီးတၢ်မၤလိာ်တဖၣ်အဃိန့ၣ်လီၤ.

³⁵ယကဟံးထီၣ်ကွံာ်ဘီဧိၤမုၢ်ဧိၤလၢစီၤၡလိၤမိၤအဖိခွါအအိၣ် ဒီးဟ့ၣ်လီၤနၤပှၤအဒူၣ်တဆံဒူၣ်,

³⁶ဘၣ်ဆၣ်ယကပျဲစီၤၡလိၤမိၤအဖိခွါပၢၤဃာ်ဒံးဒူၣ်တဒူၣ်, ဒ်သိးထီဘိယကအိၣ်ဒီးယခ့ယပှၤစီၤဒၤဝံးအစၢၤအသွဲၣ်တဂၤလၢ အပၢတၢ်လၢဝ့ၢ်ယရူၤၡလ့ၣ်, ဝ့ၢ်လၢယဃုထၢတ့ၢ်အီၤဒ်သိးတၢ်လီၢ်လၢတၢ်ကဘူၣ်ထီၣ်ဘါထီၣ်ယၤ အဂီၢ်အပူၤန့ၣ်လီၤ.

³⁷စီၤယၤရၤဘၣ်ဧၢ, ယကဒုးကဲထီၣ်နၤလၢကီၢ်အံၣ်စရ့လးအစီၤပၤ ဒီးနကပၢဘၣ်ကယဲၢ်လီၢ်ကဝီၤလၢနသးလီအီၤခဲလၢာ်န့ၣ်လီၤ.

³⁸နမ့ၢ်စူၢ်ယၤလၢလၢပှဲၤပှဲၤ, အိၣ်မူလၢယတၢ်သိၣ်တၢ်သီ တဖၣ်အပူၤဒီးမၤန့ၢ်ယတၢ်ဘၣ်သူၣ်ဘၣ်သးနၤခီဖျိမၤတၢ်လၢယမၤ လိာ်နၤ, ဒ်ယခ့ယပှၤစီၤဒၤဝံးမၤတ့ၢ်ဝဲအသိးန့ၣ်ဒီးယကအိၣ်ဒီးနၤထီ ဘိန့ၣ်လီၤ. ယကဒုးကဲထီၣ်နၤလၢကီၢ်အံၣ်စရ့လးအစီပၤ, ဒီးသပှၢ်ကတၢၢ်နစၢၤနသွဲၣ်တဖၣ်ကပၢဘၣ်တၢ်လၢနလီၢ်ခံ, ဒ်ယမၤတ့ၢ်တၢ်လၢစီၤဒၤဝံးအဂီၢ်အသိးန့ၣ်လီၤ.

³⁹မ့ၢ်လၢစီၤၡလိၤမိၤအတၢ်ဒဲးဘးအဃိန့ၣ်, ယကစံၣ်ညီၣ်စီၤဒၤဝံး အစၢၤအသွဲၣ်တဖၣ်, ဘၣ်ဆၣ်တမ့ၢ်ဘၣ်ထီဘိတထံၣ်ဃီဘၣ်.”

⁴⁰ဒီးလၢတၢ်န့ၣ်အဃိ, စီၤၡလိၤမိၤဂုာ်ကျဲးစၢးမၤသံစီၤယၤ ရၤဘၣ်န့ၣ်လီၤ. ဘၣ်ဆၣ်အဝဲဃ့ၢ်ပူၤဖျဲးကွံာ်အသးဆူကီၢ်အဲၤကူပတူးအစီၤပၤ စီၤၡံၡးအအိၣ်, ဒီးအိၣ်ဝဲဆိးဝဲဖဲန့ၣ်, တုၤလီၤလၢစီၤၡလိၤမိၤသံဝဲတစုန့ၣ်လီၤ.

⁴¹ကယဲၢ်တၢ်တမံၤလၢ်လၢ်လၢစီၤၡလိၤမိၤမၤတ့ၢ်ဝဲ, အဝဲအတၢ်ဖံးတၢ် မၤဒီးအတၢ်ကူၣ်သ့တဖၣ်အဂ့ၢ်န့ၣ်ဘၣ်တၢ်ကွဲးနီၣ်ကွဲးဃါအီၤလၢ စီၤၡလိၤမိၤအလံာ်တၢ်စံၣ်စိၤတဲစိၤအပူၤန့ၣ်လီၤ.

⁴²အဝဲမ့ၢ်စီၤပၤလၢဝ့ၢ်ယရူၤၡလ့ၣ်အပူၤလၢကီၢ်အံၣ်စရ့လးဒီ တဘ့ၣ်ညါအဖီခိၣ်အနံၣ်လွံၢ်ဆံန့ၣ်လီၤ.

⁴³အဝဲသံဝဲဒီးဘၣ်တၢ်ခူၣ်လီၤကွံာ်အီၤလၢစီၤဒၤဝံးအဝ့ၢ်ပူၤ ဒီးအဖိခွါစီၤရဃၤဘၣ်ကဲထီၣ်စီၤပၤလၢအလီၢ်န့ၣ်လီၤ.