Read S'gaw Karen လံာ်စီၤပၤအခီၣ်ထံးတဘ့ၣ် 16 Bible Online

လံာ်စီၤပၤအခီၣ်ထံးတဘ့ၣ် 16 - S'gaw Karen bible

လံာ်စီၤပၤအခီၣ်ထံးတဘ့ၣ် 16

¹ယွၤကတိၤတ့ၢ်တၢ်ဒီးစီၤဃနၤနံအဖိခွါဝံယ့ၤဟူဒီးဟ့ၣ်အီၤ တၢ်ကစီၣ်အံၤလၢစီၤဘါၡၤအဂီၢ်လီၤ

²“နတမ့ၢ်တၢ်နီတမံၤဘၣ်. ဘၣ်ဆၣ်ယဒုးကဲထီၣ်နၤလၢယပှၤဂီၢ်မုၢ် အံၣ်စရ့လးလၢအခိၣ်အနၢ်န့ၣ်လီၤ. ဒီးခဲကနံၣ်အံၤနမၤတ့ၢ်တၢ်ဒဲးဘးဒ်စီၤယၤရၤဘၣ်အသိး, ဒီးနဆှၢဃီၤယပှၤဂီၢ်မုၢ်ဆူတၢ်ဒဲးဘးအပူၤန့ၣ်လီၤ. အဝဲသ့ၣ်အတၢ်ဒဲးဘးတဖၣ်ထိၣ်ဂဲၤထီၣ်ယတၢ်သးဒိၣ်,

³ဒီးလၢတၢ်န့ၣ်အဃိ, ဒ်ယမၤတ့ၢ်စီၤယၤရၤဘၣ်အသိးယက တၢၤကွံာ်နၤဒီးနပှၤဟံၣ်ဖိဃီဖိန့ၣ်လီၤ.

⁴နပှၤဟံၣ်ဖိဃီဖိတဖၣ်အကျါတဂၤလၢ်လၢ်လၢအသံလၢဝ့ၢ်ပူၤန့ၣ် ကဘၣ်တၢ်အီၣ်ကွံာ်အီၤလၢထွံၣ်တဖၣ်, ဒီးပှၤတဂၤလၢ်လၢ်လၢအသံလၢဝ့ၢ်အချၢတၢ်ပျီပူၤန့ၣ်ကဘၣ်တၢ် အီၣ်ကွံာ်အီၤလၢလီတးတဖၣ်န့ၣ်လီၤ.”

⁵ကယဲၢ်တၢ်အိၣ်လီၤတဲာ်တမံၤလၢ်လၢ်လၢစီၤဘါၡၤမၤတ့ၢ်ဝဲဒီး ကယဲၢ်အတၢ်သးဒူအတၢ်မၤတဖၣ်ဘၣ်တၢ်ကွဲးနီၣ်အီၤလၢကီၢ်အံၣ်စရ့ လးအစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.

⁶စီၤဘါၡၤသံဝဲဒီးဘၣ်တၢ်ခူၣ်လီၤကွံာ်အီၤလၢဝ့ၢ်တံးရစၢ်အ ပူၤ, ဒီးအဖိခွါစီၤအ့လၤကဲထီၣ်စီၤပၤလၢအလီၢ်န့ၣ်လီၤ.

⁷ယွၤအတၢ်ကစီၣ်လၢအကတိၤထီဒါစီၤဘါၡၤဒီးအပှၤဟံၣ်ဖိ ဃီဖိန့ၣ်ဘၣ်တၢ်ဟ့ၣ်လီၤအီၤလၢဝံယ့ၤဟူ, မ့ၢ်လၢစီၤဘါၡၤမၤတ့ၢ်တၢ်ဒဲးဘးထီဒါယွၤအဃိန့ၣ်လီၤ. အဝဲထိၣ်ဂဲၤထီၣ်ယွၤအတၢ်သးဒိၣ်တမ့ၢ်ထဲလၢတၢ်အၢတၢ်သီလၢအမၤ တ့ၢ်ဝဲဒ်စီၤပၤယၤရၤဘၣ်လၢအဝဲအမဲာ်ညါမၤတ့ၢ်ဝဲအသိးအဃိန့ၣ် ဘၣ်. မ့မ့ၢ်, မ့ၢ်စ့ၢ်ကီးလၢအဝဲမၤသံကွံာ်ကယဲၢ်စီၤယၤရၤဘၣ်အပှၤ ဟံၣ်ဖိဃီဖိခဲလၢာ်အဃိန့ၣ်လီၤ.

⁸လၢကီၢ်ယူဒၤအစီၤပၤအၤစါပၢတၢ်ခံဆံဃုနံၣ်တနံၣ်အပူၤန့ၣ်, စီၤဘါၡၤအဖိခွါစီၤအ့လၤကဲထီၣ်ကီၢ်အံၣ်စရ့လးအစီၤပၤ ဒီးအဝဲမၤတၢ်ဖဲဝ့ၢ်တံးရစၢ်အပူၤခံနံၣ်န့ၣ်လီၤ.

⁹စီၤစံၣ်ရံၤ, ပှၤကွၢ်ထွဲစီၤပၤအလ့ၣ်ကဟၣ်တဖၣ်ခံပူတပူ, လၢအမ့ၢ်စီၤပၤအသုးခိၣ်တဖၣ်အကျါတဂၤကူၣ်တၢ်အၢထီဒါစီၤပၤ န့ၣ်လီၤ. ဘၣ်မုၢ်တနံၤလၢဝ့ၢ်တံးရစၢ်အပူၤန့ၣ်, စီၤအ့လၤအီမူၤသံးဖဲစီၤအၢ်စၤလၢအမ့ၢ်ပှၤကွၢ်ထွဲနီတဂၤ အဟံၣ်ပူၤန့ၣ်လီၤ.

¹⁰စီၤစံၣ်ရံၤဟဲနုာ်လီၤဆူဟံၣ်ပူၤဒီးမၤသံကွံာ်စီၤအ့လၤ ဒီးကဲထီၣ်စီၤပၤလၢအလီၢ်န့ၣ်လီၤ. တၢ်အံၤမၤအသးဖဲကီၢ်ယူဒၤအစီၤပၤအၤစါပၢတၢ်ခံဆံနွံနံၣ် တနံၣ်အပူၤန့ၣ်လီၤ.

¹¹တုၤစီၤစံၣ်ရံၤကဲထီၣ်စီၤပၤတဘျီန့ၣ်အဝဲမၤသံကွံာ်ကယဲၢ် စီၤဘါၡၤအဟံၣ်ဖိဃီဖိခဲလၢာ်န့ၣ်လီၤ. အဘူးအတံၢ်ဒီးအတံၤသကိးပိာ်ခွါခဲလၢာ်ဘၣ်တၢ်မၤသံကွံာ်အီၤ န့ၣ်လီၤ.

¹²ဒီးလၢတၢ်န့ၣ်အဃိဒ်တၢ်လၢယွၤစံးတ့ၢ်ဝဲထီဒါစီၤဘါၡၤခီ ဖျိဝံယ့ၤဟူအသိး, စီၤစံၣ်ရံၤမၤသံကွံာ်ကယဲၢ်စီၤဘါၡၤအပှၤဟံၣ်ဖိဃီဖိခဲ လၢာ်န့ၣ်လီၤ.

¹³လၢအဝဲသ့ၣ်အတၢ်ဘါထီၣ်တၢ်ဂီၤတၢ်ဖီၣ်ဒီးလၢအဝဲသ့ၣ်ဆှၢဃီၤ ကီၢ်အံၣ်စရ့လးဆူတၢ်ဒဲးဘးအပူၤအဃိ, စီၤဘါၡၤဒီးအဖိခွါစီၤအ့လၤထိၣ်ဂဲၤထီၣ်ဘၣ်ယွၤ, ကီၢ်အံၣ်စရ့လးအကစၢ်ယွၤအတၢ်သးဒိၣ်ထီၣ်န့ၣ်လီၤ.

¹⁴ကယဲၢ်တၢ်အိၣ်လီၤတဲာ်တမံၤလၢ်လၢ်လၢစီၤအ့လၤမၤတ့ၢ်ဝဲန့ၣ်ဘၣ် တၢ်ကွဲးနီၣ်ကွဲးဃါအီၤလၢကီၢ်အံၣ်စရ့လးအစီၤပၤတဖၣ်အတၢ် စံၣ်စိၤတဲစိၤအပူၤန့ၣ်လီၤ.

¹⁵လၢကီၢ်ယူဒၤအစီၤပၤအၤစါပၢတၢ်ခံဆံနွံနံၣ်တနံၣ်အပူၤ န့ၣ်, စီၤစံၣ်ရံၤပၢတၢ်လၢဝ့ၢ်တံးရစၢ်အပူၤလၢကီၢ်အံၣ်စရ့လးအဖီ ခိၣ်နွံသီန့ၣ်လီၤ. ပှၤအံၣ်စရ့လးအသုးဖိတဖၣ်မၤန့ၢ်ဝ့ၢ်ကံးဘသိၣ်လၢအအိၣ်လၢကီၢ် ဖလ့ၡသးအပူၤ,

¹⁶ဒီးဖဲန့ၣ်တုၤအဝဲသ့ၣ်နၢ်ဟူဘၣ်ဝဲလၢစီၤစံၣ်ရံၤကူၣ်ထီၣ်တၢ် အၢထီဒါစီၤပၤဒီးမၤသံကွံာ်အီၤန့ၣ်, အဝဲသ့ၣ်ခဲလၢာ်တဲဖျါဘိးဘၣ်သ့ၣ်ညါထီၣ်, အသုးခိၣ်ဖးဒိၣ်စီၤ ဧိၣ်ရံၤဒ်စီၤပၤလၢကီၢ်အံၣ်စရ့လးအဖီခိၣ်န့ၣ်လီၤ.

¹⁷စီၤဧိၣ်ရံၤဒီးအသုးဖိတဖၣ်ဟးထီၣ်လၢဝ့ၢ်ကံးဘသိၣ်ဒီးလဲၤ ကဝီၤဒုးဝ့ၢ်တံးရစၢ်န့ၣ်လီၤ.

¹⁸တုၤစီၤစံၣ်ရံၤထံၣ်ဝဲဒၣ်လၢဝ့ၢ်ဘၣ်တၢ်မၤန့ၢ်ကွံာ်အီၤလံ န့ၣ်အဝဲလဲၤနုာ်ဆူနီအသးကံၢ်ပူၤ, ဆိၣ်ကဲၤထီၣ်နီလၢမ့ၣ်အူဒီးသံဝဲလၢမ့ၣ်အူလၣ်အကျါန့ၣ်လီၤ.

¹⁹တၢ်အံၤမၤအသးမ့ၢ်လၢအဝဲအတၢ်ဒဲးဘးတဖၣ်ထီဒါယွၤအဃိန့ၣ် လီၤ. ဒ်ပှၤပၢတၢ်လၢအဝဲအမဲာ်ညါစီၤယၤရၤဘၣ်အသိးန့ၣ်အဝဲမၤသး အုးတ့ၢ်ယွၤလၢအကစၢ်ဒၣ်ဝဲအတၢ်ဒဲးဘးတဖၣ်အဃိဒီးလၢအဆှၢဃီၤ ကီၢ်အံၣ်စရ့လးဆူတၢ်ဒဲးဘးအပူၤအဃိန့ၣ်လီၤ.

²⁰ကယဲၢ်တၢ်အိၣ်လီၤတဲာ်တမံၤလၢ်လၢ်လၢစီၤစံၣ်ရံၤမၤတ့ၢ်ဝဲ ဃုာ်ဒီးတၢ်ဂ့ၢ်ဘၣ်ထွဲဒီးအဝဲအတၢ်ထိၣ်ဂဲၤတၢ်အၢအဂ့ၢ်န့ၣ်, ဘၣ်တၢ်ကွဲးနီၣ်ကွဲးဃါအီၤလၢကီၢ်အံၣ်စရ့လးအစီၤပၤတဖၣ် အလံာ်တၢ်စံၣ်စိၤတဲစိၤအပူၤန့ၣ်လီၤ.

²¹ကီၢ်အံၣ်စရ့လးအပှၤဂီၢ်မုၢ်လီၤမုၢ်လီၤဖးကွံာ်ဝဲလီၤ. အဝဲသ့ၣ်အကျါတနီၤအဲၣ်ဒိးဒုးကဲထီၣ်စီၤကံနးအဖိခွါစီၤ ကံးဘနံၤလၢစီၤပၤဒီးပှၤအဂၤတနီၤဘၣ်သူၣ်ဘၣ်သးဝဲလၢစီၤ ဧိၣ်ရံၤန့ၣ်လီၤ.

²²လၢခံကတၢၢ်န့ၣ်, ပှၤလၢအဘၣ်သူၣ်ဘၣ်သးစီၤဧိၣ်ရံၤမၤနၢၤကွံာ် တၢ်န့ၣ်လီၤ. စီၤတံးဘနံၤသံဝဲဒီးစီၤဧိၣ်ရံၤကဲထီၣ်စီၤပၤန့ၣ်လီၤ.

²³လၢတၢ်န့ၣ်အဃိဖဲကီၢ်ယူဒၤအစီၤပၤအၤစါပၢတၢ်သၢဆံတနံၣ် အနံၣ်ပူၤန့ၣ်စီၤဧိၣ်ရံၤကဲထီၣ်ကီၢ်အံၣ်စရ့လးအစီၤပၤ, ဒီးအဝဲပၢတၢ်တဆံခံနံၣ်န့ၣ်လီၤ. အခီၣ်ထံးဃုနံၣ်န့ၣ်အဝဲပၢတၢ်ဖဲဝ့ၢ်တံးရစၢ်အပူၤ,

²⁴ဝံၤဒီးအဝဲပှ့ၤန့ၢ်ကီၢ်ၡၤမရံအကစၢၢ်လၢစ့အဘ့ၣ်ဃုကထိ လၢပှၤတဂၤလၢအမံၤမ့ၢ်ဝဲစီၤၡ့မ့ၢ်အအိၣ်န့ၣ်လီၤ. စီၤဧိၣ်ရံၤမၤဂၢၢ်ထီၣ်ကျၢၤထီၣ်ကစၢၢ်န့ၣ်, သူၣ်ထီၣ်ဝ့ၢ်တဖျၢၣ်ဖဲန့ၣ်ဒီးယုၢ်ဝဲအမံၤလၢၡၤမရံပိာ်ထွဲထီၣ်စီၤၡ့မ့ၢ်, ကစၢၢ်အကစၢ်လၢညါအမံၤအခံန့ၣ်လီၤ.

²⁵စီၤဧိၣ်ရံၤမၤတ့ၢ်တၢ်ဒဲးဘးထီဒါယွၤအါန့ၢ်ဒံးပှၤလၢအဝဲ အမဲာ်ညါတဂၤလၢ်လၢ်န့ၣ်လီၤ.

²⁶ဒ်စီၤယၤရၤဘၣ်လၢအဝဲအမဲာ်ညါအသိးန့ၣ်, အဝဲထိၣ်ဂဲၤထီၣ်ဘၣ်ယွၤ, ကီၢ်အံၣ်စရ့လးအကစၢ်ယွၤအတၢ်သးဒိၣ် ခီဖျိအဝဲအတၢ်ဒဲးဘးတဖၣ်ဒီးဆှၢဃီၤပှၤဂီၢ်မုၢ်ဆူတၢ်ဒဲး ဘးဒီးတၢ်ဘါထီၣ်တၢ်ဂီၤတၢ်ဖီၣ်အပူၤန့ၣ်လီၤ.

²⁷ကယဲၢ်တၢ်အိၣ်လီၤတဲာ်တမံၤလၢ်လၢ်လၢစီၤဧိၣ်ရံၤမၤတ့ၢ်ဝဲဒီး ကယဲၢ်အဝဲအတၢ်မၤလၢအကဲထီၣ်လိၣ်ထီၣ်တဖၣ်န့ၣ်, ဘၣ်တၢ်ကွဲးနီၣ်ကွဲးဃါအီၤလၢကီၢ်အံၣ်စရ့လးအစီၤပၤတဖၣ်အတၢ် စံၣ်စိၤတဲစိၤအပူၤန့ၣ်လီၤ.

²⁸စီၤဧိၣ်ရံၤသံဝဲဒီးဘၣ်တၢ်ခူၣ်လီၤကွံာ်အီၤလၢကီၢ်ၡၤမရံအ ပူၤ, ဒီးအဖိခွါစီၤအၤဃာ်ကဲထီၣ်စီၤပၤလၢအလီၢ်န့ၣ်လီၤ.

²⁹လၢကီၢ်ယူဒၤအစီၤပၤအၤစါပၢတၢ်သၢဆံဃိးနံၣ်တနံၣ်အပူၤ န့ၣ်, စီၤဧိၣ်ရံၤအဖိခွါစီၤအၤဃာ်ကဲထီၣ်ကီၢ်အံၣ်စရ့လးအစီၤပၤ, ဒီးအဝဲပၢတၢ်လၢကီၢ်ၡၤမရံခံဆံခံနံၣ်န့ၣ်လီၤ.

³⁰အဝဲမၤတ့ၢ်တၢ်ဒဲးဘးထီဒါယွၤအါန့ၢ်ဒံးပှၤလၢအဝဲအမဲာ်ညါ တဂၤလၢ်လၢ်န့ၣ်လီၤ.

³¹တၢ်မၤတၢ်ဒဲးဘးဒ်စီၤယၤရၤဘၣ်အသိးန့ၣ်, လၢအဂီၢ်တလၢမၤဘၣ် အီၤအဃိအဝဲမၤအါထီၣ်ဝဲဒီးဟံးန့ၢ်အမါလၢကီၢ်စံဒိၣ်အစီၤ ပၤအ့သဘၤလးအဖိမုၣ်နီၢ်အံၤစ့ဘ့ၤလးဒီးဘူၣ်ထီၣ်ဘါထီၣ် ဘဧၤလးန့ၣ်လီၤ.

³²အဝဲဘှီထီၣ်တၢ်လုၢ်ဟံၣ်တဖျၢၣ်လၢဘဧလးအဂီၢ်လၢကီၢ်ၡၤမရံအ ပူၤ, မၤတၢ်လုၢ်လီၢ်တခါလၢအဂီၢ်ဒီးပာ်ဝဲလၢတၢ်လုၢ်ဟံၣ်အပူၤန့ၣ် လီၤ.

³³အဝဲမၤထီၣ်စ့ၢ်ကီးကစၢ်မုၣ်အၡ့ရၤအဂီၤတခါန့ၣ်လီၤ. အဝဲထိၣ်ဂဲၤထီၣ်ယွၤ, ကီၢ်အံၣ်စရ့လးအကစၢ်ယွၤအတၢ်သးဒိၣ်အါ န့ၢ်ဒံးကီၢ်အံၣ်စရ့လးအစီၤပၤတဖၣ်လၢအဝဲအမဲာ်ညါတက့ၢ်န့ၣ် လီၤ.

³⁴ဖဲအဝဲပၢတၢ်အကတီၢ်န့ၣ်စီၤဃံၤမ့လးလၢဝ့ၢ်ဘ့ၤသ့လးသူၣ် ထီၣ်ကဒါက့ၤဝ့ၢ်ယရံၤဃိန့ၣ်လီၤ. ဒ်ယွၤတဲဆိပာ်တ့ၢ်ခီဖျိစီၤနိၣ်အဖိခွါစီၤယိၤၡူအသိးန့ၣ်, စီၤဃံၤမ့လးအဖိခွါဝဲၢ်ကိစီၤအဘံရၣ်ဘၣ်တၢ်မၤသံကွံာ်အီၤ ဖဲအဝဲပာ်လီၤဝ့ၢ်ယရံၤဃိအခီၣ်ထံးဒီးအဖိခွါသဒါစီၤစကံာ်ဘၣ် တၢ်မၤသံကွံာ်အီၤဖဲအဝဲဘှီထီၣ်တြဲၤဖးဒိၣ်တဖၣ်အခါန့ၣ် လီၤ.