Read S'gaw Karen လံာ်စီၤပၤအခီၣ်ထံးတဘ့ၣ် 6 Bible Online

လံာ်စီၤပၤအခီၣ်ထံးတဘ့ၣ် 6 - S'gaw Karen bible

လံာ်စီၤပၤအခီၣ်ထံးတဘ့ၣ် 6

¹ဖဲကီၢ်အံၣ်စရ့လးအပှၤဂီၢ်မုၢ်ဟးထီၣ်လၢကီၢ်အဲၤကူပတူးအလီၢ်ခံ, အနံၣ်လွံၢ်ကယၤဃိးဆံ, ဖဲစီၤၡလိၤမိၤကဲစီၤပၤလၢကီၢ်အံၣ်စရ့လးလွံၢ်နံၣ်တနံၣ်လၢလါခံလါတလါ, လါစံာ်အပူၤန့ၣ်စီၤၡလိၤမိၤစးထီၣ်တၢ်မၤလၢတၢ်သူၣ်ထီၣ်ယွၤ အတၢ်လုၢ်ဟံၣ်အဂီၢ်န့ၣ်လီၤ.

²အတၢ်ထိၣ်လၢအအိပူၤမ့ၢ်ဝဲအထီအိၣ်ဝဲအပျၢ်ဃုဆံ, အဒီၣ်ဃီၤအိၣ်ဝဲအပျၢ်ခံဆံဒီးအကစီၤထီၣ်အိၣ်ဝဲအပျၢ်သၢဆံ န့ၣ်လီၤ.

³ဒၢးတၢ်မဲာ်ညါန့ၣ်အထီအိၣ်ဝဲအပျၢ်တဆံဒီးအဒီၣ်ဃီၤအိၣ်ဝဲ အပျၢ်ခံဆံ, လဲၢ်ထဲသိးသိးဒီးတၢ်လီၢ်စီဆှံအတၢ်ထီအသိးန့ၣ် လီၤ.

⁴ယွၤအတၢ်လုၢ်ဟံၣ်အဒူၣ်တဖၣ်န့ၣ်အိၣ်ဒီးပဲတြီဖိတဖၣ်လၢအလိၤ, လၢအအံၣ်လၢတၢ်ချၢဒိၣ်န့ၢ်ဒံးလၢတၢ်အိပူၤတက့ၢ်န့ၣ်လီၤ.

⁵ဝးတရံးတၢ်လုၢ်ဟံၣ်အဒၢးဖးဒိၣ်တဖၣ်န့ၣ်, တၢ်သူၣ်ထီၣ်ဖိလၢ အအိၣ်သၢဆီတဖၣ်ဘၣ်တၢ်သူၣ်ထီၣ်အီၤအိၣ်စဲဘူးလိာ်အသး, ဒီးတဆီစုာ်စုာ်န့ၣ်ကစီၤထီၣ်ဝဲယဲၢ်ပျၢ်န့ၣ်လီၤ.

⁶တၢ်ဖီလာ်ကတၢၢ်တဆီ, အဒၢးတဖျၢၣ်စုာ်စုာ်လဲၢ်ဝဲ, ယဲၢ်ပျၢ်, လၢတၢ်ခၢၣ်သးတဆီန့ၣ်လဲၢ်ဝဲ, ဃုပျၢ်ဒီးလၢအဖီခိၣ်ကတၢၢ်တဆီန့ၣ်လဲၢ်ဝဲနွံပျၢ်လီၤ. တၢ်လုၢ်ဟံၣ်အဒူၣ်လၢအဖီခိၣ်တဆီဘၣ်တဆီန့ၣ် ဘူန့ၢ်ဒံးလၢအဖီလာ်တဆီစုာ်စုာ်, ဒ်သိးဒၢးဖိတဖၣ်ဘၣ်တၢ်ဆီလီၤအီၤလၢတၢ်ဒူၣ်အလိၤကသ့ဝဲ, သုတအိၣ်ဒီးအသ့ၣ်အကျိၤတဖၣ်လၢဘၣ်တၢ်ဘှီနုာ်အီၤလၢတၢ်ဒူၣ် အလိၤတဂ့ၤအဂီၢ်န့ၣ်လီၤ.

⁷လၢၢ်တဖၣ်လၢတၢ်ဘှီထီၣ်ယွၤအတၢ်လုၢ်ဟံၣ်န့ၣ်, ဘၣ်တၢ်ကတဲာ်ကတီၤပာ်စၢၤအီၤလၢတၢ်ခူၣ်လၢၢ်အလီၢ်, ဒ်သိးတၢ်သီၣ်တၢ်သဲလၢခံၣ်ခူၣ်မ့ၢ်ဂ့ၤ, ကွါမ့ၢ်ဂ့ၤ, တၢ်ပီးတၢ်လီလၢထးအဂၤမ့ၢ်ဂ့ၤအသုတအိၣ်တဂ့ၤ, ဖဲတၢ်ဘှီထီၣ်ယွၤအတၢ်လုၢ်ဟံၣ်အခါန့ၣ်လီၤ.

⁸ဒၢးဖိလၢတၢ်ဖီလာ်ကတၢၢ်တဆီအကျဲစၢၤအိၣ်ဝဲလၢယွၤအတၢ်လုၢ် ဟံၣ်အကလံၤထံးတကပၤအိၣ်ဒီးဃီသွါတဖၣ်လၢအလဲၤထီၣ်ဆူဒၢးခံ ဆီတဆီဒီးသၢဆီတဆီန့ၣ်လီၤ.

⁹အန့ၣ်သတးဒီး, စီၤပၤၡလိၤမိၤမၤဝံၤတၢ်သူၣ်ထီၣ်ယွၤအတၢ်လုၢ်ဟံၣ်န့ၣ်လီၤ. အဝဲမၤထီၣ်တၢ်အခိၣ်ဒုးလာ်လၢကျိၤတဖၣ်ဒီးသ့ၣ်ဘၣ်တဖၣ်လၢသ့ၣ် ဆှိအ့ရ့းန့ၣ်လီၤ.

¹⁰တၢ်သူၣ်ထီၣ်ဖိသၢဆီ, လၢတဆီစုာ်စုာ်ကစီၤထီၣ်ဝဲယဲၢ်ပျၢ်န့ၣ် ဘၣ်တၢ်ဘှီထီၣ်အီၤလၢယွၤအတၢ်လုၢ်ဟံၣ်အဒူၣ်အချၢတခီ ဒီးဘၣ်တၢ်ဒုးစဲဘူးအဝဲသ့ၣ်လၢသ့ၣ်ဆှိအ့ရ့းအကျိၤတဖၣ်န့ၣ်လီၤ.

¹¹ယွၤစံးဘၣ်စီၤၡလိၤမိၤ,

¹²“နမ့ၢ်စူၢ်ကယဲၢ်ယတၢ်သိၣ်တၢ်သီတဖၣ်ဒီးတၢ်မၤလိာ်တဖၣ်န့ၣ်, တၢ်လၢယအၢၣ်လီၤတ့ၢ်နပၢ်စီၤဒၤဝံးန့ၣ်ယကမၤအီၤလၢနဂီၢ်လီၤ.

¹³ယကအိၣ်ကဆိးလၢယပှၤဂီၢ်မုၢ်အံၣ်စရ့လးအကျါလၢယွၤအတၢ်လုၢ်ဟံၣ် လၢနဘှီထီၣ်အီၤအံၤအပူၤ, ဒီးယတလဲၤသဒၣ်အဝဲသ့ၣ်နီတစုဘၣ်.”

¹⁴အန့ၣ်ဒီးစီၤၡလိၤမိၤမၤဝံၤတၢ်သူၣ်ထီၣ်ယွၤအတၢ်လုၢ်ဟံၣ်န့ၣ်လီၤ.

¹⁵တၢ်ဒူၣ်တဖၣ်အအိပူၤဘၣ်တၢ်ကးဘၢအီၤလၢသ့ၣ်ဆှိအ့ရ့းအသ့ၣ်ဘၣ် တဖၣ်စးထီၣ်လၢအဒါတုၤလၢအခိၣ်ဒုးလာ်, ဒီးတၢ်ဒါန့ၣ်ဘၣ်တၢ်ဒါလီၤအီၤလၢသ့ၣ်ဆှိန့ၣ်လီၤ.

¹⁶ဒၢးလၢတၢ်အသးကံၢ်ပူၤကတၢၢ်လၢအဘၣ်တၢ်ကိးအီၤလၢတၢ်စီဆှံ ကတၢၢ်န့ၣ်ဘၣ်တၢ်ဘှီအီၤဖဲယွၤအတၢ်လုၢ်ဟံၣ်အလီၢ်ခံန့ၣ်လီၤ. အထီအိၣ်ဝဲအပျၢ်ခံဆံဒီးဘၣ်တၢ်ဒူၣ်တဲာ်အီၤလၢသ့ၣ်ဆှိအ့ ရ့းအသ့ၣ်ဘၣ်တဖၣ်စးထီၣ်လၢတၢ်ဒါအလီၢ်ဒီးတုၤလၢအခိၣ်ဒုးလာ် န့ၣ်လီၤ.

¹⁷ဒၢးလၢအအိၣ်လၢတၢ်လီၢ်စီဆှံကတၢၢ်အမဲာ်ညါန့ၣ်ထီဝဲအပျၢ် လွံၢ်ဆံန့ၣ်လီၤ.

¹⁸သ့ၣ်ဆှိအ့ရ့းအသ့ၣ်ဘၣ်တဖၣ်ဘၣ်တၢ်ကယၢကယဲအီၤဒီးထံလူၤသၣ် တဖၣ်ဒီးဖီတဖၣ်လၢတၢ်စိးပျၤန့ၢ်အီၤလီၤ. တၢ်ဒူၣ်အအိပူၤတကပၤအံၤဘၣ်တၢ်ကးဘၢအီၤဒီးသ့ၣ်ဆှိအ့ရ့းဒ် သိးလၢၢ်လၢတၢ်ဒူၣ်တဖၣ်အလိၤအသုတဘၣ်တၢ်ထံၣ်အီၤတဂ့ၤအဂီၢ်န့ၣ်လီၤ.

¹⁹လၢယွၤအတၢ်လုၢ်ဟံၣ်အလီၢ်ခံန့ၣ်, ဒၢးလၢတၢ်အသးကံၢ်ပူၤတဖျၢၣ် ဘၣ်တၢ်ဘှီထီၣ်အီၤလၢယွၤအတၢ်အၢၣ်လီၤအီလီၤအတလါ ကဘၣ်တၢ်ပာ်လီၤအီၤအဂီၢ်န့ၣ်လီၤ.

²⁰ဒၢးလၢတၢ်သးကံၢ်ပူၤအံၤအထီမ့ၢ်ဝဲအပျၢ်ခံဆံ, အဒီၣ်ဃီၤမ့ၢ်ဝဲအပျၢ်ခံဆံဒီးအကစီၤထီၣ်မ့ၢ်ဝဲအပျၢ်ခံဆံ, ခဲလၢာ်ဘၣ်တၢ်ကျးဘၢအီၤလၢထူစီန့ၣ်လီၤ. တၢ်လုၢ်လီၢ်န့ၣ်ဘၣ်တၢ်ကးဘၢအီၤလၢသ့ၣ်ဆှိအ့ရ့းအသ့ၣ်ဘၣ်တဖၣ် န့ၣ်လီၤ.

²¹ယွၤအတၢ်လုၢ်ဟံၣ်အအိပူၤဘၣ်တၢ်ကးဘၢအီၤလၢထူဒီးပျံၤသွဲထူတဖၣ် ဘၣ်တၢ်ဘျးလီၤခီဂာ်အီၤလၢဒၢးလၢတၢ်သးကံၢ်ပူၤအကျဲစၢၤဒီး, ဒၢးအံၤဘၣ်တၢ်ကးဘၢအီၤဒီးထူန့ၣ်လီၤ.

²²ယွၤအတၢ်လုၢ်ဟံၣ်အအိပူၤခဲလၢာ်ဘၣ်တၢ်ကးဘၢအီၤလၢထူ, ဒီးဒ်န့ၣ်အသိး, တၢ်လုၢ်လီၢ်လၢအအိၣ်လၢတၢ်လီၢ်စီဆှံ ကတၢၢ်အပူၤစ့ၢ်ကီးန့ၣ်လီၤ.

²³ခ့ရူာ်ခံဂၤလၢတၢ်မၤအီၤလၢသ့ၣ်စၤယံး ဘၣ်တၢ်ပာ်လီၤအီၤလၢတၢ်လီၢ်စီဆှံကတၢၢ်အပူၤ, တဂၤစုာ်စုာ်အထီအိၣ်ဝဲဆံဆဲၣ်ပျၢ်န့ၣ်လီၤ.

²⁴ခ့ရူာ်အခီၣ်ထံးတဂၤအဒံးဆ့တခီထီဝဲယဲၢ်ပျၢ်ဒီးအဂၤတခီ ထီဝဲယဲၢ်ပျၢ်, ခဲလၢာ်အထီမ့ၢ်ဝဲဆံဆဲၣ်ပျၢ်စးထီၣ်လၢအဒံးဆ့ တခီအစိးနါတုၤဆူအဒံးဆ့အဂၤတခီအစိးနါန့ၣ်လီၤ.

²⁵ခ့ရူာ်ခံဂၤတဂၤအတၢ်ထိၣ်မ့ၢ်စ့ၢ်ကီးဝဲဆံဆဲၣ်ပျၢ်, မ့ၢ်လၢခ့ရူာ်ခံဂၤအံၤမ့ၢ်တၢ်တမံၤဃီလၢအတကွီၣ်ဒီးအက့ၢ်အဂီၤအဃိန့ၣ်လီၤ.

²⁶ခ့ရူာ်တဂၤစုာ်စုာ်အထီအိၣ်ဝဲဆံဆဲၣ်ပျၢ်န့ၣ်လီၤ.

²⁷အဝဲသ့ၣ်ဘၣ်တၢ်ပာ်လီၤသဃဲၤအီၤလၢတၢ်လီၢ်စီဆှံကတၢၢ်, ဒ်သိးအဝဲသ့ၣ်အဒံးဆ့လၢအသလၣ်ထီၣ်အသးအကျါခံဘ့ၣ် ကထိးလိာ်အသးလၢဒၢးအခၢၣ်သး ဒီးအဒံးဆ့အဂၤခံဘ့ၣ်ကထိးဘၣ်တၢ်ဒူၣ်တဖၣ် န့ၣ်လီၤ.

²⁸ခ့ရူာ်ခံဂၤအံၤဘၣ်တၢ်ကးဘၢအီၤလၢထူန့ၣ်လီၤ.

²⁹ဒၢးဖးဒိၣ်ဒီးဒၢးလၢတၢ်သးကံၢ်ပူၤကတၢၢ်အတၢ်ဒူၣ်တဖၣ်ဘၣ်တၢ် ကယၢကယဲအီၤခဲလၢာ်လၢခ့ရူာ်တဖၣ်, သ့ၣ်စူၣ်ပလူၣ်တဖၣ်ဒီးဖီတဖၣ်အဂီၤလၢတၢ်စိးပျၤအီၤန့ၣ်လီၤ.

³⁰တၢ်ဒါဒၣ်လဲာ်ဘၣ်တၢ်ကးဘၢအီၤလၢထူန့ၣ်လီၤ.

³¹တၢ်လီၢ်စီဆှံကတၢၢ်အကျဲစၢၤအိၣ်ဒီးတြဲၤဖးဒိၣ်လၢတၢ်အိး ထီၣ်အီၤသ့ခံကပၤတဘ့ၣ်လၢတၢ်မၤအီၤလၢသ့ၣ်စၤယံးန့ၣ်လီၤ. တြဲၤအခိၣ်ထိးအက့ၣ်ကွီၤန့ၣ်အဘၣ်တၢ်မၤစူအီၤလီၤ.

³²တြဲၤတဖၣ်ဘၣ်တၢ်ကယၢကယဲအီၤလၢခ့ရူာ်တဖၣ်, သ့ၣ်စူၣ်ပလူၣ်တဖၣ်ဒီးဖီတဖၣ်အဂီၤလၢတၢ်စိးပျၤအီၤန့ၣ်လီၤ. တြဲၤတဖၣ်, ခ့ရူာ်တဖၣ်ဒီးသ့ၣ်စူၣ်ပလူၣ်တဖၣ်ဘၣ်တၢ်ကးဘၢအီၤ လၢထူန့ၣ်လီၤ.

³³လၢကျဲစၢၤလဲၤဆူဒၢးဖးဒိၣ်အဂီၢ်တြဲၤဖးဒိၣ်လၢအခိၣ်တံာ် အိၣ်လွံၢ်ခီ, အနၢၣ်အိၣ်ဃူဃူဘၣ်တၢ်မၤအီၤလၢသ့ၣ်စၤယံးအိၣ်ဝဲလီၤ.

³⁴ဖဲန့ၣ်တြဲၤအလၣ်လၢတၢ်မၤအီၤလၢသ့ၣ်ဆှိဒီးကၢ်ချံးအသးသ့ဝဲ အိၣ်ခံဘ့ၣ်,

³⁵ဒီးဘၣ်တၢ်ကယၢကယဲအီၤလၢခ့ရူာ်တဖၣ်, သ့ၣ်စူၣ်ပလူၣ်တဖၣ်ဒီးဖီတဖၣ် အဂီၤလၢတၢ်စိးပျၤအီၤဒီးဘၣ်တၢ်ကးဘၢအီၤလၢထူဖိးလိာ်ဖိး ဒ့န့ၣ်လီၤ.

³⁶ဘျီၣ်လၢအအိၣ်လၢတၢ်သးကံၢ်ပူၤတဖျၢၣ်န့ၣ်ဘၣ်တၢ်ဘှီထီၣ်အီၤလၢ ယွၤအတၢ်လုၢ်ဟံၣ်အမဲာ်ညါဒီးဘၣ်တၢ်ဒူၣ်ဝးတရံးအီၤ လၢတၢ်ဒူၣ်လၢတၢ်မၤအီၤဒီးသ့ၣ်ဆှိအ့ရ့းအကျိၤတကထၢအဖီခိၣ် အိၣ်ဒီးလၢၢ်သၢကထၢတဆီဘၣ်တဆီန့ၣ်လီၤ.

³⁷ယွၤအတၢ်လုၢ်ဟံၣ်အခီၣ်ထံးဘၣ်တၢ်ပာ်လီၤအီၤလၢလါခံလါတလါ, လါစံာ်လၢစီၤၡလိၤမိၤပၢတၢ်လွံၢ်နံၣ်တနံၣ်အကတီၢ်န့ၣ်လီၤ.

³⁸ဖဲစီၤၡလိၤမိၤပၢတၢ်တဆံတနံၣ်အပူၤလါဃိးလါတလါ, လၢအမ့ၢ်လါဘူလ့ၤအပူၤန့ၣ်, ယွၤအတၢ်လုၢ်ဟံၣ်ဘၣ်တၢ်မၤဝံၤအီၤ လၢလၢပှဲၤပှဲၤဒ်တၢ်တိာ်ကျဲၤပာ်အီၤလီၤတံၢ်လီၤဆဲးအသိးန့ၣ်လီၤ. စီၤၡလိၤမိၤသူၣ်ထီၣ်တၢ်လုၢ်ဟံၣ်အံၤယံာ်ဝဲ နွံနံၣ်န့ၣ်လီၤ.