Read S'gaw Karen လံာ်စီၤပၤအခီၣ်ထံးတဘ့ၣ် 2 Bible Online

လံာ်စီၤပၤအခီၣ်ထံးတဘ့ၣ် 2 - S'gaw Karen bible

လံာ်စီၤပၤအခီၣ်ထံးတဘ့ၣ် 2

¹ဘူးထီၣ်လၢစီၤဒၤဝံးကသံန့ၣ်အဝဲကိးအဖိခွါစီၤၡလိၤမိၤ ဒီးဟ့ၣ်လီၤအီၤအတၢ်မၤလိာ်ပိာ်လီၤလၢခံကတၢၢ်တဖၣ်န့ၣ်လီၤ.

²ယတၢ်သံအဆၢကတီၢ်ဟဲတုၤလံ. အိၣ်ဒီးတၢ်နာ်န့ၢ်အီၤနသးဒီးတၢ် ပာ်လီၤသးသပှၢ်ပှၢ်,

³ဒီးမၤတၢ်လၢယွၤ, နကစၢ်ယွၤမၤလိာ်နၤလၢနကဘၣ်မၤန့ၣ်တက့ၢ်. စူၢ်ကယဲၢ်အဝဲအတၢ်ဘူၣ်ထီၣ်ဘါထီၣ်အတၢ်သိၣ်တၢ်သီဒီးအတၢ်မၤလိာ် တဖၣ်လၢအအိၣ်ကွဲးအသးလၢစီၤမိၤၡ့အတၢ်သိၣ်တၢ်သီအလံာ်ပူၤဒ် သိးဖဲနလဲၤတၢ်တပူၤလၢ်လၢ်န့ၣ်, နကဘီၣ်ထီၣ်ညီထီၣ်လၢကယဲၢ်တၢ်လၢနမၤခဲလၢာ်အပူၤန့ၣ်တက့ၢ်.

⁴နမ့ၢ်စူၢ်အီၤဒီး, ယွၤကဟံးဃာ်အတၢ်အၢၣ်လီၤလၢအမၤတ့ၢ်ဝဲ, ဖဲအဝဲစံးဘၣ်တ့ၢ်ယၤလၢ, ယစၢၤယသွဲၣ်တဖၣ်, ကပၢဘၣ်ကီၢ်အံၣ်စရ့လးအဆၢကတီၢ်ကယံာ်ပှဲၤသိးဒီးအဝဲသ့ၣ်အတၢ် စူၢ်ယတၢ်မၤလိာ်လၢတၢ်သးတီလီၤတံၢ်လီၤဆဲးလၢအသူၣ်ဒီဖျၢၣ် သးဒီဖျၢၣ်န့ၣ်လီၤ.

⁵တၢ်အိၣ်ဒံးအဂၤတမံၤန့ၣ်လီၤ. နသ့ၣ်နီၣ်ထီၣ်တၢ်လၢစီၤယိၤအာ် မၤဘၣ်တ့ၢ်ယၤခီဖျိမၤသံသုးခိၣ်ဖးဒိၣ်ခံဂၤလၢအံၣ်စရ့လး အသုးမုၢ်အပူၤလၢအမ့ၢ်ဝဲ, စီၤန့ၢ်အဖိခွါစီၤအဘံန့ၢ်, ဒီးစီၤယ့သ့ၢ်အဖိခွါစီၤဧမါစၤလီၤ. နသ့ၣ်နီၣ်ထီၣ်လၢအဝဲမၤသံတ့ၢ်အဝဲသ့ၣ်လၢတၢ်မုာ်တၢ်ခုၣ်အကတီၢ် ဒ်လဲၣ်, ဒ်တၢ်ဟ့ၣ်ကၣ်အသိးလၢတၢ်သံတဖၣ်လၢအဝဲသ့ၣ်မၤဘၣ်တ့ၢ်ဝဲဖဲတၢ် ဒုးတၢ်ယၤအကတီၢ်အဃိန့ၣ်လီၤ. အဝဲမၤသံကွံာ်ပှၤလၢအတၢ်ကမၣ်တအိၣ်တဖၣ်, ဒီးယဟံးန့ၢ်မူဒါလၢတၢ်လၢအဝဲအမၤတ့ၢ်ဝဲအဂီၢ်အဃိ, ခဲကနံၣ်အံၤယတူၢ်ဘၣ်က့ၤယဲတၢ်မၤအသးတဖၣ်လၢအပိာ်ထွဲထီၣ်အခံ န့ၣ်လီၤ.

⁶နသ့ၣ်ညါတၢ်လၢနကဘၣ်မၤန့ၣ်လီၤ. တကြၢးနပျဲအဝဲသံဒ်န့ဆၢၣ် အလုၢ်အလၢ်တမံၤအသိးန့ၣ်ဘၣ်.

⁷ဘၣ်ဆၣ်ဒီးဒုးနဲၣ်တၢ်သူၣ်ကညီၤသးကညီၤဆူစီၤဘၢ်စံးလဲ အဖိခွါတဖၣ်လၢအအိၣ်လၢဝ့ၢ်ကံးလဧးဒီးအံးထွဲကွၢ်ထွဲအဝဲ သ့ၣ်, မ့ၢ်လၢအဝဲသ့ၣ်မ့ၢ်ပှၤသူၣ်ကညီၤသးကညီၤယၤဖဲယဘၣ်ဃ့ၢ်ပူၤ ဖျဲးကွံာ်ယသးလၢနဒီပုၢ်ဝဲၢ်ခွါစီၤအးဘၡါလိၣ်အအိၣ်အကတီၢ် အဃိန့ၣ်တက့ၢ်.

⁸လၢပှၤဘံၣ်ယၤမံၣ်အဒူၣ်အပူၤန့ၣ်ပှၤအိၣ်ဒံးဝဲတဂၤလၢအမ့ၢ်စီၤ က့ရၤအဖိခွါစီၤၡံမံၤလၢဝ့ၢ်ဘၤဃူရံၣ်န့ၣ်လီၤ. ဘၣ်တနံၤဖဲယလဲၤဆူဝ့ၢ်မၤဃန့ၤန့ၣ်အဝဲဆိၣ်အၢယၤဆါဆါကလဲာ် န့ၣ်လီၤ. ဘၣ်ဆၣ်ဖဲယထံၣ်လိာ်ယသးဒီးအီၤဖဲ ထံကျိယၢ်ဒ့ၣ်န့ၣ်ယဟ့ၣ်လီၤအီၤယတၢ်အၢၣ်လီၤသမှံၤသပှၢ်လၢယွၤ အမံၤအပူၤလၢယတပျဲတၢ်မၤသံကွံာ်အီၤဘၣ်.

⁹ဘၣ်ဆၣ်ပျဲပူၤကွံာ်အီၤလၢတၢ်စံၣ်ညီၣ်တဂ့ၤ. နသ့ၣ်ညါတၢ်လၢနကဘၣ်မၤအီၤလီၤ. ဒီးနကဘၣ်ကူၣ်ကျဲၤဒ်သိးအဝဲကဘၣ်တၢ်မၤသံအီၤအဂီၢ်န့ၣ်လီၤ.

¹⁰စီၤဒၤဝံးသံဝဲ, ဒီးဘၣ်တၢ်ခူၣ်လီၤကွံာ်အီၤလၢစီၤဒၤဝံး အဝ့ၢ်ပူၤန့ၣ်လီၤ.

¹¹အဝဲမ့ၢ်တ့ၢ်ကီၢ်အံၣ်စရ့လးအစီၤပၤအနံၣ်လွံၢ်ဆံ, ဒီးပၢတၢ်လၢဝ့ၢ်ဃ့ဘြိၣ်အပူၤနွံနံၣ်ဒီးလၢဝ့ၢ်ယရူၤၡလ့ၣ် အပူၤသၢဆံသၢနံၣ်န့ၣ်လီၤ.

¹²စီၤၡလိၤမိၤကဲထီၣ်စီၤပၤလၢအပၢ်စီၤဒၤဝံးအလီၢ်, ဒီးအဝဲအတၢ်စိတၢ်ကမီၤဒ်စီၤပၤအသိး, သူၣ်လီၤအသးဂၢၢ်ဂၢၢ်ကျၢၤကျၢၤန့ၣ်လီၤ.

¹³အန့ၣ်တစုနီၢ်ဃးကံၤအဖိခွါစီၤအဒိနံၤယၤလဲၤဆူစီၤၡလိၤ မိၤအမိၢ်နီၢ်ဘၤသၡ့ဘၤအအိၣ်န့ၣ်လီၤ. နီၢ်ဘၤသၡ့ဘၤသံကွၢ်အီၤ, “အအံၤမ့ၢ်တၢ်ဒီတံၤဒီသကိးအတၢ်ဟဲန့ၣ်ဧါ.” ဒီးစီၤအဒိနံၤယၤစံးဆၢဝဲ, “မ့ၢ်လီၤ.”

¹⁴အန့ၣ်ဒီး, စီၤအဒိနံၤယၤစံးအါထီၣ်ဝဲ, “ယအဲၣ်ဒိးကတိၤတၢ်ဒီးနၤတမံၤလီၤ.” နီၢ်ဘၤသၡ့ဘၤသံကွၢ်အီၤ, “မ့ၢ်တၢ်မနုၤန့ၣ်လဲၣ်.”

¹⁵အဝဲစံးဆၢဝဲ, “နသ့ၣ်ညါလၢယကဘၣ်ကဲထီၣ်စီၤပၤဒီးပှၤကိး ဂၤဒဲးလၢကီၢ်အံၣ်စရ့လးအပူၤမုၢ်လၢ်တၢ်အံၤန့ၣ်လီၤ. ဘၣ်ဆၣ်, တၢ်တမံၤဒၣ်မၤအသး, တၢ်မၤအသးလီၤဆီကွံာ်ဒီးယဒီပုၢ် ဝဲၢ်ခွါကဲထီၣ်စီၤပၤ, မ့ၢ်လၢတၢ်န့ၣ်မ့ၢ်ယွၤအတၢ်ဘၣ်အသးအဃိန့ၣ်လီၤ.

¹⁶ဒီးခဲကနံၣ်အံၤယအဲၣ်ဒိးဃ့သကွံာ်ကညးတၢ်တမံၤန့ၣ်လီၤ. ဝံသးစူၤဂ့ၢ်လိာ်ယၤတဂ့ၤ.” ဒီးနီၢ်ဘၤသၡ့ဘၤသံကွၢ်ဝဲ, “မ့ၢ်တၢ်မနုၤန့ၣ်လဲၣ်.”

¹⁷အဝဲစံးဆၢဝဲ, “ယသ့ၣ်ညါလၢစီၤပၤၡလိၤမိၤတမ့ၢ်ကဂ့ၢ်လိာ် နၤဘၣ်. ဝံသးစူၤဃ့န့ၢ်ယၤစီၤပၤၡလိၤမိၤလၢကပျဲယမၤန့ၢ်နီၢ်အဘံ ၡး, ပိာ်မုၣ်သးစၢ်တဂၤလၢဝ့ၢ်ၡူန့ၣ်, ဒ်ယမါအသိးတက့ၢ်.”

¹⁸နီၢ်ဘၤသၡ့ဘၤစံးဆၢဝဲ, “ဂ့ၤလံ. ယကကတိၤတၢ်ဒီးစီၤပၤလၢ နဂီၢ်န့ၣ်လီၤ.”

¹⁹လၢတၢ်န့ၣ်အဃိ, နီၢ်ဘၤသၡ့ဘၤလဲၤဃီၤဆူစီၤပၤအအိၣ်ဒ်သိး ကကတိၤတၢ်ဒီးအီၤလၢစီၤအဒိနံၤယၤအဂီၢ်န့ၣ်လီၤ. စီၤပၤဂဲၤထၢၣ်လၢကသဂၢၢ်အမိၢ်ဒီးသကူးလီၤအသးဒီးဟ့ၣ်အီၤတၢ် ယူးယီၣ်န့ၣ်လီၤ. ဝံၤဒီးအဝဲဆ့ၣ်နီၤလၢအလီၢ်ပစိာ်အဖီခိၣ်ဒီးမၢပှၤဟဲစိာ် နုာ်လီၢ်ပစိာ်အဂၤတခါ, ဒီးအမိၢ်ဆ့ၣ်နီၤဝဲလၢလီၢ်ပစိာ်န့ၣ်အဖီခိၣ်လၢအဝဲအစုထွဲ တခီန့ၣ်လီၤ.

²⁰နီၢ်ဘၤသၡ့ဘၤစံးဘၣ်အီၤ, “ယအဲၣ်ဒိးဃ့နၤ, တၢ်သကွံာ်ကညးအဆံးဖိတမံၤလၢနကဟ့ၣ်ယၤလီၤ. တဘၣ်ဂ့ၢ်လိာ်ယၤတဂ့ၤ.” အဝဲဒၣ်စံးဝဲ, “ယမိၢ်ဧၢ, ဃ့တက့ၢ်. ယတဂ့ၢ်လိာ်နၤဘၣ်.”

²¹နီၢ်ဘၤသၡ့ဘၤစံးဆၢအီၤ “ဟ့ၣ်လီၤနဒီပုၢ်ဝဲၢ်ခွါစီၤအဒိ နံၤယၤလၢနီၢ်အဘံၡးဒ်သိးကကဲထီၣ်အမါန့ၣ်တက့ၢ်.”

²²စီၤပၤစံးဘၣ်အီၤ, “ဘၣ်မနုၤနဃ့ယၤလၢယကဟ့ၣ်နီၢ်အဘံၡးဆူ အီၤန့ၣ်လဲၣ်. နဂ့ၤဃ့ဃုာ်စ့ၢ်ကီးလၢယကဟ့ၣ်အီၤစီၤပၤအလီၢ်ပစိာ်န့ၣ်လီၤ. အဂ့ၢ်ဒ်အံၤအဝဲမ့ၢ်ယဝဲၢ်, ဒီးပှၤလုၢ်တၢ်အခိၣ်စီၤအ့ဘယၤသၢ် ဒီးစီၤယိၤအာ်အိၣ်လၢအအိၣ်တကပၤန့ၣ်လီၤ.”

²³အန့ၣ်ဒီး, စီၤၡလိၤမိၤမၤတၢ်အၢၣ်လီၤသမှံၤသပှၢ်တမံၤလၢယွၤ အမံၤအပူၤစံးဝဲ, “ယမ့ၢ်တမၢဘၣ်စီၤအဒိနံၤယၤလၢအက ဟ့ၣ်အသးသမူဒ်တၢ်အပှ့ၤလၢအဃ့ဝဲတမံၤအဃိဘၣ်ဒီး, မ်ကစၢ်ယွၤမၤသံယၤတက့ၢ်.

²⁴ယွၤပာ်လီၤယၤဂၢၢ်ဂၢၢ်ကျၢၤကျၢၤလၢယပၢ်စီၤဒၤဝံးအလီၢ်ပစိာ် အဖီခိၣ်န့ၣ်လီၤ. အဝဲဟံးဃာ်အတၢ်အၢၣ်လီၤ, ဒီးဟ့ၣ်လီၤယၤဒီးယစၢၤယသွဲၣ်တဖၣ်လၢ ဘီမုၢ်န့ၣ်လီၤ. ယဆိၣ်တၢ်လၢယွၤလၢအမူဝဲတဂၤအမံၤအပူၤလၢစီၤအဒိနံၤယၤကသံ ဝဲတနံၤအံၤဒၣ်လဲာ်န့ၣ်လီၤ.”

²⁵လၢတၢ်န့ၣ်အဃိစီၤပၤၡလိၤမိၤဟ့ၣ်လီၤအကလုၢ်လၢစီၤဘနါယၤ ကလဲၤမၤသံကွံာ်စီၤအဒိနံၤယၤဒီးစီၤအဒိနံၤယၤသံကွံာ်ဝဲ ဒၣ်န့ၣ်လီၤ.

²⁶တုၤနုၤတစု, စီၤပၤၡလိၤမိၤစံးဘၣ်ပှၤလုၢ်တၢ်အခိၣ်စီၤအ့ဘယၤသၢ်, “က့ၤဆူနတၢ်အိၣ်တၢ်ဆိးဒၣ်နဲအလီၢ်လၢဧၤနသိးအပူၤန့ၣ်တ က့ၢ်. နကၢကီၣ်လၢနကဘၣ်သံဘၣ်ဆၣ်, ယတမၤသံနၤခဲအံၤဒံးဘၣ်. အဂ့ၢ်ဒ်အံၤ, နမ့ၢ်တ့ၢ်ပှၤအခိၣ်လၢအကွၢ်ထွဲယွၤအတၢ်အၢၣ်လီၤအီ လီၤအတလါစီဆှံ, ဖဲနအိၣ်တ့ၢ်ဒီးယပၢ်စီၤဒၤဝံးအခါ, ဒီးနတူၢ်သကိးဃုာ်တၢ် ဒီးအီၤလၢကယဲၢ်အတၢ်ကိၢ်တၢ်ဂီၤခဲလၢာ်အပူၤအဃိန့ၣ်လီၤ.”

²⁷အန့ၣ်ဒီးစီၤၡလိၤမိၤဒုးဟးထီၣ်ကွံာ်စီၤအ့ဘယၤသၢ်လၢတၢ်မၤ တၢ်ဒ်ယွၤအပှၤလုၢ်တၢ်အခိၣ်တဂၤအသိး, သတးဒီးအဝဲ မၤလၢထီၣ်ပှဲၤထီၣ်တၢ်လၢယွၤစံးတ့ၢ်ဝဲဖဲဝ့ၢ်ၡံလိၤဘၣ်ထွဲ ဒီးပှၤလုၢ်တၢ်အခိၣ်စီၤဧ့လံၤဒီးအစၢၤအသွဲၣ်တဖၣ်အဂ့ၢ်န့ၣ်လီၤ.

²⁸စီၤယိၤအာ်နၢ်ဟူဘၣ်တၢ်လၢမၤတ့ၢ်အသးန့ၣ်လီၤ. (အဝဲဆီၣ်ထွဲမၤစၢၤတ့ၢ်စီၤအဒိနံၤယၤ, ဘၣ်ဆၣ်, တဆီၣ်ထွဲမၤစၢၤတ့ၢ်စီၤအးဘၡါလိၣ်ဘၣ်) လၢတၢ်န့ၣ်အဃိအဝဲဃ့ၢ်ပူၤဖျဲးအသးဆူယွၤအိၣ်ဝဲဆိးဝဲ အဒဲစီၤဆှံအပူၤဒီးဟံးဃာ်ကျၢၤတၢ်လုၢ်လီၢ်အသနၢၣ်တဖၣ်န့ၣ် လီၤ.

²⁹ဖဲတၢ်ကစီၣ်တုၤဃီၤဆူစီၤပၤၡလိၤမိၤအအိၣ်လၢစီၤယိၤအာ်ဃ့ၢ် ပူၤဖျဲးအသးဆူယွၤအဒဲစီဆှံအပူၤဒီးအိၣ်ဝဲလၢတၢ်လုၢ်လီၢ် အကပၤန့ၣ်, စီၤၡလိၤမိၤမၢလီၤပှၤစိာ်တၢ်ကစီၣ်တဂၤဆူ စီၤယိၤအာ်အအိၣ်ဒ်သိးကသံကွၢ်အီၤလၢဘၣ်မနုၤအဝဲဃ့ၢ်ပူၤ ဖျဲးကွံာ်အသးဆူတၢ်လုၢ်လီၢ်အပူၤလဲၣ်န့ၣ်လီၤ. စီၤယိၤအာ်စံးဆၢဝဲလၢအဝဲဃ့ၢ်ပူၤဖျဲးကွံာ်အသးဆူယွၤအ အိၣ်, မ့ၢ်လၢအဝဲပျံၤဘၣ်စီၤၡလိၤမိၤအဃိန့ၣ်လီၤ. အန့ၣ်ဒီးစီၤၡလိၤမိၤမၢစီၤဘနါယၤလၢကမၤသံကွံာ်အီၤန့ၣ် လီၤ.

³⁰စီၤဘနါယၤလဲၤဃီၤဆူဒဲစီဆှံဒီးစံးဘၣ်စီၤယိၤအာ်, “စီၤပၤဟ့ၣ်လီၤအကလုၢ်လၢနကဟဲက့ၤထီၣ်လီၤ.” စီၤယိၤအာ်စံးဆၢဝဲ, “ယတဟဲက့ၤထီၣ်ဘၣ်. ယကသံဖဲအံၤလီၤ.” စီၤဘနါယၤက့ၤကဒါက့ၤဆူ စီၤပၤအအိၣ်, ဒီးတဲဘၣ်အီၤလၢတၢ်လၢစီၤယိၤအာ်စံးတ့ၢ်ဝဲ န့ၣ်လီၤ.

³¹စီၤၡလိၤမိၤစံးဆၢအီၤ, “မၤတၢ်လၢစီၤယိၤအာ်စံးဝဲန့ၣ်တ က့ၢ်. မၤသံအီၤဒီးခူၣ်လီၤကွံာ်အီၤန့ၣ်တက့ၢ်. အန့ၣ်သတးဒီးယၤမ့ၢ်ဂ့ၤ, စီၤဒၤဝံးအစၢၤအသွဲၣ်အဂၤတဖၣ်မ့ၢ် ဂ့ၤ, တအိၣ်ဘၣ်လၢၤဒီးမူဒါနီတစုလၢတၢ်လၢစီၤယိၤအာ်မၤတ့ၢ်ဝဲ ဖဲအဝဲမၤသံတ့ၢ်ပှၤလၢအတၢ်ကမၣ်တဖၣ်အဂီၢ်လၢၤဘၣ်န့ၣ်လီၤ.

³²ယွၤကစံၣ်ညီၣ်စီၤယိၤအာ်လၢတၢ်မၤသံတဖၣ်လၢအဝဲမၤတ့ၢ်ဝဲ, တအိၣ်ဘၣ်ဒီးယပၢ်စီၤဒၤဝံးအတၢ်သ့ၣ်ညါထွဲဘၣ်အဃိန့ၣ်လီၤ. စီၤယိၤအာ်မၤသံကွံာ်ပှၤခံဂၤလၢအတၢ်ကမၣ်တအိၣ်ဘၣ်ဒီးမ့ၢ် တ့ၢ်ပှၤလၢအဂ့ၤန့ၢ်အီၤ, အံၣ်စရ့းလးအသုးမုၢ်သုးခိၣ်ကျၢၢ်စီၤအဘံန့ၢ်ဒီးယူဒၤအသုး မုၢ်အသုးခိၣ်ကျၢၢ်စီၤဧမါစၤတဖၣ်န့ၣ်လီၤ.

³³တၢ်စံၣ်ညီၣ်လၢအဝဲသ့ၣ်ဘၣ်တၢ်မၤသံအီၤအဂီၢ်န့ၣ်, ကလီၤဘၣ်ဝဲလၢစီၤယိၤအာ်အလိၤဒီးအစၢၤအသွဲၣ်တဖၣ်အလိၤလီၤ စိၤလီၤထီန့ၣ်လီၤ. မ့မ့ၢ်, ယွၤကဟ့ၣ်တၢ်မၤနၢၤထီဘိဆူစီၤဒၤဝံးအစၢၤအသွဲၣ် တဖၣ်လၢအဆ့ၣ်နီၤလၢအဝဲအလီၢ်ပစိာ်အလိၤန့ၣ်လီၤ.”

³⁴လၢတၢ်န့ၣ်အဃိစီၤဘနါယၤလဲၤဃီၤဆူယွၤအဒဲစီဆှံဒီးမၤသံ ကွံာ်စီၤယိၤအာ်ဒီးအဝဲဘၣ်တၢ်ခူၣ်လီၤကွံာ်အီၤဖဲတၢ်လီၢ်ပျီ ပူၤ, လၢအဟီၣ်ခိၣ်ကဝီၤဒၣ်ဝဲန့ၣ်လီၤ.

³⁵စီၤပၤဒုးကဲထီၣ်စီၤဘနါယၤလၢပှၤသုးမုၢ်အသုးခိၣ်ကျၢၢ်လၢ စီၤယိၤအာ်အလီၢ်, ဒီးပာ်စီၤစၤဒိးလၢပှၤလုၢ်တၢ်အခိၣ်, လၢစီၤအ့ဘယၤသၢ်အလီၢ်န့ၣ်လီၤ.

³⁶အန့ၣ်ဝံၤဒီး, စီၤပၤမၤလိာ်စီၤၡံမံၤဒီးစံးဘၣ်အီၤ, “သူၣ်ထီၣ်ဟံၣ်တဖျၢၣ်လၢနဂီၢ်ဒၣ်နဲလၢဝ့ၢ်ယရူၤၡလ့ၣ်အပူၤန့ၣ် တက့ၢ်. အိၣ်ဆိးလၢဟံၣ်န့ၣ်အပူၤဒီးဟးထီၣ်လၢဝ့ၢ်န့ၣ်တဂ့ၤ.

³⁷နမ့ၢ်ဟးထီၣ်ဒီးလဲၤဖျိကွံာ်ယံၤန့ၢ်ဒံးထံကျိဖိကံဒြိၣ် တစုစုဒီးနကသံသပှၢ်ကတၢၢ်လီၤ. တၢ်န့ၣ်ကမ့ၢ်နတၢ်ကမၣ်ဒၣ်နဲလီၤ.”

³⁸စီၤၡံမံၤစံးဆၢဝဲ, “ဂ့ၤလံ. တၢ်ဒိၣ်ကစၢ်စီၤပၤဧၢ, ယကမၤတၢ်လၢနစံးဘၣ်ယၤန့ၣ်လီၤ.” လၢတၢ်န့ၣ်အဃိအဝဲအိၣ်ဝဲဆိးဝဲလၢဝ့ၢ်ယရူၤၡလ့ၣ်အပူၤအါနံၤ အါသီန့ၣ်လီၤ.

³⁹ဘၣ်ဆၣ်ဒီးသၢနံၣ်ဝံၤအလီၢ်ခံန့ၣ်, စီၤၡံမံၤအကုၢ်တဖၣ်အကျါ ခံဂၤဃ့ၢ်ကွံာ်ဝဲဆူဝ့ၢ်ကၤသးအစီၤပၤ, စီၤမၤကၤအဖိခွါစီၤအၤကံၣ်အအိၣ်န့ၣ်လီၤ. တုၤစီၤၡံမံၤနၢ်ဟူဘၣ်ဝဲလၢအဝဲသ့ၣ်အိၣ်လၢဝ့ၢ်ကၤသးန့ၣ်,

⁴⁰အဝဲဂီၤကၢ်ထီၣ်အကသ့ၣ်ယီၤဒီးလဲၤဝဲဆူစီၤပၤအၤကံၣ်အအိၣ်လၢ ဝ့ၢ်ကၤသးလၢကဃုထံၣ်အကုၢ်တဖၣ်အဂီၢ်န့ၣ်လီၤ. ဒီးထံၣ်န့ၢ်က့ၤဝဲဒီးဟဲက့ၤကိးကဒါက့ၤဝဲဆူအဟံၣ်န့ၣ်လီၤ.

⁴¹တုၤစီၤၡလိၤမိၤနၢ်ဟူတ့ၢ်တၢ်လၢစီၤၡံမံၤမၤတ့ၢ်ဝဲန့ၣ်,

⁴²အဝဲမၤလိာ်အီၤဒီးစံးဘၣ်အီၤ, “ယမၢနအၢၣ်လီၤယၤလၢယွၤ အမံၤအပူၤလၢနသုတဟးထီၣ်လၢဝ့ၢ်ယရူၤၡလ့ၣ်အပူၤတဂ့ၤန့ၣ်လီၤ. ဒီးယဟ့ၣ်ပလီၢ်တ့ၢ်နၤလၢနမ့ၢ်ဟးထီၣ်ဒီးနကသံသပှၢ်ကတၢၢ်န့ၣ် လီၤ. မ့ၢ်နတအၢၣ်လီၤတၢ်န့ၣ်ဒီးစံးတ့ၢ်လၢနကစူၢ်ယၤဘၣ်န့ၣ်ဧါ.

⁴³မ့မ့ၢ်ဒ်န့ၣ်ဒီးဘၣ်မနုၤလၢနမၤဟးဂီၤကွံာ်နတၢ်အၢၣ်လီၤဒီး တစူၢ်ဘၣ်ယတၢ်မၤလိာ်ဘၣ်န့ၣ်လဲၣ်.

⁴⁴ကယဲၢ်တၢ်လၢနမၤကမၣ်ဘၣ်တ့ၢ်ယပၢ်စီၤဒၤဝံးန့ၣ်နသ့ၣ်ညါဂ့ၤဂ့ၤ လီၤ. ယွၤကစံၣ်ညီၣ်နၤလၢတၢ်န့ၣ်အဂီၢ်လီၤ.

⁴⁵ဘၣ်ဆၣ်, အဝဲကဆိၣ်ဂ့ၤယၤ, ဒီးမၤဂၢၢ်မၤကျၢၤစီၤဒၤဝံးအဘီ အမုၢ်လီၤစိၤလီၤထီန့ၣ်လီၤ.”

⁴⁶အန့ၣ်ဝံၤဒီး, စီၤပၤဟ့ၣ်လီၤအကလုၢ်ဆူစီၤဘနါယၤ, ဒီးအဝဲဟးထီၣ်လဲၤမၤသံကွံာ်စီၤၡံမံၤန့ၣ်လီၤ. ဒီးဘီမုၢ်အိၣ်ဂၢၢ်ဆိးကျၢၤဝဲခဲကနံၣ်အံၤ, လၢစီၤၡလိၤမိၤအစုပူၤန့ၣ်လီၤ.