Read S'gaw Karen လံာ်စီၤပၤအခီၣ်ထံးတဘ့ၣ် 21 Bible Online

လံာ်စီၤပၤအခီၣ်ထံးတဘ့ၣ် 21 - S'gaw Karen bible

လံာ်စီၤပၤအခီၣ်ထံးတဘ့ၣ် 21

¹လၢစီၤပၤအၤဃာ်အနီလၢဝ့ၢ်ယံးစရ့လးအကပၤန့ၣ်စီၤနၤဘိး အစပံးလီၢ်အိၣ်ဝဲဒၣ်န့ၣ်လီၤ.

²ဘၣ်မုၢ်တနံၤစီၤအၤဃာ်စံးဘၣ်စီၤနၤဘိး, “ပျဲယဟံးန့ၢ် နစပံးလီၢ်န့ၣ်တက့ၢ်. အဂ့ၢ်ဒ်အံၤ, အိၣ်ဘူးဒီးယနီ, ဒီးယအဲၣ်ဒိးသူတၢ်လီၢ်န့ၣ်လၢတၢ်ဒိးတၢ်လၣ်အကရၢၢ်တခါန့ၣ် လီၤ. လၢတၢ်န့ၣ်အဂီၢ်, ယကဟ့ၣ်နၤစပံးလီၢ်အဂ့ၤဒိၣ်တက့ၢ်မ့တမ့ၢ်, နမ့ၢ်ဘၣ်နသးဒီးယကဟ့ၣ်နၤတၢ်အပှ့ၤတမံၤလၢအကြၢးဝဲ ဘၣ်ဝဲန့ၣ်လီၤ.”

³စီၤနၤဘိးစံးဆၢဝဲ, “ယန့ၢ်သါဘၣ်စပံးလီၢ်အံၤလၢယမိၢ်ပၢ် ဖံဖုလၢပျၢၤတဖၣ်အအိၣ်န့ၣ်လီၤ. မ်ယွၤတြီယၤလၢယကပျဲနမၤန့ၢ်အီၤန့ၣ်တက့ၢ်.”

⁴စီၤအၤဃာ်က့ၤကဒါက့ၤဆူဟံၣ်လၢတၢ်သူၣ်လီၤဘှံးသးလီၤတီၤ, ဒီးတၢ်သူၣ်ဒိၣ်သးဖျိးအပူၤလၢတၢ်လၢစီၤနၤဘိးစံးဘၣ်တ့ၢ် အီၤအဃိန့ၣ်လီၤ. အဝဲမံလီၤလၢအလီၢ်မံခိၣ်, ဃၣ်အမဲာ်ဆူတၢ်အဒူၣ်ဒီးတအီၣ်ဘၣ်တၢ်ဘၣ်န့ၣ်လီၤ.

⁵အမါနီၢ်အံၤစ့ဘ့ၤလးလဲၤဆူအအိၣ်ဒီးသံကွၢ်ဝဲ, “ဘၣ်မနုၤလၢနသူၣ်လီၤဘှံးသးလီၤတီၤနးမးန့ၣ်လဲၣ်. ဘၣ်မနုၤအဃိနတအီၣ်တၢ်ဘၣ်န့ၣ်လဲၣ်.”

⁶အဝဲစံးဆၢဝဲ, “မ့ၢ်လၢတၢ်လၢစီၤနၤဘိးစံးဘၣ်တ့ၢ်ယၤအဃိန့ၣ်လီၤ. ယပာ်ဖျါထီၣ်ယတၢ်သးအိၣ်လၢယကပှ့ၤအစပံးအလီၢ်မ့တမ့ၢ်အဝဲမ့ၢ် ဘၣ်အသးဒီးယကဟ့ၣ်အီၤလၢစပံးလီၢ်အဂၤတတီၤလၢအလီၢ်န့ၣ်လီၤ. ဘၣ်ဆၣ်အဝဲတဲဘၣ်ယၤလၢယမၤန့ၢ်အီၤတသ့ဘၣ်န့ၣ်လီၤ.”

⁷နီၢ်အံၤစ့ဘ့ၤလးစံးဆၢဝဲ, “နမ့ၢ်စီၤပၤဧါမ့တမ့ၢ်နတမ့ၢ် စီၤပၤဘၣ်န့ၣ်ဧါ. ဂဲၤဆၢထၢၣ်လၢနလီၢ်မံခိၣ်, အိၣ်ဒီးတၢ်သးဖှံဒီးအီၣ်တၢ်တက့ၢ်. ယကမၤန့ၢ်နၤလၢစီၤနၤဘိးအစပံးလီၢ်န့ၣ်လီၤ.”

⁸အန့ၣ်ဒီးအဝဲကွဲးလံာ်ပရၢတနီၤ, ဆဲးလီၤဝဲလၢစီၤအၤဃာ်အမံၤ, စဲပနီၣ်ဃာ်ဝဲလၢအတၢ်စဲပနီၣ်, ဒီးဆှၢလီၤဝဲဆူပဒိၣ်ပပှၢ် တဖၣ်ဒီးထံဖိကီၢ်ဖိလၢအဒိၣ်အထီလၢဝ့ၢ်ယံးစရ့လးအပူၤတဖၣ် အအိၣ်န့ၣ်လီၤ.

⁹တၢ်ပရၢတဖၣ်စံးဝဲ, “ဘိးဘၣ်သ့ၣ်ညါထီၣ်တၢ်ဒုၣ်တၢ်အီၣ်အနံၤတ နံၤ, ကိးဖှိၣ်ကယဲၢ်ပှၤဂီၢ်မုၢ်တပူၤဃီ, ဒီးဒုးဆ့ၣ်နီၤစီၤနၤဘိးလၢတၢ်လၤကပီၤအလီၢ်န့ၣ်တက့ၢ်.

¹⁰မၤန့ၢ်ပှၤအၢပှၤသီခံဂၤလၢအကအုၣ်အသးထီဒါမဲာ်ပူၤအီၤဒ် အမ့ၢ်ပှၤဆိၣ်အၢကစၢ်ယွၤဒီးစီၤပၤတက့ၢ်. ဝံၤဒီးထုးထီၣ်ကွံာ်အီၤလၢဝ့ၢ်ပူၤဒီးကွံာ်သံအီၤလၢလၢၢ်တ က့ၢ်.”

¹¹ပဒိၣ်ပပှၢ်တဖၣ်ဒီးဝ့ၢ်ယံးစရ့လးအထံဖိကီၢ်ဖိလၢအဒိၣ်အထီ တဖၣ်မၤဝဲဒ်နီၢ်အံၤစ့ဘ့ၤလးမၤလိာ်ဝဲအသိးန့ၣ်လီၤ.

¹²အဝဲသ့ၣ်ဘိးဘၣ်သ့ၣ်ညါထီၣ်တၢ်ဒုၣ်တၢ်အီၣ်အနံၤတနံၤ, ကိးဖှိၣ်ပှၤဂီၢ်မုၢ်တပူၤဃီ, ဒီးဟ့ၣ်စီၤနၤဘိးလၢတၢ်လၤ ကပီၤအလီၢ်န့ၣ်လီၤ.

¹³လၢကမျၢၢ်အမဲာ်ညါန့ၣ်ပှၤအၢပှၤသီခံဂၤအုၣ်အသးထီဒါစီၤနၤ ဘိးလၢအဆိၣ်အၢကစၢ်ယွၤဒီးစီၤပၤန့ၣ်လီၤ. ဒီးလၢတၢ်န့ၣ်အဃိအဝဲဘၣ်တၢ်ထုးထီၣ်ကွံာ်အီၤဆူ ဝ့ၢ်အချၢဒီးကွံာ်သံကွံာ်အီၤလၢလၢၢ်န့ၣ်လီၤ.

¹⁴တၢ်ကစီၣ်ဘၣ်တၢ်ဆှၢအီၤဆူနီၢ်အံၤစ့ဘ့ၤလးအအိၣ်စံးဝဲ, “စီၤနၤဘိးဘၣ်တၢ်မၤသံကွံာ်အီၤလံ,” န့ၣ်လီၤ.

¹⁵တစုဃီဖဲနီၢ်အံၤစ့ဘ့ၤလးဒိးန့ၢ်ဘၣ်တၢ်ကစီၣ်န့ၣ်, အဝဲစံးဘၣ်စီၤအၤဃာ်, “စီၤနၤဘိးသံလံ. ခဲကနံၣ်အံၤ, လဲၤဒီးဟံးန့ၢ်စပံးလီၢ်လၢအဝဲဂ့ၢ်လိာ်ဝဲလၢကဆါန့ၢ်နၤန့ၣ် တက့ၢ်.”

¹⁶တဘျီဃီစီၤအၤဃာ်လဲၤဝဲဆူစပံးအလီၢ်, လၢကဟံးန့ၢ်ကွံာ်အီၤ အဂီၢ်န့ၣ်လီၤ.

¹⁷တုၤနုၤတစု, ယွၤစံးဘၣ်စီၤအ့ၤလံယၤ, ဝံလၢဝ့ၢ်တံးၡဘး,

¹⁸“လဲၤဆူကီၢ်ၡၤမရံအစီၤပၤအၤဃာ်အအိၣ်တက့ၢ်. နကထံၣ်ဘၣ်အီၤလၢစီၤနၤဘိးအစပံးလီၢ်အပူၤ, ဖဲအဝဲလဲၤလၢကဟံးန့ၢ်ကွံာ်ဝဲအဂီၢ်န့ၣ်လီၤ.

¹⁹တဲဘၣ်အီၤလၢယၤ, ယွၤစံးဘၣ်အီၤ, ဖဲနမၤသံကွံာ်ပှၤတဂၤဝံၤ အလီၢ်ခံန့ၣ်, မ့ၢ်နကဟံးန့ၢ်ကွံာ်အတၢ်စုလီၢ်ခီၣ်ခိၣ်စ့ၢ်ကီးဧါ. တဲဘၣ်အီၤလၢအအံၤမ့ၢ်တၢ်လၢယစံးန့ၣ်တက့ၢ်. ဖဲတၢ်လီၢ်တတီၤဃီလၢထွံၣ်တဖၣ်လ့ၣ်ကွံာ်စီၤနၤဘိးအသွံၣ်န့ၣ် အဝဲသ့ၣ်ကလ့ၣ်ထီၣ်ကွံာ်နသွံၣ်စ့ၢ်ကီးန့ၣ်လီၤ.”

²⁰တုၤစီၤအၤဃာ်ထံၣ်ဘၣ်စီၤအ့ၤလံယၤန့ၣ်, အဝဲစံးဝဲ, “ယဒုၣ်ယဒါဧၢ, မ့ၢ်နချုးန့ၢ်ယၤလံဧါ.” စီၤအ့ၤလံယၤစံးဆၢဝဲ, “မ့ၢ်ယချုးန့ၢ်နၤလံ. နဟ့ၣ်လီၤတ့ၢ်လံနသးလၢာ်လၢာ်ဆ့ဆ့လၢနကမၤတၢ်လၢအကမၣ်လၢယွၤ အမဲာ်ညါန့ၣ်လီၤ.

²¹လၢတၢ်န့ၣ်အဃိယွၤစံးဘၣ်နၤ, ယကဟဲစိာ်တၢ်တတၢးတနါလၢနဖီခိၣ်န့ၣ်လီၤ. ယကတၢၤကွံာ်နၤဒီးမၤလၢာ်ကွံာ်ကယဲၢ်နပှၤဟံၣ်ဖိဃီဖိပိာ်ခွါ လၢနဟံၣ်ဒူၣ်ဃီထၢအပူၤ, သးစၢ်မ့ၢ်ဂ့ၤ, သးပှၢ်မ့ၢ်ဂ့ၤဒ်သိးသိးန့ၣ်လီၤ.

²²နပှၤဟံၣ်ဖိဃီဖိကကဲထီၣ်ဒ်စီၤနဘးအဖိခွါစီၤပၤစီၤယၤရၤ ဘၣ်အဟံၣ်ဖိဃီဖိအသိးဒီးဒ်စီၤအဃံယၤအဖိခွါစီၤပၤစီၤဘါ ၡၤအဟံၣ်ဖိဃီဖိအသိး, မ့ၢ်လၢနထိၣ်ဂဲၤထီၣ်ယတၢ်သးဒိၣ်ထီၣ်ခီဖျိနဆှၢဃီၤပှၤအံၣ် စရ့လးဖိဆူတၢ်ဒဲးဘးအပူၤအဃိလီၤ.

²³ဒီးဖဲအဘၣ်ထွဲဒီးနီၢ်အံၤစ့ဘ့ၤလးန့ၣ်, ယွၤစံးဝဲဒၣ်လၢထွံၣ်တဖၣ်ကအီၣ်ကွံာ်အစိၣ်လၢဝ့ၢ်ယံးစရ့လး အပူၤန့ၣ်လီၤ.

²⁴ကယဲၢ်နဘူးနတံၢ်တဂၤလၢ်လၢ်လၢအသံလၢဝ့ၢ်ပူၤန့ၣ်ထွံၣ်တဖၣ်ကအီၣ် ကွံာ်အီၤဒီးပှၤတဂၤလၢ်လၢ်လၢအသံလၢတၢ်ပျီပူၤန့ၣ်လီတးတဖၣ် ကအီၣ်ကွံာ်အီၤန့ၣ်လီၤ.”

²⁵(ပှၤဒ်စီၤအၤဃာ်အသိးန့ၣ်တအိၣ်ဘၣ်နီတဂၤဂၤဘၣ်. အဝဲဟ့ၣ်လီၤအးလီၤအသးလၢာ်လၢာ်ဆ့ဆ့လၢကမၤတၢ်ကမၣ်လၢယွၤ အမဲာ်ညါ, ကယဲၢ်တၢ်လၢအမါနီၢ်အံၤစ့ဘ့ၤလးမၢဆူၣ်အီၤလၢကမၤဝဲန့ၣ်လီၤ.

²⁶အဝဲမၤတ့ၢ်တၢ်ဒဲးဘးတဖၣ်လၢအလီၤမဲာ်ဆှးအဒိၣ်ကတၢၢ်ခီဖျိတၢ် ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်ဒ်ပှၤအမိၢ်ဖိတဖၣ်လၢယွၤ ဟီထီၣ်ကွံာ်တ့ၢ်အီၤလၢကီၢ်ပူၤဖဲကီၢ်အံၣ်စရ့လးအပှၤဂီၢ်မုၢ်တဖၣ် ဟဲထီၣ်ဒုးတၢ်အခါမၤတ့ၢ်ဝဲအသိးန့ၣ်လီၤ.)

²⁷တုၤစီၤအ့ၤလံယၤကတိၤတၢ်ဝံၤန့ၣ်, စီၤအၤဃာ်ဖှီယာ်ကွံာ်အကူ အသိးတဖၣ်, ဘ့ၣ်လီၤကွံာ်အီၤဒီးကူထီၣ်ကၤထီၣ်ဆ့ကၤထၢၣ်တၢ်ကံးယာ်န့ၣ် လီၤ. အဝဲဂ့ၢ်လိာ်လၢကအီၣ်တၢ်, မံလီၤလၢထၢၣ်တၢ်ကံးယာ်အပူၤဒီးအိၣ် ဝဲဒၣ်လၢတၢ်သူၣ်အုးသးအုးဒီးတၢ်သူၣ်လီၤဘှံးသးလီၤတီၤ အပူၤန့ၣ်လီၤ.

²⁸ယွၤစံးဘၣ်ဝံအ့ၤလံယၤ,

²⁹“မ့ၢ်နပာ်သူၣ်ပာ်သးလၢ, စီၤအၤဃာ်ဆိၣ်လီၤတ့ၢ်အသးလၢယမဲာ် ညါဒ်လဲၣ်န့ၣ်ဧါ. မ့ၢ်လၢအဝဲမၤတ့ၢ်တၢ်အံၤအဃိ, ယတဟဲစိာ်တၢ်တတၢးတနါလၢအဖီခိၣ်ဖဲအဝဲအိၣ်မူဒံးဝဲ အဆၢကတီၢ်န့ၣ်ဘၣ်. တၢ်ဆၢကတီၢ်လၢယကဟဲစိာ်တၢ်တတၢးတနါဆူစီၤ အၤဃာ်အဟံၣ်ဒူၣ်ဃီထၢအဖီခိၣ်န့ၣ်ကမ့ၢ်ဖဲအဝဲအဖိပိာ်ခွါ အစိၤအဆၢကတီၢ်န့ၣ်လီၤ.”