Read S'gaw Karen လံာ်စီၤပၤအခီၣ်ထံးတဘ့ၣ် 5 Bible Online

လံာ်စီၤပၤအခီၣ်ထံးတဘ့ၣ် 5 - S'gaw Karen bible

လံာ်စီၤပၤအခီၣ်ထံးတဘ့ၣ် 5

¹ဝ့ၢ်ထါယၢၣ်ကီၢ်အစီၤပၤဃူရၣ်, ထီဘိမ့ၢ်တ့ၢ်စီၤဒၤဝံးအတံၤသကိးတဂၤန့ၣ်လီၤ. ဒီးဖဲအဝဲနၢ်ဟူဘၣ်ဝဲလၢစီၤၡလိၤမိၤကဲထီၣ်စီၤပၤလၢစီၤ ဒၤဝံးအလီၢ်န့ၣ်, အဝဲဆှၢလီၤအထံကီၢ်မီၣ်သီတဖၣ်ဆူစီၤၡလိၤမိၤအအိၣ်န့ၣ်လီၤ.

²စီၤၡလိၤမိၤဆှၢကဒါက့ၤတၢ်ကစီၣ်အံၤဆူစီၤပၤဃူရၣ်အအိၣ်န့ၣ်လီၤ.

³“မ့ၢ်လၢတၢ်ဒုးတၢ်ယၤတဖၣ်အိၣ်ဝဲတထံၣ်ဃီဒီးယပၢ်စီၤဒၤဝံး ဘၣ်ဒုးတၢ်ထီဒါအဒုၣ်အဒါအထံအကီၢ်အိၣ်ဝးတရံးအီၤတဖၣ်အဃိ, နသ့ၣ်ညါလၢတချုးလၢယွၤဟ့ၣ်အီၤတၢ်မၤနၢၤလၢကယဲၢ်အဒုၣ်အဒါ ခဲလၢာ်အဖီခိၣ်ဒံးဘၣ်န့ၣ်, အဝဲဘှီထီၣ်တၢ်လုၢ်ဟံၣ်တဖျၢၣ်လၢတၢ်ကဘူၣ်ထီၣ်ဘါထီၣ်ယွၤ, အဝဲအကစၢ်ယွၤအဂီၢ်တသ့ဘၣ်န့ၣ်လီၤ.

⁴မ့မ့ၢ်ခဲအံၤ, ယွၤ, ယကစၢ်ယွၤဟ့ၣ်လီၤလံယၤတၢ်ဃူတၢ်ဖိးလၢ ကယဲၢ်ယထံဆၢကီၢ်ဆၢခဲလၢာ်န့ၣ်လီၤ. ယဒုၣ်ယဒါတအိၣ်လၢၤနီတဂၤဘၣ်, ဒီးတၢ်ဘၣ်ယိၣ်လၢတၢ်ကဟဲထီၣ်ဒုးယၤအဂီၢ်တအိၣ်လၢၤဘၣ်.

⁵ယွၤအၢၣ်လီၤတ့ၢ်ယပၢ်စီၤဒၤဝံးလၢ, နဖိခွါလၢယကဒုးကဲထီၣ် အီၤစီၤပၤလၢနလီၢ်ခံန့ၣ်, ကသူၣ်ထီၣ်တၢ်လုၢ်ဟံၣ်တဖျၢၣ်လၢယဂီၢ်လီၤ. ဒီးခဲကနံၣ်အံၤယပာ်လီၤယသးလၢယကသူၣ်ထီၣ်တၢ်လုၢ်ဟံၣ် အဝဲန့ၣ်လၢတၢ်ကဘူၣ်ထီၣ်ဘါထီၣ်ယွၤယကစၢ်ယွၤအဂီၢ်န့ၣ်လီၤ.

⁶လၢတၢ်န့ၣ်အဃိမၢလီၤနပှၤတဖၣ်ဆူကီၢ်လဘၤနိၣ်လၢကကူာ်လီၤသ့ၣ် ဆှိအ့ရ့းတဖၣ်လၢယဂီၢ်န့ၣ်တက့ၢ်. ယပှၤတဖၣ်ကမၤသကိးတၢ်ဒီးအဝဲသ့ၣ်, ဒီးယကဟ့ၣ်ဘူးဟ့ၣ်လဲနပှၤတဖၣ်ဒ်နစံၣ်ညီၣ်နဲအသိးန့ၣ်လီၤ. ဒ်နသ့ၣ်ညါဂ့ၤဂ့ၤအသိးန့ၣ်, ယပှၤတဖၣ်ကူာ်လီၤသ့ၣ်တသ့ဒ်နပှၤတဖၣ် အသိးန့ၣ်ဘၣ်.”

⁷ဖဲအဝဲဒိးန့ၢ်ဘၣ်စီၤၡလိၤမိၤအတၢ်ကစီၣ်န့ၣ်စီၤဃူရၣ်ဘၣ် သူၣ်ဘၣ်သးဒိၣ်ဒိၣ်ကလဲာ်ဒီးစံးဝဲ, “စံးထီၣ်ပတြၢၤယွၤတနံၤအံၤလၢအဟ့ၣ်စီၤဒၤဝံးလၢအဖိခွါ လၢအကူၣ်သ့ဒ်သိးအံၤတဂၤလၢအကဲထီၣ်ပှၤဂီၢ်မုၢ်ဖးဒိၣ်တဖု အစီၤပၤလၢအဝဲအလီၢ်အဃိန့ၣ်တက့ၢ်.”

⁸အန့ၣ်ဒီးစီၤဃူရၣ်ဆှၢလီၤတၢ်ကစီၣ်ဒ်လာ်အံၤဆူ စီၤၡလိၤမိၤအအိၣ်စံးဝဲ, “ယဒိးန့ၢ်ဘၣ်နတၢ်ကစီၣ်ဒီးယအိၣ် ကတဲာ်ကတီၤယသးလၢယကမၤတၢ်လၢနဃ့န့ၣ်လီၤ. ယကဟ့ၣ်လီၤသ့ၣ်ဆှိအ့ရ့းတဖၣ်ဒီးသ့ၣ်ဆှိတဖၣ်န့ၣ်လီၤ.

⁹ယပှၤတဖၣ်ကဟဲစိာ်လီၤသ့ၣ်အကျီၣ်တဖၣ်လၢကီၢ်လဘၤနိၣ်ဆူပီၣ်လဲၣ် ဒီးကစၢထီၣ်အီၤတပူၤဃီဒ်ထိတဖၣ်အသိးဒီးထိၣ်ထွံလီၤအီၤလၢ ပီၣ်လဲၣ်နံၤဆူတၢ်လီၢ်လၢနဃုထၢန့ၣ်လီၤ. ဖဲန့ၣ်ယပှၤတဖၣ်ကဃ့ၣ်လီၤကွံာ်အီၤဒီးနပှၤတဖၣ်ကအံးထွဲ ကွၢ်ထွဲက့ၤအီၤန့ၣ်လီၤ. နဲဒၣ်တခီယအဲၣ်ဒိးလၢနကဟ့ၣ်ယခ့ယပှၤသ့ၣ်တဖၣ်လၢတၢ်အီၣ်တၢ်အီ န့ၣ်လီၤ.

¹⁰လၢတၢ်န့ၣ်အဃိစီၤဃူရၣ်ဟ့ၣ်ဝဲစီၤၡလိၤမိၤလၢသ့ၣ်ဆှိအ့ ရ့းဒီးသ့ၣ်ဆှိအကျီၣ်တဖၣ်လၢအသးလီဝဲ,

¹¹ဒီးစီၤၡလိၤမိၤဟ့ၣ်လီၤစီၤဃူရၣ်လၢဘုကၠူၣ်အကိၢ်ခံကလး, ဒီးသ့ၣ်စၤယံးအသိဆှံဆှံအကိၢ်ခံဆံကိးနံၣ်ဒဲးလၢကဒုး အီၣ်အပှၤတဖၣ်အဂီၢ်န့ၣ်လီၤ.

¹²ယွၤဟံးဃာ်ဂၢၢ်ကျၢၤအတၢ်အၢၣ်လီၤဒီးဟ့ၣ်လီၤစီၤၡလိၤမိၤလၢ တၢ်ကူၣ်သ့န့ၣ်လီၤ. ဒီးတၢ်ဃူတၢ်ဖိးအိၣ်ဝဲလၢစီၤဃူရၣ်ဒီးစီၤၡလိၤမိၤအဘၢၣ် စၢၤဒီးအဝဲသ့ၣ်မၤတၢ်အၢၣ်လီၤလိာ်သးန့ၣ်လီၤ.

¹³လၢကီၢ်အံၣ်စရ့လးဒီဘ့ၣ်ညါန့ၣ်စီၤပၤၡလိၤမိၤဃုထၢမၤဆူၣ် ပှၤသၢကလးဒ်ပှၤဘၣ်တၢ်မၤဆူၣ်အီၤတဖၣ်အသိး,

¹⁴ဒီးပာ်လီၤစီၤအဒိနံရၣ်ဒ်ပှၤအခိၣ်လၢကပၢဆှၢအဝဲသ့ၣ်န့ၣ်လီၤ. စီၤၡလိၤမိၤနီၤဖးလီၤအဝဲသ့ၣ်ဆူပှၤတကလးစုာ်စုာ်, သၢကရူၢ်ဒီးပှၤတကရူၢ်ဘၣ်တကရူၢ်စုာ်စုာ်မၤတၢ်လၢကီၢ်လဘၤနိၣ်တလါ, ဒီးလၢအထံအကီၢ်အပူၤခံလါန့ၣ်လီၤ.

¹⁵စီၤၡလိၤမိၤအိၣ်စ့ၢ်ကီးဒီးပှၤကူးတဲာ်လၢၢ်ဃိးကလးဂၤလၢ ကစၢၢ်ခိၣ်ကလိကျါဒီးပှၤစိၢ်လၢၢ်နွံကလးဂၤ,

¹⁶ဒီးပာ်လီၤပှၤသၢကထိသၢကယၤဂၤဒ်ပှၤမၤတၢ်ဖိအခိၣ်တဖၣ်လၢ ကကွၢ်ထွဲအဝဲသ့ၣ်ဒီးသုးကျဲၤပၢဆှၢအဝဲသ့ၣ်အတၢ်မၤန့ၣ်လီၤ.

¹⁷ဖဲဒၣ်စီၤပၤၡလိၤမိၤမၤလိာ်ဝဲန့ၣ်, အဝဲသ့ၣ်ကူးတဲာ်လၢၢ်ဖးဒိၣ်အဂ့ၤတဖၣ် လၢယွၤအတၢ်လုၢ်ဟံၣ်အခီၣ်ထံးအဂီၢ်န့ၣ်လီၤ.

¹⁸စီၤၡလိၤမိၤ, ဒီးစီၤဃူရၣ်အပှၤမၤတၢ်ဖိတဖၣ်ဒီးပှၤတဖၣ်လၢ ဝ့ၢ်ကံးဘလးကတဲာ်ကတီၤလၢၢ်ဒီးသ့ၣ်တဖၣ်လၢကသူၣ်ထီၣ်ယွၤအတၢ် လုၢ်ဟံၣ်အဂီၢ်န့ၣ်လီၤ.