Read S'gaw Karen လံာ်စီၤပၤအခီၣ်ထံးတဘ့ၣ် 7 Bible Online

လံာ်စီၤပၤအခီၣ်ထံးတဘ့ၣ် 7 - S'gaw Karen bible

လံာ်စီၤပၤအခီၣ်ထံးတဘ့ၣ် 7

¹စီၤၡလိၤမိၤသူၣ်ထီၣ်စ့ၢ်ကီးနီတဖျၢၣ်လၢအဂီၢ်ဒၣ်ဝဲ, ဒီးယံာ်ဝဲတဆံသၢနံၣ်န့ၣ်လီၤ.

²နီလၢအအိၣ်လၢလဘၤနိၣ်အပှၢ်လၢ်ကျါအံၤ, အထီအိၣ်ဝဲ အပျၢ်တကယၤ, အဒီၣ်ဃီၤအိၣ်ဝဲအပျၢ်ယဲၢ်ဆံ, ဒီးအကစီၤထီၣ်အိၣ်ဝဲအပျၢ်သၢဆံန့ၣ်လီၤ. နီအံၤအိၣ်ဒီးအထူၣ်, သ့ၣ်ဆှိအ့ရ့းတဖၣ်လၢအရဲၣ်လီၤအသးသၢ ဂ့ၢ်ဒီးတဂ့ၢ်န့ၣ်အိၣ်ဝဲတဆံယဲၢ်ထူၣ်လီၤ. လၢထူၣ်တဖၣ်အဖီခိၣ်န့ၣ်တၢ်ပာ်ထီၣ်ကျိၤတဖၣ်လၢသ့ၣ်ဆှိအ့ရ့းန့ၣ်လီၤ.

³အခိၣ်ဒုးလာ်ဘၣ်တၢ်မၤအီၤလၢသ့ၣ်ဆှိအ့ရ့းလၢအဘၣ်တၢ်မၤလဲၢ် ထီၣ်အီၤတုၤလၢတၢ်ပာ်ဖှိၣ်အဒၢးတဖၣ်အဖီခိၣ်, လၢအဘၣ်တၢ်ပၢၢ်ဃးအီၤလၢထူၣ်တဖၣ်န့ၣ်လီၤ.

⁴လၢတၢ်ဒူၣ်ခံကပၤအလိၤန့ၣ်ပဲတြီအိၣ်ဝဲ, တခီသၢဂ့ၢ်စုာ်စုာ် န့ၣ်လီၤ.

⁵ကျဲစၢၤအတြဲၤတဖၣ်ဒီးပဲတြီတဖၣ်အိၣ်ဝဲဒီးအနၢၣ်လွံၢ်နၢၣ်, ဒီးပဲတြီဖိသၢဂ့ၢ်စုာ်စုာ်လၢအအိၣ်လၢတၢ်ဒူၣ်တဖၣ်အလိၤန့ၣ်, ကွၢ်ဆၢညါလိာ်အသးန့ၣ်လီၤ.

⁶နီအဘျီၣ်ဖးဒိၣ်လၢအထီအိၣ်ဝဲအပျၢ်ယဲၢ်ဆံဒီးအဒီၣ်ဃီၤအိၣ်ဝဲအပျၢ်သၢဆံဘၣ်တၢ်ဘှီထီၣ်အီၤ, အိၣ်ဒူၣ်ဃးအသးဒီးထူၣ်တဖၣ်လၢအအိၣ်ဒီးအခိၣ်ဒုးန့ၣ်လီၤ. ဒီးလၢဘျီၣ်ဖးဒိၣ်အမဲာ်ညါန့ၣ်တၢ်ခိၣ်ဒုးထီၣ်အသးအိၣ်ဝဲ တဖျၢၣ်လီၤ.

⁷လီၢ်ပစိာ်အဒၢးလၢအဘၣ်တၢ်ကိးစ့ၢ်ကီးအီၤလၢတၢ်စံၣ်ညီၣ်အဒၢး ဖးဒိၣ်, ဖဲစီၤၡလိၤမိၤစံၣ်ညီၣ်တဲာ်ကွီၢ်တဖၣ်န့ၣ်, ဘၣ်တၢ်ဘှီထီၣ်အီၤဒီးသ့ၣ်ဆှိအ့ရ့းအသ့ၣ်ဘၣ်တဖၣ်စးထီၣ်လၢ အဒါတုၤလၢတၢ်ခိၣ်ဒုးအကျိၤတဖၣ်န့ၣ်လီၤ.

⁸လၢတၢ်စံၣ်ညီၣ်အဒၢးဖးဒိၣ်အလီၢ်ခံဂၢၤအဂၤတတီၤန့ၣ်, စီၤၡလိၤမိၤအကစၢ်ဒၣ်ဝဲအိၣ်ဆိးအဟံၣ်တဖၣ်ဘၣ်တၢ်ဘှီထီၣ်အီၤဒ် တၢ်သူၣ်ထီၣ်အဂၤတဖၣ်အသိးန့ၣ်လီၤ. အဝဲဘှီထီၣ်စ့ၢ်ကီးဟံၣ်ဒ်န့ၣ်အသိးလၢအမါ, ကီၢ်အဲၤကူပတူးအစီၤပၤအဖိမုၣ်အဂီၢ်န့ၣ်လီၤ.

⁹ကယဲၢ်တၢ်သူၣ်ထီၣ်, ခဲလၢာ်အံၤဒီးဂၢၤဖးဒိၣ်န့ၣ်, ဘၣ်တၢ်မၤအီၤလၢလၢၢ်အဂ့ၤတဖၣ်စးထီၣ်လၢအသနၢၣ်ခီၣ်ထံးတုၤလီၤ လၢအခိၣ်စိးန့ၣ်လီၤ. လၢၢ်တဖၣ်ဘၣ်တၢ်ကတဲာ်ကတီၤအီၤလၢတၢ်စိးပျၢၤလၢၢ်အလီၢ်, ဒီၣ်တဲာ်အီၤဒ်အတၢ်ထိၣ်တဲာ်အိၣ်ဝဲ, ဒီးအကပၤလၢအအိပူၤဒီးလၢအချၢခံခီလိာ်ဘၣ်တၢ်ဘူးဃူအီၤ လၢထးဘူးတဖၣ်န့ၣ်လီၤ.

¹⁰တၢ်အသနၢၣ်ခီၣ်ထံးတဖၣ်ဘၣ်တၢ်မၤအီၤလၢလၢၢ်ဖးဒိၣ်တဖၣ်လၢအဘၣ် တၢ်ကတဲာ်ကတီၤအီၤဖဲတၢ်စိးပျၤလၢၢ်အလီၢ်, တနီၤအထီအိၣ်ဝဲဃိးပျၢ်ဒီးတနီၤဆံဆဲၣ်ပျၢ်န့ၣ်လီၤ.

¹¹လၢလၢၢ်သနၢၣ်အခီၣ်ထံးတဖၣ်အဖီခိၣ်န့ၣ်လၢၢ်အဂၤတဖၣ်လၢအဘၣ်တၢ် ကူးတဲာ်အီၤဒ်အတၢ်ထိၣ်တၢ်ဒွးအသိးအိၣ်ဝဲ, ဒီးလၢအဖီခိၣ်န့ၣ်ကျိၤသ့ၣ်ဆှိအ့ရ့းတဖၣ်အိၣ်ဝဲန့ၣ်လီၤ.

¹²နီအဂၢၤ, ယွၤအတၢ်လုၢ်ဟံၣ်အဂၢၤလၢတၢ်အိပူၤ, ယွၤအတၢ်လုၢ်ဟံၣ်အတၢ်လဲၤနုာ်အဒၢး, အိၣ်ဒီးတၢ်ဒူၣ်တဖၣ်လၢတၢ် မၤအီၤလၢလၢၢ်ဘူးတဲာ်အသးတဖၣ်သၢကထၢအဖီခိၣ်သ့ၣ်ဆှိအ့ရ့း အကျိၤတကထၢ, တဆီဝံၤတဆီန့ၣ်လီၤ.

¹³စီၤပၤၡလိၤမိၤမၤလိာ်ပှၤတဂၤလၢအမံၤမ့ၢ်ဝဲစီၤဃူရၣ်အဘံ, ပှၤမၤတၢ်သ့လၢစုတဂၤ, လၢအအိၣ်ဝဲဆိးဝဲလၢဝ့ၢ်ထါယၢၣ်, ဒီးမ့ၢ်ပှၤမၤတၢ်သ့ဂ့ၤဂ့ၤဘၣ်ဘၣ်လၢတၢ်မၤတၢ်လၢတိၢ်ဘီန့ၣ်လီၤ.

¹⁴အဝဲအပၢ်လၢတအိၣ်မူလၢၤဘၣ်န့ၣ်, မ့ၢ်ပှၤလၢဝ့ၢ်ထါယၢၣ်, ဒီးမ့ၢ်စ့ၢ်ကီးပှၤတဂၤလၢအသ့မၤတၢ်လၢစုဂ့ၤဂ့ၤကလဲာ်လၢ တိၢ်ဘီန့ၣ်လီၤ. အဝဲအမိၢ်မ့ၢ်ပှၤလၢနးသၤလံအဒူၣ်ပူၤန့ၣ်လီၤ. စီၤဃူရၣ်အဘံမ့ၢ်ပှၤတဂၤလၢအအိၣ်ဒီးတၢ်သူၣ်ဆးသးဆးဒီးတၢ် လဲၤခီဖျိအါလၢတၢ်မၤတၢ်လၢစုန့ၣ်လီၤ. အဝဲတူၢ်လိာ်စီၤပၤၡလိၤမိၤအတၢ်ကွဲမုာ်အီၤလၢကကဲပှၤအခိၣ် တဂၤလၢကယဲၢ်တၢ်ဖံးတၢ်မၤလၢအဘၣ်ထွဲဒီးတိၢ်ဘီ အဂီၢ်န့ၣ်လီၤ.

¹⁵စီၤဃူရၣ်အဘံသိန့ၢ်ထူၣ်တိၢ်ဘီခံထူၣ်, တထူၣ်စုာ်စုာ်, အထီအိၣ်ဝဲတဆံဃိးပျၢ်ဒီးအခိၣ်ထိးဝးတရံးအနီၣ်ထိၣ်မ့ၢ်ဝဲ တဆံခံပျၢ်, ဒီးပာ်ဝဲဖဲကျဲစၢၤဆူယွၤအတၢ်လုၢ်ဟံၣ်န့ၣ်လီၤ.

¹⁶အဝဲမၤစ့ၢ်ကီးတၢ်အခိၣ်ထိးတိၢ်ဘီခံခါ, လၢတခါစုာ်စုာ်ထီ ဝဲယဲၢ်ပျၢ်, ဒ်သိးကဘၣ်တၢ်ပာ်အီၤလၢထူၣ်တဖၣ်အခိၣ်စိးန့ၣ်လီၤ.

¹⁷ထူၣ်တထူၣ်စုာ်စုာ်အခိၣ်ထိးဘၣ်တၢ်ကယၢကယဲအီၤဒီးတၢ်အက့ၢ်အဂီၤ တမံၤလၢအမ့ၢ်ဝဲ, ပျံၤသွဲထါဘံပကံအသး,

¹⁸ဒီးသလဲသၣ်တိၢ်ဘီခံဂ့ၢ်န့ၣ်လီၤ.

¹⁹တၢ်အခိၣ်ထိးတဖၣ်အံၤတၢ်ပိာ်အီၤလီၤဂာ်ဒီးဖီဒ့ၣ်ညါတဖၣ်, လၢအထီအိၣ်ဝဲလွံၢ်ပျၢ်,

²⁰ဒီးဘၣ်တၢ်မၤအီၤကဝီၤကျီၤလၢတၢ်အက့ၢ်အဂီၤထးသွဲ တဖၣ်အဖီခိၣ်န့ၣ်လီၤ. တၢ်အခိၣ်ထိးတခါစုာ်စုာ်အလိၤအိၣ်ဒီးသလဲသၣ်အဖျၢၣ်ခံကယၤ ရဲၣ်လီၤအသးခံဂ့ၢ်ဝးတရံးန့ၣ်လီၤ.

²¹စီၤဃူရံၣ်အဘံပာ်လီၤထူၣ်တိၢ်ဘီခံထူၣ်အံၤလၢယွၤအတၢ်လုၢ်ဟံၣ် အကျဲစၢၤအမဲာ်ညါန့ၣ်လီၤ. ထူၣ်လၢအအိၣ်လၢကလံၤထံးတထူၣ်န့ၣ်ယုၢ်ဝဲအမံၤလၢယၤကံၣ်ဒီး ထူၣ်လၢအအိၣ်လၢကလံၤစိးတထူၣ်န့ၣ်ယုၢ်ဝဲအမံၤလၢဘိၤဧးလီၤ.

²²ဖီဒ့ၣ်ညါအတၢ်ဂီၤတိၢ်ဘီလၢတၢ်ပိာ်န့ၢ်အီၤန့ၣ်, ဘၣ်တၢ်ပာ်အီၤလၢထူၣ်တဖၣ်အခိၣ်ထိးန့ၣ်လီၤ. သတးဒီးတၢ်မၤလၢအဘၣ်ထွဲဒီးထူၣ်တဖၣ်န့ၣ်ဝံၤဝဲဒၣ်န့ၣ်လီၤ.

²³စီၤဃူရၣ်အဘံမၤန့ၢ်ထံဒၢတိၢ်ဘီဖးဒိၣ်ဖျၢၣ်သလၢၣ်တဖျၢၣ်လၢ အယိာ်အိၣ်ဝဲယဲၢ်ပျၢ်, အဒိၣ်တူာ်အိၣ်ဝဲအပျၢ်တဆံ, ဒီးအခိၣ်ထိးဝးတရံးအတၢ်ထိၣ်အိၣ်ဝဲအပျၢ်သၢဆံန့ၣ်လီၤ.

²⁴ထံဒၢဖးဒိၣ်အချၢဝးတရံးအကနူၤန့ၣ်ထံလူၤသၣ်တိၢ်ဘီတဖၣ်ဘၣ် တၢ်ရဲၣ်လီၤအီၤခံဂ့ၢ်, ဘၣ်တၢ်ပိာ်န့ၢ်အီၤအိၣ်စဲဘူးဒီးထံဒၢန့ၣ်လီၤ.

²⁵ထံဒၢဖးဒိၣ်န့ၣ်ဘၣ်တၢ်ပာ်ထီၣ်အီၤလၢဂီၤဖံးတိၢ်ဘီတဆံခံ ဒုအလိၤ, လၢအမဲာ်ကွၢ်တၢ်ဆူတၢ်ပျီပူၤ, သၢဒုကွၢ်ဝဲဆူ ကလံၤစိးသၢဒုကွၢ်ဝဲဆူမုၢ်နုာ်, သၢဒုကွၢ်ဝဲဆူကလံၤထံး, ဒီးသၢဒုကွၢ်ဝဲဆူမုၢ်ထီၣ်န့ၣ်လီၤ.

²⁶ထံဒၢဖးဒိၣ်န့ၣ်တီၣ်ဝဲသၢစုမုၢ်ဒိၣ်လီၤ. အခိၣ်ဒူအကနုၤမၤအသးဒ်သလၢတဖျၢၣ်အခိၣ်ဒူအသိး, လီၤဂာ်ဒ်ဖီဒ့ၣ်ညါတဖီးသလၣ်ထီၣ်အကဘျံးတဖၣ်န့ၣ်လီၤ. ထံဒၢတိၢ်ဘီဖးဒိၣ်အံၤတြီၢ်ဝဲဘၤသၤခံကထိန့ၣ်လီၤ.

²⁷စီၤဃူရံၣ်အဘံမၤစ့ၢ်ကီးဝဲလ့ၣ်အဆိတဆံလၢတိၢ်ဘီလၢတဆိ စုာ်စုာ်အထီမ့ၢ်ဝဲလွံၢ်ပျၢ်, အဒီၣ်ဃီၤမ့ၢ်ဝဲလွံၢ်ပျၢ်ဒီးအကစီၤထီၣ်မ့ၢ်ဝဲ သၢပျၢ်န့ၣ်လီၤ.

²⁸အဝဲသ့ၣ်ဘၣ်တၢ်မၤအီၤဒီးသ့ၣ်ဘၣ်လွံၢ်ဘ့ၣ်လၢအတၢ်ထိၣ်တုၤသိး သိးဒီးဘၣ်တၢ်မၤစဲဘူးအီၤဒီးထီထီၣ်အီၤတခါဘၣ်တခါဒ်လ့ၣ် ဒၢအတကွီၣ်အသိးန့ၣ်လီၤ.

²⁹လၢအသ့ၣ်တဖၣ်ဘၣ်အလိၤန့ၣ်, အိၣ်ဝဲဒီးခ့ယုၢ်တဖၣ်, ဂီၤဖံးဖါတဖၣ်ဒီးခ့ရူာ်တဖၣ်အတၢ်ဂီၤ, ဒီးအတကွီၣ်အဖီခိၣ်ဒီးအဖီလာ်န့ၣ်အိၣ်ဝဲဒီးဖီကွီၤအတၢ် ဂီၤတဖၣ်လၢတၢ်စိးပျၤ, သဝံးအီၤန့ၣ်လီၤ.

³⁰လ့ၣ်တဆိဘၣ်တဆိစုာ်စုာ်, အိၣ်ဒီးလ့ၣ်ဖံဘၣ်တိၢ်ဘီလွံၢ်ခါဒီး အဝၣ်ရိတိၢ်ဘီတဖၣ်န့ၣ်လီၤ. လၢတၢ်အသနၢၣ်လွံၢ်နၢၣ်န့ၣ်ပၢၢ်တိၢ်ဘီတဖၣ်အိၣ်ဝဲလၢတၢ်ပာ်ထီၣ် သရာ်အဂီၢ်ဝဲ, ဒီးဘၣ်တၢ်ကယၢကယဲစိးပျၤအီၤလၢဖီအတၢ်ဂီၤတဖၣ်န့ၣ်လီၤ.

³¹လၢပၢၢ်တဖၣ်အဖီခိၣ်န့ၣ်တၢ်အခိၣ်တံာ်ကဝီၤကျီၤအိၣ်တခါလၢတၢ် ကပာ်ထီၣ်သရာ်အဂီၢ်န့ၣ်လီၤ. အတၢ်ထိၣ်မ့ၢ်ဝဲအလဲၢ်တပျၢ်လၢအဖျိးထီၣ်ဆူတၢ်ချၢဒီးအယိာ်တထါ လၢနုာ်လီၤဆူလ့ၣ်ပူၤန့ၣ်လီၤ. တၢ်အခိၣ်တံာ်အံၤဘၣ်တၢ်ဒဲးကံၣ်ဒဲးဝ့ၤအီၤဝးတရံးန့ၣ်လီၤ.

³²လ့ၣ်ဖံဘၣ်တဖၣ်အထီအိၣ်ဝဲတပျၢ်ဒီးတထါ, ဒီးအဝဲသ့ၣ်အိၣ်လၢလ့ၣ်ဒၢအသ့ၣ်ဘၣ်တဖၣ်အဖီလာ်, ဒီးလ့ၣ်ဖံဘၣ်အဝၣ်ရိတဖၣ်အိၣ်စဲဘူးဒီးလ့ၣ်တဖၣ်န့ၣ်လီၤ.

³³လ့ၣ်ဖံဘၣ်တဖၣ်လီၤဂာ်ဒီးလ့ၣ်ကဟၣ်အလ့ၣ်ဖံဘၣ်တဖၣ်န့ၣ်လီၤ. အဝၣ်ရိတဖၣ်, အခိၣ်ဒူအကနူၤတဖၣ်, အဒံးတဖၣ်ဒီးအခီၣ်ကျီၤတဖၣ် ဘၣ်တၢ်မၤအီၤလၢတိၢ်ဘီခဲလၢာ်န့ၣ်လီၤ.

³⁴လၢလ့ၣ်တဆိစုာ်စုာ်အနၢၣ်တဖၣ်အခီၣ်ထံးန့ၣ်အိၣ်ဒီးပၢၢ်လွံၢ်ခါ လၢအအိၣ်ဒီးတၢ်လီၢ်လွံၢ်ခါလၢတၢ်ကပာ်ထီၣ်အီၤ, ဒီးတၢ်လီၢ်တဖၣ်အံၤအိၣ်စဲဘူးဒီးလ့ၣ်န့ၣ်လီၤ.

³⁵လ့ၣ်တဆိစုာ်စုာ်အိၣ်ဒီးအခိၣ်ကွီၤလၢအကစီၤထီၣ်အိၣ်ဝဲ တထါန့ၣ်လီၤ. အပၢၢ်တဖၣ်ဒီးအသ့ၣ်ဘၣ်တဖၣ်အိၣ်ဝဲ ဘူးဒီးလ့ၣ်န့ၣ်လီၤ.

³⁶ပၢၢ်တဖၣ်, သ့ၣ်ဘၣ်တဖၣ်ဒီးဖဲတၢ်လီၢ်လီၤဟိတတီၤတီၤဝးတရံး န့ၣ်, ဘၣ်တၢ်ကယၢကယဲအီၤလၢခ့ရူာ်အတၢ်ဂီၤတဖၣ်, ခ့ယုၢ်အတၢ်ဂီၤတဖၣ်ဒီးသ့ၣ်စူၣ်ပလူၣ်အတၢ်ဂီၤတဖၣ်, ဒီးဖီကွီၤအဂီၤအတၢ်စိးပျၤအီၤန့ၣ်လီၤ.

³⁷တၢ်အံၤမ့ၢ်လ့ၣ်တဖၣ်ဘၣ်တၢ်မၤအီၤဒ်လဲၣ်အဂ့ၢ်န့ၣ်လီၤ. အဝဲသ့ၣ်ခဲလၢာ်ဘၣ်တၢ်မၤအီၤလီၤဂာ်လိာ်အသး, အိၣ်ဒီးအတၢ်ထိၣ်ဒီးအက့ၢ်အဂီၤတမံၤဃီန့ၣ်လီၤ.

³⁸စီၤဃူရၣ်အဘံမၤစ့ၢ်ကီးသရာ်အဖျၢၣ်တဆံ, တဖျၢၣ်လၢလ့ၣ်တခိၣ်စုာ်စုာ်အဂီၢ်န့ၣ်လီၤ. သရာ်တဖျၢၣ်စုာ်စုာ်အဒီၣ်ဃီၤမ့ၢ်ဝဲလွံၢ်ပျၢ်ဒီးတြီၢ်ဝဲဘၤသး လွံၢ်ကယၤန့ၣ်လီၤ.

³⁹အဝဲပာ်လီၤလ့ၣ်ယဲၢ်ဆိလၢယွၤအတၢ်လုၢ်ဟံၣ်အကလံၤထံးတကပၤ, ဒီးအဂၤယဲၢ်ဆိလၢကလံၤစိးတကပၤန့ၣ်လီၤ. ထံဒၢဖးဒိၣ်န့ၣ်, အဝဲပာ်လီၤဝဲလၢကလံၤထံးမုၢ်ထီၣ်တကပၤန့ၣ် လီၤ.

⁴⁰စီၤဃူရၣ်အဘံမၤစ့ၢ်ကီးဝဲသပၢၤတဖၣ်, တပူၣ်တဖၣ်ဒီးသရာ်တဖၣ် လီၤ. အဝဲမၤဝံၤအတၢ်မၤခဲလၢာ်လၢစီၤပၤၡလိၤမိၤအဂီၢ်လၢကစၢ်အတၢ် လုၢ်ဟံၣ်အပူၤန့ၣ်လီၤ. တၢ်လၢအဝဲမၤဝဲတဖၣ်မ့ၢ်ဒ်လၢလာ်အံၤလီၤ.

⁴¹ထူၣ်ခံထူၣ်, တၢ်အခိၣ်ထိးသရာ်အဂီၤခံဖျၢၣ်လၢထူၣ်တဖၣ်အခိၣ် ထိး, တၢ်အက့ၢ်အဂီၤထးသွဲတဖၣ်ထါဘံပကံအသးလၢတၢ်အခိၣ်ထိးတဖျၢၣ် စုာ်စုာ်အလိၤ.

⁴²တိၢ်ဘီသလဲသၣ်အဖျၢၣ်လွံၢ်ကယၤ, အိၣ်ဝဲခံဂ့ၢ်, တဂ့ၢ်အဖျၢၣ်တကယၤစုာ်စုာ်, ဘၣ်တၢ်ရဲၣ်လီၤအီၤဝးတရံးလၢတၢ်အခိၣ်ထိးတဖၣ်အလိၤ,

⁴³တၢ်ပာ်ထီၣ်သရာ်အလီၢ်ဆံဆဲၣ်ခါ, သရာ်အဖျၢၣ်တဆံ,

⁴⁴ထံဒၢဖးဒိၣ်ဒီးဂီၤဖံးဖါတဆံခံဒုလၢအယိးဃာ်ထံဒၢဖး ဒိၣ်

⁴⁵သပၢၤတဖၣ်, တပူာ်တဖၣ်ဒီးသလၢတဖၣ်န့ၣ်လီၤ. ကယဲၢ်တၢ်အပီးအလီလၢစီၤဃူရၣ်အဘံမၤဝဲလၢစီၤပၤၡလိၤမိၤ အဂီၢ်လၢယွၤအတၢ်လုၢ်ဟံၣ်အပူၤအံၤ, ဘၣ်တၢ်မၤအီၤလၢတိၢ်ဘီလၢတၢ်ထူးဘျ့ကတြ့ၣ်ထီၣ်အီၤန့ၣ်လီၤ.

⁴⁶စီၤပၤမၢပှၤသိတၢ်တဖၣ်အံၤခဲလၢာ်လၢကပံာ်လၢအအိၣ်ဝဲဖဲ စူးကိၤသးဒီးဝ့ၢ်စၤရတါအဘၢၣ်စၢၤလၢအအိၣ်ဝဲဖဲ ထံကျိယၢ်ဒ့ၣ်အတၢ်ပၢၤခိၣ်န့ၣ်လီၤ.

⁴⁷မ့ၢ်လၢတၢ်ပီးတၢ်လီတဖၣ်အါကဲာ်ဆိးအဃိ, စီၤပၤၡလိၤမိၤတမၢ ဘၣ်ပှၤစီၤနီၣ်ပာ်တိၢ်ဘီအပီးအလီတဖၣ်အံၤအလီၤသယၢၢ်ဘၣ်. သတးဒီးအတၢ်လီၤသယၢၢ်မ့ၢ်ထဲလဲၣ်ထဲလဲၣ်န့ၣ်, ပှၤတဲတသ့နီတဂၤဘၣ်.

⁴⁸စီၤၡလိၤမိၤမၢပှၤမၤစ့ၢ်ကီးတၢ်အပီးအလီလၢထူတဖၣ်, လၢယွၤအတၢ်လုၢ်ဟံၣ်အဂီၢ်, လၢအမ့ၢ်ဝဲတၢ်လုၢ်လီၢ်, စီၢ်နီၤခိၣ်တဖၣ်လၢတၢ်ကပာ်ထီၣ်ကိၣ်လၢတၢ်လုၢ်ထီၣ်အီၤဆူကစၢ် ယွၤအအိၣ်,

⁴⁹တၢ်ပာ်ထီၣ်မ့ၣ်အူဒၢအလီၢ်ဆံဆဲၣ်ခါလၢအဘၣ်တၢ်ပာ်အီၤဖဲ တၢ်လီၢ်စီဆှံကတၢၢ်အမဲာ်ညါ, ယဲၢ်ခါလၢကလံၤထံးတကပၤဒီးယဲၢ် ခါလၢကလံၤစိးတကပၤ, သံၣ်ဧိၤဖီဧိၤတဖၣ်, မ့ၣ်အူဒၢတဖၣ်ဒီးနီၣ်တံာ်လၢတၢ်ကမၤပံာ်မ့ၣ်အူတဖၣ်,

⁵⁰လီခီတဖၣ်, နီၣ်တံာ်လၢကမၤကဆှီမ့ၣ်အူဒၢအဆၣ်တဖၣ်, သလၢတဖၣ်, ခွးလၢတၢ်နၢမူအဂီၢ်တဖၣ်, ဒီးသပၢၤဘံၣ်သလၣ်တဖၣ်လၢ တၢ်ကစိာ်မ့ၣ်အူအ့ၣ်တဖၣ်, သံၣ်ကျိၤတဖၣ်လၢတၢ်အလီၢ်စီဆှံကတၢၢ်အတြဲၤတဖၣ်ဒီးယွၤအတၢ် လုၢ်ဟံၣ်အကျဲစၢၤဆူတၢ်ချၢအတြဲၤတဖၣ်အဂီၢ်န့ၣ်လီၤ.

⁵¹ကယဲၢ်တၢ်အပီးအလီခဲလၢာ်အံၤဘၣ်တၢ်မၤအီၤလၢထူန့ၣ်လီၤ. တုၤစီၤပၤၡလိၤမိၤမၤဝံၤကယဲၢ်တၢ်မၤလၢယွၤအတၢ်လုၢ်ဟံၣ် အဂီၢ်န့ၣ်, ကယဲၢ်တၢ်လၢအပၢ်စီၤဒၤဝံးလုၢ်ထီၣ်တ့ၢ်ဝဲဆူ ယွၤအအိၣ်လၢအမ့ၢ်စ့, ထူဒီးတၢ်ပီးတၢ်လီအဂၤတဖၣ်န့ၣ်, အဝဲဒၢနုာ်ဝဲဆူယွၤအတၢ်လုၢ်ဟံၣ်အတၢ်ပာ်ဖှိၣ်အဒၢးတဖၣ်အပူၤ န့ၣ်လီၤ.