Read S'gaw Karen လံာ်စီၤပၤအခီၣ်ထံးတဘ့ၣ် 3 Bible Online

လံာ်စီၤပၤအခီၣ်ထံးတဘ့ၣ် 3 - S'gaw Karen bible

လံာ်စီၤပၤအခီၣ်ထံးတဘ့ၣ် 3

¹စီၤၡလိၤမိၤမၤတၢ်ဒီသိၣ်ဒီမှံၤဒီးကီၢ်အဲၤကူပတူးအစီၤ ပၤခီဖျိအဝဲအတၢ်ဒိးတ့ဒိးဖျီအသးဒီးကီၢ်အဲၤကူပတူးအစီၤပၤအဖိ မုၣ်န့ၣ်လီၤ. အဝဲဟဲက့ၤကိးအီၤလၢကအိၣ်ဝဲဆိးဝဲလၢစီၤဒၤဝံးအဝ့ၢ်ပူၤ တုၤလီၤလၢအဝဲသူၣ်ထီၣ်အနီ, ယွၤအတၢ်လုၢ်ဟံၣ်ဒီးဝ့ၢ်ခိၣ်ဒူဝးတရံးဝ့ၢ်ယရူၤၡလ့ၣ်ဝံၤဝဲ တစုန့ၣ်လီၤ.

²တၢ်လုၢ်ဟံၣ်တဖျၢၣ်တဘၣ်တၢ်သူၣ်ထီၣ်အီၤလၢယွၤအဂီၢ်ဒံးဘၣ်. လၢတၢ်န့ၣ်အဃိပှၤဂီၢ်မုၢ်လုၢ်ထီၣ်ပာ်ထီၣ်ဒံးဒၣ်တၢ်လုၢ်တၢ်ပာ် တဖၣ်လၢတၢ်လုၢ်လီၢ်လၢအလီၤဆီလိာ်အသးအါတီၤအဖီခိၣ်န့ၣ်လီၤ.

³စီၤၡလိၤမိၤအဲၣ်ဘၣ်ယွၤဒီးပိာ်ထွဲတ့ၢ်အပၢ်စီၤဒၤဝံးအတၢ် မၤလိာ်ပိာ်လီၤတဖၣ်အခံန့ၣ်လီၤ. ဘၣ်ဆၣ်အဝဲမၤသံစ့ၢ်ကီးဆၣ်ဖိကီၢ်ဖိတဖၣ်ဒီးလုၢ်ထီၣ်အီၤဒ် တၢ်လုၢ်တၢ်ပာ်တဖၣ်အသိးလၢတၢ်လုၢ်လီၢ်အကလုာ်ကလုာ်အဖီခိၣ်န့ၣ် လီၤ.

⁴တၢ်မၤအသးတဘျီ, အဝဲလဲၤဆူဝ့ၢ်ကံးဘိၣ်ဒ်သိးကလုၢ်ထီၣ်တၢ် လုၢ်တၢ်ပာ်တဖၣ်, မ့ၢ်လၢဝ့ၢ်ကံးဘိၣ်မ့ၢ်တၢ်လီၢ်ဖဲတၢ်လုၢ်လီၢ်လၢအမံၤဟူသၣ် ဖျါကတၢၢ်အိၣ်ပာ်ဝဲအဃိန့ၣ်လီၤ. အဝဲလုၢ်ထီၣ်တ့ၢ်တၢ်လုၢ်မ့ၣ်အူလၢအကယၤတဖၣ်ဖဲန့ၣ်, လၢအပူၤကွံာ်န့ၣ်လီၤ.

⁵မုၢ်တနၤဃီန့ၣ်, ယွၤလီၣ်ဖျါထီၣ်အသးလၢအီၤလၢတၢ်မံမီၢ်တခါ အပူၤဒီးသံကွၢ်အီၤ, “နအဲၣ်ဒိးလၢယကဟ့ၣ်နၤတၢ်မနုၤလဲၣ်.”

⁶စီၤၡလိၤမိၤစံးဆၢဝဲ, “ထီဘိနပာ်ဖျါထီၣ်နတၢ်အဲၣ်ဒိၣ်ဒိၣ် ကလဲာ်လၢနခ့နပှၤယပၢ်စီၤဒၤဝံးအဂီၢ်ဒီးအဝဲမ့ၢ်တ့ၢ်ပှၤအ ဂ့ၤ, ပှၤအသးတီဒီးပှၤလၢအတီဝဲလိၤဝဲလၢအတၢ်ဘၣ်ထွဲဒီးနၤအပူၤ န့ၣ်လီၤ. ဒီးနပာ်ဖျါထွဲဒံးနတၢ်အဲၣ်လၢအဒိၣ်ဝဲဒီးတလီၤတူာ်ဘၣ်ခီ ဖျိနဟ့ၣ်အီၤဖိခွါတဂၤလၢမုၢ်မဆါတနံၤအံၤလၢအပၢတၢ်လၢ အလီၢ်န့ၣ်လီၤ.

⁷အိယွၤ, ကစၢ်ယွၤဧၢ, ယမ့မ့ၢ်ဒံးဒၣ်လဲာ်ပှၤသးစၢ်ဒီးတသ့ၣ်ညါ လၢကဘၣ်ပၢတၢ်ဒ်လဲၣ်ဘၣ်ဆၣ်, နပျဲယကဲထီၣ်စီၤပၤလၢယပၢ်အလီၢ်န့ၣ်လီၤ.

⁸ခဲအံၤ, ယအိၣ်လၢပှၤဂီၢ်မုၢ်လၢနဃုထၢအီၤဒ်သိးကမ့ၢ်နတၢ်ဒၣ် နဲ, ပှၤဂီၢ်မုၢ်တဖုလၢအါဝဲတုၤဒၣ်လဲာ်တၢ်ဂံၢ်အီၤတသ့ဘၣ်အကျါ န့ၣ်လီၤ.

⁹လၢတၢ်န့ၣ်အဃိဟ့ၣ်လီၤယၤတၢ်ကူၣ်သ့လၢယလိၣ်ဘၣ်အီၤဒ်သိး ယကပၢနပှၤဂီၢ်မုၢ်လၢတၢ်စံၣ်ညီၣ်တီအပူၤဒီးယကသ့ၣ်ညါနီၤဖးတၢ်ဂ့ၤ ဒီးတၢ်အၢအဆၢန့ၣ်တက့ၢ်. မ့တမ့ၢ်ဘၣ်ဒ်န့ၣ်ဒီးယပၢနပှၤဂီၢ်မုၢ်ဖးဒိၣ်အံၤကသ့ဝဲတစုစုဒ်လဲၣ်.”

¹⁰ယွၤဘၣ်သူၣ်ဘၣ်သးတ့ၢ်တၢ်လၢစီၤၡလိၤမိၤဃ့ဝဲအံၤ,

¹¹ဒီးလၢတၢ်န့ၣ်အဃိယွၤစံးဘၣ်အီၤ, “လၢနကဃ့နကစၢ်ဒၣ်နဲအတၢ် အိၣ်ကၢအိၣ်ခိးအဂီၢ်မ့ၢ်ဂ့ၤ, တၢ်ထူးတၢ်တီၤမ့ၢ်ဂ့ၤ, နဒုၣ်နဒါတဖၣ်အတၢ်သံမ့ၢ်ဂ့ၤအလီၢ်န့ၣ်, မ့ၢ်လၢနဃ့တ့ၢ်တၢ်ကူၣ်သ့ဒ်သိးနကပၢတၢ်လၢတၢ်စံၣ်ညီၣ်တီအပူၤ အဃိ,

¹²ယကမၤတၢ်လၢနဃ့တ့ၢ်အီၤန့ၣ်လီၤ. ယကဟ့ၣ်အါထီၣ်နၤတၢ်ကူၣ်သ့ဒီးတၢ်သ့ၣ်ညါနၢ်ပၢၢ်အါန့ၢ်ဒံးပှၤ တဂၤလၢ်လၢ်မၤန့ၢ်တ့ၢ်ဝဲလၢညါမ့ၢ်ဂ့ၤ, ကမၤန့ၢ်ကဒီးဝဲ ဆူညါမ့ၢ်ဂ့ၤန့ၣ်လီၤ.

¹³ယကဟ့ၣ်လီၤစ့ၢ်ကီးနၤတၢ်လၢနတဃ့တဖၣ်န့ၣ်လီၤ. လၢနသးသမူဒီတစိၤန့ၣ်နကအိၣ်ဒီးတၢ်ထူးတၢ်တီၤဒီးတၢ်လၤတၢ် ကပီၤအါန့ၢ်ဒိၣ်န့ၢ်ဒံးစီၤပၤအဂၤ, တဂၤလၢ်လၢ်န့ၣ်လီၤ.

¹⁴ဒီးနမ့ၢ်စူၢ်ယၤဒီးတိၢ်န့ၢ်ယတၢ်သိၣ်တၢ်သီတဖၣ်ဒီးယတၢ်မၤလိာ် တဖၣ်ဒ်နပၢ်စီၤဒၤဝံးမၤတ့ၢ်ဝဲအသိးန့ၣ်ဒီး, ယကဒုးအိၣ်ကၢအိၣ်ခိးနၤလီၤ.”

¹⁵စီၤၡလိၤမိၤမံပၢၢ်ထီၣ်ဒီးသ့ၣ်ညါဘၣ်ဝဲလၢကစၢ်ယွၤကတိၤတ့ၢ် တၢ်ဒီးအီၤလၢတၢ်မံမီၢ်အပူၤန့ၣ်လီၤ. အန့ၣ်ဝံၤဒီးအဝဲလဲၤဆူဝ့ၢ်ယရူၤၡလ့ၣ်, ဒီးဂဲၤဆၢထၢၣ်ဝဲလၢယွၤအတၢ်အၢၣ်လီၤအီလီၤအတလါစီဆှံအမဲာ်ညါ, ဒီးလုၢ်ထီၣ်တၢ်လုၢ်မ့ၣ်အူတဖၣ်ဒီးတၢ်လုၢ်မၤဃူမၤဖိးတဖၣ်ဆူ ယွၤန့ၣ်လီၤ. အန့ၣ်ဝံၤအလီၢ်ခံ, အဝဲမၤဝဲတၢ်အီၣ်အမူးတမူး လၢကယဲၢ်အပဒိၣ်ပပှၢ်တဖၣ်အဂီၢ်န့ၣ်လီၤ.

¹⁶ဘၣ်မုၢ်တနံၤ, ပှၤဃဲသဲမုၣ်ခံဂၤဟဲဃီၤဒီးပာ်ဖျါထီၣ်အသး လၢစီၤပၤၡလိၤမိၤအမဲာ်ညါန့ၣ်လီၤ.

¹⁷လၢအကျါတဂၤစံးဝဲ, “တၢ်ဒိၣ်ကစၢ်စီၤပၤဧၢ, ပိာ်မုၣ်အံၤဒီးယၤပအိၣ်လၢဟံၣ်တဖျၢၣ်ဃီအပူၤ, ဒီးယဆံးစၢ်ထီၣ်, ပိာ်ခွါတဂၤဖဲဟံၣ်န့ၣ်, ဖဲအဝဲအိၣ်စ့ၢ်ကီးဖဲန့ၣ်အခါလီၤ.

¹⁸ယဖိအိၣ်ဖျဲၣ်ထီၣ်ခံသီဝံၤအလီၢ်ခံန့ၣ်, အဝဲစ့ၢ်ကီးဆံးစၢ် ထီၣ်ဖိပိာ်ခွါတဂၤလီၤ. ထဲဒၣ်ပဝဲခံဂၤပအိၣ်ဖဲဟံၣ်န့ၣ်အပူၤ, ပှၤအဂၤတအိၣ်ဘၣ်နီတဂၤဘၣ်.

¹⁹ဒီးဘၣ်မုၢ်တနၤ, လၢတၢ်တပာ်သူၣ်ပာ်သးအပူၤ, အဝဲတလ့ၣ်ဃီၤဘၣ်အသးဆူအဖိအဖီခိၣ်, ဒီးကျံၤသံဘၣ်အီၤန့ၣ် လီၤ.

²⁰အဝဲပၢၢ်ထီၣ်လၢမုၢ်နၤအခါ, စိာ်ထီၣ်ကွံာ်ယဖိခွါလၢယကပၤဖဲ ယမံဘၣ်ယသးအခါဒီးက့ၤစိာ်ဝဲဆူအလီၢ်မံပူၤ, ဝံၤဒီးအဝဲပာ်ဖိသၣ်လၢအသံန့ၣ်လၢယလီၢ်မံပူၤန့ၣ်လီၤ.

²¹လၢခံတဂီၤ, ဖဲယမံပၢၢ်ထီၣ်, ဒီးယသါကဒုးအီနုၢ်ယဖိန့ၣ်, ယထံၣ်လၢအသံဝဲဒၣ်န့ၣ်လီၤ. ယကွၢ်ဃီၤအီၤထံထံဆးဆး, ဒီးယထံၣ်တ့ၢ်လၢတမ့ၢ်ယဖိဘၣ်န့ၣ်ဘၣ်.”

²²ဘၣ်ဆၣ်, ပိာ်မုၣ်တဂၤစံးဝဲ, “တမ့ၢ်ဘၣ်. ဖိသၣ်လၢအမူဝဲ န့ၣ်မ့ၢ်ယဖိ, ဒီးလၢအသံတဂၤန့ၣ်မ့ၢ်နဖိလီၤ.” ပိာ်မုၣ်အခီၣ်ထံးတဂၤစံးဆၢက့ၤဝဲ, “တမ့ၢ်ဘၣ်. ဖိသၣ်လၢအသံန့ၣ်မ့ၢ်နဖိဒီးဖိသၣ်လၢအမူဝဲ တဂၤန့ၣ်မ့ၢ်ယဖိလီၤ.” ဒီးလၢတၢ်န့ၣ်အဃိအဝဲသ့ၣ်ဂ့ၢ်လိာ်ဘှီလိာ်အသးလၢစီၤပၤအမဲာ် ညါန့ၣ်လီၤ.

²³တုၤနုၤတစု, စီၤပၤၡလိၤမိၤစံးဝဲ, “သုဝဲတဂၤစုာ်စုာ် သုစံးလၢဖိသၣ်လၢအမူန့ၣ်မ့ၢ်သုတၢ်ဒီးဖိသၣ်လၢအသံန့ၣ်မ့ၢ် ပှၤအတဂၤအတၢ်န့ၣ်လီၤ.”

²⁴စီၤပၤမၢပှၤဟဲစိာ်နးတဘ့ၣ်, ဒီးတုၤတၢ်ဟဲစိာ်အီၤန့ၣ်,

²⁵အဝဲစံးဝဲ, “ဖှဲးသ့ၣ်ဖးဖိသၣ်လၢအမူဝဲတဂၤန့ၣ်ခံခီ ဒီးဟ့ၣ်လီၤပိာ်မုၣ်ခံဂၤ, တဂၤတခီစုာ်စုာ်န့ၣ်တက့ၢ်.”

²⁶မိၢ်နီၢ်နီၢ်တဂၤလၢအသးပူၤပှဲၤဒီးတၢ်အဲၣ်ဘၣ်အဖိခွါအံၤစံး ဘၣ်စီၤပၤ, “တၢ်ဒိၣ်ကစၢ်စီၤပၤဧၢ, ဝံသးစူၤတဘၣ်မၤသံ ဖိသၣ်အံၤတဂ့ၤ. ဟ့ၣ်လီၤပိာ်မုၣ်န့ၣ်တက့ၢ်.” ဘၣ်ဆၣ်ပိာ်မုၣ်အဂၤတဂၤစံးဝဲ, “ဟ့ၣ်ပဝဲနီတဂၤတဂ့ၤ. ဖှဲးသ့ၣ်ဖးဒီၣ်တဲာ်ဆၣ်ခီအီၤခံခီန့ၣ်တက့ၢ်.”

²⁷တုၤနုၤတစု, စီၤပၤၡလိၤမိၤစံးဝဲ, “မၤသံဖိသၣ်လၢၤတဂ့ၤ. ဟ့ၣ်လီၤဆူပိာ်မုၣ်လၢအခီၣ်ထံးတဂၤန့ၣ်တက့ၢ်. အဝဲမ့ၢ်ဖိသၣ်အမိၢ်နီၢ်နီၢ်န့ၣ်လီၤ.”

²⁸တုၤအံၣ်စရ့လးအပှၤဂီၢ်မုၢ်နၢ်ဟူဘၣ်စီၤၡလိၤမိၤအတၢ်စံၣ်ညီၣ် န့ၣ်အဝဲသ့ၣ်ခဲလၢာ်ပှဲၤဝဲဒီးအတၢ်ယူးယီၣ်ပာ်ကဲအီၤဒိၣ်ဒိၣ် မုၢ်မုၢ်မ့ၢ်လၢအဝဲသ့ၣ်, သ့ၣ်ညါဝဲလၢကစၢ်ယွၤဟ့ၣ်လီၤလံအီၤတၢ်ကူၣ်သ့လၢကမၤဘၣ်လီၢ် ဘၣ်စးတၢ်ဂ့ၢ်လိာ်ဘှီလိာ်တီတီလိၤလိၤအဃိန့ၣ်လီၤ.