Read S'gaw Karen လံာ်စီၤပၤအခီၣ်ထံးတဘ့ၣ် 18 Bible Online

လံာ်စီၤပၤအခီၣ်ထံးတဘ့ၣ် 18 - S'gaw Karen bible

လံာ်စီၤပၤအခီၣ်ထံးတဘ့ၣ် 18

¹တယံာ်ဘၣ်ဝံၤအလီၢ်ခံ, လၢတၢ်ယီၤဃ့သၢနံၣ်တနံၣ်အပူၤန့ၣ်ယွၤ စံးဘၣ်စီၤအ့ၤလံယၤ, “လဲၤဒီးဒုးနဲၣ်နသးလၢစီၤပၤအၤဃာ်, ဒီးယကဒုးဟဲစူၤလီၤတၢ်လီၤ.”

²လၢတၢ်န့ၣ်အဃိစီၤအ့ၤလံယၤစးထီၣ်လဲၤတၢ်န့ၣ်လီၤ. မ့ၢ်တၢ်ဆၢကတီၢ်ဖဲတၢ်သၣ်ဝံၤလီၤဒိလၢကီၢ်ၡၤမရံအပူၤနးက တၢၢ်,

³အဃိ, စီၤအၤဃာ်ကိးန့ၢ်စီၤဧိၤဘါဒယၤလၢအမ့ၢ်ပှၤကွၢ်ထွဲ တၢ်အခိၣ်လၢနီပူၤန့ၣ်လီၤ. (စီၤဧိၤဘါဒယၤမ့ၢ်ပှၤအဲၣ်ထူအဲၣ် ယွၤဒိၣ်မးတဂၤ,

⁴ဒီးဖဲနီၢ်အံၤစ့ဘ့ၤလးမၤသံကွံာ်ယွၤအဝံတဖၣ်အခါန့ၣ်, စီၤဧိၤဘါဒယၤဟံးန့ၢ်အဝဲသ့ၣ်အကျါဝံတကယၤဒီးပာ်ခူသူၣ် အဝဲသ့ၣ်လၢလၢၢ်ကအိတဖၣ်အပူၤခံကရူၢ်, တကရူၢ်ပှၤအဂၤယဲၢ်ဆံစုာ်စုာ်ဒီးလုၢ်အီၣ်လုၢ်အီအဝဲသ့ၣ်လၢတၢ် အီၣ်ဒီးထံန့ၣ်လီၤ.)

⁵စီၤအၤဃာ်စံးဘၣ်စီၤဧိၤဘါဒယၤ, “မ်ပကလဲၤကွၢ်တၢ်လၢကယဲၢ် ထံထီၣ်ပၢၢ်ဒီးကယဲၢ်ထံကျိအထၣ်လၢကီၢ်ပူၤဒ်သိးပကထံၣ်ဘၣ်လၢ, မ့ၢ်ပထံၣ်န့ၢ်နီၣ်ဧိၤမံၤဧိၤလၢအကလၢဝဲလၢပကသ့ၣ်တဖၣ်ဒီး ကသ့ၣ်လၤတဖၣ်ကအီၣ်ဒီးမူဝဲအဂီၢ်န့ၣ်ဧါ. ဘၣ်သ့ၣ်သ့ၣ်ပတမၤသံဘၣ်ပဆၣ်ဖိကီၢ်ဖိနီတဒုဒုဘၣ်.”

⁶အဝဲသ့ၣ်အသးလီၤပလိာ်လၢတဂၤစုာ်စုာ်ကလဲၤဒီးဆှၣ်ကွၢ်တၢ်လၢ လီၢ်ကဝီၤမတၤလၢကီၢ်ပူၤ, ဒီးဟးထီၣ်ဝဲတဂၤတကျိၤန့ၣ်လီၤ.

⁷ဖဲစီၤဧိၤဘါဒယၤလဲၤတၢ်လၢကျဲန့ၣ်သတူၢ်ကလာ်ထံၣ်လိာ်အသးဒီး စီၤအ့ၤလံယၤန့ၣ်လီၤ. ဒီးအဝဲသ့ၣ်ညါနီၣ်အီၤ, ဒီးထိၣ်လီၤပှီၤအသးလၢအမဲာ်ညါဒီး သံကွၢ်ဝဲ, “တၢ်ဒိၣ်ဧၢ, နမ့ၢ်နီၢ်နီၢ်စီၤအ့ၤလံယၤန့ၣ်ဧါ.”

⁸အဝဲစံးဆၢဝဲ, “မ့ၢ်, ယမ့ၢ်စီၤအ့ၤလံယၤလီၤ. လဲၤဒီးတဲဘၣ်နကစၢ်စီၤပၤလၢယအိၣ်ဖဲအံၤန့ၣ်တက့ၢ်.”

⁹စီၤဧိၤဘါဒယၤစံးဆၢဝဲ, “မ့ၢ်ယမၤတ့ၢ်တၢ်မနုၤတမံၤလၢ နကအဲၣ်ဒိးဒုးလီၤဘၣ်ယၤလၢတၢ်ကီတၢ်ခဲအပူၤလၢစီၤပၤအၤဃာ် ကမၤသံကွံာ်ယၤန့ၣ်လဲၣ်.

¹⁰လၢယွၤ, နကစၢ်ယွၤလၢအမူဝဲတဂၤအမံၤအပူၤန့ၣ်, ယဆိၣ်လီၤယသးလၢစီၤပၤကွၢ်ဃုနၤလၢထံကီၢ်ကိးဘ့ၣ်ဒဲးအပူၤ လၢဟီၣ်ခိၣ်ချၢန့ၣ်လီၤ. တဘျီလၢ်လၢ်ဖဲထံကီၢ်တဘ့ၣ်အစီၤပၤပာ်ဖျါဝဲလၢနတအိၣ်ဘၣ်လၢ အဝဲအထံကီၢ်အပူၤန့ၣ်, စီၤပၤအၤဃာ်ကဃ့စီၤပၤအဝဲန့ၣ်လၢကဆိၣ်လီၤအသး, လၢတၢ်တထံၣ်န့ၢ်ဘၣ်နၤဘၣ်န့ၣ်လီၤ.

¹¹ဒီးခဲကနံၣ်အံၤနသးအိၣ်လၢယကလဲၤဒီးတဲအီၤလၢနအိၣ်ဖဲ အံၤန့ၣ်ဧါ.

¹²တုၤယဟးထီၣ်တဘျီဃီဒီးယွၤအသးမ့ၢ်စိာ်ကွံာ်နၤဆူတၢ်လီၢ်လၢ ယတသ့ၣ်ညါဘၣ်တပူၤပူၤဒီးတၢ်ကမၤအသးဒ်လဲၣ်. ဒီးတုၤယတဲဘၣ်စီၤအၤဃာ်လၢနအိၣ်ဖဲအံၤ, ဒီးအဝဲဃုနၤမ့ၢ်တဘၣ်န့ၣ်ဒီးအဝဲကမၤသံယၤလီၤ. သ့ၣ်နီၣ်ထီၣ်က့ၤလၢယမ့ၢ်တ့ၢ်ပှၤတဂၤလၢအအဲၣ်ထူအဲၣ်ယွၤစးထီၣ် လၢယဖိသၣ်လံၤလံၤန့ၣ်တက့ၢ်.

¹³မ့ၢ်နတနၢ်ဟူတ့ၢ်လၢဖဲနီၢ်အံၤစ့ဘ့ၤလးမၤသံယွၤအဝံတဖၣ် အခါန့ၣ်, ယပာ်ခူသူၣ်တ့ၢ်အဝဲသ့ၣ်အကျါပှၤတကယၤဂၤလၢလၢၢ်ကအိတဖၣ်အပူၤ ခံကရူၢ်, တကရူၢ်ပှၤအဂၤယဲၢ်ဆံစုာ်စုာ်ဒီးလုၢ်အီၣ်လုၢ်အီအီၤလၢတၢ်အီၣ် ဒီးထံန့ၣ်ဘၣ်ဧါ.

¹⁴လၢတၢ်န့ၣ်အဃိနမၢယလဲၤတဲစီၤပၤလၢနအိၣ်ဖဲအံၤန့ၣ်ကသ့ဒ် လဲၣ်. အဝဲကမၤသံယၤလီၤ.”

¹⁵စီၤအ့ၤလံယၤစံးဆၢဝဲ, “လၢယွၤသ့တၢ်လၢာ်ကစၢ်လၢအမူဝဲ ဒီးယမၤအတၢ်တဂၤအမံၤအပူၤန့ၣ်, ယအၢၣ်လီၤယသးလၢယကလဲၤဒုးနဲၣ် ဖျါယသးလၢစီၤပၤတနံၤအံၤန့ၣ်လီၤ.”

¹⁶လၢတၢ်န့ၣ်အဃိစီၤဧိၤဘါဒယၤလဲၤဃီၤဆူစီၤပၤအၤဃာ်အအိၣ် ဒီးတဲအီၤ, ဒီးစီၤအၤဃာ်ဟးထီၣ်လၢကလဲၤထံၣ်စီၤအ့ၤလံယၤအဂီၢ်န့ၣ်လီၤ.

¹⁷ဖဲစီၤအၤဃာ်ထံၣ်ဘၣ်အီၤန့ၣ်အဝဲစံးဝဲ, “အိမ့ၢ်နၤ, ပှၤမၤကိၢ်မၤဂီၤတၢ်အဒိၣ်ကတၢၢ်လၢကီၢ်အံၣ်စရ့လးအပူၤန့ၣ်ဧါ.”

¹⁸စီၤအ့ၤလံယၤစံးဆၢအီၤ, “ယတမ့ၢ်ဘၣ်ပှၤမၤကိၢ်မၤဂီၤတၢ် ဘၣ်. မ့ၢ်သုဝဲ, နၤဒီးနပၢ်တခီန့ၣ်လီၤ. သုတစူၢ်ဘၣ်ယွၤအတၢ်မၤ လိာ်တဖၣ်ဘၣ်ဒီးသုဘူၣ်ထီၣ်ဘါထီၣ်ဘဧၤလးအတၢ်ဂီၤတၢ်ဖီၣ်တဖၣ် န့ၣ်လီၤ.

¹⁹ခဲကနံၣ်အံၤဟ့ၣ်လီၤနကလုၢ်လၢကယဲၢ်ကီၢ်အံၣ်စရ့လးအပှၤဂီၢ်မုၢ် ကဟဲထံၣ်ယၤဖဲကစၢၢ်ကၢ်မ့ၤလးအလိၤန့ၣ်တက့ၢ်. ဟဲကိးဃုာ်ဘဧၤလးအဝံလွံၢ်ကယၤယဲၢ်ဆံဂၤဒီးကစၢ်မုၣ်အၡ့ရၤ အဝံလွံၢ်ကယၤဂၤလၢအဘၣ်တၢ်ဆီၣ်ထွဲမၤစၢၤတ့ၢ်အီၤလၢနီၢ်ပၤ မုၣ်အံၤစ့ဘ့ၤလးန့ၣ်တက့ၢ်.”

²⁰လၢတၢ်န့ၣ်အဃိစီၤအၤဃာ်ကိးဖှိၣ်ကယဲၢ်ပှၤအံၣ်စရ့လးဖိ ခဲလၢာ်ဒီးဘဧၤလးအဝံတဖၣ်လၢကဟဲထံၣ်လိာ်အသးဖဲ ကစၢၢ်ကၢ်မ့ၤလးအလိၤန့ၣ်လီၤ.

²¹စီၤအ့ၤလံယၤလဲၤထီၣ်ဆူပှၤဂီၢ်မုၢ်အအိၣ်ဒီးစံးဝဲ, “လၢသုကစံၣ်ညီၣ်တဲာ်သုသးအဂီၢ်န့ၣ်ကယံာ်ဒံးဆံးယံာ်လဲၣ်. ယွၤမ့မ့ၢ်ကစၢ်ယွၤဒီးဘူၣ်ထီၣ်ဘါထီၣ်အီၤတက့ၢ်. ဘဧၤလးမ့မ့ၢ်ကစၢ်ယွၤဒီးဘူၣ်ထီၣ်ဘါထီၣ်အီၤတက့ၢ်.” ဘၣ်ဆၣ်ဒီးပှၤဂီၢ်မုၢ်တကတိၤဘၣ်တၢ်နီတဘီဘၣ်.

²²အန့ၣ်ဒီးစီၤအ့ၤလံယၤစံးဝဲ, “ယမ့ၢ်ယွၤအဝံထဲတဂၤဧိၤလၢ အအိၣ်လီၤတဲာ်န့ၣ်လီၤ. မ့မ့ၢ်ဘဧၤလးအဝံအိၣ်ဝဲလွံၢ်ကယၤယဲၢ်ဆံဂၤန့ၣ်လီၤ.

²³ဟဲစိာ်ဂီၤဖံးဖါခံဒုတက့ၢ်. မ်ဘဧၤလးအဝံတဖၣ်ဟံးန့ၢ်တ ဒု, မၤသံကွံာ်အီၤ, ဒီၣ်တဲာ်အီၤတကူာ်တကူာ်, ဒီးပာ်ထီၣ်အီၤလၢသ့ၣ်မုၣ်အဖီခိၣ်တက့ၢ်. ဘၣ်ဆၣ်တဘၣ်ဒွဲၣ်ထီၣ်မ့ၣ်အူတဂ့ၤ. ယကမၤတၢ်တမံၤဃီဒီးဂီၤ ဖံးဖါအဂၤတဒုန့ၣ်လီၤ.

²⁴ဝံၤဒီး, မ်ဘဧၤလးအဝံတဖၣ်ဘါထုကဖၣ်တၢ်ဆူအဝဲသ့ၣ်အကစၢ်အ အိၣ်, ဒီးယကဘါထုကဖၣ်တၢ်ဆူယွၤအအိၣ်လီၤ. ဒီးကစၢ်တဂၤလၢအစံးဆၢတၢ်ခီဖျိဆှၢလီၤမ့ၣ်အူန့ၣ်, အဝဲမ့ၢ်ကစၢ်ယွၤလီၤ.” ပှၤဂီၢ်မုၢ်ကိးသတြီထီၣ်အတၢ်ဘၣ်သူၣ်ဘၣ်သးန့ၣ်လီၤ.

²⁵အန့ၣ်ဒီး, စီၤအ့ၤလံယၤစံးဘၣ်ဘဧၤလးအဝံတဖၣ်, “မ့ၢ်လၢသုအိၣ်အါဂၤအဃိဟံးန့ၢ်ဂီၤဖံးဖါတဒုဒီးကတဲာ် ကတီၤဆိအီၤတက့ၢ်. ဘါထုကဖၣ်တၢ်ဆူသုကစၢ်အအိၣ်, ဘၣ်ဆၣ်ဆိၣ်ကဲၤထီၣ်သ့ၣ်မုၣ်တဂ့ၤ.”

²⁶အဝဲသ့ၣ်ဟံးန့ၢ်ဃီၤဂီၤဖံးဖါလၢအဘၣ်တၢ်ဟဲစိာ်န့ၢ်အီၤ, ကတဲာ်ကတီၤထီၣ်ဝဲဒီးဘါထုကဖၣ်တၢ်ဆူဘဧၤလးအအိၣ်တုၤမုၢ်ထူၣ် အကတီၢ်န့ၣ်လီၤ. အဝဲသ့ၣ်ကိးသတြီထီၣ်ဝဲ, “ဘဧၤလးဧၢ, စံးဆၢပှၤတက့ၢ်.” ဒီးဂဲၤကလံာ်ဝဲဝးတရံးတၢ်လုၢ်လီၢ်လၢအဘှီထီၣ်ဝဲန့ၣ်လီၤ. ဘၣ်ဆၣ်တၢ်စံးဆၢတဟဲနီတမံၤဘၣ်.

²⁷တုၤလီၤလၢမုၢ်ထူၣ်အကတီၢ်န့ၣ်, စီၤအ့ၤလံယၤစးထီၣ်မၤလီၤ နံၤဘၣ်ဖၣ်လဲအဝဲသ့ၣ်ဒီးစံးဝဲ, “ဘါထုကဖၣ်ဒိၣ်ထီၣ်တက့ၢ်. အဝဲမ့ၢ်ကစၢ်တဂၤလီၤ. ဘၣ်သ့ၣ်သ့ၣ်ကမ့ၢ်အဝဲအိၣ်လၢတၢ်ဆိကမိၣ်ယိာ်ပူၤမ့ၢ်ဂ့ၤ, အတၢ်ဖံးတၢ်မၤအါမ့ၢ်ဂ့ၤလီၤ. မ့တမ့ၢ်ဘၣ်ဒီးဘၣ်သ့ၣ်သ့ၣ်အဝဲ ကအိၣ်ဒီးတၢ်လဲၤတၢ်က့ၤတပူၤပူၤလီၤ. မ့တမ့ၢ်ဘၣ်န့ၣ်ကမ့ၢ်အဝဲမံဘၣ်အသးဒီးသုကဘၣ်ထိၣ်ဂဲၤထီၣ်အီၤ လီၤ.”

²⁸လၢတၢ်န့ၣ်အဃိဘဧၤလးအဝံတဖၣ်ဘါထုကဖၣ်ဒိၣ်ထီၣ်, ဒီးဂဲာ်လီၤအသးလၢဃဲာ်တဖၣ်ဒီးဒီတဖၣ်ဒ်အဝဲသ့ၣ်အလုၢ်အလၢ်အိၣ် ဝဲအသိး, တုၤအသွံၣ်ဟဲယွၤလီၤဝဲန့ၣ်လီၤ.

²⁹အဝဲသ့ၣ်ကိးကလူဒိၣ်ထီၣ်ဒံးဒ်ပှၤအပျုၢ်တဖၣ်အသိးတုၤလီၤလၢ မုၢ်ဃ့ၢ်လီၤပှၤလုၢ်တၢ်ပာ်တၢ်အကတီၢ်, ဘၣ်ဆၣ်တၢ်စံးဆၢတဟဲနီတမံၤဘၣ်, တၢ်တနၢ်ဟူဘၣ်တၢ်အသီၣ်နီတမံၤစ့ၢ်ကီးဘၣ်.

³⁰အန့ၣ်ဒီး, စီၤအ့ၤလံယၤစံးဘၣ်ပှၤဂီၢ်မုၢ်, “ဟဲသုးဘူးသုသးဆူယအိၣ်တက့ၢ်.” ဒီးအဝဲသ့ၣ်ဟဲပာ်ဖှိၣ်အသးဝးတရံးအီၤန့ၣ်လီၤ. အဝဲမၤဂ့ၤထီၣ်က့ၤယွၤအတၢ်လုၢ်လီၢ်လၢအဘၣ်တၢ်မၤလီၤပှီၢ်ကွံာ် တ့ၢ်အီၤန့ၣ်လီၤ.

³¹အဝဲဟံးထီၣ်လၢၢ်တဆံခံဖျၢၣ်ဒ်ဒူၣ်တဖၣ်လၢအဘၣ်ဃးဒီးစီၤယၤ ကိာ်အဖိခွါတဖၣ်အတၢ်ဂံၢ်အိၣ်ဝဲအသိးန့ၣ်လီၤ. စီၤယၤကိာ်မ့ၢ်ပှၤတဂၤလၢယွၤဟ့ၣ်တ့ၢ်အီၤမံၤလၢအမ့ၢ်ဝဲ စီၤအံၣ်စရ့လးန့ၣ်လီၤ.

³²အဝဲဘှီထီၣ်ကဒါက့ၤတၢ်လုၢ်လီၢ်လၢတၢ်ဘူၣ်ထီၣ်ဘါထီၣ်ယွၤအဂီၢ် လၢလၢၢ်တဆံခံဖျၢၣ်အံၤန့ၣ်လီၤ. အဝဲခူၣ်တၢ်ကျိၤတကျိၤဝးတရံးတၢ်လုၢ်လီၢ်, လဲၢ်ဝဲတုၤလၢအကတြီၢ်တၢ်ချံခံနာ်န့ၣ်လီၤ.

³³အန့ၣ်ဒီး, အဝဲပာ်လီၤသ့ၣ်မုၣ်လၢတၢ်လုၢ်လီၢ်အဖီခိၣ်, ဒီၣ်တဲာ်ဂီၤဖံးဖါတကူာ်တကူာ်, ဒီးပာ်ထီၣ်ဝဲလၢသ့ၣ်မုၣ်အဖီ ခိၣ်န့ၣ်လီၤ. အဝဲစံးဝဲ, “မၤပှဲၤထံကိလွံၢ်ကိလၢတၢ်လုၢ် မ့ၣ်အူဒီးသ့ၣ်မုၣ်အဖီခိၣ်န့ၣ်တက့ၢ်.” အဝဲသ့ၣ်မၤဒ်န့ၣ်,

³⁴ဒီးအဝဲစံးဝဲ, “မၤကဒီးတဘျီတက့ၢ်.” ဒီးအဝဲသ့ၣ်မၤဝဲ လီၤ. အဝဲစံးဝဲ, “မၤကဒီးအသီတဘျီတက့ၢ်.” ဒီးအဝဲသ့ၣ်မၤဝဲလီၤ.

³⁵ထံယွၤလီၤဝဲဝးတရံးတၢ်လုၢ်လီၢ်ဒီးမၤပှဲၤတၢ်ကျိၤန့ၣ်လီၤ.

³⁶တုၤနၣ်ရံၣ်လၢမုၢ်ဃ့ၢ်လီၤတၢ်လုၢ်တၢ်ပာ်အကတီၢ်တုၤဝဲန့ၣ်, ဝံအ့ၤလံယၤသုးဘူးအသးဆူတၢ်လုၢ်လီၢ်ဒီးဘါထုကဖၣ်ဝဲ, “အိယွၤ, စီၤအၤဘြၤဟၣ်, စီၤအံၤစဲး, စီၤယၤကိာ်အကစၢ်ယွၤဧၢ, ဒုးနဲၣ်နသးခဲကနံၣ်အံၤလၢနမ့ၢ်ကီၢ်အံၣ်စရ့လးအကစၢ်ယွၤဒီး ယမ့ၢ်နခ့နပှၤဒီးယမၤတၢ်မၤခဲလၢာ်ဒ်နတၢ်မၤလိာ်အသိးန့ၣ်လီၤ.

³⁷စံးဆၢယၤ, ယွၤဧၢ, စံးဆၢယၤ, ဒ်သိးပှၤဂီၢ်မုၢ်အံၤကသ့ၣ်ညါ ဝဲလၢနၤ, ယွၤန့ၣ်မ့ၢ်ကစၢ်ယွၤဒီးလၢနဘိးကဒါက့ၤအဝဲသ့ၣ်အသးတဖၣ်ဆူ နအိၣ်န့ၣ်တက့ၢ်.”

³⁸ယွၤဆှၢလီၤမ့ၣ်အူဒီးမ့ၣ်အူန့ၣ်အီၣ်ကွံာ်ဝဲတၢ်လုၢ်တၢ်ပာ်, သ့ၣ်မုၣ်, လၢၢ်တဖၣ်ဒီးဟီၣ်ခိၣ်ကမူၣ်ဒီးအီၣ်ဃ့ထီၣ်ကွံာ်စ့ၢ် ကီးထံလၢတၢ်ကျိၤအပူၤန့ၣ်လီၤ.

³⁹တုၤပှၤဂီၢ်မုၢ်ထံၣ်ဃီၤတၢ်အံၤန့ၣ်, အဝဲသ့ၣ်ထိၣ်လီၤပှီၤအသး လၢဟီၣ်ခိၣ်လိၤဒီးကိးထီၣ်ဝဲ, “ယွၤမ့ၢ်ကစၢ်ယွၤ, ယွၤထဲတဂၤဧိၤမ့ၢ်ကစၢ်ယွၤန့ၣ်လီၤ.”

⁴⁰စီၤအ့ၤလံယၤမၤလိာ်ပှၤဂီၢ်မုၢ်စံးဝဲ, “ဖီၣ်ဃာ်ဘဧၤလးအ ဝံတဖၣ်တက့ၢ်. ပျဲပူၤဖျဲးအဝဲသ့ၣ်နီတဂၤတဂ့ၤ.” ပှၤဂီၢ်မုၢ်ဖီၣ်ဃာ်အဝဲသ့ၣ်ခဲလၢာ်ဒီးစီၤအ့ၤလံယၤဆှၢဃီၤ အဝဲသ့ၣ်ဆူထံကျိဖိကံၡိၣ်ဒီးမၤသံကွံာ်အဝဲသ့ၣ်န့ၣ်လီၤ.

⁴¹အန့ၣ်ဒီး, စီၤအ့ၤလံယၤစံးဘၣ်စီၤပၤအၤဃာ်, “ခဲအံၤလဲၤဒီးအီၣ်တၢ်တက့ၢ်. ယနၢ်ဟူဘၣ်တၢ်ဟဲစူၤအသီၣ် သုးဘူးအသးလီၤ.”

⁴²ဖဲစီၤအၤဃာ်လဲၤတ့ၢ်ဒ်သိးကအီၣ်တၢ်န့ၣ်, စီၤအ့ၤလံယၤလဲၤထီၣ်ဆူကစၢၢ်ကၢ်မ့ၤလးအဒီခိၣ်, ဖဲအဝဲထိၣ်လီၤပှီၤအသးလၢဟီၣ်ခိၣ်လိၤဒီးပာ်အခိၣ်လၢအခီၣ် လ့ၣ်ခိၣ်အကဆူးန့ၣ်လီၤ.

⁴³အဝဲစံးဘၣ်အခ့အပှၤ, “လဲၤဒီးကွၢ်တၢ်ဆူပီၣ်လဲၣ်န့ၣ်တ က့ၢ်.” အခ့အပှၤလဲၤဒီးဟဲက့ၤဒီးစံးဝဲ, “ယတထံၣ်တၢ်နီတမံၤဘၣ်.” စီၤအ့ၤလံယၤတဲဘၣ်အီၤလၢအကလဲၤဒီးကွၢ်တၢ်တုၤအပှဲၤထီၣ်ခဲ လၢာ်နွံစုလီၤ.

⁴⁴နွံစုတစုန့ၣ်အဝဲဟဲက့ၤကဒါက့ၤဒီးစံးဝဲဒၣ်, “ယထံၣ်တၢ်အၢၣ်ဖိတလိၣ်တဒိၣ်ထဲသိးပှၤကညီတဂၤအစု ဟဲထီၣ်လၢပီၣ်လဲၣ်တခီန့ၣ်လီၤ.” စီၤအ့ၤလံယၤမၤလိာ်အခ့အပှၤ, “လဲၤဆူစီၤပၤအၤဃာ်အအိၣ် ဒီးတဲအီၤလၢကက့ၤထီၣ်ဆူအလ့ၣ်ကဟၣ်အပူၤဒီးက့ၤဆူအဟံၣ် တချုးတၢ်စူၤမၤတံာ်တာ်အီၤန့ၣ်လီၤ.”

⁴⁵လၢတစိၢ်ဖိအတီၢ်ပူၤန့ၣ်မူကပိာ်လိၤဘၣ်တၢ်ကးဘၢအီၤလၢတၢ် အၢၣ်ခံးသူတဖၣ်, ကလံၤအူထီၣ်တၢ်ဒီးတၢ်စးထီၣ်ဟဲစူၤလီၤဒိၣ်ဒိၣ်ကလဲာ်လီၤ. စီၤအၤဃာ်ဒိးထီၣ်အလ့ၣ်ကဟၣ်ဒီးစးထီၣ်က့ၤကဒါက့ၤဆူဝ့ၢ်ယံး စရ့လးန့ၣ်လီၤ.

⁴⁶ယွၤအတၢ်စိတၢ်ကမီၤလီၤဘၣ်လၢစီၤအ့ၤလံယၤအလိၤ. အဝဲဒၣ်ကံၢ်တူာ်ထီၣ်အကူအသိးဃံးဃံးလၢအယီၢ်ဒ့အလိၤဒီးဃ့ၢ် ဝဲလၢစီၤအၤဃာ်အမဲာ်ညါဒီတကျဲညါဆူဝ့ၢ်ယံးစရ့လးန့ၣ်လီၤ.